MAGIGIAMMU NGA ARTIKULO 20
KANSION 67 Ilayyagayya i Uvovug na Dios
Ari Magimmang nga Mallayyagayya Gafu ta Aya!
“Mawag tu melayya-gayya tu ollu i Mapia nga Dumug ta ngamin nga nasion.”—MAR. 13:10.
I MAGIGIAMMU TAM
Nu kunnasi ittam nga paguyuan na aya nga mabbalin tu matalikarag anna interu-kararua nga mallayyagayya.
1. Anni i nagigiammu tam ta 2023 annual meeting?
TA 2023 annual meeting, a nakalawa ittam tu makapagayayya nga panguli na karuan nga kuru-kurugattam anna naginna tam i exciting ira nga anunsio meyannung ta ministerio. Angngarigan na, nagigiammu tam nga egga paga i chansa na karuan nga pumanig ta totolay ni Jehova maski paga kabalin na kadaral na Madumu-rumug nga Babilonia. Nagigiammu tam gapa nga namegafu ta Nobiembre 2023, ari ngana mekiddaw ta publisher ira nga ireport da i ngamin nga nakua da ta ministerio. Kebalinan kari natun nga ari ngana kuruga importante anna apuradu i ministerio tam kumpara tagga? Siguradu nga ari!
2. Ta pappasa na kada aggaw, ngatta mabbalin tu mas apuradu i pallayyagayya tam? (Marcos 13:10)
2 Ta kada aggaw nga mappasa, mabbalin tu mas apuradu i ministerio tam. Ngatta? Megafu ta baddi ngana laman i nabattang nga tiempo nage na panuppalan. Ikonsidera tam i profesiya ni Jesus meyannung ta trabahu nga pallayyagayya ta pangurianan ira nga aggaggaw. (Bibbigan i Marcos 13:10.) Segun ta nitura ni Mateo, kinagi ni Jesus nga melayyagayya i mapia nga dumug ta interu nga davvun nage nga duttal “i panuppalan.” (Mat. 24:14) I uvovug nga panuppalan ay tumukoy ta interamente nga kadaral na marake nga mundo ni Satanas. Sinunno ngana ni Jehova i “aggaw onu oras” na kesimmu na ganna-gannug. (Mat. 24:36; 25:13; King. 1:7) Ta kada aggaw nga mappasa, mas umara-aranni ittam ngana tatun nga tiempo. (Roma 13:11) Ngem habang maginnennag ittam, ari ittam nakuan magimmang nga mallayyagayya.
3. Ngatta mallayyagayya ittam?
3 Ta pamministerio tam, makasta nu pannonopattam yaw nga importante nga pakkiavu: Ngatta ilayyagayya tam i mapia nga dumug? Simple laman, megafu ta aya. Nu mallayyagayya ittam, mepasingattam i aya tam ta mapia nga dumug, i aya tam ta totolay, anna i pinaka-importante ta ngamin, i aya tam kani Jehova anna ta ngagan na. Gigiammuattam i kada tadday tatun.
MALLAYYAGAYYA ITTAM MEGAFU TA AYA TAM TA MAPIA NGA DUMUG
4. Anni i matageno tam nu makalawa ittam tu good news?
4 Manono mu paga kari nu anni i natageno mu turi ta nakaginna ka tu good news? Awayya na tu naginnam nga nagana ngana i kafamiliam onu egga i nangiyofer niko tu trabahu nga kakawagammu. Siguradu nga excited ka nga ikagi yatun ta kafamiliam onu ta kokkofummu. Kunnatun kari gapa i natageno mu turi ta naginnam i kapianan nga dumug ta ngamin—i mapia nga dumug na Pappatulan na Dios?
5. Anni i natageno mu turi ta ollu nga nagigiammum i kinakurug meyannung ta Uvovug na Dios? (Innan gapa i letratu ira.)
5 Nonopammu i natageno mu turi ta ollum nga nagigiammu i kinakurug ta Uvovug na Dios. Nagigiammum nga iddeddukan naka na Yamam ta langi. Ikaya na nga mabbalikka tu parte na familia na maddayaw ira nisa. Nipromesa na nga awan ngana saw tu mattaki anna mazziga-riga. Egga i iddanamam nga masingan i natay ira nga iddeddukammu nga maginnolay saw ta paraiso, anna aru paga. (Mar. 10:29, 30; Juan 5:28, 29; Roma 8:38, 39; Nep. 21:3, 4) Talaga natukkal i futum tatun ira nga kinakurug. (Luc. 24:32) Inaya mu i nagigiammum ira, anna ari mu maattamman tu siko laman i makannammu tatun!—Ikumpara i Jeremias 20:9.
Turi ta nagigiammu tam i kinakurug ta Biblia, ari tam maattamman tu sittam laman i makannammu tatun! (Innan i parapo 5)
6. Anni i magigiammum ta ekspiriensa ni Ernest anna ni Rose?
6 Innattam i tadday nga ekspiriensa. Mafulu i dagun ni Brother Ernest b turi ta natay i yama na. Istorian na: “Nononopakku: ‘Minay kari yayya ta langi? Onu talaga awan ngana yayya?’ Namassil ngà ta abbing ira nga egga paga i yama da.” Kanayun nga umay si Ernest ta sementeriu anna mappalittukag ta panchon na yama na, tapus ipakimallo na: “Dios ku, please, kagiammu bi nu sitaw i dian ni Papa.” Nappasa i 17 dagun kabalin na patay na yama na, na-oferan si Ernest tu Bible study anna inalawa na yatun. Magayayya yayya ta nakannammuan na nga awan tu ammu na natay anna gitta na agga-katrug laman ira. Nagigiammu na ta Biblia i promesa nga paginnolay. (Ecl. 9:5, 10; King. 24:15) Nalegan na balaman i tabbag ta pakkiavu na ira nga piga ragun na ngana nga ala-alegan! Talaga magayayya si Ernest ta nagigiammu na ira nga kinakurug ta Biblia. Nappa-Bible study gapa i atawa na nga si Rose anna parehas nga inaya da i mensahe na Pappatulan. Na-baptize ira turi ta 1978. Matalikarag da nga nilayyagayya i pangurug da ta kafamilia, kokkofun, anna maski sinni nga magginna ta nira. Megafu tatun, maturu tu 70 i noffunan ni Ernest anna Rose nga mappa-baptize.
7. Anni i mesimmu nu negamu ta futu tam i aya tam ta kinakurug ta Biblia? (Lucas 6:45)
7 Manawag gafu nga nu negamu ta futu tam i aya tam ta kinakurug ta Biblia, kakayà tam nga ikagi yatun ta ngamin. (Bibbigan i Lucas 6:45.) Kunnatun gapa i natageno na ollu-siglo nga disipulos ni Jesus nga nakkagi: “Arian na awayya tu ariam-mi nga ilammuyag i nasingan anna nagigginna mi ira.” (King. 4:20) Kuruga ayatattam i kinakurug yari ta ikaya tam nga ilayyagayya yatun ta mas aru nga totolay adde ta posible.
MALLAYYAGAYYA ITTAM MEGAFU TA AYA TAM TA TOTOLAY
8. Anni i mamaguyu ta nittam tapenu iyadde ta tanakuan i mapia nga dumug? (Innan i kahon nga “ Ayatan i Totolay—Pabbalinan Ira tu Disipulo.”) (Innan gapa i letratu.)
8 Kagitta ni Jehova anna ni Jesus, ayatattam gapa i totolay. (Prov. 8:31; Juan 3:16) Makatageno ittam tu allo turi ira ta ‘awan tu Dios da’ anna ‘awan tu iddanama da.’ (Efe. 2:12) Kagitta da i malaggabban ta problema ira, anna egga nittam i life vest nga kawagadda—i mapia nga dumug na Pappatulan na Dios. Nu ayatan anna ikallo tam ira, kuattam i adde na mawayya tam nga iyadde nira i mapia nga dumug. Gafu tatun nga nabalor nga mensahe, mapannu i futu da tu pagiddanama, mapeggan ira tu kapianan nga pattolay sangawe, anna egga i chansa da nga maekspiriensa i “kurug nga pattolay”—i mannanayun nga inango ta paraiso.—1 Tim. 6:19.
Nu ayatan anna ikallo tam i totolay, kuattam i adde na mawayya tam nga iyadde nira i mapia nga dumug (Innan i parapo 8)
9. Anni nga abiso i ikagi tam meyannung ta mappange, anna ngatta? (Ezekiel 33:7, 8)
9 Paguyuan ittam paga na aya tam ta totolay tapenu abisowan ira ta araranni ngana nga kadaral naw nga marake nga mundo. (Bibbigan i Ezekiel 33:7, 8.) Ikallo tam i kasittoletam anna i ari Saksi nga kafamilia tam. Aru ta nira i tuloy lapa i pattoleda ta kada aggaw ngem ari da ammu nga araranni ngana i ‘kanninipang nga ziga-riga nga mas paga ta nesissimmu gari namegafu ta nekaparo na mundo adde sangoye anna awan noka ngana vuluvuga tu kagitta na.’ (Mat. 24:21) Ikaya tam nga mannammuadda nu anni i mesimmu ta tiempo na pamanunnu. Ollu, madaral i falsu nga relihion. Kabalin natun, madaral yaw nga marake nga mundo ta Armagedon. (Nep. 16:14, 16; 17:16, 17; 19:11, 19, 20) Ipakimallo tam nga aru nakuan i magginna ta abiso tam adde ta posible anna mevulu ira ta nittam ta passerbi kani Jehova. Ngem kunnasi gapa danuri ari nga magginna ta abiso tam sangawe, nelavu i iddeddukattam nga kafamilia?
10. Ngatta apuradu ngana i pangabiso tam?
10 Kagitta na nepakanawag ta nappasa nga artikulo, posible tu uray ni Jehova nga ipaliag i totolay nga manguli sonu masingadda i kadaral na Madumu-rumug nga Babilonia. Nu kunnatun, mas gafu apuradu i pangabiso tam nira. Pannonopan yaw: Posible tu manono da saw uli i kagiattam ta nira sangawe. (Ikumpara i Ezekiel 33:33.) Awayya na tu manono da saw uli i abiso nga naginna da ta nittam anna mapaguyu ira nga mevulu nittam ta paddayaw kani Jehova nage da paga nga mofutan tu oras. Kagitta na guardia ta affukutan ta Filipos nga nanguli laman turi ta “nallunig tu masikan,” awayya na tu i karuan ta ari magginna sangawe ay manguli balaman sonu masingadda i kakkadda-kaddag nga kadaral na Madumu-rumug nga Babilonia.—King. 16:25-34.
MALLAYYAGAYYA ITTAM MEGAFU TA AYA TAM KANI JEHOVA ANNA TA NGAGAN NA
11. Kunnasi tam nga meyawa kani Jehova i kekakua, dayaw, anna pakapangngua? (Nepakannammu 4:11) (Innan gapa i letratu ira.)
11 I pinaka-importante nga rason nu ngatta ilayyagayya tam i mapia nga dumug ay megafu ta ayatattam si Jehova nga Dios anna i masanto nga ngagan na. Imammatattam i ministerio tam nga makedayaw ta Dios nga ayatattam. (Bibbigan i Nepakannammu 4:11.) Napafutuan ittam nga umanugu taw: “Yafu anna Dios mi! Mekunnay nikaw i kekakua, dayaw anna pakapangngua!” Meyawa tam nisa i kekakua anna dayaw nu ipakannammu tam ta tanakuan i makakumbinsi nga ebidensia nga ‘pinaro na ngamin i adde na’ anna matolay ittam megafu ta niyawa na nga inango. Meyawa tam nisa i pakapangngua tam nu usattam i tiempo, siki-sikan, anna i pakkukua tam ira tapenu makapallayyagayya ta adde na mawayya tam. (Mat. 6:33; Luc. 13:24; Col. 3:23) Fermi gafu i aya tam nga ikagi i meyannung ta Dios nga ayatattam. Mapaguyu ittam gapa nga ikagi ta tanakuan i ngagan na anna i kualidad na ira. Ngatta?
Meyawa tam kani Jehova i pakapangngua tam nu usattam i tiempo, siki-sikan, anna i pakkukua tam ira tapenu makapallayyagayya ta adde na mawayya tam (Innan i parapo 11)
12. Kunnasi tam mapakasanto i ngagan ni Jehova ta pallayyagayya tam?
12 Paguyuan ittam na aya tam kani Jehova nga pakasantowan i ngagan na. (Mat. 6:9) Kayà tam nga makiparte ta pangikagi ta tanakuan nga ari tu kurug i ngamin nga kinaladdug ni Satanas meyannung kani Jehova. (Gen. 3:1-5; Job 2:4; Juan 8:44) Nu mallayyagayya ittam, ikaya tam nga ikagi ta ngamin nga magginna nu sinni talaga si Jehova anna i kualidad na ira. Ikaya tam nga mannammuan na ngamin nga aya i kapianan nga kualidad na anna matunung anna patas i pammagurena. Aranni ngana nga pawanan na Pappatulan na i ngamin nga ziga-riga anna mangirattal tu imammo anna pagayayya ta ngamin nga totolay. (Sal. 37:10, 11, 29; 1 Juan 4:8) Nu idefensa tam i reputasion ni Jehova ta ministerio tam, mapakasanto tam i ngagan na. Magayayya ittam gapa megafu ta kukukuattam i responsibilidad tam bilang Saksi ni Jehova. Kunnasi?
13. Ngatta kedayawattam i magalan bilang Saksi ni Jehova? (Isaias 43:10-12)
13 Inagalan ittam ni Jehova nga ‘saksi na.’ (Bibbigan i Isaias 43:10-12.) Aru ngana nga dagun i nappasa, tadday nga tura naggafu ta Manangngal nga Baggi i nakkagi: “I kadakallan nga dayaw nga awayya tam malawa ay i magalan bilang Saksi ni Jehova.” c Ngatta kunnatun? Ikonsidera yaw nga ilustrasion. Egga i nangakusa niko nga nangngua ka tu marake. Sinni i piliammu nga mattestigu para ta niko ta korte? Magga piliammu i tolay nga kilalam anna pattalakkammu. Piliammu i makasta i reputasion na tapenu mangurug i totolay ta ikagi na. Ta pappili ni Jehova nittam bilang Saksi na, ipasingan na nga kuruga kilala na ittam anna mattalo yayya nga testiguattam nga yayya laman i kurug nga Dios. Talaga kedayawattam i pabbalin tu Saksi na. Approbetchattam i kada oportunidad nga ipakannammu i ngagan na anna pakurugan nga kinaladdug i ngamin nga pamara-parake kontra nisa. Nu kuattam yatun, makapattolay ittam segun ta nengagan ta nittam—Saksi ittam ni Jehova!—Sal. 83:18; Roma 10:13-15.
ARI ITTAM MAGIMMANG NGA MALLAYYAGAYYA ADDE TA PANUPPALAN
14. Anni ira i exciting nga gannug nga araranni ngana nga mesimmu?
14 Talaga excited ittam nga masingan i araranni ngana nga mesimmu! Ta bendision ni Jehova, iddanamattam nga masingan i mas aru paga nga totolay nga mangalawa ta kinakurug nage mamegafu i dakal nga ziga. Maski sonu maddaggun ngana i karigatan nga tiempo, i dakal nga ziga, excited ittam gapa nga mas aru saw i awayya na tu mallawan ta mundo ni Satanas anna mevulu nittam ta paddayaw kani Jehova!—King. 13:48.
15-16. Anni i itulu-tuloy tam nga kuan, anna adde sonu anni?
15 Durante nga maginnag ittam, egga i importante nga trabahu nga kuattam—i trabahu nga ari ngana vuluvuga makua uli. Pribilehio tam nga ilayyagayya i mapia nga dumug na Pappatulan na Dios ta interu davvun. Itulu-tuloy tam gapa nga abisowan i totolay meyannung ta araranni ngana nga mesimmu. Mawag nga mannammuadda nga paspas ngana i kadaral naw nga marake nga mundo. Sonu duttal yatun nga tiempo na pamanunnu, mannammuadda saw nga naggafu kani Jehova nga Dios i mensahe nga ilayyagayya tam.—Eze. 38:23.
16 Anni gafu i determinadu nga kuattam? Paguyuan ittam na aya tam ta mapia nga dumug, aya ta kasittoletam, anna i pinaka-importante ta ngamin, i aya tam kani Jehova nga Dios anna ta ngagan na tapenu ari ittam magimmang nga mallayyagayya. Kakayà tam nakuan nga kuan yatun. Ari tam italattan yatun anna matalikarag ittam adde sonu kagian ni Jehova, “fustu ngana!”
KANSION 54 “Yaw i Dalan”
a Nesimmu i annual meeting turi ta Oktubre 7, 2023 ta Newburgh Assembly Hall of Jehovah’s Witnesses ta New York, U.S.A. Nepagiraw i interu nga programa ta JW Broadcasting®—Part 1 turi ta Nobiembre 2023 anna Part 2 turi ta Enero 2024.
b Innan i artikulo nga “Humanga Ako sa Malinaw at Makatuwirang Sagot ng Bibliya” nga nepublisa turi ta Pebrero 1, 2015 nga Ang Bantayan.