MAGIGIAMMU NGA ARTIKULO 48
Tangngallammu Kanayun i Nono Mu nu Mapurueban i Kinamatalo Mu
“Tangngallam-mu nga kanayun i nono mu ta ngamin nga tiempo.”—2 TIM. 4:5.
KANSION 123 Magpasakop sa Teokratikong Kaayusan
SUMARIO a
1. Anni i kayà kagian na tangngallattam kanayun i nono tam? (2 Timoteo 4:5)
NU EGGA i mesimmu nga makataki ta nittam, awayya na tu mapurueban i kinamatalo tam kani Jehova anna ta organisasion na. Anni gafu i kuattam nu mesimmu yatun? Mawag tu tangngallattam nga kanayun i nono tam anna alerto ittam ta espiritual tapenu maladda i pangurug tam. (Bibbigan i 2 Timoteo 4:5.) Matangngallattam kanayun i nono tam nu kalmadu ittam laman, mannono ittam tu mapia, anna parigattam i pagimamma ni Jehova ta ganna-gannug. Nu kuattam danatun, ari nga afektan na emosiottam i appana-panono tam.
2. Anni i gigiammuattam taw nga artikulo?
2 Ta nappasa nga artikulo, ginigiammu tam i tallu nga problema nga awayya na tu arubangattam maggafu ta lawan na kongregasion. Taw gapa nga artikulo, gigiammuattam yaw nga tallu nga problema ta unag na kongregasion nga mamurueba ta kinamatalo tam kani Jehova: (1) nu gitta na marake i pinattratu nittam na kapangngurug tam, (2) nu madisiplina ittam, anna (3) nu marigatan ittam nga tuttulan i panguli ta organisasion. Nu mesimmu nittam i kuddanatun nga problema, anni i kuattam tapenu matangngallattam kanayun i nono tam anna ari tam vuluvuga panawan si Jehova anna i organisasion na?
NU GITTA NA MARAKE I PINATTRATU NITTAM NA KAPANGNGURUG TAM
3. Anni i posible nga reaksiottam nu gitta na marake i pinattratu ta nittam na kapangngurug tam?
3 Natageno mu ngana kari nga marake i pinattratu nikaw na kapangngurug mu? Awayya na tu egga i pribilehio natun nga brother onu sister. Magga ari mabba nga sinadya natun nga wagim nga takitakka. (Roma 3:23; Sant. 3:2) Ngem awayya na tu nadismaya ka talaga ta kingngua na. Posible gapa nga ari ka makakatrug megafu ta agga-nono mu yatun. Baka nanono mu, ‘Kunnasi nga makua yaw ta nio na tadday nga wagi ta unag paga mabba na organisasion na Dios?’ Kunnatun mismu i kayà ni Satanas nga nonopattam. (2 Cor. 2:11) Meyarayyu ittam na kunnatun nga negatibo nga appana-panono kani Jehova anna ta organisasion na. Nu natakitan ittam gafu na kapangngurug tam, kunnasi tam nga matangngallan kanayun i nono tam anna ibita i mannono tu makadaral?
4. Kunnasi nga natangngallan kanayun ni Jose i nono na maski nu marake i nikatratu na, anna anni i magigiammum tatun? (Genesis 50:19-21)
4 Ariammu pattakitan i nono mu. Ta katinedyer ni Jose, marake i pinattratu ta nisa na manung na ira. Ikala-kalussaw da yayya anna kayà paga lagu yayya nga patayan na karuan ta nira. (Gen. 37:4, 18-22) Turi kua, nilaku da yayya tapenu mabbalin tu aripan. Megafu tatun, nepallo i nappasa-pasan ira ni Jose ta unag na 13 dagun. Puede nakuan nga paddudan ni Jose nu talaga iddukan yayya ni Jehova. Posible nakuan gapa nga nonopan na nga pinagurayan ngana yayya ni Jehova ta tiempo nga mawag na i uffun. Ngem ari nga pinattaki ni Jose i nono na. Kanayun nga natangngallan na i nono na gukaban na pattalupaddian na nga kalmadu. Tagga ta egga nakuan i chansa na nga mangibalo ta manung na ira, ari na nga kingngua yatun. Lallagu, nipasingannan na ira tu aya anna pinakoma na ira. (Gen. 45:4, 5) Nakua ni Jose yatun megafu ta nakapannono yayya tu mapia. Imbes gare tu agga-nono na i problema na ira, ninono na i gakkag ni Jehova. (Bibbigan i Genesis 50:19-21.) Anni i magigiammum tatun? Nu marake i pinattratu da ta niko, ari nakuan nga mattaki i nono mu kani Jehova, ni tu nonopammu nga pinagurayan naka ngana. Pannonopammu lallagu tu mapia nu kunnasi naka nga uuffunan tapenu maattammammu i kapuruebam. Nu marake gapa i pinattratu ta nikaw na tanakuan, ikagumammu nga takkabban tu aya i kina-imperfekto da ira.—1 Ped. 4:8.
5. Kunnasi nga natangngallan kanayun ni Miqueas i nono na turi ta natageno na nga marake i nikatratu na?
5 Ikonsidera i ekspiriensa na elder nga si Brother Miqueas b nga taga-South America. Nanono na nga egga bi i tiempo nga marake i pinattratu nisa na karuan nga elder. Istorian na: “Tatukku pagalaman nga naekspiriensa i grabe nga stress. Navvuru-vurung ngà. Ari ngà makakatrug nu gabi anna siminangi ngà megafu ta awan tu makuà.” Ngem kanayun lagapa nga sinangngallan ni Miqueas i nono na anna nikaguman na nga kontrolan i mataga-tageno na. Kanayun yayya nga makimallo kani Jehova tapenu makkiddaw tu masanto nga espiritu anna sikan nga magattam. Nar-research gapa yayya ta publikasiottam ira tu informasion ira nga makoffun ta nisa. Anni i magigiammu tam tatun? Nu matageno mu nga marake i pinattratu niko na kapangngurug mu, kalmadu ka laman nakuan anna ikagumammu nga alsan ta nono mu i negatibo ira nga mataga-tageno mu. Baka ari mu ammu nu anni ira i makagafu nu ngatta kunnari i nakagi onu nakua na wagim. Yayya nga makimallo ka kani Jehova anna mappaduffukka ta nisa tapenu masingammu i ganna-gannug segun ta pagimamma na wagim. Makaduffun yatun tapenu merasonammu ta nono mu nga ari naka mabba sinadya nga tinakitan na wagim anna tapenu mapakomam yayya. (Prov. 19:11) Ari mu nakuan kattaman nga ammu ni Jehova i pappasa-pasammu anna magga iddan naka tu sikan nga kawagammu tapenu makapagattam.—2 Cro. 16:9; Ecl. 5:8.
NU MADISIPLINA ITTAM
6. Ngatta malippawa tam nakuan nga i panisiplina ni Jehova ay pangipasingan na tu pangaya na? (Hebreo 12:5, 6, 11)
6 Awayya na tu mataka-taki i madisiplina. Ngem nu agga-nono tam laman i taki nga mataga-tageno tam, baka nonopattam ngana nga ari tu patas i nikadisiplina tam anna ari tu mepappangngo yatun. Nu kunnatun, ari tam nu kua malippawa nga i nikadisiplina tam ay pangipasingan ni Jehova tu pangaya na para ta nittam. (Bibbigan i Hebreo 12:5, 6, 11.) Nu yari laman ngana gapa i mataga-tageno tam i fokus tam, meddattam tu chansa si Satanas nga ilogo ittam. Kayà na gare nga panakitattam i disiplina anna mas marake paga tatun, kayà na nga umarayyu ittam kani Jehova anna ta kongregasion. Yayya nga nu nadisiplina ka, kunnasim nga matangngallan kanayun i nono mu?
Mapakalinno nga inalawa ni Pedro i tabarang anna i disiplina yari tu mas aru i pinangusan ta nisa ni Jehova (Innan i parapo 7)
7. (a) Base ta picture, anni ira i pinangusan ni Jehova kani Pedro kabalin na nga inalawa i disiplina? (b) Anni i magigiammum kani Pedro?
7 Alawatan i disiplina anna kuan i kawagan ira nga panguli. Ari laman tu namittan nga nitunung ni Jesus si Pedro ta arubang na karuan nga apostol. (Mar. 8:33; Luc. 22:31-34) Baka talaga nepasiranan si Pedro tatun! Ngem matalo lagapa yayya kani Jesus. Inalawa na i disiplina anna nakagigiammu yayya ta nakkamalian na ira. Binala-balakkan ni Jehova i kinamatalo ni Pedro anna nitalo na ta nisa i madammo ira nga responsibilidad ta kongregasion. (Juan 21:15-17; King. 10:24-33; 1 Ped. 1:1) Anni i magigiammu tam kani Pedro? Parehu nga pammakapianattam anna na tanakuan i disiplina nu ari tu yari i nikepasirattam laman i agga-nono tam, nu mappetunung ittam, anna kuattam i mawag ira nga uliattam. Nu kuattam danatun, mas aru i pangusan ta nittam ni Jehova anna pakabenefisiowan yatun na wawwaragi.
8-9. Anni i natageno ni Brother Bernardo ta gafu na nikadisiplina na, ngem anni i nakaduffun tapenu metunung na i appana-panono na?
8 Ikonsidera i nesimmu kani Brother Bernardo nga taga-Mozambique. Nalsa yayya ta pakka-elder. Anni i natageno na ta gafu? Kagian na, “Nattaki i nono ku megafu ta manaki ku i disiplina da niakan.” Mavurung gare yayya nu anni saw i nonopan na kakongregasion na ira. Inamin na, “Piga vulan labbi i nappasa nige ku nga minammatan nga fustu i disiplina da nio anna nige ku nga nattalo uli kani Jehova anna ta organisasion na.” Anni i nakoffun kani Bernardo tapenu alawatan i disiplina?
9 Nitunung ni Bernardo i appana-panono na. Nipakanawag na: “Tagga bi ta elder ngà paga, usu-usakku i Hebreo 12:7 tapenu uffunan i wawwaragi nga mapeggan tu fustu nga pagimamma ta panisiplina ni Jehova. Niyavu ku gafu ta baggì, ‘Sinni kari i mawag tu mangiyaplika taw nga teksto?’ Ngamin nga masserbi kani Jehova—maski sakan.” Inuli ni Bernardo i mawag paga ira nga ulian na tapenu metoli i pattalo na kani Jehova anna ta organisasion. Mas gapa nga binibbig na i Biblia anna mas nga pinannonopan na tu mapia yatun. Maski nu mavurung lagapa yayya ta nononopan na wawwaragi meyannung ta nisa, nakipartner yayya ta nira ta ministerio anna nakkomo-komento lagapa yayya ta study ira. Pappasa na tiempo, netoli si Bernardo ta pakka-elder. Nu nadisiplina ka gapa kagitta ni Bernardo, ikagumammu nga ari nakuan tu yari laman i nikepasirammu i agga-nono mu, nu ari lagu, alawatammu i tabarang anna kuammu i mawag ira nga uliammu. c (Prov. 8:33; 22:4) Nu kuammu danatun, makasiguradu ka nga bala-balakkan naka ni Jehova megafu ta ari mu yayya vuluvuga pinanawan anna i organisasion na.
NU MARIGATAN ITTAM NGA TUTTULAN I PANGULI TA ORGANISASION
10. Anni nga panguli ta unnug i awayya na nga namurueba ta kinamatalo na karuan nga Israelita nga lallaki?
10 Mapurueban i kinamatalo tam nu egga ira i panguli ta organisasion. Nu ari ittam nga magimmugug, baka yatun i mangiyarayyu ta nittam kani Jehova. Angngarigan na, nafektan i karuan nga Israelita ta tadday nga panguli. Nige gare nga napeggan tu Mosaiko nga Dob, yari ira ulu na familia i nangngua ta annungan ira na papari. Ira i mamataddag tu altar anna mangitavvung kani Jehova para ta familia da. (Gen. 8:20, 21; 12:7; 26:25; 35:1, 6, 7; Job 1:5) Ngem turi ta nepatuppal ngana i Dob, ari ngana nga mepamavulun ta ulu ira na familia nga kuan yatun. Nanunno ngana gare si Jehova tu papari maggafu ta familia ni Aaron tapenu ira i mangitavvung. Kabalin nga nepatuppal yatun nga panguli ta unnug, nu egga i ulu na familia nga ari mabba tu gaka ni Aaron ngem nangngua tu annungan na tadday nga pari, awayya na tu mapatay yayya. d (Lev. 17:3-6, 8, 9) Posible kari nga yaw nga panguli i tadday nga rason nu ngatta narrebelde da Kora, Datan, Abiram, anna i 250 nga panakallan na tribu kontra kani Moises anna Aaron? (Num. 16:1-3) Posible nga kunnatun. Ngem maski anni paga i makagafu, ari nga nattalupaddian nga matalo kani Jehova si Kora anna i kakavulu na. Nu purueban gafu na panguli ira ta organisasion i kinamatalo mu, anni i kuammu?
Turi ta nanguli i asayment na Kohatita ira, sigga-paran ira nga nasserbi bilang gumakkansion, mabbantay ta trangka ira, onu manangngal ta abayaw ira (Innan i parapo 11)
11. Anni i magigiammu tam ta karuan nga Kohatita?
11 Napafutuan nga suportan i panguli ira ta organisasion. Ta paddian na Israelita ira ta katanapan, nepaannung ta Kohatita ira i tadday nga prominente nga annungan. Kada magali i kampu, i Kohatita ira i taga-akka ta kaban na pakkasinabban anna masingan yatun na ngamin nga Israelita. (Num. 3:29, 31; 10:33; Jos. 3:2-4) Dakal nga pribilehio yatun! Ngem nanguli i unnug turi ta naddian ngana i Israelita ira ta Nepromesa nga Davvun. Ari ngana gare nga mawag tu kanayun nga meyala-ali i Kaban. Yayya nga ta tiempo na pammaguray ni Patul Solomon, nepaannung ta karuan nga Kohatita i trabahu bilang gumakkansion, i karuan mabbantay ta trangka, anna i karuan gapa manangngal ta abayaw ira. (1 Cro. 6:31-33; 26:1, 24) Awan tu mabibbig tam ta Biblia nga narreklamo i Kohatita ira ni tu nifersa da nga mas prominente nakuan nga annungan i meyawa ta nira megafu ta espesial bi i pribilehio na naggafuadda tu familia. Anni gafu i magigiammum tatun? Napafutuan nga suportammu i panguli ira ta organisasion ni Jehova, nelagum ngana i maski anni nga makafekto ta asayment mu. Magayayya ka lagapa nakuan ta maski anni nga asayment nga meyawa ta niko. Daddamman nga ari tu magukug i kata-katolem base ta pribilehiom. Mas tagibaloran ni Jehova i pattuppal mu anne ta maski anni nga asayment mu.—1 Sam. 15:22.
12. Anni i natageno ni Zaina turi ta nare-asayn yayya?
12 Ikonsidera i ekspiriensa ni Sister Zaina nga taga-Middle East. Nakalawa yayya tu panguli ta asayment na anna nawawan na i tagibaloran na nga pribilehio. Nare-asayn yayya kabalin na maturu tu 23 dagun nga passerbi na ta Bethel. Kagian na: “Talaga nakaddagan ngà turi ta nare-asayn ngà. Matageno ku nga gitta na awan tu kwentà anna iyava-avu ku ta baggì, ‘Anni tamma i nakkurangakku?’” I mas marake paga tatun, egga ira i kakongregasion na nga mas paga nga inammungadda i taki nga mataga-tageno na. Kudda sa: “Nu malalaki ka nakuan, ari ka nakuan napalawan ta Bethel.” Egga ira i tiempo nga fermi i pinakkafi na nono ni Zaina yatutta makatatangi yayya kada gabi. Ngem kagian na: “Kakku nipamavulun nga paddudakku i organisasion onu i pangaya ni Jehova ta nio.” Kunnasi gafu nga natangngallan kanayun ni Zaina i nono na?
13. Anni i kingngua ni Zaina tapenu malabanan i negatibo nga panageno na?
13 Kunnasi nga nalabanan ni Zaina i negatibo ira nga mataga-tageno na? Nabbibbig yayya tu artikulo ira ta publikasiottam nga makaduffun ta problema na. Dakal i neyuffun ta nisa na artikulo nga “Mapaglalabanan Mo ang Panghihina ng Loob!” ta Pebrero 1, 2001 nga isyu na Ang Bantayan. Ipakanawag natun nga artikulo i kaparehu gabbalaman nga ziga nga nataga-tageno ni Marcos nga nattura ta Biblia turi ta nanguli i annungan na. Manono paga ni Zaina, “I ehemplo ni Marcos i kawagakku tapenu malabanakku i pakkafi na nono ku.” Ari gapa vuluvuga inarayyuan ni Zaina i kokkofun na ira. Ari na nga nisisina i baggi na ni tu ninono na nga kakkabbi yayya. Nalippawa na nga i espiritu ni Jehova i mangungnguffun ta interu nga organisasion na anna kuruga ikavurungan yayya danuri na brother nga mangirollu. Nalippawa na gapa nga mawag tu kuan na organisasion na Dios i kapianan tapenu metuppal i trabahu ni Jehova.
14. Anni nga panguli ta organisasion i narigatan nga tuttulan ni Vlado, ngem anni i nakoffun ta nisa?
14 Narigatan i 73-anios nga elder nga si Vlado nga taga-Slovenia turi ta ne-merge onu netadday i kongregasion na ta tanakuan nga kongregasion tapus ari ngana nga meyusa i Kingdom Hall da. Kagian na: “Ariakku mantindian nu ngatta ari ngana meyusa i makakkasta nga Kingdom Hall mi. Natakitan ngà megafu ta nikanni laman, ni-renovate mi yatun. Karpinteru ngà anna sakan i namadday ta karuan nga bagu tu muebles tatun. Fuera paga tatun, aru i mawag tu me-adjust megafu ta pam-merge. Ari tu mabi nga kuan yatun para ta nikami nga manakam ngana nga publisher.” Anni i nakoffun kani Vlado tapenu tuttulan yatun nga direksion? Kinagi na: “Kanayun nga marresulta ta bendision ira i panguloli ta organisasion ni Jehova. Iprepara ittam danatun nga panguli ta mas darakal paga nga panguli ta mappange.” Marigatakka kari megafu ta resulta ira na pam-merge na kongregasion onu ta panguli ta asayment mu? Mepasiguradu ta niko nga mantindian ni Jehova i mataga-tageno mu. Nu suportammu yatun ira nga panguli anna ari mu vuluvuga panawan si Jehova anna i organisasion nga usu-usan na, magga mabendisionakka.—Sal. 18:25.
TANGNGALLAN KANAYUN I NONO MU TA NGAMIN NGA TIEMPO
15. Kunnasi tam nga matangngallan kanayun i nono tam nu egga ira i luttuag nga problema ta unag na kongregasion?
15 Habang umara-aranni i panuppalan naw nga mundo, magga egga ira i luttuag nga problema ta unag na kongregasion. Danatun i awayya na nga mamurueba ta kinamatalo tam kani Jehova. Yatutta mawag tu tangngallattam kanayun i nono tam. Nu gitta na marake i pinattratu ta niko na kapangngurug mu, ariammu nakuan pattakitan i nono mu. Nu madisiplina ka, ari nakuan tu yari i kepasirammu i agga-nono mu, mappetunung ka, anna kuammu yari ira mawag tu uliammu. Nu nafektakka gapa mismu ta panguli ira ta organisasion ni Jehova, napafutuan nga alawatammu yatun anna tuttulammu i direksion.
16. Kunnasim nga mapattalupaddian i pattalo mu kani Jehova anna ta organisasion na?
16 Mapattalupaddiammu i pattalo mu kani Jehova anna ta organisasion na nu mapurueban i kinamatalo mu. Makuam laman yatun nu kanayun nga tangngallammu i nono mu. Kayà na kagian, kalmadu ka laman nakuan kanayun, mannono ka tu mapia, anna parigammu i pagimamma ni Jehova ta ganna-gannug. Ikagumammu nga gigiammuan i karakter ira ta Biblia nga nawayya da nga arubangan i problema ira nga kaparefu na nappasa-pasammu anna pannonopammu tu mapia i ehemplo da ira. Makimallo ka kani Jehova para ta uffun. Kammu gapa vuluvuga isina i baggim ta kongregasion. Nu kuammu danatun, maski anni paga i mesimmu, ari naka vuluvuga meyarayyu ni Satanas kani Jehova onu ta organisasion na.—Sant. 4:7.
KANSION 126 Sigga-sifu, Matuyag, Masikan
a Mapurueban i kinamatalo tam kani Jehova anna ta organisasion na nu egga ira i problema nga luttuag ta unag na kongregasion. Mevuru-vura taw nga artikulo i tallu tatun nga problema anna nu anni i makua tam tapenu matalo tam lagapa kani Jehova anna ta organisasion na.
b Natalianan i karuan nga ngagan.
c Mas aru paga nga makaduffun nga suhestion i mabibbig mu ta artikulo nga “Makapaglilingkod Ka Bang Muli Gaya ng Dati?” ta Agosto 15, 2009 nga Ang Bantayan, p. 30.
d Ikikkiddaw na Dob nga nu kayà na ulu ira na familia nga mamarti tu alaga da nga ayam para ta makan, mawag nga iyangay da yatun nga ayam ta santuario. Ngem ari nga mekiddaw yatun tari ira ta ulu na familia nga maddian ta ararayyu ta santuario.—Deut. 12:21.