TA TIEMPO na Biblia, tangngallan na tadday nga ingkargadu i tangabbalayan onu i pakkukua na tanakuan nga tolay. Nu mittan, tukuyan na Hebreo anna i Griego nga uvovug ira nga netransleyt tu “ingkargadu” i tadday nga manangngal onu tadday nga mayordomo ta balay.

Tagga ta i ana na patriarka nga si Jacob nga si Jose ay naaripan ta Ehipto, nabbalin si Jose tu tadday nga ingkargadu ta balay na yafuna. Kakuruganna, ‘nitalo na Ehipsio nga yafuna i ngamin nga pakkukuana kani Jose.’ (Gen. 39:2-6) Nappasa i tiempo, tagga ta si Jose ay nabbalin tu makapangngua nga mammaguray ta Ehipto, nanunno gapa yayya tu ingkargadu ta sarilina nga balay.​—Gen. 44:4.

Ta kaggawan ni Jesus, maruddu nga maddian i makakkua ta davvun ta siudad ira nga arayyu ta komadda. Yatutta mappili ira tu ingkargadu nga manangngal ta inaggaw nga aktibidad na trabahador ira nga makkoman ta davvudda.

Sinni i kualipikadu para ta posision na tadday nga ingkargadu? Nitabarang na ollu-siglo nga Romano nga gumattura nga si Columella nga i tadday nga doroban nga natunno bilang manangngal, onu ingkargadu, ay mawag tu “tadday nga tolay nga ekspiriensadu” ta pakkoman. Yatun nga tolay ay “egga ira i kualidadna nga ipatageno i autoridadna ta trabahador ngem mawag gapa tu arianna ira tazzian.” Niyammunna paga: “Yaw i pinaka-importante nga mekiddaw nisa​—nga kanna nonopan nga ammuna i kanna ammu, anna mawag tu kanayun nakuan nga kayàna i makagigiammu tu bagu ira nga gannug.”

Usu-usan na Uvovug na Dios i angngarigan na ingkargadu anna i trabahuna tapenu iyilustra i aktibidad ira ta unag na kongregasion Cristiano. Angngariganna, pinagaram ni apostol Pedro i Cristiano ira nga usadda i abilidadda ira nga niyawa na Dios tapenu ‘iserbida ta pammakapian na kataggi-tadday i madduma-ruma nga pakawayya nga neyawa na dios nira.’​—1 Ped. 4:10.

Inusa mismu ni Jesus i angngarigan na tadday nga ingkargadu ta ilustrasionna nga mabibbig ta Lucas 16:1-8. Fuera paga tatun, ta tadday nga profesiya ni Jesus meyannung ta seniales na presensiana bilang Patul, nipasiguraduna ta disipulosna nga manunno yayya tu tadday nga “mekatalo anna nannono nga doroban,” onu “mekatalo anna ma-uto nga doroban.” I primeru nga annungan natun nga doroban ay mangiyawa tu tulu-tuloy nga suplay na espiritual nga makan para ta disipulos ni Cristo durante ta tiempo na panuppalan. (Mat. 24:45-47; Luc. 12:42) Mappabalo ittam nga tadday ittam ta makalawa tu makapatuyag ta pangurug nga publikasion ira nga iprepara natun nga matalo nga doroban nga metaneg ta interu mundo.