MAGIGIAMMU NGA ARTIKULO 47
Awan Vuluvuga tu Mangiyarayyu ta Nittam Kani Jehova
“Mammakatalo ngà nikaw, AFU.”—SAL. 31:14.
KANSION 122 Magpakatatag!
SUMARIO a
1. Ngatta makagi tam nga ikaya ni Jehova nga umaranni ittam ta nisa?
IKAYA ni Jehova nga umaranni ittam ta nisa. (Sant. 4:8) Kayà na nga mabbalin tu Dios tam, Yama tam, anna Kofuttam. Tabbagan na i pakimallo tam ira anna duffunan na ittam ta mariga ira nga tiempo. Usu-usan na gapa i organisasion na tapenu tudduan anna protektan ittam. Ngem anni i mawag nga kuattam tapenu makaranni ittam kani Jehova?
2. Kunnasi ittam makaranni kani Jehova?
2 Makaranni ittam kani Jehova nu makimallo ittam ta nisa, bibbigattam i Uvovug na, anna pannonopan tu mapia yatun. Nu kuattam yatun, mas ayatan anna appresiattam yayya. Mapaguyu ittam nga tuttulan anna idayaw yayya megafu ta mepappangngo yayya tatun. (Nep. 4:11) Nu mas makilala tam si Jehova, mas mattalo ittam ta nisa anna ta organisasion nga niyawa na nga manguffun ta nittam.
3. Kunnasi nga puru-purueban na Diablo nga iyarayyu ittam kani Jehova, ngem anni i makoffun tapenu ari tam panawan i Dios tam anna i organisasion na? (Salmo 31:13, 14)
3 Puru-purueban na Diablo nga iyarayyu ittam kani Jehova mas ngana nu meparubang ittam ta pakarigatan ira. Kunnasi na nga kukukuan yatun? Sisinukan na nga pakkafian i pattalo tam kani Jehova anna ta organisasion na. Ngem malabanattam i taktika na ira. Nu masikan i pangurug tam anna buu i pattalo tam kani Jehova, ari tam nga panawan i Dios tam anna i organisasion na.—Bibbigan i Salmo 31:13, 14.
4. Anni i gigiammuattam taw nga artikulo?
4 Taw nga artikulo, gigiammuattam i tallu nga pakarigatan nga maggafu ta lawan na kongregasion. Pakkafian na kada tadday tatun i pattalo tam kani Jehova anna ta organisasion na. Kunnasi ittam iyarayyu natun ira nga pakarigatan kani Jehova? Anni i makua tam tapenu malabanan i taktika ira ni Satanas?
NU MAKKAPROBLEMA ITTAM
5. Kunnasi nga pakkafian na problema ira i pattalo tam kani Jehova anna ta organisasion na?
5 Nu karuan makkaproblema ittam, gitta na nu kontran ittam na familia tam onu mawawanan ittam tu trabahu. Kunnasi nga pakkafian na kunnatun ira nga problema i pattalo tam ta organisasion ni Jehova tapus iyarayyu ittam natun ta nisa? Nu nabayag ngana i problema tam, baka mawawanan ittam tu iddanama anna makkafi i nono tam. Approbetchan ni Satanas i kunnatun ira nga tiempo tapenu paddudattam i pagiddu ni Jehova ta nittam. Ikaya na nga nonopattam nga si Jehova onu i organisasion na i makalliwa ta pazziga-riga tam. Kunnatun i nesimmu ta Israelita ira tagga. Ta gafu na bi, mangurug ira nga sinunno ni Jehova si Moises anna si Aaron nga mangipaliag ta nira ta pakka-aripadda. (Ex. 4:29-31) Ngem turi ta ziniga-riga ira ni Faraon, pinaliwa da lallagu si Moises anna si Aaron ta problema da ira. Kinagi da: “Megafu ta nikamu, mas nallussaw si Faraon anna i aripan na ira ta nikami anna nangipay kamu tu espada ta lima da tapenu patayaddakami.” (Ex. 5:19-21) Fugurammu yatun! Pinaliwa da i matalo ira nga aripan na Dios. Nu nabayag ngana nga attattammammu i problema ira, anni i kuammu tapenu masikan lagapa i pattalo mu kani Jehova anna ta organisasion na?
6. Anni i magigiammu tam kani profeta Habakuk nu egga ira i problema tam? (Habakuk 3:17-19)
6 Ivuvvu mu i mayan na futum kani Jehova ta pakimallo anna mappoffukka ta nisa. Napakaru i problema nga nappasan ni profeta Habakuk. Mittan, pinaddudan na nu talaga kari ikavurungan yayya ni Jehova, yari tu nivuvvu na i mataga-tageno na ta pakimallo. Kinagi na: “Kunnasi kabayag, O Jehova, nga mappoffun ngà, ngem ari ka magginna? . . . Ngatta ipamavulummu i panattazzi?” (Hab. 1:2, 3) Sinabbag ni Jehova yatun nga napafutuan nga pakimallo na matalo nga aripan na. (Hab. 2:2, 3) Kabalin nga pinannonopan ni Habakuk i pinangipaliag ni Jehova ta totolena, nagayayya uli yayya. Nakumbinsi yayya nga tattangngallan yayya ni Jehova anna duffunan na yayya nga makapagattam ta maski anni nga kapurueba. (Bibbigan i Habakuk 3:17-19.) Anni gafu i magigiammum tatun? Nu makkaproblema ka, makimallo ka kani Jehova anna ikagim ta nisa i mataga-tageno mu. Tapus mappoffukka ta nisa. Nu kuammu yatun, makasiguradu ka nga iyawa ni Jehova i sikan nga kawagammu tapenu makapagattam. Nu matageno mu i uffun na, massikan i pangurug mu.
7. Anni i pinurueban nga kuan na wagi ni Shirley, anna kunnasi na nga napattalupaddian i pattalo na kani Jehova?
7 Ariammu iyemmang i espiritual nga rutinam. Yatun i nanguffun kani Sister Shirley nga taga-Papua New Guinea turi ta nakkaproblema yayya. b Mariga i familia ni Shirley anna nu karuan makkukurang i kanadda. Mittan, pinurueban na wagi na nga lalaki nga pakkafian i pattalo na kani Jehova. Kinagi na: “Kagiammu nga dudduffunan naka na masanto nga espiritu na Dios, ngem dian na ‘vu nga? Mariga lapa mabba i familia tam. Kakenga laman i oras mu nga mallayyagayya.” Anni i efekto natun kani Shirley? Inamin na: “Niyavu ku ta baggì: ‘Talaga kari nga ikavurungan nakami na Dios?’ Ngem insigida nga nakimallo ngà kani Jehova anna nikagì sa i ngamin nga egga ta nono ku. Ariakku niyemmang i pabbibbig ku tu Biblia anna i publikasiottam ira. Nitulu-tuloy ku gapa i mallayyagayya anna magatende ta study ira.” Turi kua, nasingan na gabbalaman nga dudduffunan ni Jehova i familia na. Ari gare nga nabbisin i familia da anna magayayya lagapa ira. Kinagi ni Shirley: “Natageno ku nga tattabbagan ni Jehova i pakimallo ku ira.” (1 Tim. 6:6-8) Nu ariammu iyemmang i espiritual nga rutinam, ari naka mapagimmang na problema onu padduda nga masserbi kani Jehova.
NU MARAKE I KATRATU NA BROTHER IRA NGA MANGIROLLU
8. Anni i puede nga mesimmu ta brother ira nga mangirollu?
8 Gukaban na TV, radio, diariu, anna social media, mangiwara-wara i kalaban tam ira tu kinaladdug anna ugal ira nga informasion meyannung ta brother ira nga mangirollu ta organisasion ni Jehova. (Sal. 31:13) Naaresto anna naakusan tu kriminal i karuan nga brother. Kunnatun gabbalaman i nesimmu ta ollu-siglo ira nga Cristiano turi ta naakusan anna naaresto si apostol Pablo maski nu awan mabba tu liwa na. Ngem anni i kingngua na wawwaragi?
9. Anni i kingngua na karuan nga Cristiano turi ta nefuku si apostol Pablo?
9 Nagimmang nga massuporta kani Pablo i karuan ta ollu-siglo ira nga Cristiano turi ta nefuku yayya ta Roma. (2 Tim. 1:8, 15) Ngatta? Ipasiradda kari si Pablo megafu ta kriminal i paningan na magaru ta nisa? (2 Tim. 2:8, 9) Onu maganassing kari ira megafu ta baka mapersigi gapa ira? Maski anni paga i makagafu, anni tamma i natageno ni Pablo? Inattamman na i aru nga problema anna pinappeligro na paga lagu i inango na para ta nira. (King. 20:18-21; 2 Cor. 1:8) Ari tam nakuan mabbalin tu kagitta danuri pinagurayadda si Pablo ta tiempo nga kawagan na i uffudda! Anni nakuan gafu i agga-nono tam nu mapersigi i brother ira nga mangirollu?
10. Anni nakuan i daddammattam nu mapersigi i brother ira nga mangirollu, anna ngatta?
10 Daddamman nu ngatta mapersigi ittam anna nu sinni i makagafu tatun. Nakagi ta 2 Timoteo 3:12: “Madara-darum ngamin i maya ta attolay nga mekunnay ta Dios ta ketadday da kani Cristo Jesus.” Yari tu ari tam nakuan gafu makaddagan nu puntirian ni Satanas i brother ira nga mangirollu. Ikaya na nga pallikuradda si Jehova anna ikaya na nga ananassingan ittam.—1 Ped. 5:8.
Maski agga-fuku si Pablo, magutu nga inuffunan yayya ni Onesiforo. Sangawe, supu-suportan na wawwaragi i agga-fuku ira nga kapangngurug da kagitta na masingattam tawe nga picture (Innan i parapo 11-12)
11. Anni i magigiammu tam ta kingngua ni Onesiforo? (2 Timoteo 1:16-18)
11 Tulu-tuloy mu nga suportan i wawwaragim anna ari mu ira vuluvuga nga pagurayan. (Bibbigan i 2 Timoteo 1:16-18.) Neruma i kingngua na tadday ta ollu-siglo nga Cristiano nga mangngagan tu Onesiforo turi ta nefuku si Pablo. “Arian na nga nipasiran i nikafuku [ni Pablo].” Inala-aleg lallagu ni Onesiforo si Pablo anna turi ta nasimmuan na yayya, nikaguman na nga duffunan yayya tapenu mala na i kawagan na ira. Pinappeligro ni Onesiforo i mismu nga inango na tapenu makua na yatun. Anni gafu i magigiammu tam tatun? Ari tam ipamavulun nga i paganassing ta tolay i mangifugag ta nittam nga duffunan i wawwaragi tam ira nga mapeppersigi. Kuattam lallagu i ngamin nga mawayya tam tapenu idefensa anna duffunan ira. (Prov. 17:17) Kawagadda i aya anna suporta tam.
12. Anni i magigiammu tam ta wawwaragi tam ta Russia?
12 Ikonsidera tam nu kunnasi nga inuffunan na wawwaragi tam ta Russia i meddu nga kapangngurug da ira nga nefuku. Nu mabista i karuan ta nira, aru nga wawwaragi i umay ta korte tapenu mangipasingan tu suporta. Anni i magigiammu tam tatun? Ari tam nakuan maganassing nu mapara-parake, maaresto, anna mapeppersigi i brother ira nga mangirollu. Ipakimallo tam ira, uffunan i miembro na familia da, anna mannono tu praktikal ira nga meyuffun ta nira.—King. 12:5; 2 Cor. 1:10, 11.
NU MAUYU-UYAW ITTAM
13. Kunnasi nga pakkafian na panguyu-uyaw i pattalo tam kani Jehova anna ta organisasion na?
13 Awayya na tu uyawan ittam na ari tu Saksi nga kaparientes tam, katrabahu tam, onu kaeskuela tam ira megafu ta pallayyagayya tam anna pattuttul tam ta atannang nga estandarte ta moral ni Jehova. (1 Ped. 4:4) Awayya na tu kagiadda: “Appresiakku i kata-katolem, ngem sobra ngana mabba i ka-istrikto na relihion nu anna sobra i pakka-makadios nu.” Awayya na tu kuestionan na karuan i pattratu tam ta nadisfellowship ira. Kakkagiadda: “Abbo ku mabba nu minammakoma kamu? Awan tu allo nu!” Nu makaginna ittam tu kunnatun ira nga komento, baka paddudattam i estandarte ira ni Jehova. Awayya na tu manono tam: ‘Sobra kari i ikikkiddaw niakan ni Jehova? Kita-istrikto kari i organisasion na?’ Nu meparubakka ta kunnatun, anni i kuammu tapenu madukko ka lagapa kani Jehova anna ta organisasion na?
Ari nga nangurug si Job ta kinaladdug ira na magappappe ira nga kofun na nga nanguyu-uyaw ta nisa. Determinadu lallagu yayya nga ari wawwanan i integridad na kani Jehova (Innan i parapo 14)
14. Anni nakuan i kuattam nu mauyu-uyaw ittam megafu ta panuttul tam ta estandarte ira ni Jehova? (Salmo 119:50-52)
14 Determinadu nga tuttulan i estandarte ira ni Jehova. Sinuttul ni Job i estandarte ira ni Jehova maski paga nauyu-uyaw yayya megafu tatun. Kinumbinsi paga lagu yayya na tadday ta magappappe nga kofun na nga awan tu pakialam na Dios nu tuttulan na i estandarte na Dios onu ari. (Job 4:17, 18; 22:3) Ngem ari nga kinurug ni Job danatun nga kinaladdug. Ammu na nga fustu i estandarte ira ni Jehova ta mapia anna marake, yari tu determinadu yayya nga tuttulan yatun. Ari na nga nipamavulun nga mawawan na i integridad na megafu laman ta duma nga tolay. (Job 27:5, 6) Anni i magigiammu tam tatun? Ari mu nakuan kuestionan i estandarte ira ni Jehova megafu laman ta mauyu-uyaw ka. Nonopammu i nappasa-pasammu ira. Ari kari tu mamikkaru ngana nga napakurug mu nga mas nappipia i pattolem turi ta sinuttul mu i estandarte ira ni Jehova? Determinadu ka nakuan nga suportan i organisasion nga manuttuttul tatun ira nga estandarte. Nu kuammu yatun, ari naka meyarayyu kani Jehova na maski anni nga panguyu-uyaw.—Bibbigan i Salmo 119:50-52.
15. Ngatta nauyu-uyaw si Brizit?
15 Ikonsidera i ekspiriensa ni Sister Brizit nga taga-India. Inuyu-uyaw yayya na kafamilia na ira megafu ta pangurug na. Ari nabbayag kabalin na nga nabawtisowan ta 1997, nawanan tu trabahu i ari tu Saksi nga atawa na. Yari tu nadisidi na atawa ni Brizit nga maddian ira na ána da ta balay na magana na ta tanakuan nga siudad. Ngem mas nazziga paga i situasion ni Brizit. Megafu ta awan tu trabahu na atawa na, mawag tu mattrabahu yayya tu full time tapenu masuportan i familia da. Tapus, ma-350 kilometro i distansia na karannian nga kongregasion ta nisa. Kaddaraddam ta kokkontran yayya na familia na atawa na megafu ta pangurug na. Mas naggrabe paga yatun adde ta punto nga mawag mana tu magali i familia ni Brizit. Tapus kalanna nga natay i atawa na. Turi kua, natay gapa i 12-anios nga ana na nga babay megafu ta cancer. I ziga na, si Brizit i paliwatan na parientes na ira megafu ta matturunug ira nga nesimmu. Kinagi da nga ari nakuan nga nesimmu yatun ira nga trahedia nu ari yayya nabbalin tu Saksi ni Jehova. Ngem nattalo lagapa yayya kani Jehova anna ari na nga pinanawan i organisasion na.
16. Kunnasi nga nabala-balakkan si Brizit ta pattalupaddian na nga madukko kani Jehova anna ta organisasion na?
16 Megafu ta ararayyu i kongregasion ta paddianan ni Brizit, tadday nga circuit overseer i namagaram ta nisa nga mallayyagayya ta lugar da anna mangikondukta tu study ta balena. Ta ollu, abbo na tu kitazziga yatun. Ngem sinuttul na lagapa i instruksion. Nilayyagayyan na i tanakuan, nangikondukta yayya tu study ta balena, anna regular nga naf-family worship kavulu i ána na nga babbay. Anni i resulta natun? Aru i nabbalin tu Bible study ni Brizit anna aru gapa i nappa-baptize. Turi ta 2005, narregular payunir yayya. Nabala-balakkan i pattalo na kani Jehova anna i kinamatalo na ta organisasion. Matalo gapa ngana nga massesserbi kani Jehova i ána na nga babbay. Tapus egga ngana i dua nga kongregasion ta lugar da! Kumbinsidu si Brizit nga pinasikan yayya ni Jehova tapenu makayanan na i problema na ira anna maattamman na i panguyu-uyaw na kafamilia na.
ARI TAM NGA WAWWANAN I KINAMATALO TAM KANI JEHOVA ANNA TA ORGANISASION NA
17. Anni i determinadu nga kuattam?
17 Kayà ni Satanas nga kurugattam nga pagurayan ittam ni Jehova nu egga ira i problema tam anna mas mazziga i pattolay tam nu suportattam i organisasion ni Jehova. Kayà na gapa tu maganassing ittam nu mapara-parake, mapeppersigi, onu mefuku i brother ira nga mangirollu. Gukaban gapa na panguyu-uyaw, ikaya na nga pakkafian i pattalo tam ta estandarte ira ni Jehova anna ta organisasion na. Ngem ammu tam ngana danaw nga taktika na. Yatun tu ari ittam nga melogo ni Satanas. (2 Cor. 2:11) Determinadu ittam nga panakitan i kinaladdug ira ni Satanas anna kanayun ittam nakuan nga matalo kani Jehova anna ta organisasion na. Daddammattam nakuan nga ari ittam vuluvuga nga pagurayan ni Jehova. (Sal. 28:7) Yari tu ari tam ipamavulun i anni laman nga mangiyarayyu ta nittam kani Jehova!—Roma 8:35-39.
18. Anni i gigiammuattam ta tumunug nga artikulo?
18 Taw nga artikulo, nagigiammu tam i pakarigatan ira nga arubangattam maggafu ta lawan na kongregasion. Ngem awayya na gapa nga mapurueban i pattalo tam kani Jehova anna ta organisasion na megafu ta pakarigatan ira ta unag na kongregasion. Kunnasi tam arubangan danatun? Gigiammuattam yatun ta tumunug nga artikulo.
KANSION 118 Pasikannammu i Pangurug Mi
a Tapenu matalo nga makapagattam ittam taw nga pangurianan ira nga aggaggaw, mawag tu itulu-tuloy tam i mattalo kani Jehova anna ta organisasion na. Usan na Diablo i kapurueba ira tapenu pakkafian yatun nga pattalo tam. Taw nga artikulo gigiammuattam i tallu tatun anna nu anni i makua tam tapenu malabanan danatun.
b Natalianan i karuan nga ngagan.