1-2. Segun ta 1 Pedro 4:7, 8, anni i makoffun nittam tapenu maattamman i pazziga-riga?

DURANTE nga mas egga ittam ngana ta “pangurianan ira nga aggaw,” awayyana nga meparubang ittam ta grabe ira nga ziga-riga. (2 Tim. 3:1) Angngariganna, kabalin na eleksion ta tadday nga nasion ta western Africa, egga i aru nga parralaban. Ta maturu nga annam nga vulan, nappeligro i wawwaragi tam megafu ta parralaban ta pallevuda. Anni i nakoffun nira ta kunnatun nga pazziga-riga? Naddian i karuan ta babalay na wawwaragi nga egga ta mas memammo nga lugar. Kinagi na tadday nga brother: “Ta kunnaw nga situasion, magayayya ngà ta kavulu ku i kokkofukku. Napagarammi i kataggi-tadday.”

² Sonu duttal ngana i “dakal nga ziga,” magayayya ittam noka ta kapeggan tu mapia ira nga kofun nga mangiddu nittam. (Nep. 7:14, NW) Yari tu mawag nga mapeggan ittam tu matuyag nga pakkorofun sangawe pagalaman. (Bibbigan i 1 Pedro 4:7, 8.) Aru i magigiammu tam ta ekspiriensa ni Jeremias, nu sitaw inuffunan yayya na kokkofunna nga mepaliag ta aranni ngana nga kadaral na Jerusalem. * Kunnasi tam maparigan si Jeremias?

3. (a) Anni i awayyana nga rason nga isina nakuan ni Jeremias i baggina? (b) Anni i kinagi ni Jeremias kani Baruc, anna anni i resultana?

³ Ta maturu 40 nga ragun, nattolay si Jeremias kavulu i ari matalo nga totolay, nelavu i karrubana anna posible nga pati i karuan nga kaparientesna ta ilina nga Anatot. (Jer. 11:21;  12:6) Maski kunnari paga, arianna nisisina i baggina. Kakuruganna, kinagina i mataga-tagenona ta matalo nga sekretariona nga si Baruc anna nammuattam gapa yatun megafu ta netura i mataga-tagenona ta Biblia. (Jer. 8:21; 9:1; 20:14-18; 45:1) Ma-imajittam nga durante nga itutura ni Baruc i interesante ira nga nesimmu kani Jeremias, nakultibada i monag nga aya anna respeto ta kataggi-tadday.​—Jer. 20:1, 2; 26:7-11.

4. Anni i nipakua ni Jehova kani Jeremias, anna kunnasi nga pinatuyag naw nga annungan i pakkofun da Jeremias anni Baruc?

⁴ Aru dagun nga magutu nga inabisowan ni Jeremias i Israelita ira meyannung ta mesimmu ta Jerusalem. (Jer. 25:3) Ta pangiyabisona paga ta totolay nga mabbabawi ira, nipetura ni Jehova kani Jeremias i pamappalanna ta naluku nga pabbibbigan. (Jer. 36:1-4) Durante nga makkavulu nga mattrabahu da Jeremias anni Baruc taw nga naggafu ta Dios nga annungan, nga awayyana nga nabbayag ta piga nga vulan, siguradu nga nakkapata-patuyag ira tu pangurug.

5. Kunnasi nga pinakurug ni Baruc nga mapia yayya nga kofun kani Jeremias?

⁵ Turi ta zimittal i tiempo tapenu melammuyag i netura ta naluku nga pabbibbigan, mawag nga italo ni Jeremias i pangikagi ta mensahe ta kofunna nga si Baruc. (Jer. 36:5, 6) Magutu nga nituppal ni Baruc i peligroso nga annunganna. Manono mu kari nu kunnasi nga idadayaw ni Jeremias si Baruc tagga ta minay si Baruc ta patio na templo anna kingnguana i nepakua nisa? (Jer. 36:8-10) Nammuan na prinsipe ira na Juda i kingngua ni Baruc, anna zinogda yayya nga ibibbigna nira tu masikan i naluku nga pabbibbigan! (Jer. 36:14, 15) Nadesisionan na prinsipe ira nga ipakoli kani Patul Jehoiakim i kinagi ni Jeremias. Navurungan ira kani Baruc yari tu kinagida nisa: “Mattagu kamu ni Jeremias, anna ariannu  ikagi ta maski sinni nu sitaw i diannu.” (Jer. 36:16-19) Makakkasta yatun nga tabarang!

6. Anni i reaksion da Jeremias anni Baruc ta pangokkontra?

⁶ Nakaporay si Patul Jehoiakim turi ta naginnana i nitura ni Jeremias yari tu sinuggina i naluku nga pabbibbigan anna nipa-arestona da Jeremias anni Baruc. Ngem ari nga nappatantalaw si Jeremias. Nanga uli yayya tu bagu nga pangiturakkan, tapus niyawana yatun kani Baruc, anna durante nga kinagi uli nisa ni Jeremias i mensahe ni Jehova, nitura ni Baruc “i ngamin nga uvovug nga egga ta naluku nga pabbibbigan nga sinuggi ni Patul Jehoiakim na Juda.”​—Jer. 36:26-28, 32.

7. Anni i nesimmu durante nga makkavulu nga mattrabahu da Jeremias anni Baruc?

⁷ Mas nga meggo i pakkorofun danuri totolay nga makkavulu nga mangarubang ta problema ira. Yari tu maimajin tam nga durante nga makkavulu da Jeremias anni Baruc nga mattrabahu ta pangitura uli ta zinaral na marake nga Patul nga si Jehoiakim nga naluku nga pabbibbigan, mas nakilalada i kataggi-tadday anna mas naddukko i pakkofudda. Kunnasi ittam mabenefisiowan ta ehemplo naw nga dua nga matalo nga lallaki?

8. Anni i awayyana nga makefugag nittam nga mapeggan tu madukko nga kokkofun, anna ngatta ariattam nakuan sumuku?

⁸ Awayyana nga mariga para nittam nga kagian i mataga-tageno tam ta tanakuan megafu ta egga nakataki nittam ta nappasa. (Prov. 18:19, 24) Onu awayyana nga matageno tam nga kurang i tiempo anna sikattam tapenu kultiban i madukko nga relasion. Maski kunnari paga, ariattam nakuan sumuku. Nu ikaya tam nga vulutan ittam na wawwaragi tam ta tiempo na ziga, mawag nga gigiammuattam nga italo nira i nononopan anna mataga-tageno tam sangawe. Importante yatun nga dakkua tapenu mapeggan tu madukko nga pakkorofun.​—1 Ped. 1:22.

9. (a) Kunnasi nga nipasingan ni Jesus nga mattalo yayya ta kokkofunna? (b) Kunnasi nga makoffun nikaw i vuka nga komunikasion tapenu maponag mu i pakikkofun ta tanakuan? Mangiyawa tu angngarigan.

⁹ Nipasingan ni Jesus i pattalona ta kokkofunna gukaban na vuka nga pakikomunika nira. (Juan 15:15) Maparigattam yayya gukaban na pangibillay tam ta tanakuan ta pagayayya, pakavurungan, anna pakadismayattam ira. Magginna tu mapia durante nga makiyuvovug i tanakuan nikaw, anna awayyana nga mammuammu nga egga ira i parehu nga nononopan, taga-tagenappan anna addetannu. Ikonsidera i angngarigan ni sister Cindy nga magedad tu 29. Nabbalin tu kofunna i payunir  nga si Marie-Louise nga magedad tu 67. Kada Huebes na umma, kanayun nga makkavulu nga mattrabahu ta tana na serbisiu da Cindy anni Marie-Louise. Kinagi ni Cindy, “Magenjoy ngà nga makistoria ta kokkofukku ta importante ira nga gannug, megafu ta uffunannà naw tapenu mas nga makilalà anna matindiakku ira.” Mattuyag i pakkofun nu vuka i komunikasionnu ta kataggi-tadday. Kagitta ni Cindy, nu mapeggattam tu meddu anna vuka nga komunikasion ta tanakuan, mas posible nga maddukko i pakikkofuttam nira.​—Prov. 27:9.

10. Segun ta Proverbio 27:17, anni i resultana nu makikavulu ittam ta kapangngurug tam ira ta ministerio?

¹⁰ Kagitta na nesimmu kada Jeremias anni Baruc, nu makipattrabahu ittam ta ministerio kavulu i kapangngurug tam ira anna innan i makasta ira nga kualidadda, makagigiammu ittam nira anna maddukko ittam nira. (Bibbigan i Proverbio 27:17.) Angngariganna, anni i matageno mu nu egga ka ta ministerio tapus naginnam nga magutu nga nidefensa na kofummu i pangurugna onu nitaddagganna i meyannung kani Jehova anna ta gakkagna? Siguradu nga mas maddukko ka nisa.

11-12. Mangiyawa tu angngarigan nu kunnasi makoffun ta pamaladda ta pakkorofun i pakipattrabahu ta ministerio.

¹¹ Ikonsidera i dua nga ekspiriensa nu kunnasi nga mamaddukko ta totolay i pakkavulu ta ministerio. Nikiddaw ni sister Adeline nga 23 anios ta kofunna nga si Candice nga vulutanna yayya nga mallayyagayya ta teritoria nga ari kuruga malayyagayyan. “Ikayami i mas mabbalin tu matalikarag anna mas magenjoy ta ministerio,” kunna. “Parehu nga kawagammi i espiritual nga pamagaram.” Kunnasi ira nabenefisiowan ta pakkavuluda nga mattrabahu? “Ta ultimu na kadaggaw,” kunni Adeline, “pabbibidammi i natagenomi, nu anni i nakatukkal ta futumi ta pinallayyagayyami, anna nu kunnasi nakami nigiya ni Jehova ta ministeriomi. Na-enjoymi danaw nga paggiristoriami anna mas nakilalami i kataggi-tadday.”

 ¹² Minay da sister Laïla anni Marianne, parehu nga single nga taga-France nga nallayyagayya tu lima ligguan ta Bangui, i okupadu nga kabisera na Central African Republic. Neraddamman ni Laïla: “Madduma i personalidadmi ni Marianne, ngem pia ‘na laman ta egga i vuka nga komunikasion anna napafutuan nga ayami, mas nga nalladda i pakkofummi. Durante nga maobserbà i kalalaki ni Marianne nga makibagay, i ayana ta totolay ira, anna i katalikaragna ta ministerio, mas nga ziminakal i respetò nisa.” Ariammu mawag nga magali ta tanakuan nga nasion tapenu ma-enjoy mu danaw nga benefisio. Ta kada pallayyagayyam ta lokal nga teritorianu kavulu i tadday nga wagi, egga i oportunidad mu nga mas makilala ira anna malladda i pakkorofunnu.

13. Anni nga kapurueba i awayyana nga meparubang nittam nu makipattrabahu ittam ta kokkofuttam?

¹³ Nu mittan durante nga makipattrabahu ittam ta kokkofuttam, masingi-singattam ari laman i kalalakida, nu ari, pati gapa i pakkafiadda. Anni i makoffun nittam nga mattalupaddian nga madukko ta kokkofuttam maski nu makkamali ira? Ikonsidera tam uli i ehemplo ni Jeremias. Anni i nakoffun nisa tapenu innan i mapia ta tanakuan anna palampasan i pakkamaliadda?

14. Anni i nagigiammu ni Jeremias kani Jehova, anna kunnasi yaw nakoffun nisa?

¹⁴ Nitura ni Jeremias i libru ira ta Biblia kagitta na Ollu anna Mekadua Patul Ira kunne na gapa i libru na Jeremias. Noffunan yayya na annunganna tapenu masinganna i allo ni Jehova ta imperfekto nga totolay. Angngariganna, ammuna nga tagga ta nabbabawi si Patul Ahab ta liwi-liwana, nilisi ni Jehova si Ahab ta pakasingan ta interu familiana nga mapatay durante nga sigga-matolay yayya. (1 Pat. 21:27-29) Kunnatun gapa, ammu ni Jeremias nga mas aru i kingngua ni Manases nga namallussaw kani Jehova anne ta kingngua ni Ahab. Maski kunnatun paga, pinakoma ni Jehova si Manases megafu ta nabbabawi yayya. (2 Pat. 21:16, 17; 2 Cro. 33:10-13) Siguradu nga nakoffun danatun nga rekord kani Jeremias tapenu maparigan i pasensia anna allo na Dios ta pakipattrabahuna ta madukko nga kokkofunna.​—Sal. 103:8, 9.

15. Kunnasi nga pinarigan ni Jeremias i pappasensia ni Jehova tagga ta ari nakapaffokus si Baruc?

¹⁵ Ikonsidera nu kunnasi trinatu ni Jeremias si Baruc tagga ta temporario nga nawawanna i fokusna ta annunganna. Imbes nga insigida nga immangan ni Jeremias i pakikkofunna kani Baruc, inuffunan ni Jeremias si Baruc gukaban na pangibillena nisa ta masippo ngem prangka nga mensahe na Dios. (Jer. 45:1-5) Anni i magigiammu tam taw nga rekord?

16. Kagitta na mabibbig ta Proverbio 17:9, anni i mawag nga kuattam tapenu mattalupaddian i pakkorofuttam?

¹⁶ Kakuruganna, ariattam nakuan ekspektan i kinaperfekto ta wawwaragi tam. Yayya nga, oras tu egga i mabbalin nga kofuttam, mawag nga mappursigi ittam nga mattalupaddian yatun nga pakkofun. Nu makkamali i kofuttam, baka mawag nga mangiyawa tam tu masippo ngem prangka nga tabarang base ta Uvovug na Dios. (Sal. 141:5) Anna nu matakitadda ittam, mawag nga pakomattam ira. Nu napakoma tam ngana ira, lillitattam nga ituki ta mappange i naliwatadda onu iyistoria ta tanakuan. (Bibbigan i Proverbio 17:9.) Talaga importante taw nga pangurianan nga aggaw nga maffokus ta kalalakian na wawwaragi tam anne ta pakkafiadda! Nu kunnatun i kuattam, malladda i relasiottam nira, anna kawagattam danatun nga madukko ira nga kokkofun sonu dakal nga ziga.

17. Kunnasi nga pinakurug ni profeta Jeremias nga kurug yayya nga kofun ta tiempo na ziga-riga?

¹⁷ Pinakurug ni profeta Jeremias nga kurug yayya nga kofun ta tiempo na ziga-riga. Angngariganna, kabalin nga pinaliag na ofisial na korte nga si Ebed-melec si Jeremias ta siguradu nga kapatay ta avvu nga napannu tu fuyo, naganassing si Ebed-melec ta prinsipe ira baka takitadda yayya. Turi ta naginna yatun ni Jeremias, ari yayya nga basta nagimammo, nga iddanamanna nga makapagattam lagapa i kofunna. Maski nu nakafuku si Jeremias, kingnguana i mawayyana gukaban na pangibillena ta makapabannay nga promesa ni Jehova ta kofunna nga si Ebed-melec.​—Jer. 38:7-13; 39:15-18.

18. Segun ta Proverbio 17:17, anni nakuan i kuattam nu meparubang i kofuttam ta kapurueba?

¹⁸ Ta maddaggun, meparubang i wawwaragi tam ta madduruma ira nga kapurueba. Angngariganna, aru i mazziga-riga gafu ta kalamidad onu gafu ta peligro nga irattal na totolay. Nu mesimmu danatun, puede nga imbitan na karuan nittam danaw nga kokkofun tapenu maddian ta balay tam. Awayyana gapa nga makoffun i karuan ta finansial. Ngem mawayya tam ngamin nga ipakimallo kani Jehova nga uffunan i wawwaragi tam. Nu nammuattam nga nakkafi i nono na tadday nga brother onu sister, baka ariattam ammu nu anni i kagian onu kuattam. Ngem egga i meyuffuttam ngamin. Angngariganna, usattam i tiempo tam kavulu i kokkofuttam. Meddu nga ginnattam ira nu maguvovug ira. Anna awayya tam ibillay nira i paborito tam nga makapabannay nga teksto. (Isa. 50:4) I pinaka-importante ay sigga-parakka nga manguffun ta kofummu nu kawagan naka.​—Bibbigan i Proverbio 17:17.

19. Kunnasi nga makoffun ta mappange i kapeggan tu matuyag nga pakkorofun sangawe?

¹⁹ Mawag tu determinadu ittam sangawe nga mapeggan anna pattalupaddianan i matuyag nga relasion ta wawwaragi tam. Ngatta? Megafu ta kayà na kalabattam ira nga passirinan ittam gukaban na kinaladdug ira. Kayàda nga ariattam mattalo anna ari suportan i wawwaragi tam. Ngem ari ira mavviktoria. Ariadda ittam nga mapagimmang nga ayatan i wawwaragi tam. Awan tu makuada nga manaral ta pakkorofuttam. Kakuruganna, mabbayag danatun nga pakkorofun ari laman adde ta panuppalan, nu ari, adde ta mannanayun!