1-2. (a) Anni ira nga pakkiavu i tabbagattam? (b) Anni i mangipasingan nga kakayà ittam nga uffunan ni Jehova?

 MOFFUNAN ittam ni Jehova tapenu maattammattam i problema tam ira anna tapenu magayayya ittam nga masserbi ta nisa. Kunnasi na ittam nga uuffunan? Kunnasi ittam gapa nga mammakapia ta panguffun na ta nittam? Matabbag danatun taw nga artikulo. Ngem tabbagattam labbi yaw nga pakkiavu: Talaga kari nga kakayà ni Jehova nga uffunan ittam?

² Makoffun ta nittam i uvovug nga inusa ni apostol Pablo ta tura na ta Hebreo ira. Nitura na: “I Yafu [Jehova] i manguffun niakan, awan tu ek-ku nga paganassingan. Anni i makua na tolay niakan?” (Heb. 13:6) Segun ta referensia ira meyannung ta Biblia, i uvovug ira nga “i manguffun” tatun nga versikulo ay tumukoy ta tolay nga mappabibibi tapenu uffunan i mappappakurag. Imajinammu si Jehova nga mappabibibi tapenu kuragan i problemadu nga tolay. Magga umanugu ka nga ipasingan natun nga pangideskriba nga sigga-paran anna kakayà ni Jehova i manguffun. Nu uffunan ittam ni Jehova, magayayya ittam maski nu egga i attattammattam ira nga problema.

3. Anni i tallu nga panguffun ni Jehova tapenu magayayya ittam maski nu egga i attattammattam nga problema?

³ Kunnasi ittam nga uuffunan ni Jehova tapenu magayayya ittam maski nu egga i attattammattam nga problema? Matabbag tam yatun nu gigiammuattam i libru na Isaias. Ngatta? Megafu ta aru ta profesiya nga nipakannammu ni Jehova kani Isaias i magaplika ta aripan na ira sangawe. Fuera paga tatun, ta pangideskriba ni Isaias kani Jehova, nangusa yayya tu uvovug ira nga mabi tam laman malippawa. I Isaias kapitulo 30 i tadday nga angngarigan natun. Tatun nga kapitulo, nangusa si Isaias tu  makakkasta ira nga ilustrasion tapenu maimajittam nu kunnasi nga uffunan ni Jehova i totolena. Nitura na nga uuffunan ittam ni Jehova gukaban na (1) pagginna tu mapia ta pakimallo tam anna pattabbag tatun, (2) pangigiya ta nittam, anna (3) pamendision na ta nittam sangawe anna ta mappange. Sinaggi-taddayattam nga gigiammuan yatun nga tallu nga panguffun ni Jehova ta nittam.

4. (a) Anni i nipangagal ni Jehova ta Judio ira ta kaggawan ni Isaias, anna anni i nipamavulun na nga mesimmu? (b) Anni nga iddanama i niyawa ni Jehova para ta matalo ira? (Isaias 30:18, 19)

⁴ Ta gafu na Isaias kapitulo 30, inagalan ni Jehova i Judio ira tu “ána nga matagga i ulu da” nga ‘mangammung tu liwa ta liwa.’ Kinagi na paga: “Minarrebelde ira nga totolay. . . . Manaki da nga ginnan i dob ni Jehova.” (Isa. 30:1, 9) Megafu ta manaki na totolay i magginna, niprofesiya ni Isaias nga ipamavulun noka ni Jehova nga mazziga ira. (Isa. 30:5, 17; Jer. 25:8-11) Nesimmu yatun turi ta inaripan ira na Babilonio. Ngem matalo i karuan nga Judio yatutta egga i mensahe ni Isaias nga namaggiddanama ta nira. Kinagi na nga duttal noka i tiempo nga ipamavulun ni Jehova nga manoli ira ta Jerusalem. (Bibbigan i Isaias 30:18, 19.) Kunnatun mismu i nesimmu. Pinalawan ira ni Jehova ta pakka-aripadda ta Babilonia. Ngem aru nga dagun labbi i nappasa nige nga nesimmu yatun. Kinagi gare ni Isaias nga “mapasensia nga maginnag si Jehova tapenu faboran naka.” Mappasa labbi gafu i tiempo nige nga mepaliag danatun nga matalo. Kakurugan na, 70 nga dagun nga naaripan i Israelita ira ta Babilonia nige nga nepamavulun nga manoli ta Jerusalem i karuan ta nira. (Isa. 10:21; Jer. 29:10) Nu dati, maraddam i Israelita ira gafu ta nika-aripadda, magayayya ngana ira turi ta nakatoli ira ta Jerusalem.

5. Anni i ipasiguradu ta nittam na Isaias 30:19?

⁵ Sangawe, mabanna-bannayan ittam taw ira nga uvovug: “Magga ikallo naka sonu mappakurag ka.” (Isa. 30:19) Ipasiguradu ta nittam ni Isaias nga magginna tu mapia si Jehova nu mappakurag ittam ta nisa anna tubbag yayya insigida ta pakimallo tam ira. Kinagi paga ni Isaias: “Tabbagan naka insigida oras tu maginna naka.” Iperaddam nittam natun ira nga makapagaram nga uvovug nga sigga-paran anna kakayà na Yama tam nga uffunan danuri mappakurag ta nisa. Nu agga-nono tam yatun, magayayya ittam maski nu magattattam ittam.

6. Kunnasi nga ipasingan na kinagi ira ni Isaias nga gigginnan ni Jehova i pakimallo na kada aripan na?

⁶ Anni paga i ipasiguradu natun nga versikulo meyannung ta pakimallo tam ira? Gigginnan tu mapia ni Jehova i pakimallo na kada tadday ta nittam. Ngatta makagi tam yatun? Ta gafu na Isaias kapitulo 30, neyusa i uvovug nga “kamu” megafu ta kikkibbidan ni Jehova i totolena bilang grupo. Ngem ta versikulo 19, neyusa i uvovug ira nga “ka” anna “naka.” Kayà na kagian, kada tadday ta nira i kikkibbidan ni Jehova. Nitura ni Isaias: “Ari ka ngana nga tumangi”; “magga ikallo naka”; “tabbagan naka.” Talaga minaggiddu nga Yama si Jehova, yari tu ari na nga ikagi ta ana na nga nakkafi i nono na: “Parigammu gare i wagim. Pasikannammu i nono mu.” Ikavurungan na i kada tadday ta nittam anna yayya mismu i magginna ta pakimallo tam ira.​—Sal. 116:1; Isa. 57:15.

7. Kunnasi nga nipasingan ni Isaias anna ni Jesus nga mawag tu ari ittam nga magimmang nga makimallo?

⁷ Nu ipakimallo tam kani Jehova i tadday nga pakavurungattam, awayya na nga i ollu labbi nga kuan na ay iddan na ittam tu sikan tapenu maattamman yatun. Ngem kunnasi nu ari lagapa nga mawawan i problema tam? Baka mawag tu mamippiga ittam nga makkiddaw kani Jehova tu sikan tapenu maattamman  yatun. Kayà ni Jehova nga kunnatun i kuattam. Yatun i punto na kinagi ni Isaias: ‘Ariammu pagibannaggan si Jehova.’ (Isa. 62:7) Anni i kayà kagian natun? Nu makimallo ittam kani Jehova, mawag tu ariattam nga magimmang nga gitta na ariattam yayya pagibannagan. Ipanono ta nittam na kinagi ira ni Isaias i ilustrasion ira ni Jesus meyannung ta pakimallo nga mabibbig ta Lucas 11:8-10, 13. Tatun ira nga teksto, pagaramman ittam ni Jesus nga ‘ariattam immangan’ i makimallo anna tulu-tuloy nga “makkiddaw” tu masanto nga espiritu. Puede tam gapa nga ipakimemallo kani Jehova nga igiya na ittam tapenu makangngua ittam tu fustu ira nga desision.

8. Kunnasi nga natuppal i Isaias 30:20, 21 ta ollu nga tiempo?

⁸ Bibbigan i Isaias 30:20, 21. Turi ta pinalevutan na suddalu ira nga Babilonio i Jerusalem tu tanga-ragun-gaddua, nabbalin tu kasiggagangay na pakkakan tu pan anna paginum tu danum i pinazziga na totolay. Ngem segun ta versikulo 20 anna 21, nipromesa ni Jehova nga nu mabbabawi anna manguli i Judio ira, ipaliag na ira. Ta pagagal ni Isaias kani Jehova bilang “Katannangan nga Instruktor” da, nipromesa na ta totolay nga tudduan ira ni Jehova ta paddayaw nga alawatan na. Natuppal danatun turi ta napalawan i Judio ira ta pakka-aripadda. Si Jehova i nabbalin tu Katannangan nga Instruktor da anna gukaban na pangigiya na, netoli da i marenu nga paddayaw. Kuruga magayayya ittam megafu ta si Jehova i Katannangan nga Instruktor tam sangawe.

9. Kunnasi tam nga malawa i instruksion ira ni Jehova sangawe?

⁹ Nigitta gapa ittam ni Isaias ta estudiante ira nga tuttudduan ni Jehova. Egga i dua nga kukukuan ni Jehova tapenu tudduan ittam. Ollu, kinagi ni Isaias: “Masingan mismu na matam i Katannangan nga Instruktor mu.” Tatun nga ilustrasion, maimajittam nga agga-taddag i Instruktor ta arubang na estudiante na ira. Pribilehio tam nga matudduan ni Jehova sangawe. Kunnasi na nga kuan yatun? Gukaban na organisasion na. Ipappabalo tam i manawag ira nga instruksion nga malawa tam tatun! Makoffun i instruksion ira ta study, kombension, kunne na gapa ta publikasion, programa ira ta JW Broadcasting^®, anna karuan paga tapenu magayayya ittam maski nu egga i problema nga attattammattam.

10. Kunnasi tam nga maginna i “ngaral ta likug [tam]”?

¹⁰ Kunnaw i kinagi ni Isaias nga tadday paga nga kukukuan ni Jehova tapenu tudduan ittam: “Maginna mismu na talingam ira i ngaral  ta likug mu.” Dineskriba ni Isaias si Jehova bilang sigga-sifu nga instruktor nga daddaddanan na i estudiante na ira nga lumalakag tapus ituttuddu na ta nira i lakaradda tapenu megiya na ira. Kunnasi tam gapa nga maginna i ngaral na Dios nga gitta na egga yatun ta likug tam? Nabayag ngana nga nipetura na Dios i uvovug na ta Biblia yatutta makagi tam nga gitta na egga ta likug yatun. Nu bibbigattam gafu i Biblia, gitta na gigginnattam i ngaral na Dios ta likug tam.​—Isa. 51:4.

11. Tapenu magayayya ittam maski nu egga i attattammattam, anni ira i mawag tu kuattam, anna anni i resulta natun?

¹¹ Kunnasi ittam mammakapia ta instruksion ira ni Jehova nga iyayawa na ta organisasion na anna na Uvovug na? Egga i dua nga kinagi ni Isaias. Ollu, “yaw i dalan.” Mekadua, “tatun kamu lumakag.” (Isa. 30:21) Ari nga makalanno tu ammu tam laman “i dalan.” Mawag gapa nga ‘lumakag ittam tatun.’ Gukaban na Uvovug ni Jehova nga ipakanawag na organisasion na, magigiammu tam i ikikkiddaw na ta nittam. Mammuattam gapa nu kunnasi tam nga iyaplika yatun ira nga nagigiammu tam. Mawag nga parefu nga kuattam yatun tapenu magayayya ittam ta passerbi kani Jehova maski nu egga i attattammattam. Saka tam laman gapa masiguradu nga bendisionan ittam ni Jehova.

12. Segun ta Isaias 30:23-26, kunnasi nga binendisionan ni Jehova i totolena?

¹² Bibbigan i Isaias 30:23-26. Kunnasi nga natuppal yatun nga profesiya ta Judio ira nga nanoli ta Israel kabalidda nga naaripan ta Babilonia? Nakalawa ira tu napakaru nga bendision ta pisikal anna espiritual. Binendisionan ni Jehova i totolena tu napakaru nga literal nga makan. Ngem egga paga i mas importante nga kingngua na. Niddan na ira tu abundansia nga espiritual nga makan turi ta sisinu ngana nga metoli i marenu nga paddayaw. I bendision ira ta espiritual nga nalawa na totolay na Dios tatun nga tiempo ay ararayyu nga mas aru nu mekumpara ta bendision ira nga nalawa da dati. Gitta na nakagi ta versikulo 26, niddan ira ni Jehova tu mas aru nga nawag, kayà na kagian, inuffunan na ira nga mas malippawa i Uvovug na. (Isa. 60:2) Nakoffun danatun nga bendision ni Jehova ta aripan na ira tapenu metulu-tuloy da i magayayya anna magutu nga passerbi da ta nisa “megafu ta makasta nga kondision na futu da.”​—Isa. 65:14.

13. Kunnasi nga natuppal ta kaggawattam i profesiya meyannung ta ketoli na marenu nga paddayaw?

¹³ Magaplika kari gapa ta nittam sangawe i profesiya meyannung ta ketoli na marenu nga paddayaw? Wan! Ngem kunnasi? Namegafu  turi ta 1919 C.E., minillion ngana i nakalawan ta nika-aripadda ta Babilonia nga Dakal, i imperio na falsu nga relihion ta interu nga mundo. Neyangay ngana ira ta lugar nga mas makasta anne ta Nepromesa nga Davvun ta Israel—i espiritual nga paraiso. (Isa. 51:3; 66:8) Anni yatun nga espiritual nga paraiso?

14. Anni i espiritual nga paraiso, anna sinni ira i maddian tatun sangawe? (Innan i Kebalinan na Termino.)

¹⁴ Namegafu turi ta 1919 C.E., magayayya ngana nga maddian ta espiritual nga paraiso b i nazelugan ira. Ta pappasa na tiempo, naddian gapa danuri neravvunan i iddanama da onu i “tanakuan nga karneru” tatun nga espiritual nga paraiso anna nakalawa ira tu napakaru nga bendision maggafu kani Jehova.​—Juan 10:16, NW; Isa. 25:6; 65:13.

15. Sitaw i dian na espiritual nga paraiso?

¹⁵ Sitaw i dian na espiritual nga paraiso ta tiempo tam? Megafu ta maddian ta nadduruma nga parte na mundo i aripan ira ni Jehova, malegan gafu i espiritual nga paraiso nga paddianadda ta interu nga mundo. Maski gafu nu anni nga nasion i paddianattam, puede ittam nga mabbalin tu parte na espiritual nga paraiso nu aktibo nga supu-suportattam i kurug nga paddayaw.

16. Anni i kuattam tapenu kanayuttam nga maappresia i kasta na espiritual nga paraiso?

¹⁶ I tadday nga makua tam tapenu mattalupaddian ittam ta espiritual nga paraiso ay kanayuttam nakuan nga appresian i pawwaragi tam ta interu nga mundo. Kunnasi tam nga makua yatun? Maffokus ittam ta makasta ira nga kualidad na wawwaragi tam, ari tu ta pakkafiadda ira. (Juan 17:20, 21) Ngatta importante yatun? Nonopammu yaw nga ilustrasion. Nu mappasiar ittam ta makakkasta nga vukig, nadduruma nga klase na kayu i masingattam. Megitta ta makakkasta nga vukig i espiritual nga paraiso ta kongregasion ira sangawe. Megitta gapa ta nadduruma nga klase na kayu i nadduruma nga klase na wawwaragi tam. (Isa. 44:4; 61:3) Kanayuttam nakuan nga appresian i kasta  na “vukig,” ari tu i daral na kada “kayu” nga masingi-singattam. Anni i kayà kagian natun? Appresiattam nakuan gafu i makakkasta nga pattaradday tam bilang mawwaragi anna ari nakuan tu yari i pakkafiattam onu i pakkafian na kakongregasiottam i agga-sinnattam.

17. Anni i makua na kada tadday tapenu mattaradday i kongregasion?

¹⁷ Anni i makua na kada tadday tapenu mattaradday ittam? Mabbalin ittam nakuan tu minangngirattal tu imammo. (Mat. 5:9; Roma 12:18) Kada kuattam i adde na mawayya tam tapenu memammo i pakikavulu tam ta kakongregasiottam ira, mas mapakasta tam i espiritual nga paraiso. Nonopattam nakuan nga niyaranni ni Jehova ta marenu nga paddayaw i kada tadday nga maddian ta espiritual nga paraiso. (Juan 6:44) Siguradu nga magayayya si Jehova nu masingi-singan na nga ikakkagumattam nga ari nga madaral i imammo anna pattaradday na meddu ira nga aripan na!—Isa. 26:3; Hag. 2:7.

18. Anni nakuan i kanayuttam nga pannonopan tu mapia, anna ngatta?

¹⁸ Kunnasi ittam nga mammakapia ta bendision ira nga malawa tam bilang aripan na Dios? Pannonopattam nakuan tu mapia i magiggigiammu tam ta Uvovug na Dios anna ta nebase-Biblia ira nga publikasiottam. Makoffun i paggigiammu anna pannono tu mapia tapenu makultiba tam i kualidad ira na tadday nga Cristiano. Yatun i mamaguyu ta nittam tapenu “makka-aya-aya” ta kongregasion. (Roma 12:10) Nu pannonopattam tu mapia i bendisiottam ira sangawe, mapaladda tam i relasiottam kani Jehova. Nu pannonopattam gapa i bendision ira nga iyawa ni Jehova ta mappange, mabbalin tu kuru-kurug i iddanama tam nga passerbian yayya tu mannanayun. Makoffun ngamin danatun tapenu magayayya ittam ta passerbi kani Jehova sangawe.

19. (a) Segun ta Isaias 30:18, ta anni ittam nga makasiguradu? (b) Anni i makoffun tapenu magayayya ittam maski nu magattattam?

¹⁹ “Magguyu” si Jehova para ta nittam sonu pangultimuan na yaw nga marake nga mundo. (Isa. 30:18) “Dios na hustisia” si Jehova yayya nga makasiguradu ittam nga daralan na i mundo ni Satanas ta fustu nga tiempo. (Isa. 25:9) Pasensiattam nga innaggan yatun nga tiempo na pangipaliag ni Jehova ta nittam. Ngem habang ari paga nga nesimmu yatun, determinadu ittam nga approbetchan i pappakimallo, paggigiammu anna pangiyaplika ta Uvovug na Dios, anna pannono tu mapia ta bendisiottam ira. Nu kuattam danatun, uffunan ittam ni Jehova nga magayayya nga masserbi ta nisa maski nu magattattam ittam.