1-2. (a) Anni i makoffun nittam tapenu makapagattam ta inaggaw nga kapurueba? Iyesplika. (b) Anni i ikonsidera tam taw nga artikulo?

“NU NONONOPAKKU i problema nga nappasakku, ammù nga ariakku narubang yatun nga magitetadday.” Nakagim ngana kari yatun? Aru nittam i nakekagi tatun. Baka nakagim yatun turi ta naattammammu i serioso nga taki onu i patay na iddeddukan. Nu nonopammu i nappasammu, matageno mu nga nakapagattam ka ta kada aggaw megafu laman ta “ari nga maguku-gukug nga pakapangngua” na masanto nga espiritu ni Jehova.​—2 Cor. 4:7-9.

² Maddepende gapa ittam ta masanto nga espiritu tapenu labanan i influwensia naw nga marake nga mundo. (1 Juan 5:19) Fuera paga tatun, mawag tam gapa nga labanan i “marakay ira nga espiritu.” (Efe. 6:12) Ta karu na problema nga nononopattam, ikonsidera tam i dua nga gannug nu kunnasi ittam uuffunan na masanto nga espiritu. Anna gigiammuattam nu anni i makua tam tapenu mabbenefisio tu mapia ta masanto nga espiritu.

3. Anni i tadday nga panguffun ni Jehova nittam tapenu maattammattam i kapurueba ira?

³ Uuffunan ittam na masanto nga espiritu ni Jehova gukaban na pangiyawana tu pakapangngua, onu sikan, tapenu metuppal tam i responsibilidad tam ira maski nu egga ira i kapurueba. Natageno ni apostol Pablo nga nebala-balayunna i masserbi maski egga ira i ziga megafu ta naddepende yayya ta ‘pakapangngua ni Cristo.’ (2 Cor. 12:9) Ta mekadua nga pabbiahena bilang misionero, ari laman tu nallallappo si Pablo ta pallayyagayya nu ari sinuportanna gapa i material nga pakawaganna ira. Naddian yayya ta Corinto ta balay da Akila anni Priscila. Mappadday ira tu tolda. Kunnatun gapa i trabahu ni Pablo, yayya nga egga ira i aggaw nga nakipattrabahu yayya nira. (King. 18:1-4) Pinasikan na masanto  nga espiritu si Pablo tapenu masuportan i pakawaganna anna metuppalna i ministeriona.

4. Segun ta 2 Corinto 12:7b-9, anni i problema ni Pablo?

⁴ Bibbigan i 2 Corinto 12:7b-9, NW. Taw ira nga versikulo, anni i kayà kagian ni Pablo kustu kinagina nga nakillaban yayya ta tadday nga “sì ta pattag”? Nu simillo i sì ta pattag mu, siguradu nga mataka-taki yatun. Tuktukuyan taw ni Pablo i sumussussu nga personal nga problema nga ara-arubanganna. Inagalanna yaw nga problema nga “tadday nga anghel ni Satanas” nga ari magimmang nga “mallappag” (“mamubbug,” ftn.) ta nisa. Awayyana nga ari tu direkta nga si Satanas onu i demoniona ira i paggafuan na problema ira ni Pablo, nga gittana ira i nangitubbo tu sì nisa. Ngem turi ta nasifutan danatun nga marake nga espiritu i “sì,” gittana kakayàda nga mas iponag paga yatun nga sì, tapenu mas matakitan si Pablo. Anni i kingngua ni Pablo?

5. Kunnasi sinabbag ni Jehova i pakimallo ira ni Pablo?

⁵ Ta ollu, ikaya ni Pablo nga malsa yatun nga “sì.” Inaminna: “Namillu nga nipakimemallo ku ta Yafu tu arian na niakan yaw.” Ngem maski nu namippiga nakimallo si Pablo ari lagapa nalsa i sì ta pattagna. Kayàna kari kagian naw nga ari sinabbag ni Jehova i pakimallo ni Pablo? Ari. Sinabbagna danatun. Ari inalsa ni Jehova i problema, ngem niddanna si Pablo tu sikan nga magattam. Kinagi ni Jehova: ‘Mas matageno mu i pakapangnguà nu makafi ka.’ (2 Cor. 12:8, 9) Anna ta uffun na Dios, napattalupaddian ni Pablo i aya anna memammo nga panageno!​—Fil. 4:4-7.

6. (a) Kunnasi tabbagan ni Jehova i pakimallo tam ira? (b) Anni ira nga teksto ta parapo i mamasikan nikaw?

⁶ Kagitta ni Pablo, nakimemallo ka ngana kari kani Jehova nga alsanna i tadday nga problemam? Maski nu nakimemallo ka ngem ari lagapa nalsa i problema​—onu mas naggrabe paga—​kayàna kari kagian nga awan tu fabor ni Jehova nikaw? Nu kunnatun, nonopammu i ehemplo ni Pablo. Nu kunnasi nga sinabbag ni Jehova i pakimallona, siguradu nga tabbaganna gapa i pakimallo mu! Awayyana nga ari alsan ni Jehova i problema. Ngem gukaban na masanto nga espiritu, iyawana nikaw i sikan nga kawagammu tapenu maattammammu i problema. (Sal. 61:3, 4) Posible nga “grabe i makua-makua” nikaw, ngem arian naka nga pagurayan ni Jehova.​—2 Cor. 4:8, 9; Fil. 4:13, NW.

7-8. (a) Kunnasi nga negitta ta paddag i masanto nga espiritu? (b) Kunnasi nga dineskriba ni Pedro i pagguyu na masanto nga espiritu?

⁷ Kunnasi ittam paga nga uuffunan na masanto nga espiritu? Megitta tam i masanto nga espiritu ta paddag. Meyusa na barangay i paddag nga mangipange ta fustu nga direksion tapenu memammo nga makadde ta destinasionna maski nu mappala-palung i bebay. Kunnatun gapa, uffunan ittam na masanto nga espiritu nga tulu-tuloy nga masserbi kani Jehova maski nu aru i meparubang nittam nga problema adde ta makadde ittam ta napabagu nga mundo nga nipromesa na Dios.

⁸ Tadday nga gumaggimmanango si apostol Pedro, yatutta familiar yayya ta pallayag. Yari tu mepangngo laman nga deskribanna i pattrabahu na masanto nga espiritu gukaban na pangusana ta termino ira nga konektadu ta pallayag. Niturana: “I profesiya ay ari vuluvuga zimittal gukaban na uray na tolay, nu ari, i totolay ay naguvovug maggafu ta Dios durante nga igiggiya ira na masanto nga espiritu.” I literal nga kebalinan na Griego nga uvovug nga netransleyt tu “igiggiya” ay “meyayangay; meyaga-agi.”​—2 Ped. 1:21, NW; ftn.

9. Anni i egga ta nono ni Pedro turi ta niyusana i ekspresion nga “meyaga-agi”?

⁹ Anni i egga ta nono ni Pedro turi ta niyusana i ekspresion nga “meyaga-agi”? Neyusa gapa ni  Lucas i kaparehu nga forma natun nga Griego nga uvovug ta turana ta Kingngua tapenu ideskriba i tadday nga barangay nga “meyanug” na paddag. (King. 27:15) Segun ta tadday nga iskolar na Biblia, turi ta nitura ni Pedro nga i nattura ira ta Biblia ay “igiggiya” na masanto nga espiritu, nangusa si Pedro tu termino nga mangipanono ta totolay meyannung ta pallayag. Kagittana kakkagian ni Pedro nga nu kunnasi nga ituttubba na paddag i barangay ta destinasionna, idirekta na masanto nga espiritu i nattura ira ta Biblia tapenu metuppalda i annungadda. Kinagi paga natun nga iskolar: “Gittana niyatannang na profeta ira i layagda.” Kingngua ni Jehova i partena. Niyawana i “paddag,” onu i masanto nga espiritu. Kingngua gapa na nattura ira ta Biblia i parteda. Sinuttulda i direksion natun nga espiritu.

10-11. Anni nga dua nga dakkua i mawag nga kuattam tapenu masiguradu tam nga igigiya ittam na masanto nga espiritu? Iyilustra.

¹⁰ Siempre, ta maddaggun ari ngana nga usu-usan ni Jehova i masanto nga espirituna tapenu mattura i totolay tu libru ira na Biblia. Maski kunnari paga, usu-usan lagapa ni Jehova i masanto nga espirituna ta pangidirektana ta aripanna ira. Kukukuan lagapa ni Jehova i partena. Kunnasi ittam mabbenefisio ta masanto nga espiritu na Dios? Mawag tu siguraduattam nga kukukuattam i parte tam. Kunnasi tam makua yatun?

¹¹ Nonopan yaw nga angngarigan. Tapenu moffunan na paddag, egga i dua nga mawag nga kuan na mallayag. Ollu, iyangena i barangayna nu sitaw i dian na paddag. Siempre, ari magali i barangay nu mattalupaddian i mallayag ta pipi megafu ta ararayyu yayya ta dian na paddag. Mekadua, mawag tu iyutun anna ivullagna tu mapia i layag adde ta posible. Siguradu, maski nu masikan i paddag, magali laman i barangay nu mapaddagan tu mapia i layag. Kunnatun gapa, makapagattam ittam laman durante nga massesserbi kani Jehova nu egga nittam i uffun na masanto nga espiritu. Tapenu mabenefisiowan ta espiritu, mawag tu kuattam i dua nga dakkua. Ollu, mawag nga kuattam i gannug ira nga idirekta na espiritu na Dios ta aripanna ira. Mekadua, mawag nga “iyutun tam tu mapia i layag” tam adde ta posible  gukaban na aktibo nga pakiparte taw ira nga aktibidad adde ta mawayya tam. (Sal. 119:32) Nu kuattam danaw nga dakkua, uffunan ittam na masanto nga espiritu nga arubangan i gittana palung ira nga pangokkontra anna kapurueba ira anna uffunanna ittam nga massikan anna tulu-tuloy nga matalo nga masserbi kani Jehova adde ta madde tam i napabagu nga mundo.

12. Anni i tumunug nga ikonsidera tam?

¹² Nagigiammu tam i dua nga gannug nu kunnasi ittam uuffunan na masanto nga espiritu. Iddan ittam na masanto nga espiritu tu sikan anna uffunanna ittam nga mattalupaddian nga matalo durante nga ara-arubangattam i problema ira. Idirekta gapa ittam na masanto nga espiritu anna uffunanna ittam nga mattalupaddian ta dalan nga mappange ta mannanayun nga inango. Sangawe, ikonsidera tam i appa nga gannug nga mawag nga kuattam tapenu mabbenefisio ittam tu mapia ta masanto nga espiritu.

13. Segun ta 2 Timoteo 3:16, 17, anni i meyuffun na Katurakan nittam, ngem anni i mawag nga kuattam?

¹³ Ollu, gigiammuan i Biblia. (Bibbigan i 2 Timoteo 3:16, 17, NW.) I literal nga kebalinan na Griego nga uvovug nga netransleyt tu “ininspiran na Dios” ay “inangngagan onu inassaban na Dios.” Inusa na Dios i espirituna tapenu “iyangngag” i appanonona ta nono na nattura ira ta Biblia. Nu bibbigattam i Biblia anna pannonopattam i nabibbig tam, meponag tam i instruksion ira na Dios ta ginnonopan anna giffutuattam. Paguyuan ittam natun ira nga mangngua tu panguloli ta pattoletam tapenu mapagayayya tam si Jehova. (Heb. 4:12) Ngem tapenu mabbenefisio tu mapia ta masanto nga espiritu, mawag nga mapeggan ittam tu tiempo nga regular nga gigiammuan i Biblia anna monag nga pannono ta nabibbig tam. Tapus i Biblia i manginfluwensia ta kakkagian anna kukukuattam.

14. (a) Ngatta ta makagi tam nga presente i masanto nga espiritu ta study tam ira? (b) Kunnasi nga “agga-vullag i layag tam” kada magatende ittam ta study ira?

¹⁴ Mekadua, makistudy. (Sal. 22:22) Presente i espiritu ni Jehova ta study tam ira. (Nep. 2:29) Ngatta makagi tam yatun? Megafu ta nu maddayarayaw tam kavulu i kapangurug tam ira, makimallo ittam para ta masanto nga espiritu, makkansion ittam tu kansion na Pappatulan base ta Biblia, anna magginna ittam ta nebase-Biblia ira nga instruksion nga ipresenta na brother ira nga sinunno na masanto nga espiritu. Uuffunan gapa na masanto nga espiritu i sister ira nga mapprepara anna mangipresenta ta parteda ira. Tapenu mabbenefisio tu mapia ta masanto nga espiritu, mawag gapa nga nakaprepara anna makipartisipa ittam ta study ira. Nu kunnatun, magatende ittam ta study nga “agga-vullag i layag tam.”

15. Kunnasi ittam uuffunan na masanto nga espiritu ta pallayyagayya?

¹⁵ Mekatallu, mallayyagayya. Nu usattam i Biblia ta pallayyagayya anna panuddu, ipamavuluttam nga uffunan ittam na masanto nga espiritu ta ministerio tam. (Roma 15:18, 19) Tapenu gafu mabbenefisio tu mapia ta espiritu na Dios, mawag nga regular ka nga mallayyagayya anna usammu i Biblia adde ta posible. I tadday nga makuam tapenu mas mapakastam i ministeriom ay gukaban na pangusa ta sampol ira nga pakiyuvovug ta Workbook ta Pattolay Anna Ministerio.

16. Anni i makua tam tapenu direkta nga makala tu masanto nga espiritu?

¹⁶ Meka-appa, makimallo kani Jehova. (Mat. 7:7-11; Luc. 11:13) I makua tam tapenu direkta nga makala tu masanto nga espiritu ay gukaban na pakimallo kani Jehova. Awan tu mamagimmang ta pakimallo tam ira tapenu madde si Jehova onu makefugag ta pakadde nittam na mapia nga regalu nga espiritu na Dios​—maski paga i pader na affukutan onu maski si Satanas. (Sant. 1:17) Kunnasi ittam gafu  makimallo tapenu mabbenefisio tu mapia ta masanto nga espiritu? Tapenu matabbag yatun, gigiammuattam i neyilustra nga pakimallo nga nerekord laman ta Evanghelio ni Lucas. *

17. Anni nga leksion meyannung ta pakimallo i magigiammu tam ta ilustrasion ni Jesus nga nerekord ta Lucas 11:5-9, 13?

¹⁷ Bibbigan i Lucas 11:5-9, 13. Ipasingan na ilustrasion ni Jesus nu kunnasi ittam nakuan makimallo para ta masanto nga espiritu. Ta ilustrasion, nalawa na lalaki i kawaganna ‘megafu ta arianna nga inimmangan i makkiddaw.’ Ari yayya nappasirang nga nappoffun ta kofunna maski nu dis-oras ngana na gabi. (Innan i study note ta Luke 11:8, nwtsty-E.) Kunnasi nga niyaplika ni Jesus yaw nga ilustrasion ta pakimallo? Kinagina: “Makkiddaw kamu ay keddak-kamu. Magaleg kamu ay makaleg kamu. Mattotto kamu ta puerta ay mavukatan.” Anni gafu i magigiammu tam? Tapenu malawa tam i uffun na masanto nga espiritu, mawag tu ariattam immangan nga ipakimallo yatun.

18. Segun ta ilustrasion ni Jesus, ngatta makasiguradu ittam nga iyawa ni Jehova i masanto nga espirituna?

¹⁸ Uffunan gapa ittam na ilustrasion ni Jesus nga masingan nu ngatta iddan ittam ni Jehova tu masanto nga espiritu. Ikaya na lalaki ta ilustrasion i mabbalin tu mapia nga minammisita. Natagenona nga responsibilidadna nga serbian tu makan i nagabianan ngana nga bisitana ngem awan vuluvuga tu metunnagna. Kinagi ni Jesus nga niddan na karrubana i lalaki tu tinapay megafu ta ari inimmangan na lalaki i nakkiddaw. Anni i punto ni Jesus? Nu kunnasi nga sigga-paran nga uffunan na imperfekto nga tolay i pursigidu nga karrubana, yammanno ngana i masippo nga nelangitan nga Yama tam nga uffunan danuri ari magimmang nga makkiddaw nisa tu masanto nga espiritu! Yari tu makasiguradu ittam nga tabbagan ni Jehova i pakimallo tam nga makkiddaw tu masanto nga espiritu.​—Sal. 10:17; 66:19.

19. Ngatta makasiguradu ittam nga mavviktoria ittam?

¹⁹ Makasiguradu ittam nga maski nu anni paga nga pappursigi i kuan ni Satanas tapenu maffu ittam, magga mavviktoria ittam. Ngatta? Megafu ta uffunan ittam na masanto nga espiritu ta dua nga gannug. Ollu, iddanna ittam tu sikan nga kawagattam tapenu marubang i problema ira. Mekadua, yatun i fuersa nga “mangitubba ta layag tam,” tapenu uffunan ittam nga mattulu-tuloy nga masserbi kani Jehova adde ta madde tam i napabagu nga mundo. Determinadu tam nakuan nga mabbenefisio tu mapia ta uffun na masanto nga espiritu!