1. Anni i ipamavulun ni Jehova nga kuattam?

IPAMAVULUN ni Jehova nga maddesision ittam nu anni i kayà tam nga pattolay. Tudduanna ittam nu kunnasi i mangngua tu mapia nga desision, anna uffunanna ittam nga mavviktoria nu yatun nga desision ay mamagayayya nisa. (Sal. 119:173) Nu kanayuttam nga iyaplika i sirib nga malegan ta Uvovug na Dios, mas makapaddesision ittam tu mapia.​—Heb. 5:14.

2. Anni i meparubang nga problema nittam kabalittam nga nangngua tu desision?

² Maski nu makakua ittam tu masirib nga desision, awayyana nga marigatan ittam nga balinan i pinegafuanattam. Ikonsidera i angngarigan ira: Naddesision i tadday nga kabataan nga brother nga bibbigan i interu nga Biblia. Netuppalna yatun ta piga nga ligguan ngem niyemmanna gabbalaman. Naddisidi gapa i tadday nga sister nga mappayunir ngem kanayunna italattan yatun. Nakka-anugutan na baggi na elder ira nga mas paga nga mas-shepherding ta wawwaragi ta kongregasion ngem kabalin na piga nga vulan ariadda paga pinegafuanan yatun. Madduruma danaw nga situasion, ngem egga i papparehuadda. Mangngua ira tu desision ngem ariadda natuppal i desisiodda ira. Kunnatun gapa i problema na ollu-siglo ira nga Cristiano ta Corinto. Gigiammuattam i meyannung nira.

3. Anni nga desision i kingngua na taga-Corinto ira, ngem anni i resultana?

³ Mga 55 C.E., egga i importante nga desision nga kingngua na taga-Corinto ira. Nammuadda nga mazziga-riga anna poppobre i wawwaragida ta Jerusalem anna ta Judea anna makkolo-kolekta i tanakuan nga kongregasion ira tu kuartu nga mosa ta panguffun nira. Megafu ta kinasippo anna kinavuka-palagda, naddesision i taga-Corinto ira nga maddona ta makawag nga wawwaragida anna niyavuda kani apostol Pablo nu kunnasi ira makoffun. Nangipatulug si Pablo tu instruksion ira ta kongregasion anna sinunnona si Tito nga manguffun ta pakkolekta ta  kuartu nga nedona. (1 Cor. 16:1; 2 Cor. 8:6) Ngem piga vulan i nappasa, nammuan ni Pablo nga ari sinuppal na taga-Corinto ira i planoda. Bilang resultana, siguradu nga ari nga nakaprepara i kontribusiodda ta mepangngo nga tiempo nga meyangay nakuan yatun ta Jerusalem kavulu i kontribusion na tanakuan paga ira nga kongregasion.​—2 Cor. 9:4, 5.

4. Kagittana mabibbig ta 2 Corinto 8:7, 10, 11, anni i nipagaram ni Pablo nga kuan na taga-Corinto ira?

⁴ Makasta i desision nga kingngua na taga-Corinto ira, anna kinomendan ni Pablo i matuyag nga pangurugda anna i pakkaragada nga mabbalin tu vuka-palag. Ngem mawag gapa nga pagarammanna ira nga balinadda i pinegafuanadda. (Bibbigan i 2 Corinto 8:7, 10, 11.) Ituddu nittam na ekspiriensada nga marigatan gapa nga mangituppal ta mapia nga desision maski i matalo ira nga Cristiano.

5. Anni ira nga pakkiavu i tabbagattam?

⁵ Kagitta na taga-Corinto ira, awayyana nga marigatan ittam nga tuppalan i desisiottam ira. Ngatta? Megafu ta imperfekto ittam, awayyana nga mangitalattan ittam. Onu mabbalin nga imposible nittam nga tuppalan i nadesisionattam nga kuan megafu ta ari ekspektan ira nga mesimmu. (Ecl. 9:11; Roma 7:18) Anni i mawag nga kuattam nu repasuattam i desision nga nakua tam ta nappasa anna nu kawagattam nga ulian yatun? Anna kunnasi tam mabbalin tu mas efektibo ta pangibalin ta napegafuanattam?

6. Kanni tam nga mawag ulian i desisiottam?

⁶ Egga ira i importante nga desision nga ariattam ngana puede ulian. Angngariganna, dinesisiottam nga si Jehova laman i passerbiattam, anna determinadu ittam nga mabbalin tu matalo ta atawa tam. (Mat. 16:24; 19:6) Ngem egga gapa i desision ira nga mawag tam nga ulian. Ngatta? Megafu ta manguloli i situasion. Anni ira nga dakkua i makoffun nittam tapenu makua tam i kakastan nga desision adde ta posible?

7. Anni nakuan i ipakimallo tam, anna ngatta?

⁷ Makimallo para ta sirib. Ininspiran ni Jehova si Santiago nga itura: “Nu egga nikamu i makkurang ta ka-uto, mawag tu makimallo ta Dios, ay meddan yaya. Ta vuka i palag na Dios.” (Sant. 1:5) Nu karuan, ‘makkurang ittam ta ka-uto.’ Yari tu mappoffun ka kani Jehova nu mangngua ka tu desision anna nu mawag nga uliammu i tadday nga desision nga nakuam ngana. Nu kunnatun, uffunan naka ni Jehova nga masirib nga maddesision.

8. Anni nga parresearch i kuattam nige tam maddesision?

⁸ Marresearch tu mapia. Makkonsulta ta Uvovug na Dios, bibbigan i publikasion ira na organisasion ni Jehova, anna makibbida ka ta totolay ira nga mapammakatalakkammu. (Prov. 20:18) Importante i parresearch nige maddesision ta panguli tu trabahu, ta pagali, onu ta pappili tu edukasion nga makoffun nikaw tapenu makonnug ka ta passuporta ta ministeriom.

9. Kunnasi ittam mabenefisiowan nu mapammakatalakkan ittam?

⁹ Usitakkan i motibom ira. Importante kani Jehova i motibo tam. (Prov. 16:2) Ikayana nga mapammakatalakkan ittam ta ngamin nga gannug. Yari tu nu mangngua ittam tu desision, ikaya tam gapa nga usitakkan i baggi tam anna ammuan i motibo tam ira. Nu ari ittam mapammakatalakkan, marigatan ittam nga ituppal i desisiottam. Angngariganna, awayyana nga nadisidi na mabbing nga brother i mabbalin tu regular payunir. Ngem egga ira i tiempo nga marigatan yayya nga maggawa ta mekiddaw nga oras anna ari kuruga yayya magayayya ta ministeriona. Awayyana  nga nanonona nga i primeru nga motibona nga mappayunir ay tapenu mapagayayya si Jehova. Posible kari gapa nga i kurug nga motibona ay tapenu mapagayayyana i maganana onu i tanakuan nga totolay?

10. Anni i kawagan ta pangngua tu panguloli?

¹⁰ Ikonsidera i situasion na tadday nga Bible study nga naddesision nga magimmang ta passigariliu. Inattammanna i ari massigariliu tu tadday onu dua nga ligguan maski nu mariga yatun para nisa. Ngem nanoli mangana yayya nga massigariliu. Ta pappasa na tiempo, nalabananna gabbalaman yatun! I ayana kani Jehova anna i pakkaragana nga pagayayyatan Yayya i nakoffun nisa tapenu affutan yatun nga bisiu.​—Col. 1:10; 3:23.

11. Ngatta mawag nga egga espesipiko nga gakkag tam?

¹¹ Mabbalin tu espesipiko. Nu espesipiko i gakkag mu, mas mabi mu nga madde danatun. Angngariganna, awayyana nga nadisidim nga mas kanayun nga bibbigan i Biblia. Ngem nu awan tu espesipiko nga iskediul mu, baka ariammu metuppal i gakkag mu. * Onu nadesisionan na baggi na elder ira nga mas paga nga mas-shepherding ta wawwaragi, ngem ta pappasa na tiempo, ariadda paga nakua yatun nga desisiodda. Tapenu makuada yatun, awayyada iyavu danaw nga pakkiavu: “Neturami kari ngana i ngagan na wawwaragi nga mabenefisiowan na pas-shepherding? Egga kari espesipiko nga tiempo nga iniskediulmi i pabbisitami nira?”

12. Anni i awayyana nga kuattam, anna ngatta?

¹² Mabbalin tu realistiko. Awan nittam i tiempo, rimienta, onu sikan tapenu kuan i ngamin nga gannug nga ikaya tam nga kuan. Yari tu mabbalin tu realistiko anna rasonable. Nu kawagan, awayyam nga ulian i desision ira nga ammum nga ari makaya na abilidad mu. (Ecl. 3:6) Angngariganna, nirepasom i desisiommu, inulim nu kawagan, anna natageno mu nga makuam yatun. Ikonsideram i lima nga dakkua nga makoffun nikaw tapenu mabalimmu i pinegafuanammu.

13. Kunnasi tam mapeggan tu sikan tapenu metuppal tam i desisiottam ira?

¹³ Makimallo tu sikan nga magguyu. Meyawa nikaw na Dios i ‘pakawayya nga mamarulo ta uray na’ tapenu metuppal mu i desisiommu. (Fil. 2:13) Yari tu ipakimallo mu i masanto nga espiritu ni Jehova nga iddan naka tu pakawayya nga kawagammu. Itulu-tuloy mu i makimallo maski nu gittana ari paga natabbag yatun. Kagitta na kinagi ni Jesus: “Makkiddaw kamu [tu masanto nga espiritu] ay keddak-kamu.”​—Luc. 11:9, 13.

14. Kunnasi nga i prinsipio nga mabibbig ta Proverbio 21:5 uffunan naka nga mangituppal ta desisiommu?

¹⁴ Mangngua tu plano. (Bibbigan i Proverbio 21:5.) Tapenu mabalimmu i maski anni nga proyekto nga pegafuanammu, kawagammu i tadday nga plano. Tapus kawagammu nga tuttulan nu anni i egga ta plano. Kunnatun gapa, nu mangngua ka tu desision, itura mu i espesipiko ira nga dakkua nga tuttulammu tapenu metuppal mu yatun nga desision. Nu egga i komplikadu nga kuammu, gadda-gadduammu yatun ta simple ira nga trabahu. Kada egga mabalimmu taw nga simple nga trabahu, masingammu i nabalimmu. Pinagaram ni Pablo i taga-Corinto ira nga mangisina ira para ta kontribusiodda ta “kada liggu” anne ta maginnag anna makkolekta ira tu kuartu ta paddattalna. (1 Cor. 16:2) Nu sisinupammu i darakal nga trabahu, ariammu matageno nga kagittana awan tu metuppal mu.

15. Kabalin mangngua tu plano, anni i awayyam kuan?

¹⁵ Nu itura mu i planom nga kuan, mas mabi  mu makua yatun. (1 Cor. 14:40) Angngariganna, sinunno na baggi na elder ira i tadday nga elder nga irekordna i kada desision na baggi na elder ira, nelavu tatun nu sinni i neyasayn nga mangngua tatun anna sonu anni metuppal yatun. I elder ira nga tumuttul taw nga direksion i siguradu nga maketuppal taw ira nga desision. (1 Cor. 9:26) Awayyam gapa kuan i kunnatun ta inaggaw nga pattolem. Angngariganna, awayyam mangngua tu lista na gannug ira nga kawagammu nga kuan ta kadaggaw, anna itura mu i kuammu segun ta patturunug na planom nga kuan. Makoffun nikaw yaw ari laman tapenu mabalimmu i pinegafuanammu nu ari tapenu aru i mabalimmu ta baddi nga tiempo.

16. Anni i tumunug nga kuammu tapenu metuppal mu i desisiommu, anna kunnasi yaw suportan na Roma 12:11?

¹⁶ Mappursigi ka. Kawagan i pappursigi tapenu matuttul mu i planom anna mabalimmu i pinegafuanammu. (Bibbigan i Roma 12:11.) Kinagi ni Pablo kani Timoteo nga “mappursigi” anna ‘ikagumanna’ i mapprogreso ta panuddu. Magaplika gapa yaw nga tabarang ta tanakuan nga espiritual ira nga addetan.​—1 Tim. 4:13, 16, NW.

17. Kunnasi tam meyaplika i Efeso 5:15, 16 ta pangituppal tam ta desisiottam?

¹⁷ Masirib nga usan i tiempom. (Bibbigan i Efeso 5:15, 16.) Mappili ka tu tiempo tapenu ituppal mu i desisiommu anna ariammu ulian yatun nga iskediul mu. Ibitam nga innaggan i perfekto nga tiempo nige mu magguyu; awayyana nga ari duttal yatun nga perfekto nga tiempo. (Ecl. 11:4) Magimmugug ka nga baka ufutan na ari kuruga importante nga gannug i tiempom anna kengan i sikan nga kawagammu ta mas importante ira nga gannug. (Fil. 1:10) Nu posible, piliammu i tiempo nu sitaw ari ka kuruga okupadu. Kagiammu ta tanakuan nga kawagammu i tiempo tapenu makapaffokus. Awayyam gapa addappan i cellphone mu anna ibitam i kanayun nga paningan ta e-mail mu onu ta social media. *

18-19. Anni i makoffun nikaw tapenu tulu-tuloy nga balinammu i nadisidim nga kuan maski nu mariga yatun?

¹⁸ Maffokus ta resulta. I resulta, onu vunga, na desisiommu ay negitta ta pabbiahe nga umay ta destinasiommu. Nu talaga ikaya mu nga madde yatun nga destinasiommu, itulu-tuloy mu i mabbiahe maski nu nammuammu nga mawag nga uliammu i dalammu. Kunnatun gapa, nu nakafokus ittam ta resulta na desisiottam, ariattam insigida sumuku nu meparubang ittam ta makatalattan onu makefugag ira tatun.​—Gal. 6:9.

¹⁹ Mariga i mangngua tu mapia ira nga desision, anna mariga gapa i pangituppal ira tatun. Ngem gukaban na uffun ni Jehova, mapeggakka tu sirib anna sikan nga kawagammu tapenu balinammu i pinegafuanammu.