1-2. Nu ari ka paga ready nga mappa-baptize, ngatta ari nakuan makkafi i nono mu? (Innan i letratu ta vungun.)

 KAYÀ mu ngana kari i mappa-baptize? Makasta yatun nga goal mu. Ngem ready ka ngana kari nga kuan yatun sangawe? Nu siguradu ka ngana anna nu umanugu i elder ira, ari ka nakuan magalangan nga mappa-baptize ta tumunug nga asembli onu kombension. Siguradu nga mabbalin saw tu kappagayayya i pattolem ta passerbi kani Jehova.

² Ngem kunnasi nu kinagi da ta niko nga ari ka labbi nga mappa-baptize ta egga paga i mawag nga papprogresowammu? Onu siko kari mismu i nakatageno nga ari ka paga kualipikadu? Ari nakuan nga makkafi i nono mu. Mabbikka man onu manakam, mawayyam i mapprogreso adde ta magawa mu yatun nga importante nga goal.

3. Anni i niyavu na ofisial nga taga-Etiopia kani Felipe, anna anni nga pakkiavu i palattuagan natun? (Kingngua 8:36, 38)

³ Bibbigan i Kingngua 8:36, 38. Niyavu na ofisial ta palasio nga taga-Etiopia kani Felipe nga evanghelisador: “Egga paga kari i makagurun ta kabawtisò?” Kayà na lalaki nga taga-Etiopia nga mappa-baptize. Ngem talaga kari preparadu ngana yayya nga kuan yatun?

4. Kunnasi nga nipasingan na lalaki nga taga-Etiopia nga kayà na paga nga mas umaru i pakannammu na?

⁴ ‘Kapaggafu na lalaki nga taga-Etiopia ta Jerusalem nga nakitaful’ onu naddayaw. (King. 8:27) Posible nga tadday yayya nga Judio nga proselita. Nakkumberte yayya ta Judaismo. Siguradu nga nammammu na i meyannung kani Jehova ta masanto ira nga tura na Hebreo nga Katurakan. Ngem kakayà na paga nga mas umaru i pakannammu na. Kakurugan na, turi ta nasimmuan yayya ni Felipe ta dalan, anni i nasingan na nga kuan natun nga ofisial? Maddaggun na nga bibbigan i libru ni  Isaias nga profeta. (King. 8:28) Matagga yatun nga espiritual nga makan. Ari nga kontentu yatun nga ofisial ta palasio ta primeru ira nga tuddu ta Katurakan. Kayà na paga nga mas umaru i pakannammu na.

5. Anni i kingngua na lalaki nga taga-Etiopia ta nagigiammu na?

⁵ I lalaki ay mekakua nga ofisial ni Candace nga reyna na Etiopia. Yayya i ‘ingkargadu ta ngamin nga kukua na reyna.’ (King. 8:27) Posible nga okupadu yayya megafu ta aru i responsibilidad na. Ngem egga lagapa i tiempo na tapenu maddayaw kani Jehova. Ari yayya nga kontentu nga makannammuan laman i kinakurug; niyaplika na nu anni i nagigiammu na. Yari tu ararayyu i biniahe na maggafu ta Etiopia tapenu dayawan si Jehova ta templo ta Jerusalem. Posible nga mabayag anna magastu yatun nga biahe. Ngem kingngua lagapa natun nga lalaki i ngamin nga mawayya na megafu ta kayà na nga maddayaw kani Jehova.

6-7. Kunnasi nga tulu-tuloy nga pinadakal na lalaki nga taga-Etiopia i pangaya na kani Jehova?

⁶ Nakannammuan na lalaki nga taga-Etiopia kani Felipe i importante ira nga bagu nga kinakurug, nelagum ngana nu sinni i Mesias. (King. 8:34, 35) Siguradu nga magayayya yatun nga ofisial turi ta nakannammuan na i kiningngua ni Jesus para ta nisa. Anni gafu gapa i kingngua na? Awayya na nakuan tu ari na nga pinanawan i pabbalin na tu respetadu nga Judio nga proselita. Ngem megafu ta ziminakal i pangaya na kani Jehova anna ta Ana na, napaguyu yayya nga kuan i tadday nga importante nga desision. Nappabawtiso yayya bilang disipulo ni Jesu-Cristo. Nasingan ni Felipe nga kualipikadu ngana yatun nga lalaki, yari tu binawtisowan na yayya.

⁷ Nu parigammu i kiningngua na lalaki nga taga-Etiopia, mabbalikka tu kualipikadu para ta bawtismo. Siguradu nga kumbinsidu ka gapa nga mangikagi tu kunnaw, “Egga paga kari i makagurun ta kabawtisò?” Ikonsidera tam nu kunnasi tam maparigan yaw ira nga kingngua na lalaki nga taga-Etiopia: Inammungan na i pakannammu na, niyaplika na i nagigiammu na, anna tulu-tuloy nga pinadakal na i pangaya na ta Dios.

8. Anni i ipagaram na Juan 17:3 nga kuammu?

⁸ Bibbigan i Juan 17:3. Pinaguyu naka kari danatun nga kinagi ni Jesus nga maggigiammu tu Biblia? Kunnatun i aru ta nittam. Ngem pagaramman ittam kari gapa danatun nga mas paga nga ammungan i pakannammu tam? Wan. Ari ittam vuluvuga magimmang nga ‘kannammuan i tattadday nga kurug nga Dios.’ (Ecl. 3:11) Tulu-tuloy nga mammungan i pakannammu tam adde ta mannanayun. Habang mas umaru  i mammuattam meyannung kani Jehova, mas gapa nga maddukko ittam ta nisa.​—Sal. 73:28.

9. Anni i mawag nga kuattam kabalittam nga mammuan i primeru ira nga kinakurug?

⁹ Turi ta gafu nga naggigiammu ittam meyannung kani Jehova, nagigiammu tam laman i primeru ira nga tuttuddu na Biblia. Ta tura ni apostol Pablo ta Hebreo ira, tinukoy na i primeru nga tuttuddu bilang i “ollu ira nga gigiammuan meyannung ta uvovug na Dios.” Ari na tagibadditan yatun ira nga tuddu, anna nikumpara na yatun ta gatto nga inuman na baby tapenu matolay yayya. (Heb. 5:12; 6:1) Ngem pinagaram na gapa i ngamin nga Cristiano nga ari laman nakuan tu danatun nga primeru nga tuttuddu i gigiammuadda. Mawag gapa nga ammuadda i monag ira nga kinakurug ta Uvovug na Dios. Karagatammu kari nga ammuan i monag ira nga tuttuddu na Biblia? Kayà mu kari nga mas paga mapprogreso anna mammungan i pakannammum meyannung kani Jehova anna ta gakkag na ira?

10. Ngatta marigatan i karuan nga maggigiammu?

¹⁰ Aru ta nittam i marigatan nga maggigiammu. Ngatta? Egga i karuan nga ari nga nagiskuela, yayya nga ari tu netuddu ta nira nu kunnasi i mabbibbig anna maggigiammu tu mapia. Ari gapa nga ma-enjoy na karuan i maggigiammu anna para nira, baddi laman i madammo da tatun. I karuan gapa, ari kuruga malalaki ta pangusa tu libru tapenu maggigiammu. Kunnatukka kari? Ari laman tu sikaw i kunnatun. Ngem moffunan naka ni Jehova. Perfekto yayya anna yayya i pinakamalalaki nga Mestru.

11. Kunnasi nga pakurugan ni Jehova nga yayya i “Katannangan nga Instruktor”?

¹¹ Agalan ni Jehova i baggi na nga ‘Katannangan nga Instruktor mu.’ (Isa. 30:20, 21) Mapasensia yayya, masippo, anna makonsiderasion nga Mestru. Maffokus yayya ta makasta ira nga kualidad na estudiante na. (Sal. 130:3) Ari na vuluvuga ikiddaw ta nittam i ari tam makua. Daddamman, yayya i naddisenio ta uto mu, tadday nga kappabbaw nga regalu. (Sal. 139:14) Gagangay laman nga karagatattam i maggigiammu. Kayà na Namaratu ta nittam nga mannanayun ittam nga maggigiammu anna ma-enjoy yatun. Makasta gafu nga ‘kanayun ittam nga mapangal’ ta kinakurug ira ta Biblia sangawe. (1 Ped. 2:2) Mannono ka nakuan tu goal ira nga posible nga madde mu. Tuttulammu nakuan i iskediul mu ta regular nga pabbibbig anna paggigiammu tu Biblia. (Jos. 1:8) Ta uffun ni Jehova, sisinu nga mas ma-enjoy mu saw nga bibbigan anna gigiammuan i meyannung ta nisa.

12. Ngatta gigiammuattam nakuan i pattolay anna ministerio ni Jesus ta personal study tam?

¹² Kanayun nakuan nga egga i tiempom nga pannonopan i pattolay anna ministerio ni Jesus. Nu kayà tam nga passerbian si Jehova, importante nga parigattam tu mapia si Jesus, mas ngana sangawe nga mariga i tiempo. (1 Ped. 2:21) Prangka nga kinagi ni Jesus ta disipulos na nga egga noka i arubangadda tu problema ira. (Luc. 14:27, 28) Ngem siguradu yayya nga makapattalupaddian nga matalo ta Dios i kurug ira nga disipulos na kagitta na nakua na. (Juan 16:33) Gigiammuammu i detalye ira na pinattolay ni Jesus anna kuammu tu goal nga parigan yayya ta inaggaw nga pattolem.

13. Anni nakuan i kanayun nga ikiddom kani Jehova, anna ngatta?

¹³ Ari nga makalanno i pakannammu. I rason gare nu ngatta mawag mu i pakannammu ay tapenu mas makilalam paga si Jehova anna mepasingan i kualidad ira kagitta na aya anna pangurug ta nisa. (1 Cor. 8:1-3) Habang itulu-tuloy mu i maggigiammu, kanayun nga ikiddom kani Jehova nga mas paga nakuan nga pasikannan na i pangurug mu. (Luc. 17:5) Siguradu nga tabbagan na i kunnatun ira nga pakimallo.  Mas paga nga mapprogreso ka nu nebase i pangurug mu ta fustu nga pakannammu ta Dios tam.​—Sant. 2:26.

14. Kunnasi nga nipasigo ni apostol Pedro nga mawag tu iyaplika tam i magigiammu tam? (Innan gapa i letratu.)

¹⁴ Nipasigo ni apostol Pedro nga mawag nga tulu-tuloy nga iyaplika na disipulos ni Cristo i magigiammu da. Inusa na i istoria ta Biblia meyannung kani Noe. Kinagi ni Jehova kani Noe nga daralan na i marake ira nga totolay tatun nga tiempo gukaban na delubio. Ngem ari nga mapaliag si Noe anna i familia na nu basta ammu da laman nga egga i duttal nga delubio. Daddamman nga i tiempo nga tinukoy ni Pedro ay i tiempo nige na Delubio, “turi ta paddaggunan ni Noe nga paddayan i barangay.” (1 Ped. 3:20) Niyaplika gafu ni Noe anna na familia na i nakannammuadda ta Dios gukaban na pamadday da tu daka-dakal nga sinambaw onu barangay. (Heb. 11:7) Tapus nikumpara ni Pedro ta bawtismo i kingngua ni Noe. Nitura na: “Yaw i keyarigan na danum na kabawtiso nga mamaliag sangoye nikamu.” (1 Ped. 3:21) Mekumpara gafu i kukukuammu sangawe tapenu makualipika ka ta bawtismo ta piga ragun nga kikkingngua ni Noe anna na familia na tapenu mamadday tu arka. Anni i mawag nga kuammu tapenu makualipika ka ta bawtismo?

15. Kunnasi tam mepasingan nga kurug ittam nga mabbabawi?

¹⁵ Tadday ta ollu nga mawag tu kuattam ay i kurug nga pabbabawi ta liwi-liwa tam ira. (King. 2:37, 38) Nu kurug gare ittam nga mabbabawi, ari nga appappe i kuattam ira nga panguli. Niyemmammu ngana kari i marake ira nga annangngua nga ikalussaw ni Jehova, gitta na pagangngua tu imoral, passigariliu, anna pangusa tu tapang onu abusadu nga paguvovug? (1 Cor. 6:9, 10; 2 Cor. 7:1; Efe. 4:29) Nu ari mu paga nakua yatun, ari ka nakuan magimmang nga manguli. Ipakibbidam yatun ta mangistudy nikaw, onu mappoffukka ta elder ira ta kongregasion. Nu tadday ka nga kabataan anna makikabbalay ka paga ta magana mu, mappoffukka ta nira tapenu meyemmammu i marake ira nga annangngua nga nakasanayammu nga baka makefugag ta pappa-baptize mu.

16. Anni i kasali ta makasta nga espiritual nga rutina?

¹⁶ Importante gapa nga egga i makasta nga  espiritual nga rutina nga tuttuttulattam. Nelavu tatun i pagatende ta study ira anna pakkomento. (Heb. 10:24, 25) Nu kualipikadu ka ngana gapa nga mallayyagayya, isalim gapa yatun ta rutinam. Nu kanayukka nga mallayyagayya, mas nga ma-enjoy mu yatun. (2 Tim. 4:5) Nu tadday ka gapa nga kabataan anna nu makikabbalay ka ta magana mu, iyavu mu ta baggim: ‘Mawag paga kari nga iperaddam na magana ku nga makistudy ngà onu mallawan ngà? Onu makkusa ngà ngana nga kuan yatun?’ Nu makkusa ka nga kuan danatun, mepasingammu i pangurug, aya, anna pappabalo mu kani Jehova nga Dios. Yatun ira ay annangngua nga “masanto anna mekunnay ta Dios,” regalu nga iyawa mu kani Jehova. (2 Ped. 3:11; Heb. 13:15) Makapagayayya ta Dios i ngamin nga regalu nga boluntariu anna ari nafersa nga meyawa ta nisa. (Ikumpara i 2 Corinto 9:7.) Kukukuattam danatun megafu ta kayà tam nga iyawa i kapianattam kani Jehova.

17-18. Anni nga kualidad i makoffun ta niko tapenu makualipika ka ta bawtismo, anna ngatta? (Proverbio 3:3-6)

¹⁷ Habang itulu-tuloy mu nga kuan i dakkua ira tapenu makualipika ka ta bawtismo, siguradu nga meparubakka ta kapurueba ira. Posible nga uyawan naka na karuan nga totolay megafu ta bagu nga pangurug mu. Awayya na tu kontran onu darumaddaka paga lagu. (2 Tim. 3:12) Maski nu kuammu i ngamin nga mawayyam tapenu meyemmang i marake nga annangngua nga napenamammu, baka nu mittan, makuam uli yatun. Baka mofu ngana gapa i pasensiam anna madismaya ka megafu ta ari mu nga magawa-gawa i goal mu. Anni nga kualidad i makoffun ta niko tapenu ari ka nga magimmang? Aya kani Jehova.

¹⁸ I aya mu kani Jehova ay tadday nga makasta nga kualidad, i kapianan nga egga nikaw. (Bibbigan i Proverbio 3:3-6.) Nu dakal i pangaya mu ta Dios, marubammu i problema ira. Maruddu nga mabibbig ta Biblia i matalo nga aya ni Jehova ta aripan na ira. Megafu tatun nga matalo nga aya na, ari na vuluvuga panawan i aripan na ira, ni tu pawanan na i pangaya na ta nira. (Sal. 100:5) Naparatu ka segun ta imahe na Dios. (Gen. 1:26) Kunnasim gafu mepasingan i kunnatun nga klase na aya?

19. Kunnasi ka nga mabbalin tu mas minappabalo ta ngamin nga kingngua ni Jehova para ta niko? (Galacia 2:20)

¹⁹ Ollu, ipasingammu i pappabalo. (1 Tes. 5:18) Ta kada aggaw, iyavu mu ta baggim, ‘Kunnasi  nga nipasingan ta niakan ni Jehova i pangaya na?’ Tapus siguraduammu nga mappabalo ka kani Jehova ta pakimallo mu ira. Espesipiko nga ikagim ta nisa i kingngua na ira para ta niko. Mangurug ka nga i kingngua na ira ay kingngua na mismu para ta niko megafu ta iddeddu naka. Kunnatun i natageno ni apostol Pablo meyannung kani Jehova. (Bibbigan i Galacia 2:20.) Iyavu mu ta baggim, ‘Kayà ku kari gapa nga ipasingan i pangaya ku ta nisa?’ Makoffun ta niko i pangaya mu kani Jehova tapenu ari ka magimmang nga labanan i tentasion ira anna arubangan i problema ira. Mapaguyu naka natun nga kanayun nga tuttulan i espiritual nga rutinam tapenu mepasingammu nga ayatammu i Yamam ta kada aggaw.

20. Anni i mawag nga kuammu tapenu mededikam i baggim kani Jehova, anna ngatta importante yatun nga desision?

²⁰ Sonu kua, mapaguyu naka na pangaya mu kani Jehova nga idedika i baggim ta nisa gukaban na espesial nga pakimallo. Daddammammu nga nu nidedikam i baggim kani Jehova, yaw i makakkasta nga iddanamam: Awayyam i mabbalin tu kukua na ta mannanayun. Nu naddedika ka kani Jehova, ipromesam nga passerbiammu yayya, makasta man onu mariga i situasion. Mittammu laman nga kuan yatun. Fustu tu serioso nga desision i paddedika. Ngem nonopammu yaw: Aru i kuammu nga desision ta pattolem, i karuan ay mapia, ngem i pangidedikam ta pattolem kani Jehova i kapianan nga desision nga makuam. (Sal. 50:14) Purueban ni Satanas nga pakkafian i pangaya mu ta Yamam tapenu ari ka nga mattalupaddian nga matalo ta nisa. Ari mu nakuan pagurayan nga mangaffu si Satanas! (Job 27:5) Makoffun ta niko i dakal nga pangaya mu kani Jehova tapenu matuppal mu i promesam nga passerbiammu yayya ta mannanayun anna tapenu mas maddukko ka ta nisa.

21. Ngatta makagi tam nga i bawtismo ay ari tu pangultimuan, nu ari, gafu pagalaman?

²¹ Kabalimmu nga idedika i baggim kani Jehova, kibbidammu i elder ira ta kongregasion nu meyannung ta bawtismo. Ngem kanayun nakuan nga daddammammu nga i bawtismo ay ari nga pangultimuan. Gafu pagalaman yatun na passerbim kani Jehova tu mannanayun. Yari tu pasikannammu ngana i pangaya mu ta Yamam sangawe. Mannono ka tu goal ira tapenu dumakal i pangaya mu ta nisa ta kada aggaw. Nu kuammu yatun, mapaguyu ka nga mappabawtiso. Kappagayayya noka yatun nga aggaw. Ngem yatun pagalaman i gafu na. Paray nakuan ta dumakal paga i pangaya mu kani Jehova anna ta Ana na ta mannanayun!