MAGIGIAMMU NGA ARTIKULO 21
KANSION 107 I Nadiosan nga Panuttulan ta Aya
Kunnasi Ka Makaleg tu Mapia nga Atawa?
“Sinni i makaleg tu mapia nga atawa nga babay? I balor na ay kuruga mangina anne ta korales ira.”—PROV. 31:10.
I MAGIGIAMMU TAM
Prinsipio ira ta Biblia nga makaduffun tapenu makaleg tu mapia nga atawa anna nu kunnasi makaduffun i tanakuan ta single ira nga kayà da ngana i mangatawa onu makitawa.
1-2. (a) Anni nakuan ira i ikonsidera na single ira nga Cristiano nage da mangayaya? (b) Anni i kayà na kagian na “pangayaya”? (Innan i “Kebalinan na Termino.”)
KAYÀ mu ngana kari i mangatawa onu makitawa? Siempre, ari gapa mawag tu mangatawa ka tapenu mabbalikka tu magayayya. Ngem aru lagapa nga single nga wawwaragi, mabbing man onu manakam, i ikaya da gapa i mangatawa. Ngem nage mu mangayaya, mawag tu maladda i relasiommu kani Jehova, kilalam tu mapia i baggim, anna kayam saw nga tolayan i familiam. a (1 Cor. 7:36) Nu kunnatun i kuammu, dakal i chansa nga mabbalin saw tu magayayya i pagatawa nu.
2 Ngem nu mittan, mariga i magaleg tu mapia nga atawa. (Prov. 31:10) Maski paga nu egga ngana i korsunadam, awayya na tu mariga lagapa nga igafu i pangaya onu pangayaya. b Taw nga artikulo, pabbiridattam nu kunnasi makaleg i Cristiano ira tu mapia nga atawa anna nu kunnasi da nga igafu i pangayaya. Ammuattam gapa nu kunnasi nga masuportan na wawwaragi danuri kayà da ngana i mangatawa.
PAGALEG TU MAPIA NGA ATAWA
3. Anni ira i mawag nga ikonsidera na single ira nu magaleg ira tu atawa?
3 Nu kayà mu ngana i mangatawa, makasta nu iyavu mu labbi ta baggim nu anni kari i ala-alegammu ta tadday nga atawa nage mu igafu i pangayaya. Ta nu ariammu kuan yatun, baka ariammu masingan nga mapia gabba i tadday nga babay para ta niko onu baka mangayaya ka ta tadday nga ari tu mapia niko. Siempre mawag tu bawtisadu nga Cristiano i maski sinni nga kayà mu atawan. (1 Cor. 7:39) Ngem ari tu gafu ta bawtisadu ay mapia ngana nga atawa para niko. Yayya nga iyavu mu ta baggim: ‘Anni kari ira i goal ku? Anni kari ira i ugali nga ala-alegakku ta atawakku? Rasonable kari danatun nga ikikkiddò?’
4. Anni ira i ipaki-pakimallo na karuan?
4 Nu kayà mu ngana i mangatawa, magga nipakimallo mu ngana i meyannung tatun. (Fil. 4:6) Siempre, ari nga ipromesa ni Jehova nga iddan na ittam tu atawa. Ngem ikavurungan na i mawag mu ira anna i mataga-tageno mu, anna maduffunan naka tapenu makaleg ka tu atawa. Yayya nga kanayummu lapa ikagi nisa nu anni ira i kayà mu anna i mataga-tageno mu. (Sal. 62:8) Ipakimallo mu nga mabbalikka nakuan tu minappasensia anna masirib. (Sant. 1:5) Kunnaw i istorian na single nga si John c nga taga-United States nu anni i ilavu na ta pakimallo na ira: “Ikagì kani Jehova nu anni ira nga ugali i kayà ku ta mabbalin tu atawà. Ipakimallo ku nga egga nakuan ira i chansa nga makaleg ngà tu mapia nga atawa. Ikiddò gapa kani Jehova nga duffunan nà nga mepasingan i ugali ira nga mamabbalin nio tu mapia nga atawa nga lalaki.” Kagian gapa ni Sister Tanya nga taga-Sri Lanka: “Habang maginnag ngà tu mapia nga paki-atawan, ikikkiddò kani Jehova nga duffunan nà nga kanayun ngà lapa nakuan nga matalo anna masaya.” Maski nu ari ka insigida makaleg tu mapia nga atawa, ipromesa ni Jehova nga kanayun na lapa iyawa i pisikal anna i emosional nga kawagammu.—Sal. 55:22.
5. Anni ira i chansa na single ira nga Cristiano tapenu makakilala tu tanakuan nga single nga mangiddu kani Jehova? (1 Corinto 15:58) (Innan gapa i letratu.)
5 Pagaramman ittam na Biblia nga ‘mallallappo ittam nga kanayun ta trabahu tam nga masserbi ta Yafu.’ (Bibbigan i 1 Corinto 15:58.) Habang busy ka ta passerbim anna madduruma nga wawwaragi i makavulu mu, ari laman tu ma-enjoy mu i makapagaram nga pakikavulu nira. Chansa gapa yatun tapenu makakilala ka tu kagittam nga single nga nakafokus ta passerbi kani Jehova. Habang kukukuammu gapa i adde na mawayyam tapenu mapagayayya si Jehova, mabbalikka tu kuruga magayayya.
Nu kanayukka nga busy ta passerbim anna madduruma nga wawwaragi i makavulu mu, awayya na tu makakilala ka gapa tu maya nga makitawa (Innan i parapo 5)
6. Anni nakuan i daddamman danuri na single habang magaleg tu atawa?
6 Ngem daddammammu yaw: Ari nakuan tu i pagaleg tu atawa i fokus mu. (Fil. 1:10) Nakadepende i kurug nga pagayayya ta relasiommu kani Jehova, ari tu megafu ta egga i atawam onu single ka. (Mat. 5:3) Habang single ka paga, mas aru i tiempom nga palawan i ministeriom. (1 Cor. 7:32, 33) Usammu tu mapia yaw nga tiempo. Kunnatun i kingngua ni Sister Jessica nga taga-United States. Nakitawa yayya turi ta aranni ngana yayya nga makkuarenta. Kinagi na, “Kanayun ngà nga busy ta ministerio, yayya nga kontentu ngà maski kayà ku nakuan i makitawa.”
PAPPASAMMU I TIEMPO ANNA MAGOBSERBA KA
7. Ngatta makasta nu pappasammu labbi i tiempo anna obserbammu i tadday nga tolay nage mu nga ikagi tu korsunadam yayya? (Proverbio 13:16)
7 Kunnasi nu masingammu nga i tadday nga tolay ay mapia nga atawa para ta niko? Insigida kari nga ikagim nisa nga korsunadam yayya? Kagian na Biblia nga ammuan labbi na ma-uto nga tolay i tadday nga gannug nage na nga magguyu. (Bibbigan i Proverbio 13:16.) Kunnasi ka gafu mabbalin tu ma-uto? Pappasammu labbi i tiempo anna ariammu ipahalata nga oobserbammu yayya nage mu nga ikagi tu korsunadam yayya. Kagian ni Brother Aschwin nga taga-Netherlands: “Mabi laman nga ma-develop i feelings, ngem mabi laman gapa yatun mawawwan. Yayya nga nu pappasammu labbi i tiempo anna obserbammu yayya tu mapia, ari ka mangayaya tu nebase laman ta emosion nga mawawwan balaman saw.” Habang obserbammu gapa i tadday nga tolay, baka manono mu balaman saw nga ari yayya tu mapia para ta niko.
8. Anni i kuan na tadday nga single tapenu maobserba na i kayà na nga atawan? (Innan gapa i letratu.)
8 Anni i kuammu tapenu arian na mahalata nga oobserbammu yayya? Ta study ira onu ta gatherings, mapansin mu i espiritualidad natun nga tolay, i ugali na, anna i agguyu-guyu na. Sinni kari ira i kokkofun na? Anni gapa i kanayun na nga istorian? (Luc. 6:45) Parefu kamu kari tu goal? Puede ka gapa makkiavu ta elder ira ta kongregasiodda onu ta karuan paga nga matured nga makannammu nisa tu mapia. (Prov. 20:18) Puedem nga iyavu ta nira nu kumusta kari i reputasion anna i ugali natun nga tolay. (Ruth 2:11) Habang obserbammu yayya, siguraduammu nakuan nga ari na matageno tu kagitta na iimbestigammu yayya. Irespetom i mataga-tageno na anna i pribadu nga pattolena.
Nage mu nga maddiga, pappasammu labbi i tiempo anna ariammu ipahalata tu oobserbammu yayya (Innan i parapo 7-8)
9. Nage ka nga mangisikka tu aya mu, ta anni ka nakuan nga kumbinsidu?
9 Kunnasi nakuan kabayag i pagobserbam nage mu ikagi nisa tu korsunadam yayya? Nu insigida ka nga mangisikka tu aya mu onu maddiga, baka nonopan na tu basta-basta ka laman nga maddesision. (Prov. 29:20) Ngem nu kebbayag ka gapa nga mangisikka, baka nonopan na tu ari ka nga siguradu, jebi ngana nu nahalata natun nga tolay nga korsunadam yayya. (Ecl. 11:4) Siempre, nage mu nga ikagi i mataga-tageno mu, ari gapa tu mawag nga kumbinsidu ka nga atawammu ngana yayya. Ngem kumbinsidu ka nakuan nga preparadu ka ngana mangatawa anna yatun nga tolay i mepangngo nga atawammu.
10. Anni nakuan i kuammu nu matageno mu nga korsunada naka na tadday nga tolay, ngem ariammu yayya nga korsunada?
10 Kunnasi nu matageno mu nga korsunada naka na tadday nga tolay? Nu ariammu mabba yayya korsunada, manawag nakuan yatun ta agguyu-guyum. Matakitammu laman garay yayya nu nonopan na nga posible nga mabbalin tu sikamu maski nu ari mabba.—1 Cor. 10:24; Efe. 4:25.
11. Ta lugar ira nu sitaw iyunnug na tanakuan i pangayaya onu pagatawa, anni ira i mawag tu mekonsidera?
11 Ta karuan nga lugar, i magana onu i tanakuan nga adulto i mappili tu atawa para ta single nga kafamilia da. Ta tanakuan gapa, i kafamilia onu kokkofun na tadday nga single i magaleg tu posible nga atawan na tapus iyunnug da nga makkasingan onu makkavulu i lalaki anna babay tapenu masingadda nu kayà da i mad-date. Nu nekiddaw niko nga iyunnug mu i pangayaya onu pagatawa, parehu nga ikonsideram i kayà anna i pakawagadda. Nu nakaleg ka ngana tu posible nga atawadda, kilalammu tu mapia yatun nga tolay, i ugali na ira, anna i pinaka-importante, i espiritualidad na. Mas importante nga makasta i sinaddag na ta espiritual anne ta aru i kuartu na, edukadu, onu prominente. Ngem daddammammu nga i brother onu sister lapa i mawag nga mangngua ta ultimu nga desision nu magatawa ira.—Gal. 6:5.
PANGAYAYA
12. Nu egga i korsunadam, kunnasim nga mekagi yatun ta nisa?
12 Nu kayà mu nga ayayatan i tadday, kunnasim ikagi nisa i mataga-tageno mu? d Puedem nga iplano nga kibbidan yatun nga tolay ta personal onu magagal ka nisa ta cellphone. Manawag nakuan nga ikagim nisa nga kayà mu nga mas makilala paga yayya. (1 Cor. 14:9) Nu kawagan, iddammu yayya tu tiempo tapenu mannono ta itabbag na niko. (Prov. 15:28) Ngem nu manaki natun nga tolay nga ayayatammu yayya, irespetom i panageno na.
13. Anni i kuammu nu egga i makkagi ta niko nga korsunada naka? (Colosas 4:6)
13 Kunnasi nu egga nakkagi ta niko nga kayà naka? Magga nigutu-gutu na nga ikagi niko yatun. Yayya nga masippo ka nakuan ta nisa anna irespetom yayya. (Bibbigan i Colosas 4:6.) Nu mawag mu paga i tiempo tapenu pannonopan nu umanugu ka nga ayayatan naka, ikagim yatun ta nisa. Ngem ariammu nakuan nga ibaya-bayag yatun. (Prov. 13:12) Nu ariammu yayya nga korsunada, masippo nakuan anna manawag nga ikagim yatun ta nisa. Istorian ni Brother Hans nga taga-Austria nu anni i nitabbag na turi ta nikagi na tadday nga sister nga kayà na yayya: “Nikagì ta nisa i desisiokku. Masippo anna manawag i pinakkagì tatun. Kingnguà yatun insigida megafu ta manaki ku nga umasa yayya. Kabalin nga nesimmu yatun, nagimmugug ngà ngana gapa nga ariakku makkagi onu mangngua tu maski anni nga gannug nga nonopan na tu manguli balaman saw i nono ku.” Ngem nu angngarigan na man tu korsunadam gapa i mangaya niko, pabbidan nu i mataga-tageno nu anna nu anni i ekspektan nu ta pangayaya. Awayya na garay nga makkaduma i ekspektan nu, depende ta kultura onu karuan paga nga rason.
KUNNASI NGA MASUPORTAN NA TANAKUAN I SINGLE IRA?
14. Kunnasi tam masuportan danuri single nga wawwaragi gukaban na kakkagiattam?
14 Anni i makua tam ngamin tapenu masuportan danuri single nga kayà da ngana i mangatawa? Magimmugug ittam nakuan ta kakkagiattam. (Efe. 4:29) Puede tam iyavu ta baggi tam: ‘Asa-asarakku kari danuri kayà da ngana i mangatawa? Nu egga i masingakku nga single nga brother anna single nga sister nga mabbibida, nonopakku kari insigida nga kayà da i kataggi-tadday?’ (1 Tim. 5:13) Fuera tatun, ari tam nakuan ipatageno ta single ira nga gitta na egga i kurang nira megafu ta awan tu atawa da. Kunnaw i kagian ni Hans nga nakagi ta nappasa nga parapo: “Egga i karuan nga wawwaragi nga makkagi nio, ‘Ngatta ari ka pagalaman mangatawa? Lakay ka ngana.’ Nu kunnatun i kagiattam, matageno na single ira nga ari ira nga maappresia anna mas lallagu nga ma-pressure ira nga mangatawa.” Mas makasta lallagu nu komendattam danatun nga single nga wawwaragi tam!—1 Tes. 5:11.
15. (a) Segun ta prinsipio ta Roma 15:2, anni nakuan i ikonsidera tam nage tam nga uffunan i magaleg tu atawa? (b) Anni ira nga punto ta video i nagustuammu?
15 Kunnasi nu masingattam nga bagay i tadday nga brother anna sister? Kagian na Biblia nga ikonsidera tam i panageno na tanakuan. (Bibbigan i Roma 15:2.) Aru nga single i manaki da nga mereto ira. Yayya nga irespeto tam nakuan nu anni i kayà da. (2 Tes. 3:11) Egga gapa i karuan nga okay laman ta nira nga maduffunan ira, ngem nu ariadda mabba ikiddaw yatun ta nittam, ariattam nakuan makialam. e (Prov. 3:27) Egga ira i single nga ariadda kayà i formal nga mepakilala ta kataggi-tadday. Kagian na single nga si Sister Lydia nga taga-Germany: “Puedem nga isali yatun nga brother anna sister ta tadday nga gatherings. Basta mangngua kamu laman tu chansa para ta nira dua nga makkavulu ira anna makkakilala. Ngem bahala na lapa saw ira nu makayakadda i kataggi-tadday.”
Makasta nga chansa i gatherings tapenu makka-ammammu i single ira (Innan i parapo 15)
16. Anni nakuan i daddamman na single ira nga Cristiano?
16 Sittam ngamin, single man onu sigga-atawan, ay awayya na nga mabbalin tu magayayya ta pattolay! (Sal. 128:1) Yayya nga nu kayà mu ngana i mangatawa onu makitawa ngem awan paga tu nalegammu, maffokus ka laman ta passerbim kani Jehova. Kagian ni Sister Sin Yi nga taga-Macao: “Nonopammu nga apapaddu saw i tiempo nga makavulu mu i atawam ta Paraiso kumpara ta abababba laman nga tiempo sangawe nga single ka. I-enjoy mu yaw nga tiempo anna usammu tu mapia.” Ngem kunnasi nu nakaleg ka ngana tu mapia nga paki-atawan anna mannobio kamu ngana? Ta tumunug nga artikulo, pabbidattam nu kunnasi nga makasta i pattuppalan na relasion nu.
KANSION 137 Matalo nga Babbay
a Tapenu mammuammu nu ready ka ngana, innan ta jw.org i artikulo nga “Paki-date—Part 1: Ready Ngà Ngana Kari nga Maki-date?”
b KEBALINAN NA TERMINO: Taw nga artikulo, i “pangaya” onu “pangayaya” ay tumukoy ta tiempo nu kanni nga maddiga onu mangisikka tu aya i tadday ta korsunada na, onu nu kanni nga ayayatan na lalaki i babay tapenu mabbalin yayya tu nobia na. I termino gapa nga “pannobio,” nga meyusa ta tumunug nga artikulo, ay tumukoy ta tiempo nu kanni nga manawag ngana ta lalaki anna babay nga kayà da i kataggi-tadday onu ira ngana. Tatun nga tiempo, mas makkakilala ira anna mammuadda nu mepangngo ira ta kataggi-tadday, anna mattulu-tuloy yatun nga relasiodda adde ta madesisiodda nga makkasal onu mab-break ira.
c Natalian i karuan nga ngagan.
d Ta karuan nga kultura, maruddu nga i brother i mangisikka tu aya onu maddiga ta sister. Ngem awan gapa tu marake nu sister i ollu nga makkagi ta brother. (Ruth 3:1-13) Para ta mas aru nga informasion, innan i artikulo nga “Ang mga Kabataan ay Nagtatanong . . . Paano Ko Kaya Masasabi sa Kaniya ang Aking Nadarama?” ta Oktubre 22, 2004 nga Gumising!
e Innan ta jw.org i video nga Nitaddaggadda i Pangurug Da—Danuri Awan tu Atawa Na.
