Ngatta kinagi na lalaki nga ari nengaganan nga ‘mawawan’ i sarili na nga rensia nu atawan na si Ruth? (Ruth 4:1, 6)

Ta tiempo na Biblia, nu matay i natawan nga lalaki ngem awan tu ana na, egga ira i luttuag nga pakkiavu: Anni ngana saw i mesimmu ta davvun na? Awan ngana kari tu mangituloy ta linia na familia na? Tabbagan na Mosaiko nga Dob yatun ira nga pakkiavu.

Anni i mesimmu ta davvun na lalaki nga natay onu na lalaki nga nilaku na i davvun na megafu ta ziga? Puede nga gatangan uli onu tubusan yatun na wagi na nga lalaki onu na aranni nga parientes na tapenu pakkukua da lagapa nga makkakafamilia yatun nga davvun.​—Lev. 25:23-28; Num. 27:8-11.

Kunnasi gafu nga mattulu-tuloy lagapa i linia na familia na natay nga lalaki? Gukaban na pangatawa ta kayung onu bayaw. Kunnatun i nesimmu kani Ruth. Atawan na tadday i nabalu na wagi na nga lalaki tapenu makka-ana ira. Yatun saw i mangituloy ta linia na familia na natay nga lalaki anna i mammana gapa ta pakkukua na. Yatun nga makonsiderasion nga unnug ay pammakapian gapa na balu ira nga babay.​—Deut. 25:5-7; Mat. 22:23-28.

Nonopan i situasion ni Noemi. Atawa yayya ni Elimelec. Turi ta natay si Elimelec anna i dua nga ána da nga lalaki, awan ngana tu mangiyawa ta pakawagan na. (Ruth 1:1-5) Turi ta nakatoli ngana si Noemi ta Juda, zinog na i manugang na nga si Ruth nga ikiddaw kani Boaz nga tubusan i davvudda ta aranni mabba yayya nga parientes ni Elimelec. (Ruth 2:1, 19, 20; 3:1-4) Ngem nanono ni Boaz nga egga paga i mas aranni nga parientes ni Elimelec. Ta Biblia, ari nga nengaganan yatun nga lalaki. Yayya gafu labbi i egga i chansa na nga mabbalin tu gumattubus.​—Ruth 3:9, 12, 13.

Ta gafu na bi, kayà na lalaki i manguffun. (Ruth 4:1-4) Maski gare ammu na nga maggasto yayya, nanono na nga imposible ngana para kani Noemi i makka-ana tu mammana saw ta davvun ni Elimelec. Yayya nga yatun saw nga davvun ay mabbalin ngana tu kukua na lalaki. Sulit gafu i paggasto na.

Ngem nanguli i nono na lalaki turi ta nammuan na nga mawag tu atawan na si Ruth. Kinagi na: “Ari ku nga matubus yatun ta baka mawawakku i sarilì nga rensia.” (Ruth 4:5, 6) Ngatta nanguli i nono na?

Nu yatun gare nga lalaki onu tanakuan i nangatawa kani Ruth tapus nakka-ana ira tu lalaki, i abbing i mammana ta davvun ni Elimelec. Kunnasi nga ‘wawwanan’ natun i “rensia” na lalaki nga ari nga nengaganan? Awan tu kagian na Biblia, ngem yaw i karuan nga posibilidad.

• Ollu, kakenga laman saw i gastowan na ta ari mabba saw nga mabbalin tu pakkukua na i davvun. Manan yatun na ana nga lalaki ni Ruth.

• Mekadua, responsibilidad na saw nga pakanan anna tangngawan si Noemi anna si Ruth.

• Mekatallu, nu mapeggan si Ruth anna yatun nga lalaki tu tanakuan paga nga ána, mawag tu billayan na i ána na kani Ruth tu mana, fuera paga ta billay na nakkapollu ira nga ána na.

• Meka-appa, nu awan tu nakkapollu nga ána natun nga lalaki, i ana da saw ni Ruth nga lalaki i mammana ta davvun ni Elimelec anna ta davvun na. Meyawa gafu saw i davvun na ta abbing nga mangituloy ta linia na familia ni Elimelec, ari tu ta nisa. Manaki natun nga lalaki nga uffunan si Noemi ta baka mawawan saw i sarili na nga rensia. Mas ikaya na nga i tumunug nga puede nga gumattubus nga si Boaz i magangngua tatun. Kingngua yatun ni Boaz ta kayà na nga “metoli i ngagan na natay nga lalaki ta rensia na.”​—Ruth 4:10.

Makagi tam gafu nga mas kayà na lalaki nga ari nengaganan nga protektan i ngagan anna i rensia na. Makasarili yayya. Ngem ari tam paga lagu ammu sangawe nu anni i ngagan na. Ari gapa yayya napeggan tu espesial nga pribilehio nga kagitta na nalawa ni Boaz, i mabbalin tu ginafuan na Mesias nga si Jesu-Cristo. Kaddaraddam i nesimmu ta lalaki nga ari nengaganan ta ari na nga inuffunan i makawag gafu laman ta makasarili ira nga rason na!—Mat. 1:5; Luc. 3:23, 32.