1. Ngatta ari ngana nga makapaggigiammu i karuan?

TA MADDAGGUN, aru nga totolay i mawag nga mattrabahu tu mapia tapenu makalanno i kuartuda ta paggastuadda. Aru ta wawwaragi tam i mattattrabahu tu aru nga oras tapenu meyawada i importante nga pakawagan na familiada. Aru gapa i mofu i orasda kada aggaw ta pabbiaheda pappange anna palabbe ta pattrabahuadda. Egga gapa danuri mattrabahu tu madammo tapenu masuportan i familiada. Ta pangultimu na aggaw, nababbannag ngana danaw nga wawwaragi! Awan ngana tu sikadda nga maggigiammu.

2. Anni i iskediul mu nga maggigiammu?

² Ngem kakuruganna, mawag tam magaleg tu tiempo tapenu gigiammuan​—wan, gigiammuan—​i Biblia anna i publikasiottam ira. Nakadepende tatun i relasiottam kani Jehova anna i mannanayun nga inango tam! (1 Tim. 4:15) Ummumma nga malukag i karuan kada aggaw anna maggigiammu ira durante nga memammo ta baleda anna fresko i nonoda gafu ta nakebannag ira. Mangiskediul gapa i karuan tu piga nga minuto ta gabi tapenu mangiponag ira tu espiritual nga makan anna pannonopan yatun.

3-4. Anni ira nga panguli i nakua ta karu na material nga mabibbig, anna ngatta?

³ Siguradu nga umanugu ka nga importante nga mangiskediul tu oras tapenu maggigiammu. Ngem anni i gigiammuattam? Baka kagiammu, ‘Napakaru i mawag nga mabibbig. Marigatan ngà nga bibbigan i ngamin.’ Mabibbig na karuan i ngamin nga publikasiottam anna magiroda i ngamin nga nebase-Biblia nga video nga malawà tam, ngem aru ta wawwaragi tam i marigatan nga kuan yatun. Ammu na Manangngal nga Baggi yatun. Yari tu kanni laman ay naddesision ira nga  pakarianan i karu na informasion nga meyimprenta anna ta digital nga format.

⁴ Angngariganna, ariattam ngana mangipublisa tu Yearbook of Jehovah’s Witnesses, megafu ta aru ngana nga makapagaram nga ekspiriensa i malegan ta jw.org^® anna ta vinulan nga programa ta JW Broadcasting^®. Mamittallu ngana laman nga mepublisa i pampubliko nga edision na Passifusifutan anna i Malukag! Ari nga nakua danatun nga panguli tapenu mas aru i tiempo tam nga kuan i tanakuan nga aktibidad. Gakkag danatun nga egga i tiempo tam nga makapaffokus ta “kapianan [onu, pinaka-importante] ta ngamin” nga gannug. (Fil. 1:10) Gigiammuattam nu kunnasi ka mapeggan tu prayoridad anna mabbenefisio tu mapia ta personal nga paggigiammum ta Biblia.

5-6. Anni nakuan ira i mawag tam nga gigiammuan tu mapia?

⁵ Anni nakuan i ollu tam nga gigiammuan? Mawag nga egga tiempo tam kadaggaw nga gigiammuan i Biblia. Napakarianan ngana i karu na kapitulo nga neyiskediul ta linigguan nga pabbibbig tu Biblia ta kongregasion tapenu mas aru i tiempo tam nga nonopan tu mapia i bibbibbigattam anna tapenu makaparresearch paga ta publikasiottam. I gakkag tam nakuan ay ari laman nga basta bibbigan i neyiskediul nga material, nu ari, ipamavuluttam nakuan nga addetan na mensahe na Biblia i futu tam anna mas maddukko tam nakuan kani Jehova.​—Sal. 19:14.

⁶ Anni paga i mawag nga gigiammuattam tu mapia? Siempre, kayà tam nga repasuan i material ta Paggigiammu tu Passifusifutan anna ta Paggigiammu na Kongregasion tu Biblia kunne na gapa i tanakuan nga magigiammu ta study ta midweek. Mawag gapa nga bibbigattam i kada isyu na Passifusifutan anna na Malukag!

7. Makkafi kari i nono tam nu ariattam mabibbig onu magiraw i ngamin nga material ta website tam anna ta JW Broadcasting?

⁷ ‘Okay sige,’ kummu, ‘ngem kunnasi gapa danuri artikulo anna video ira ta website tam, ta jw.org, kunne na gapa danuri material ta JW Broadcasting? Kakkaru danatun!’ Ikonsidera i tadday nga ilustrasion: Egga i napakaru nga masingngo nga maka-makan ta buffet restaurant. Ari makan na kostumer ira i ngamin nga netunnag. Yari tu piliadda laman i awayyada nga kanan. Kunne na gapa, nu ariammu nga mabibbig i ngamin nga material ta elektroniko, ari nakuan makkafi i nono mu. Bibbigan anna girawan laman i mawayyam. Gigiammuattam ngana nu kunnasi anna nu anni i kuattam tapenu mas mabbenefisio ta paggigiammu.

8. Anni ira i puede tam nga kuan nu mapprepara para ta Paggigiammu tu Passifusifutan, anna kunnasi makoffun yatun nikaw?

⁸ I paggigiammu ay paffokus ta bibbibbigan tapenu egga i importante nga gannug nga mammuan. Ari laman yaw tu basta alistu nga pabbibbig ta neyiskediul nga material anna paggalli ta tabbag ira. Angngariganna, nu mapprepara para ta Paggigiammu tu Passifusifutan, bibbigan labbi i sumario ta gafu na artikulo. Kabalinna, bibbigan anna pannonopan i tema na artikulo, kunne na gapa i subtitulo anna i repaso ira nga pakkiavu. Tapus, bibbigan tu mapia i interu nga artikulo. Iddan tu atension i sentence nga makkagi nikaw ta pinakapunto na parapo, nga maruddu nga mabibbig ta ollu nga sentence na kada parapo. Yatun i manguffun nikaw tapenu mammuan i punto nga ipakanawag na parapo. Durante nga bibbigammu i artikulo, pannonopan nu kunnasi suportan na kada  parapo i subtitulo ira anna i koneksionna ta tema na artikulo. Itura i termino anna i punto ira nga ariammu kuruga ammu anna kayà mu nga iresearch.

9. (a) Ngatta anna kunnasi tam nakuan iddan tu atension i teksto ira nu gigiammuan i Passifusifutan? (b) Segun ta Salmo 119:27, anni paga nakuan i kuattam fuera ta pabbibbig ta teksto?

⁹ I Paggigiammu tu Passifusifutan ay paggigiammu ta Biblia. Iddan gafu tu atension i teksto ira, mas ngana danuri mabibbig sonu ikonsidera na kongregasion yatun nga artikulo. Innan nu kunnasi massuporta ta pinakapunto na parapo i uvovug onu grupo na uvovug ira ta teksto. Durante nga mabbibbig ka, pannonopan tu mapia i teksto anna nu kunnasim nga iyaplika yatun ta pattolem.​—Bibbigan i Salmo 119:27.

10. Segun ta Hebreo 5:14, ngatta tudduan nakuan na magana i ánada nu kunnasi nga maggigiammu anna marresearch durante ta paddayarayaw na familia?

¹⁰ Normal nga kayà na magana nga magayayya i ánada ta linigguan nga Paddayarayaw na Familiada. Ngem, maski nu planadu ngana na magana i magigiammu ta paddayarayaw na familiada, ariadda nakuan nonopan nga mawag tu kanayun nga egga ira i espesial nga aktibidad onu kappagayayya nga proyekto ta kada ligguan. Ta Paddayarayaw na Familia, maski nu puede i paggiraw tu vinulan nga programa ta JW Broadcasting onu sinaggi-mittan nga espesial ira nga proyekto gitta na pamadday tu modelo na arka ni Noe, importante gapa nga tudduan i abbarabbing nu kunnasi i maggigiammu. Angngariganna, mawagda mammuan nu kunnasi mapprepara ta study ira ta kongregasion, onu nu kunnasi marresearch meyannung ta tadday nga problema nga luttuag ta eskuela. (Bibbigan i Hebreo 5:14.) Nu egga i tiempoda nga maggigiammu tu tadday nga topiko na Biblia ta balay, mas alistu ngana laman nira nga maffokus ta material nga magigiammu ta study na kongregasion, asembli, anna kombension ira, maski nu awan tu video nga magiraw. Siempre, nakadepende i kapaddu na paggigiammu ta edad anna ugali na abbarabbing.

11. Ngatta importante nga tudduattam i estudiante tam ira ta Biblia nu kunnasi i monag nga personal nga paggigiammu?

¹¹ Mawag gapa nga mammuan na estudiante tam ira ta Biblia nu kunnasi i maggigiammu. Turi ta bagu pagalaman ira, magayayya ittam ta basta paggallida ta tabbag ira nu mapprepara ira ta Bible study onu ta study ta kongregasion. Ngem mawag tam tudduan ira nu kunnasi i marresearch anna nu kunnasi i monag nga personal nga paggigiammu. Nu kunnatun, sonu egga i problemada, imbes nga insigida  nga mappoffun ta kakongregasion, ammuda nu sitaw i pagalegan tu praktikal ira nga tabarang gukaban na parresearch ta publikasiottam ira.

12. Anni ira i gakkag tam nu maggigiammu ittam?

¹² Nu ari ka mahilig nga maggigiammu, baka nonopammu nga imposible nga ma-enjoy mu yatun. Ngem posible yatun. Awayyam igafu gukaban na paggigiammu ta ababba labbi nga oras tapus sisinu nga ammungan i kapadduna. Nonopammu i gakkag ta paggigiammum. Siempre, pinaka-importante nittam i mas paddukko kani Jehova. I tadday ta insigida nga metuppal tam ay i pattabbag ta pakkiavu na tanakuan onu parresearch ta problema nga ara-arubangattam.

13. (a) Iyesplika nu anni i makua na tadday nga kabataan tapenu medefensa i pangurugna ta eskuela. (b) Kunnasi meyaplika i tabarang ta Colosas 4:6?

¹³ Angngariganna, magiggiskuela ka kari paga? Awayyana nga mangurug i ngamin nga kaklasem ta ebolusion. Kayà mu nga idefensa i tuddu na Biblia, ngem baka marigatakka. Yayya nga mawag mu nga iproyekto nga gigiammuan yatun! Dua i gakkag mu: (1) pasikannan i kombiksiommu nga pinaratu na Dios i ngamin nga gannug anna (2) ammuan nu kunnasi nga mas meyesplika i pangurug mu. (Roma 1:20; 1 Ped. 3:15) Awayyam iyavu ta baggim, ‘Ngatta mangurug i kakklasè ira ta ebolusion?’ Tapus, iresearch tu mapia yatun ta publikasiottam ira. Mammuammu nga ari balo nga kuruga mariga nga idefensa i pangurug mu. Aru i mangurug ta ebolusion megafu laman ta respetadu nga tolay i nakkagi nira nga kurug yatun. Nu makaleg tu tadday onu dua nga punto nga awayyam ibillay ta kaklasem, posible nga moffunammu danuri talaga kayàna nga mammuan i kinakurug.​—Bibbigan i Colosas 4:6.

14-16. (a) Anni i makuam tapenu mas malippawa i tadday nga libru na Biblia nga ari familiar nikaw? (b) Iyesplika nu kunnasi usan i teksto ira ta ultimu na parapo tapenu mas malippawa i libru nga Amos. (Innan gapa i kahon nga “ Tolayan ta Nono Mu i Karakter ira na Biblia!”)

¹⁴ Angngariganna, gigiammuattam ta tumunug nga study na kongregasion i tadday ta ababba ira nga libru na profesiya ta Biblia, nga ari ka kuruga nga familiar. Puedem nga padakallan labbi i interes mu meyannung ta nitura na profeta. Kunnasim makua yatun?

¹⁵ Ollu, iyavu mu ta baggim: ‘Anni i ammù meyannung ta nattura taw nga libru? Sinni yayya, taga sitaw, anni i trabahuna?’ Nu mas aru nga informasion i ammu tam meyannung ta nattura, mas malippawa tam i pinilina ira nga uvovug anna ilustrasion. Durante nga bibbigammu i Biblia, magaleg tu grupo ira na uvovug nga mangipasingan ta personalidad na nattura.

¹⁶ Kabalinna, mas makoffun nikaw nga ammuan nu kanni nga netura i libru. Mabi mu nga mammuan yatun gukaban na paningan ta “Table of the Books of the Bible” ta likug na New World Translation of the Holy Scriptures. Awayyam gapa nga repasuan i chart na profeta anna patul ira ta Appendix A6. Nu meyannung ta profesiya i libru na Biblia nga giggigiammuammu, makoffun nu ammuan nu anni i situasion na totolay turi ta netura yatun. Anni ira nga marake nga pagimamma onu annangngua na totolay i kayà na profeta nga itunung? Sinni i kakontemporariona ira? Tapenu mas malippawa i situasion, innammu i tanakuan ira nga libru ta Biblia. Angngariganna, tapenu mas malippawa nu anni i mesissimmu turi ta tiempo ni profeta Amos, mabenefisiowakka nu bibbigammu i  teksto ira ta 2 Patul Ira anna ta 2 Cronicas nga egga ta marginal reference ira na Amos 1:1. Awayyam paga nga repasuan i nitura ira ni Oseas, nga kakontemporario ni Amos. Makoffun ngamin danatun nga informasion tapenu malippawa nu kunnasi i pattolay ta tiempo ni Amos.​—2 Pat. 14:25-28; 2 Cro. 26:1-15; Os. 1:1-11; Amos 1:1.

17-18. Usan i angngarigan ira ta parapo onu i sarilim nga angngarigan nu kunnasi makoffun i detalye ira nga gittana ari kuruga importante tapenu ma-enjoy i personal nga paggigiammu.

¹⁷ Nu bibbigattam i Biblia, makoffun nu kakayà tam nga mas makagigiammu paga. Angngariganna, bibbibbigammu i kapitulo 12 na Zacarias nga nangiprofesiya ta patay na Mesias. (Zac. 12:10) Nu madde mu i versikulo 12, mabibbig mu nga maddangngul anna kuruga marraddam i “familia na tangabbalayan ni Natan” ta patay na Mesias. Imbes nga palampasan yatun nga detalye, awayyam magimmang anna iyavu mu ta baggim: ‘Anni i koneksion na tangabbalayan ni Natan ta Mesias? Egga paga kari i makuà tapenu makala tu mas aru nga informasion?’ Puedem nga parigan i kukukuan na imbestigador. Idirekta naka na tadday nga marginal reference na Zacarias 12:12 ta 2 Samuel 5:13, 14, nu sitaw mammuammu nga si Natan ay tadday ta ana ni Patul David. Madiskubrem gapa ta tadday paga nga marginal reference ta Lucas 3:23, 31 nga direkta nga gaka ni Natan si Jesus gukaban ni Maria. (Innan i Passifusifutan, Agosto 2017, p. 32, par. 4.) Sangaw, mas interesadu ka ngana! Dati nga ammum nga neprofesiya nga maggafu si Jesus ta linia ni David. (Mat. 22:42) Ngem maturu tu 20 i ána nga lallaki ni David. Ari kari nga kappabbaw nga espesipiko nga natukoy ta Zacarias i tangabbalayan ni Natan nga egga i rasodda nga kuruga marraddam ta patay ni Jesus?

 ¹⁸ Ikonsidera i tadday paga nga angngarigan. Ta ollu nga kapitulo na Lucas, mabibbig tam nga binisita na anghel nga si Gabriel si Maria anna nikagina sa i meyannung ta lalaki nga iyanana: “Dakal noka i kekwentan na anna mangagan yaya tu Ana na Dios nga Katannangan. I Yafu Dios ay pabbalinan na yaya noka tu patul nga kagitta ni David nga ginafuan na. Mannanayun noka i pammaguray na ta ginaka ira ni Jacob.” (Luc. 1:32, 33) Baka nakafokus tam laman ta ollu nga parte nga nipakannammu ni Gabriel nga magalan si Jesus bilang “Ana na Dios nga Katannangan.” Ngem niprofesiya paga ni Gabriel nga si Jesus ay ‘mammaguray bilang Patul.’ Yayya nga baka iyavu tam nu anni tamma i nanono ni Maria ta kinagi sa ni Gabriel. Nanonona kari nga talianan ni Jesus si Patul Herodes​—onu i maski sinni nga katali ni Patul Herodes nga mammaguray ta Israel? Nu mabbalin tu patul si Jesus, mabbalin si Maria tu yena na patul, anna maddian i familiana ta palasio na patul. Ngem ari kagian na Biblia nga kinagi ni Maria i kunnatun nga posibilidad kani Gabriel; ni tu nakkiddaw yayya tu espesial nga posision ta Pappatulan, gittana kingngua na dua nga disipulos ni Jesus. (Mat. 20:20-23) Mas kumbinsian ittam naw nga detalye nga kuruga minappakalinno nga babay si Maria!

19-20. Segun ta Santiago 1:22-25 anna 4:8, anni nakuan i gakkag tam ira nu maggigiammu?

¹⁹ Daddammattam nga i pinakagakkag ta paggigiammu ta Biblia anna ta publikasiottam ira ay gafu ta kayà tam nga mas maddukko kani Jehova. Kayà tam nga mas manawag nga masingan i ‘kasissinnattam’ anna nu anni ira i mawag nga uliattam tapenu mapagayayya i Dios. (Bibbigan i Santiago 1:22-25; 4:8.) Yari tu kada igafu tam i maggigiammu, makkiddaw tam nakuan tu masanto nga espiritu ni Jehova. Ipakimemallo tam nakuan nga uffunanna ittam nga mas mabbenefisio ta nagigiammu tam anna innattam i baggi tam nga kunna paninganna nittam.

²⁰ Paray nakuan tu sittam ngamin ay mabbalin tu kagitta na matalo nga aripan na Dios nga tinukoy na salmista: “Magayaya nga mamarulo ta Dob na YAFU; aggaw-gabi patalattappan na yaw ta napafutu. . . . Ngamin i kuan na ay mattuppal ta mapia.”—Sal. 1:2, 3.