1. Ngatta makagi tam nga kappagayayya i tiempo nga pattolayattam?

 KAPPAGAYAYYA i tiempo nga pattolayattam! Masingi-singattam nga matuttuppal ngana i profesiya ira na Biblia. Angngarigan na, masingattam nga makkalaba-laban i “patul na sigiran” anna “patul na zita” tapenu mabbalin tu pinakamakapangngua ta interu mundo. (Dan. 11:​40, ftn.) Masingattam i kelayyagayya na mapia nga dumug meyannung ta Pappatulan na Dios ta interu mundo anna minillion nga totolay i nappili nga passerbian si Jehova. (Isa. 60:22; Mat. 24:14) Makalawa ittam gapa tu abundansia nga espiritual nga makan “ta gagangay nga oras na akkakan.”—Mat. 24:​45-47.

2. Ta anni ittam makasiguradu, ngem anni i mawag tu rekunnisiattam?

² Tulu-tuloy ittam nga uffunan ni Jehova tapenu mas malippawa i araranni ngana nga importante ira nga mesimmu. (Prov. 4:18; Dan. 2:28) Makasiguradu ittam nga sonu mamegafu i dakal nga ziga, mammuattam ngana saw i ngamin nga mawag tu mammuattam tapenu matalo nga makapagattam anna mattalupaddian nga nattaradday tatun nga mariga nga tiempo. Ngem mawag tu rekunnisiattam nga egga ira i gannug nga ari tam talaga ammu meyannung ta mesimmu ta mappange. Taw nga artikulo, gigiammuattam labbi nu ngatta inuli tam i kinagi tam meyannung tatun ira nga mesimmu. Repasuattam  gapa i gannug ira nga ammu tam meyannung ta mappange anna nu anni noka i kuan na Yama tam ta langi.

ANNI I ARI TAM AMMU?

3. Anni i dati nga pakalippawa tam nga mesimmu ta totolay nga ari masserbi kani Jehova sonu mamegafu ngana i dakal nga ziga, anna ngatta nakagi tam yatun?

³ Ta nappasa, nikagi tam nga sonu mamegafu ngana i dakal nga ziga, awan ngana tu chansa na totolay nga masserbi kani Jehova anna mapaliag ta Armagedon. Nakagi tam yatun megafu ta abbo tam nga simboliko i nesimmu ta Delubio. Angngarigan na, abbo tam nga nu kunnasi nga niserra ni Jehova i puerta na arka nage na Delubio, kunnatun gapa i kuan na sonu mamegafu i dakal nga ziga. “Iserra” na ngana saw i sistema na ganna-gannug ni Satanas, yatutta awan ngana tu totolay nga makatallung ta organisasion na anna mapaliag.—Mat. 24:​37-39.

4. Isimbolo kari na nesimmu ta Delubio i mesimmu ta mappange? Ipakanawag.

⁴ Fustu kari tu kagiattam nga isimbolo na nesimmu ta Delubio i mesimmu ta mappange? Ari. Ngatta? Megafu ta ari nga kinagi na Biblia yatun. a Kurug tu nikumpara ni Jesus ta “tiempo ni Noe” i tiempo na kegga na, ngem arian na kinagi nga egga i mas dakal nga ketuppalan na ngamin nga nesimmu ta tiempo ni Noe ta mappange, kagitta na nipangiserra ni Jehova ta puerta na arka. Ngem arian na kayà kagian naw nga awan tu magigiammu tam meyannung ta istoria ni Noe anna ta Delubio.

5. (a) Anni i kingngua ni Noe nage na Delubio? (Hebreo 11:7; 1 Pedro 3:20) (b) Meyannung ta pallayyagayya, kunnasi nga negitta i tiempo tam ta tiempo ni Noe?

 ⁵ Turi ta naginna ni Noe i pangabiso ni Jehova, nipasingan na i pangurug na gukaban na pangngua tu arka. (Bibbigan i Hebreo 11:7; 1 Pedro 3:20.) Kunnatun gapa, mawag tu magguyu danuri i totolay nga nakaginna ta mapia nga dumug meyannung ta Pappatulan na Dios. (King. 3:​17-20) Kinagi ni Pedro nga si Noe ay “nangilayya-gayya ta matunung nga attolay.” (2 Ped. 2:5) Ngem kagitta na nagigiammu tam ta nappasa nga artikulo, ariattam ammu nu nalayyagayyan ni Noe i ngamin nga totolay ta interu mundo nage na Delubio. Sangawe, kuattam i adde na mawayya tam nga layyagayyan i totolay ta interu mundo anna matalikarag tam nga kuan yatun. Ngem maski nu kuattam i adde na mawayya tam, ariattam mawayya nga malayyagayyan i ngamin nga totolay ta interu mundo nage na panuppalan. Ngatta ari?

6-7. Ngatta makagi tam nga ariattam meyadde i mapia nga dumug ta ngamin nga totolay ta mundo nage na panuppalan? Ipakanawag.

⁶ Ikonsidera i kinagi ni Jesus meyannung ta kalawa na trabahu tam nga pallayyagayya. Nikagi na nga melayyagayya i mapia nga dumug ‘ta tanga-ravvunan tapenu kannammuan na ngamin nga sinolay.’ (Mat. 24:14) Mas ngana nga matuttuppal sangawe yatun nga profesiya kumpara tagga. Available i mensahe na Pappatulan ta maturu tu 1,000 nga lengguahe, anna gukaban na website nga jw.org, available ngana yatun ta magaru nga totolay ta interu mundo.

⁷ Ngem kinagi gapa ni Jesus ta disipulos na nga ariadda ‘merattal ta ngamin nga ili-ili’ onu malayyagayyan i ngamin nga tolay nage na nga duttal. (Mat. 10:23; 25:​31-33) Kurug gapa yatun nga kinagi ni Jesus ta kaggawattam. Minillion nga totolay i maddian ta lugar nu sitaw megamma i pallayyagayya tam. Ginatu gapa nga abbing i meyana kada minuto. Kuattam i adde na mawayya tam tapenu iyadde i mapia nga dumug ta “totolay na madduma-ruma i rasa, tribu, paguvovug, anna nasion.“ (Nep. 14:6) Ngem i kakurugan na, ariattam nga malayyagayyan i ngamin nga tolay taw ta mundo nage na panuppalan.

8. Anni i awayya na nga iyavu tam meyannung ta panentensia ira ni Jehova ta mappange? (Innan gapa i letratu ira.)

⁸ Yatutta luttuag yaw nga pakkiavu: Kunnasi danuri i awan tu chansa da nga maginna i mapia nga dumug nage nga mamegafu i dakal nga ziga? Anni i kuan ni Jehova anna na Ana na nga nangitalakkan na ta panentensia nira? (Juan 5:​19, 22, 27; King. 17:31) Kinagi na tema nga teksto taw nga artikulo nga si Jehova ay “arian na nga ikaya tu egga i madaral.” Nu ari lagu, “ikaya na tu pallikuran na ngamin nga totolay i katagaruliad-da.” (2 Ped. 3:9; 1 Tim. 2:4) Maski ammu tam yatun ira nga gannug meyannung kani Jehova, arian na paga kinagi nittam nu anni i kuan na ta nira tapenu matabbag i pakkiavu ta gafu. Siempre ari yayya nga obligadu nga ikagi ta nittam i meyannung ta maski anni nga kingngua na onu kuan na noka.

9. Anni i nipakannammu ni Jehova ta nittam ta Biblia?

⁹ Ta Biblia, nikagi ni Jehova i karuan ta gannug ira nga kuan na. Angngarigan na, ikagi na Biblia nga paginnolayan ni Jehova i “ari matunung” nga totolay nga awan tu chansa da nga maginna i meyannung ta mapia nga dumug anna manguli. (King. 24:​15, NW; Luc. 23:​42, 43) Mamalattuag yatun tu tanakuan nga importante ira nga pakkiavu.

10. Anni paga ira nga pakkiavu i luttuag?

¹⁰ Ngamin kari nga matay ta dakal nga ziga ay madaral tu mannanayun anna awan ngana tu iddanama da nga mapaginnolay? Manawag  ta Katurakan tu ngamin nga kumokkontra nga patayan ni Jehova anna na armada na sonu Armagedon ay ari mapaginnolay. (2 Tes. 1:​6-10) Ngem kunnasi gapa i totolay nga matay ta tiempo na dakal nga ziga megafu ta taki, pallakay anna pabbako, onu matay megafu ta aksidente onu pinatay da? (Ecl. 9:11; Zac. 14:13) Nelagum kari i karuan nira ta “ari matunung” nga mapaginnolay ta bagu nga mundo? Yatun i ariattam ammu.

ANNI I AMMU TAM?

11. Anni saw i basehan na kasentensia na totolay ta Armagedon?

¹¹ Egga ira i ammu tam nga mesimmu ta mappange. Angngarigan na, ammu tam nga sonu Armagedon, makastigo i totolay base ta pinattratu da ta wawwaragi ni Cristo. (Mat. 25:40) Masentensian tu karneru danuri i nangipasingan tu suporta ta nazelugan anna kani Cristo. Ammu tam gapa nga egga i wawwaragi ni Cristo nga mabattang taw ta davvun sonu mamegafu ngana i dakal nga ziga anna mappalangi laman ira nage nga mamegafu i Armagedon. Habang egga paga ta davvun i wawwaragi ni Cristo, posible nga egga paga i chansa na totolay nga makasta i giffutuadda nga suportan ira anna i trabahu nga kukukuadda. (Mat. 25:​31, 32; Nep. 12:17) Ngatta importante yatun ira nga kinakurug?

12-13. Anni i posible nga reaksion na karuan kabalidda masingan i kadaral na “Madumu-rumug nga Babilonia”? (Innan gapa i letratu ira.)

¹² Maski sonu mamegafu ngana i dakal nga ziga, posible nga i karuan nga makasingan ta kadaral na “Madumu-rumug nga Babilonia” ay meraddammadda nga piga ragun ngana nga kakkagian na Saksi ni Jehova yatun. I karuan kari saw nga makasingan tatun ay manguli anna masserbi kani Jehova?—Nep. 17:5; Eze. 33:33.

¹³ Nu mesimmu yatun, gitta natun i nesimmu ta Ehipto ta kaggawan ni Moises. Daddamman nga “dakal nga grupo na dayu” i nevulu ta Israelita ira ta pappanaw da ta Ehipto. Awayya na tu i karuan ta nira ay namegafu nga nangurug turi ta nasingadda nga nesimmu i Mafulu nga Kastigo nga niyabiso ni  Moises. (Ex. 12:38) Nu kunnatun gapa saw i mesimmu kabalin na kadaral na Madumu-rumug nga Babilonia, madismaya ittam kari megafu ta egga i totolay nga mevulu nittam nga masserbi kani Jehova nage na Armagedon? Ari! Ikaya tam parigan i nelangitan nga Yama tam nga “Dios nga minangngikallo anna minangngikabbi, ari insigida nga mapporay anna abundansia ta matalo nga aya anna kinakurug.” b—Ex. 34:6.

14-15. Nakadepende kari i mannanayun nga pappangetan na tadday nga tolay nu kanni yayya natay onu taga-sitaw yayya? Ipakanawag. (Salmo 33:​4, 5)

¹⁴ Nu mittan kagian na karuan meyannung ta kafamilia da nga ari tu Saksi nga natay, “Mas makasta ta natay yayya nage mamegafu i dakal nga ziga, megafu ta egga i iddanama na nga mapaginnolay.” Siguradu nga makasta i motibo da nu ngatta nakagi da yatun. Ngem ari nakadepende i mannanayun nga pappangetan na tadday nga tolay ta nu kanni yayya matay. Si Jehova i perfekto nga Hues. Kanayun nga matunung anna patas i desision na. (Bibbigan i Salmo 33:​4, 5.) Makapattalo ittam nga kuan na “Hues na interu davvun” nu anni i fustu.—Gen. 18:25.

¹⁵ Rasonable gapa nga kagiattam tu ari nakadepende i mannanayun nga pappangetan na tadday nga tolay nu taga-sitaw yayya. Ari gapa nga automatiko nga sentensian ni Jehova nga ‘kanzing’ i minillion nga totolay nga maddian ta lugar nu sitaw awan tu chansa da  nga maginna i meyannung ta mensahe na Pappatulan. (Mat. 25:46) Mas i pangikavurung na matunung nga Hues na interu nga davvun taw ira nga totolay anne ta pangikavuruttam. Ariattam ammu nu kunnasi nga maniobran ni Jehova i mesimmu ira ta tiempo na dakal nga ziga. Awayya na tu egga saw i chansa da nga makannammuan i meyannung kani Jehova, masserbi nisa, anna pumanig nisa sonu pakasantowan na i ngagan na ta arubang na ngamin nga nasion.—Eze. 38:16.

16. Anni i ammu tam ngana meyannung kani Jehova? (Innan gapa i letratu.)

¹⁶ Ta paggigiammu tam ta Biblia, nakannammuattam tu kuruga tagibaloran ni Jehova i inango na totolay. Niyawa na i inango na Ana na tapenu egga i chansa tam ngamin nga mattolay tu mannanayun. (Juan 3:16) Natageno tam ngamin i napafutuan nga aya ni Jehova. (Isa. 49:15) Ammu na i ngagan na kada tadday nittam. Kakurugan na, maski nu matay ittam, mawayya na ittam nga paginnolayan megafu ta meraddamman na i ngamin nga detalye meyannung ta nittam anna i memoria tam! (Mat. 10:​29-31) Siguradu nga makapattalo ittam nga perfekto noka i panentensia na minaggiddu nga Yama tam ta langi ta kada tadday nittam. Ma-uto garay yayya, matunung, anna minaggallallo.—Sant. 2:13.

17. Anni i gigiammuattam ta tumunug nga artikulo?

¹⁷ Megafu taw nga bagu nga pakalippawa, mas ari metalattan i trabahu tam nga pallayyagayya. Ngatta makagi tam yatun? Anni i mamaguyu nittam nga ari magimmang nga ilayyagayya i mapia nga dumug? Tabbagattam danatun ta tumunug nga artikulo.