1-2. Anni i mesimmu nu egga ira i ma-baptize, anna anni i gigiammuattam?

 NAKASINGAKKA ngana kari tu kandidato ira na bawtismo? Maginnam ta ngaral da i kombiksiodda durante nga tabbagadda i dua nga pakkiavu nage da nga ma-baptize. Masingammu i kafamilia anna kokkofudda nga proud na proud ta nira. Kabalin nga melammag i kandidato ira, maginnam i masikan nga pappoppo anna masingammu i pagayayya ta muka da. Kada ligguan, rinivu i maddedika kani Jehova anna ma-baptize bilang Saksi na.

² Kunnasi ka gapa? Nu nononopammu ngana i mappa-baptize, kuruga espesial ka taw nga kitaddake nga mundo megafu ta “maddaya-rayaw” ka kani Jehova. (Sal. 14:1, 2) Para niko yaw nga artikulo, abbing ka man onu manakam ngana. Ngem ta nittam gapa nga bawtisadu ngana, ikaya tam nga mabbalin tu mas determinadu nga masserbi kani Jehova adde ta mannanayun. Gigiammuattam gafu i tallu nga rason nu ngatta ikaya tam i masserbi kani Jehova.

3. Ngatta ayatan na aripan ira ni Jehova i kinakurug anna kinatunung? (Salmo 119:128, 163)

³ Nidog ni Jehova ta totolena nga ‘ayatadda i kinakurug.’ (Zac. 8:19) Ipagaram gapa ni Jesus ta tagatuttul na ira nga aleradda i kinatunung. (Mat. 5:6) Ikaya na gafu kagian yaw nga mawag tu kakayà nga kuan na tadday i tunung, mapia, anna marenu ta paningan na Dios. Iddukammu kari i kinakurug anna i kinatunung? Siguradu kami nga iddukammu. Ikalussom i kinaladdug anna i ngamin nga ugal anna marake. (Bibbigan i Salmo 119:128, 163.) Paparigan na tadday nga minalladdug si Satanas, i mammaguray taw nga mundo. (Juan 8:44; 12:31) Tadday ta gakkag ni Satanas ay paraketan i masanto nga ngagan ni Jehova nga Dios. Mangiwara-wara yayya tu kinaladdug meyannung ta Dios tam namegafu paga ta parrebelde ta Eden. Ikaya na nga nonopan na totolay nga makasarili anna laddug  nga Mammaguray si Jehova anna iyetu na i mapia ta totolay. (Gen. 3:1, 4, 5) Megafu ta kinaladdug ira ni Satanas, marake i nononopan na totolay meyannung kani Jehova adde sangawe. Nu pilian na totolay nga ari ‘ayatan i kinakurug,’ mainfluwensian ira ni Satanas nga mangngua ta ngamin nga klase na ugal anna marake nga ganna-gannug.​—Roma 1:25-31.

4. Kunnasi nga nipasingan ni Jehova nga yayya “i Dios na kinakurug”? (Innan gapa i letratu.)

⁴ Si Jehova “i Dios na kinakurug” anna kakayà na nga ituddu i kinakurug ta mangaya ta nisa. (Sal. 31:5, NW ) Megafu tatun, ari ngana ira melogo ta kinaladdug ira ni Satanas. Ituttuddu gapa ni Jehova ta aripan na ira nga makkagi ira tu kurug anna mabbalin tu matunung. Makoffun yatun tapenu mapeggan ira tu dignidad anna memammo nga nono. (Prov. 13:5, 6) Kiningngua na kari ngana yatun ta niko ta pab-Bible studym? Nagigiammum nga kapianan i dalan ni Jehova para ta ngamin nga totolay anna para ta niko mismu. (Sal. 77:13) Yatutta ikaya mu i mattolay segun ta kinatunung na Dios. (Mat. 6:33) Ikaya mu nga itaddaggan i kinakurug anna manguffun nga mapakurug nga ari tu fustu i pamara-parake ni Satanas meyannung kani Jehova nga Dios tam. Kunnasim nga makua yatun?

5. Kunnasim nga metaddaggan i kinakurug anna kinatunung?

⁵ Awayyam nga pilian i mattolay nga gitta na kakkagiammu: “Panakitakku i kinaladdug ira ni Satanas anna itaddaggakku i kinakurug. Ikaya ku nga si Jehova i Mammaguray nio anna ikaya ku nga kuan i ikakkagi na nga matunung.” Kunnasim nga makua yatun? Makimallo ka kani Jehova anna idedikam i baggim ta nisa, tapus ipakannammum ta publiko yatun nga dedikasiommu gukaban na pappa-baptize. I pangaya ta kurug anna ta tunung ay mafersa nga rason tapenu mappa-baptize.

6. Base ta Salmo 45:4, anni ira i rason nu ngatta ayatammu si Jesu-Cristo?

⁶ Ngatta ayatammu si Jesu-Cristo? Yaw i karuan nga rason nga mabibbig ta Salmo 45:4, NW. (Bibbigan) Nipasigo ni Jesus nga importante i kinakurug, kinapakalinno, anna kinatunung. Nu ayatammu i kinakurug anna kinatunung, magga ayatammu gapa si Jesu-Cristo. Nonopan nu kunnasi nga magutu nga nidefensa ni Jesus nu anni i kurug anna i tunung. (Juan 18:37) Ngem kunnasi gapa nga nipasigo ni Jesus i kinapakalinno?

7. Anni i nagustuammu ta pangipasingan ni Jesus ta kinapakalinno?

 ⁷ Nipasigo ni Jesus i kinapakalinno gukaban na ehemplo na. Angngarigan na, kanayun na nga iyawa i ngamin nga dayaw ta Yama na, ari nga ta baggi na. (Mar. 10:17, 18; Juan 5:19) Anni i efekto ta niko na kinapakalinno ni Jesus? Magga mapaguyu naka natun nga ayatan i Ana na Dios anna tuttulan yayya. Ngatta minappakalinno si Jesus? Megafu ta ayatan anna paparigan na i Yama na nga minappakalinno. (Sal. 18:35; Heb. 1:3) Ari ka kari nga maparanni kani Jesus nga perfekto nga nipasingan na i kualidad ira ni Jehova?

8. Ngatta ayatattam si Jesus bilang Patul tam?

⁸ Ayatattam si Jesus bilang Patul tam megafu ta yayya i kapianan nga Mammaguray. Sinanay mismu ni Jehova i Ana na anna sinunno na yayya nga mappatul. (Isa. 50:4, 5) Daddammammu gapa i minassakrifisio nga aya nga nipasingan ni Jesus. (Juan 13:1) Bilang Patul mu, mepappangngo si Jesus ta aya mu. Nipakanawag na nga kokkofun na danuri kurug nga mangaya ta nisa, anna ipasingadda i kurug nga pangaya da ta nisa gukaban na panuttul da ta bilin na ira. (Juan 14:15; 15:14, 15) Daka-dakal nga dayaw i mabbalin tu kofun na Ana ni Jehova!

9. Anni i napparehassan na bawtismo na Cristiano ira ta bawtismo ni Cristo?

⁹ Nibilin ni Jesus nga mappabawtiso i tagatuttul na ira. (Mat. 28:19, 20) Kingngua na mismu yatun. Ngem egga i neruman na bawtismo na ta bawtismo na tagatuttul na ira. (Innan i kahon nga “ I Bawtismo ni Jesus Anna i Bawtismo na Tagatuttul Na Ira—Anni i Naddumadda?”) Ngem egga gapa i napparehassan natun. Turi ta nabawtisowan si Jesus, nipresenta na i baggi na tapenu parulattan i uray na Yama na. (Heb. 10:7) Kunnatun gapa i kuan na tagatuttul ira ni Cristo ta bawtismo da. Ipasingadda ta publiko nga nidedika da ngana i pattoleda kani Jehova nga Dios. Nakasentro ngana gafu i pattoleda ta pangngua ta uray na Dios, ari tu ta uray da. Paparigadda gafu i ehemplo na Yafu da.

10. Anni ira i rason nu ngatta ayatammu si Jesus, anna mapaguyu naka natun nga kuan i anni?

¹⁰ Mangurug ka nga si Jesus i tattadday nga Ana ni Jehova anna yayya gapa i Patul nga sinunno na Dios tapenu mammaguray ta nittam. Ammum nga si Jesus ay minappakalinno anna perfekto nga paparigan na i Yama na. Nagigiammum gapa nga pinakan na danuri mabisin, binanna-bannayan na danuri nakkafi i nono da, anna pinammapia na danuri mataki. (Mat. 14:14-21) Masingammu nu kunnasi na nga irolluan i kongregasion na sangawe. (Mat. 23:10) Ammum gapa nga mas aru saw i kuan na ta mappange bilang Patul na Pappatulan na Dios. Kunnasim nga ipasingan nga ayatammu yayya? Tuttulammu i ehemplo na. (Juan 14:21) Tadday ta ollu nga makuam tapenu matuttul i ehemplo na ay idedikam i baggim kani Jehova anna mappa-baptize.

11. Para ta nikaw, anni i pinaka-importante nga rason tapenu mappa-baptize, anna ngatta?

¹¹ Anni i pinaka-importante nga rason tapenu mappa-baptize? Kunnaw i kinagi ni Jesus nga pinaka-importante ta ngamin nga dorob na Dios: “Ayatam-mu i Yafu nga Dios mu ta interu futum, interu nga ikararuam, interu nga nono mu anna interu nga sikam-mu.” (Mar. 12:30) Kunnatun kari gapa kadakal i pangaya mu ta Dios?

12. Ngatta ayatammu si Jehova? (Innan gapa i letratu.)

¹² Napakaru i rason nu ngatta ayatattam si Jehova. Angngarigan na, nagigiammum nga yayya i ‘paggafuan na ngamin nga inango’ anna yayya gapa i nangiyawa ta ‘ngamin nga mapia anna awan tu pakkurangan na nga regalu.’  (Sal. 36:9; Sant. 1:17) Ngamin nga mapia nga gannug nga egga ta nikaw ay naggafu ta vuka-palag anna minaggiddu nga Dios tam.

13. Ngatta makakkasta nga regalu i tavvu?

¹³ I tavvu ay makakkasta nga regalu ni Jehova ta nittam. Ngatta makagi tam yatun? Nonopan i madukko nga relasion ni Jehova anna na Ana na. Kinagi ni Jesus: “Iddukan nà na Yama” anna ‘ayatakku i Yama.’ (Juan 10:17; 14:31) Megafu ta binillion nga dagun i pinakkavvulu da, kuruga madukko i relasiodda. (Prov. 8:22, 23, 30) Nonopammu gafu nu kunnasi kataki ta Dios nga ipamavulun nga mazziga-riga i Ana na tapus matay. Kuruga iddukan na Dios i totolay. Maski siko. Yayya nga sigga-paran yayya nga isakrifisio i meddu nga Ana na tapenu makapattolay ka tu mannanayun kunne na gapa i duma nga totolay. (Juan 3:16; Gal. 2:20) Yatun i pinaka-importante nga rason nu ngatta iddukattam i Dios.

14. Anni i kakastan nga pangusammu ta pattolem?

¹⁴ Mas ziminakal i pangaya mu kani Jehova habang mas umaru i magigiammum meyannung ta nisa. Magga kayà mu gapa nga mas maparanni ta nisa sangawe anna ta mannanayun. Mawayyam nga kuan yatun. Pagaramman naka nga pagayayyatammu i futu na. (Prov. 23:15, 16) Mepasingammu yatun ari laman tu ta kakkagiammu, nu ari, maski gapa ta annangnguam. Masingan ta attolem sangawe nu talaga  iddukammu si Jehova. (1 Juan 5:3) Yatun i kakastan nga pangusammu ta pattolem.

15. Kunnasim mepasingan i pangaya mu kani Jehova?

¹⁵ Kunnasim nga mepasingan i pangaya mu kani Jehova? Ollu, makimallo ka. Tatun nga espesial nga pakimallo, idedikam i baggim ta tattadday nga kurug nga Dios. (Sal. 40:8) Tapus ipakannammum ta publiko yatun nga pribadu nga dedikasiommu gukaban na pappabawtiso. Gitta na nagigiammu tam ta gafu naw nga artikulo, i bawtismom ay magayayya anna importante nga tiempo ta pattolem. Tatummu ngana nga pegafuanan i bagu nga pattolay, ari tu para ta baggim, nu ari, para kani Jehova. (Roma 14:8; 1 Ped. 4:1, 2) Gitta na kitaddammo nga desision yatun. Ngem kurug nga importante yatun, ta yatun i mamapposible tapenu mosam ta kakastan i pattolem. Ngatta kunnatun?

16. Kagitta na ipasingan na Salmo 41:12, kunnasi nga bala-balakkan ni Jehova danuri usadda i interu pattoleda ta passerbi ta nisa?

¹⁶ Si Jehova i pinakavuka-palag. Maski anni paga i iyawa mu nisa, magga kanayun nga mas aru i itoli na ta niko. (Mar. 10:29, 30) Yayya i mangiyawa ta niko tu pinakakappagayayya, makabenefisio, anna kakastan nga pattolay nga posible maski paga sangawe taw nga marake nga mundo. Ngem i bawtismom ay pamegafuanan pagalaman. Ari tu yatun i pangultimuan. Awayyam i masserbi ta meddu nga Yamam ta mannanayun. Dumakal laman nga dumakal i pangaya mu ta Yamam kunne na gapa i pangaya na ta niko. I kurug, puede ka nga mattolay adde noka, adde ta sigga-matolay si Jehova.​—Bibbigan i Salmo 41:12.

17. Anni i meyawa mu kani Jehova nga awan paga ta nisa?

¹⁷ Nu idedikam i pattolem ta Dios anna mappa-baptize ka, pribilehiom nga iyawa i kuruga nabala-balor nga gannug ta Yamam. Niyawa na ta niko i ngamin nga mapia nga gannug kunne na gapa i ngamin nga namagayayya ta niko. Anni gafu gapa i makuam para ta nisa? Awayyam nga iyawa ta Makakkua ta langi anna ta davvun i tadday nga gannug nga awan paga ta  nisa—i napafutuan anna matalo nga passerbim. (Job 1:8; 41:11; Prov. 27:11) Egga paga kari i mas makasta nga pangusammu ta pattolem anne tatun? Siguradu nga i pangaya mu kani Jehova i kakastan nga rason tapenu mappa-baptize.

18. Anni ira nga pakkiavu i awayya na nga iyavu mu ta baggim?

¹⁸ Anni gafu ngana i tabbag mu ta pakkiavu nga ‘Mappa-baptize ka ngana kari?’ Siko laman i makatabbag tatun. Ngem makaduffun ta niko nu iyavu mu ta baggim, ‘Anni pagalaman i innaggakku?’ (King. 8:36) Daddamman i tallu nga rason nga nagigiammu tam. Ollu, egga i pangaya mu ta kurug anna ta tunung. Iyavu mu ta baggim, ‘Kayà ku kari nga duttal ngana i tiempo sonu ngamin nga totolay ay makkagi tu kurug anna mangngua tu matunung?’ Mekadua, egga i pangaya mu kani Jesu-Cristo. Iyavu mu ta baggim, ‘Kayà ku kari nga i Ana na Dios i mabbalin tu Patul ku anna kayà ku kari nga tuttulan i ehemplo na?’ I mekatallu anna i pinaka-importante ta ngamin, egga i pangaya mu kani Jehova. Iyavu mu ta baggim, ‘Kayà ku kari nga pagayayyatan i futu ni Jehova gukaban na passerbì ta nisa?’ Nu wan i tabbag mu tatun ira nga pakkiavu, ngatta ari ka pagalaman gafu mappa-baptize? Anni pagalaman i innaggammu?​—King. 16:33.

19. Ngatta ari ka nakuan magalangan nga mappa-baptize? Iyilustra. (Juan 4:34)

¹⁹ Nu magalangakka nga mappa-baptize, nonopan i tadday nga ilustrasion ni Jesus. (Bibbigan i Juan 4:34.) Nikumpara ni Jesus ta pakkatolay onu makan i pangngua ta uray na Yama na. Ta ngatta? Pammakapianattam gare i makan. Ammu ni Jesus nga pammakapianattam ngamin nga ipakua ni Jehova ta nittam. Manaki ni Jehova nga mangngua ittam tu maski anni nga gannug nga pakaperwisiuwattam. Kasali kari ta uray ni Jehova nga mappa-baptize ka? Wan. (King. 2:38) Makapakkomfiansa ka gafu nga pakabenefisiowammu nu tuttulammu i bilin nga mappa-baptize. Nonopammu yaw: Nu ari ka magalangan nga kanan i pinakamasingngo nga makan, ngatta gafu magalangakka nga mappa-baptize?

20. Anni i tabbagattam ta tumunug nga artikulo?

²⁰ Anni pagalaman gafu i innaggammu? Aru i makkakkagi, “Ari ngà paga ready.” I kurug, i desision nga idedika i baggim kani Jehova anna mappa-baptize i pinaka-importante nga desision nga kuammu ta pattolem. Yayya nga mawag tu pannonopammu tu mapia yatun. Mawag gapa i tiempo anna pangikaguman tapenu makualipika ka. Ngem nu talaga kayà mu ngana nga kuan yatun, anni i makuam sangawe tapenu mepreparam i baggim? Matabbag yatun ta tumunug nga artikulo.