1-2. (a) Segun ta Efeso 6:16, ngatta mawag tam i dakal nga ‘kalatag na angngurug’? (b) Anni ira nga pakkiavu i ikonsidera tam?

EGGA kari i dakal nga ‘kalatag na angngurug’ mu? (Bibbigan i Efeso 6:16.) Siguradu nga egga. Nu kunnasi nga protektan na dakal nga kalatag i interu nga baggi, protektan naka na pangurug mu ta imoralidad, kinavayolente, anna ari makadios nga influwensia naw na marake nga sistema na ganna-gannug.

² Ngem, mattolay ittam ngana ta “pangurianan ira nga aggaw,” yatutta tulu-tuloy nga mapurueban i pangurug tam. (2 Tim. 3:1) Kunnasim usitakkan tu mapia i kondision na kalatag na pangurug mu tapenu masiguradum nga matuyag yatun? Anna anni i kuammu tapenu agga-gafu mu tu mapia i kalatag na pangurug mu? Ikonsidera tam i tabbag tatun ira nga pakkiavu.

3. Anni i kukukuan na suddalu ira ta kalatagda, anna ngatta?

³ Ta tiempo na Biblia, maruddu nga natakkabban tu tabbi i kalatag na suddalu ira. Denuan na suddalu ira i kalatagda tapenu mapreserba i tabbi anna ari magattay i metal ira nga partena. Nu nasingan na suddalu nga egga i daral na kalatagna, siguraduanna nga mapakappian yatun tapenu kanayun yayya nga nakaprepara ta tumunug nga gerra. Kunnasi nga magaplika ta pangurug mu yatun nga angngarigan?

4. Ngatta mawag nga usitakkammu tu mapia i kondision na kalatag na pangurug mu, anna kunnasim kuan yatun?

⁴ Kagitta na suddalu ira ta ollu siglo, mawag nga regular nga usitakkammu tu mapia anna immugurammu i kalatag na pangurug mu tapenu kanayukka nakaprepara ta gerra. Bilang Cristiano, meparubang ittam ta espiritual nga gerra anna nelavu ta  kalabattam i marake ira nga espiritu. (Efe. 6:10-12) Awan tu tanakuan nga puede nga mammentena ta kalatag na pangurug mu. Kunnasim masiguradu nga matuyag i pangurug mu nu meparubakka ta kapurueba? Ollu, mawag nga ipakimallo mu i uffun na Dios. Tapus, kawagammu nga usan i Uvovug na Dios nga manguffun nikaw tapenu imammatan i baggim nga kunna pagimamma na Dios nikaw. (Heb. 4:12) Kagian na Biblia: “Mattalo ka kani Jehova ta interu nga futum, anna ariammu nga mattalo ta mismu nga pakalippawa mu.” (Prov. 3:5, 6) Sangawe, ngatta ta kammu nonopan kingnguam ira nga desision ta nappasa? Angngariganna, neparubakka kari ta madammo nga finansial nga problema? Nanono mu kari i promesa ni Jehova nga nerekord ta Hebreo 13:5: “Ariat-taka vuluvuga nga panawan, ni et-taka nga pagurayan”? Niddan naka kari tu komfiansa natun nga promesa nga uffunan naka ni Jehova? Nu kunnatun, ipasa-pasingammu nga pattalupaddianammu nga makasta i kondision na kalatag na pangurug mu.

5. Anni i awayyana nga mammuammu nu usitakkammu i pangurug mu?

⁵ Awayyana nga nakaddag ka ta nammuammu kabalimmu nga inusito tu mapia i pangurug mu. Baka egga ira madiskubrem nga pakkafian nga ariammu nasifutan. Angngariganna, awayyana nga mammuammu nga zinaral na sobra nga pavvuru-vurung, kinaladdug, anna pakkafi na nono i pangurug mu. Nu nesimmu nikaw yatun, kunnasim nga mebita nga mas paga madaral i pangurug mu?

6. Anni ira i angngarigan na rasonable nga pakavurungan?

⁶ Rasonable i karuan ira nga pakavurungan. Angngariganna, mepangngo nga ikavurungattam nu kunnasi pagayayyatan si Jehova anni Jesus. (1 Cor. 7:32) Nu nakangngua ittam tu madammo nga liwa, ikavurungattam nu kunnasi tam metoli i pakikkofuttam ta Dios. (Sal. 38:18) Ikavurungattam gapa nu kunnasi nga pagayayyatan i atawa tam anna nu kunnasi meyawa i pakawagan na miembro ira na familia tam anna na kapangngurug tam.​—1 Cor. 7:33; 2 Cor. 11:28.

7. Segun ta Proverbio 29:25, ngatta ariattam nakuan ikassing i totolay?

⁷ Makadaral ta pangurug i sobra nga pavvuru-vurung. Angngariganna, baka kanayun nga ikavurungattam nu egga i makalanno nga makan anna sinnuttam. (Mat. 6:31, 32) Yatutta baka maffokus ittam ta pagunnug ta material ira nga pakkukua. Baka mamegafu tam ngana nga ayatan i kuartu. Nu ipamavuluttam nga mesimmu yatun, makkafi i pangurug tam kani Jehova anna madaral i pakikkofuttam nisa. (Mar. 4:19; 1 Tim. 6:10) Onu baka sobra i pangikavurung tam ta makagi na tanakuan meyannung nittam. Baka mas maganassing ittam nga kantiawan onu persigian ittam na totolay anne ta paganassittam nga mapalussaw si Jehova. Tapenu maprotektattam i baggi tam tatun nga peligro, mawag nga makimallo ittam kani Jehova nga iddanna ittam tu pangurug anna gutu nga kawagattam ta pangarubang ta kapurueba.​—Bibbigan i Proverbio 29:25; Luc. 17:5.

8. Anni nakuan i reaksiottam ta kinaladdug ira?

⁸ Usu-usan ni Satanas nga “yama ngamin na siri” danuri totolay nga kontroladuna tapenu mangiwara tu kinaladdug ira meyannung kani Jehova anna ta wawwaragi tam. (Juan 8:44) Angngariganna, ipublisa anna killuan na apostata ira i kinakurug meyannung ta organisasion ni Jehova ta website-da ira, ta TV, anna ta tanakuan nga media. Danatun nga kinaladdug i karuan ta “umafa-afi nga pana” ni Satanas.  (Efe. 6:16) Anni nakuan i kuattam nu egga i makibbida nittam meyannung taw ira nga kinaladdug? Manaki tam ira nga ginnan! Ngatta? Megafu ta egga i pangurug tam kani Jehova anna mattalo ittam ta wawwaragi tam. Kakuruganna, ariattam vuluvuga makibbida ta apostata ira. Ariattam vuluvuga makipaddebate nira meyannung ta maski anni nga gannug onu maski anni nga rason, maski nu kayà tam laman nga mangusisa ta kakkagiadda.

9. Kunnasi ittam afektan na pakkafi na nono?

⁹ Pakkafian na pakkafi na nono i pangurug tam. Ariattam basta kattaman ngana laman i problema tam ira. Kakuruganna, iresponsable ittam nu kunnatun i kuattam. Ngem egga gapa ira i tiempo nga makkafi i nono tam. Ngem ari nakuan tu puru ngana laman i problema tam ira i agga-nono tam. Nu kunnatun, posible nga makattamattam i kappabbaw nga iddanama nga nipromesa nittam ni Jehova. (Nep. 21:3, 4) Nu makkafi ngana i nono tam, awayyana nga mofu i sikattam anna magimmang ittam ngana nga masserbi kani Jehova. (Prov. 24:10) Ngem ari mawag nga mesimmu yatun nittam.

10. Anni i magigiammum ta tura na tadday nga sister?

¹⁰ Ikonsidera nu kunnasi nga pinattalupaddian na tadday nga sister ta United States i pangurugna durante nga tattangngawanna i atawana nga grabe i takina. Ta turana ta hedkuarter, kinagina: “Nu mittan maka-stress anna makapakafi tu nono i situasiommi, ngem masikan i iddanamami. Talaga maappresià i informasion ira nga ala-alawatattam tapenu mapatuyag i pangurug tam anna mapagaram ittam. Talaga kawagattam danaw nga tabarang anna pamagaram. Uffunanna ittam nga mattulu-tuloy nga masserbi kani Jehova anna attamman i pamurueba ira ni Satanas nittam.” Magigiammu tam ta komento na sister nga malabanattam i pakkafi na nono! Kunnasi? Daddammammu nga i kapuruebam ira ay tiansa tapenu tubangan si Satanas. Tapus rekunnisiammu nga si Jehova i Paggafuan na banna-bannay. Anna appresiammu i espiritual ira nga probision nga iyayawana.

11. Tapenu masingattam nu masikan i pangurug tam, anni ira nga pakkiavu i iyavu tam ta baggi tam?

¹¹ Egga kari i masingammu ta kalatag na pangurug mu nga mawag tu mapakappian? Ta  nappasa ira nga vulan, nawayyam kari nga ibita i sobra nga pavvuru-vurung? Nammanakitammu kari nga ginnan onu nakiparrason ta apostata ira meyannung ta kinaladdug nga iwara-warada? Nawayyam kari nga labanan i pakkafi na nono? Nu kunnatun, makasta i kondision na pangurug mu. Ngem mawag nga mattalupaddian ittam nga alerto megafu ta egga paga i tanakuan nga armas nga iyusa ni Satanas kontra nittam. Ikonsidera tam ngana i tadday tatun.

12. Anni i efekto na materialismo nittam?

¹² Awayyana nga ariattam makapaffokus anna makkafi i kalatag na pangurug tam megafu ta materialismo. Kinagi ni apostol Pablo: “I suddalu nga egga ta serbisiu ay kagumanan na nga pagustuan i ofisial na. Ay gafu taw, arian na nga ikaba-kaba i baggi na ta kukukuan na totolay ira nga ari nga suddalu.” (2 Tim. 2:4) Kakuruganna, ari mepamavulun ta Romano ira nga suddalu i makisali ta tanakuan nga trabahu. Anni i awayyana mesimmu nu ari tuttulan na suddalu yatun nga restriksion?

13. Ngatta ari nakuan makiparte ta pannegosio i tadday nga suddalu?

¹³ Imajinammu yaw nga eksena. Egga i grupo na suddalu ira nga magensayu ta pakillaban, ngem awan tatun i tadday nga kavuluda. Egga ta palengke yatun nga suddalu nga mallalaku tu makan. Ta gabina, aru nga oras i inusa na suddalu ira tapenu ikondisiodda i armasda anna patarammadda i espadada. Ngem okupadu yari negosiante nga suddalu ta papprepara tu makan nga ilakuna ta tumunug nga aggaw. Ngem kinommananna, gavva nga minatake i kalabadda. Sinni ta suddalu ira i nakaprepara ta gerra anna sinni i mamagayayya ta komandantena? Anna sinni i kayà mu kavulu makillaban​—i suddalu nga nakaprepara onu i suddalu nga nawawan i fokusna?

14. Bilang suddalu ni Cristo, anni i importante nittam?

¹⁴ Kagitta na mapia nga suddalu, ari nakuan mawawan i fokus tam ta pinaka-importante nga gakkag tam​—i kapeggan tu fabor na Kumandante tam ira nga si Jehova anni Cristo. Yaw i mas importante anne ta maski anni nga mala tam ta mundo ni Satanas. Siguraduattam nga egga i tiempo anna sikan  nga kawagattam ta passerbi kani Jehova anna pattalupaddianattam nga nakakondision i kalatag na pangurug tam anna i tanakuan paga ira nga espiritual nga armas tam.

15. Anni i niyabiso ni Pablo nittam, anna ngatta?

¹⁵ Sigga-alerto ittam nakuan kanayun! Ngatta? Inabiso ni apostol Pablo nga “danuri i makkaraga nga marriku” i “gafu na pallikug na karuan ira ta pangurug da.” (1 Tim. 6:9, 10) I ekspresion nga “gafu na pallikug” kebalinanna nga awayya tam nga ari makapaffokus nu karagatattam i gannug ira nga ariattam kawagan. Awayyana nga memula ta futu tam i “aru nga marakay anna makadaral nga pakkaraga.” Ngem daddammattam nakuan nga usu-usan ni Satanas danatun nga pakkaraga bilang armas tapenu pakkafianna i pangurug tam.

16. Mekunnay ta rekord na Marcos 10:17-22, anni ira nga pakkiavu i pannonopattam nakuan?

¹⁶ Kagiattam nga egga i aru nga kuartu tam tapenu gumatang tu aru nga material nga gannug. Makaliwa ittam kari nu gatangattam i gannug nga ikaya tam ngem ariattam mabba talaga kawagan? Ari gapa. Ngem pannonopattam danaw nga pakkiavu: Maski nu mawayya tam nga gatangan i tadday nga gannug, egga kari talaga i tiempo anna sikattam nga usan anna imentena yatun nga gannug? Kunnatun gapa, ari tamma tu sobra ngana i pagiddu tam ta material ira nga gannug? Megafu kari ta pangaya  tam ta material nga gannug ay mabbalittam tu kagitta na lalaki nga ari nangaksepta ta imbitasion ni Jesus nga palawanna i passerbina ta Dios? (Bibbigan i Marcos 10:17-22.) Mas makasta para nittam nga mattolay tu simple anna usan i nabalor nga tiempo anna sikattam ta pangngua ta uray na Dios!

17. Anni nakuan i ariattam vuluvuga nga kattaman?

¹⁷ Ariattam nakuan kattaman nga egga ittam ta gerra anna kanayuttam nakuan nga nakaprepara ta inaggaw nga laban. (Nep. 12:17) Ari puede nga i wawwaragi tam i mangakka ta kalatag na pangurug tam. Mawag tu sittam lagapa i agga-gafu tu mapia tatun.

18. Ngatta mawag nga agga-gafu tu mapia na suddalu ira ta ollu siglo i kalatagda durante na gerra?

¹⁸ Ta ollu siglo, medayaw i tadday nga suddalu megafu ta kinagutuna ta gerra. Ngem mepasiranan yayya nu lubbe yayya nga awan i kalatagna. Nitura na Romano nga historiador nga si Tacitus: “Dakal nga kepasiranan nu nebattang na suddalu i kalatagna.” Yatun i tadday nga rason nu ngatta mawag nga agga-gafu nakuan tu mapia na suddalu ira i kalatagda durante na gerra.

19. Kunnasi tam mapattalupaddian nga agga-gafu ta kalatag na pangurug tam?

¹⁹ Agga-gafu tam tu mapia i kalatag na pangurug tam nu regular ittam nga magatende ta study ira anna nu ilayyagayya tam ta tanakuan i meyannung ta ngagan ni Jehova anna ta Pappatulanna. (Heb. 10:23-25) Kunnatun gapa, sigga-pakimallo nga bibbigattam i Uvovug na Dios ta kadaggaw anna iyaplika i tabarang anna direksionna ta ngamin nga kukukuattam. (2 Tim. 3:16, 17) Nu kunnatun, awan tu armas ni Satanas nga usanna kontra nittam i makeyawa tu permanente nga kadaral nittam. (Isa. 54:17) I dakal nga ‘kalatag na angngurug’ tam i mapprotekta nittam. Mabbalin ittam tu magutu nga makipattrabahu ta wawwaragi tam. Anna affutattam i inaggaw nga pakillaban tapenu mattalupaddian nga matuyag i pangurug tam. Pinaka-importante, dakal noka i pribilehio tam nga egga ittam ta panig ni Jesus sonu mangaffu yayya ta gerra kontra kani Satanas anna ta taga-tuttulna ira.​—Nep. 17:14; 20:10.