1. Anni i ekspektattam, anna ta anni ittam makasiguradu?

 EKSPEKTATTAM nga kontran ittam na karuan nu mallayyagayya ittam. Puede nga mas maggrabe paga yatun nga pangokkontra ta mappange. (Dan. 11:44; 2 Tim. 3:12; Nep. 16:21) Ngem makasiguradu ittam lagapa nga iyawa ni Jehova i uffun nga kawagattam. Ngatta? Namegafu tagga, kanayun nga dudduffunan ni Jehova i aripan na ira tapenu metuppal da i annungadda ira, maski kunnasi paga kaziga yatun. Gigiammuattam i karuan nga nesimmu ta pattolay ni profeta Ezekiel. Nilayyagayyan na i Judio ira nga naaripan ta Babilonia.

2. Anni i kinagi ni Jehova nga klase na totolay nga layyagayyan ni Ezekiel, anna anni i ikonsidera tam taw nga artikulo? (Ezekiel 2:3-6)

² Anni nga klase na totolay i layyagayyan ni Ezekiel? Kinagi ni Jehova nga ‘ari ira nga manguru-kurug,’ ‘matagga i ulu da,’ anna “rebelyoso.” Kagitta da i makapataki nga sì anna delikadu nga scorpion onu alagama. Yari tu namikkaru nga kinagi ni Jehova kani Ezekiel: “Ari ka nga maganassing”! (Bibbigan i Ezekiel 2:3-6.) Nawayya ni Ezekiel nga ituppal i annungan na nga mallayyagayya megafu ta (1) si Jehova i naddog ta nisa, (2) pinasikan yayya na espiritu na Dios, anna (3) pinasikan na uvovug ira na Dios i pangurug na. Kunnasi nga nakoffun kani Ezekiel danatun? Kunnasi ittam gapa moffunan danatun sangawe?

3. Anni ira nga uvovug i namasikan kani Ezekiel, anna kunnasi nga nipasiguradu ni Jehova i suporta na?

³ Kinagi ni Jehova kani Ezekiel: “Dobattaka.” (Eze. 2:3, 4) Magga napasikan si Ezekiel tatun. Ngatta? Siguradu nga nanono na i parehu gabbalaman nga uvovug nga inusa ni Jehova turi ta nidog na da Moises anna Isaias nga mabbalin tu profeta na. (Ex.  3:10; Isa. 6:8) Ammu gapa ni Ezekiel nu kunnasi nga zinuffunan ni Jehova yatun nga dua nga profeta tapenu metuppal i mariga nga annungadda. Yayya nga turi ta namiddua nga kinagi ni Jehova kani Ezekiel tu “dobattaka,” egga i rason na profeta tapenu mattalo ta suporta ni Jehova. Namikkaru gapa nga netura ta libru na Ezekiel: “Minay niakan i uvovug ni Jehova.” (Eze. 3:16) Pakatotoli gapa nga netura: “Minay uli niakan i uvovug ni Jehova.” (Eze. 6:1) Siguradu nga nakumbinsi si Ezekiel nga si Jehova i naddog ta nisa. Fuera tatun, pari i yama ni Ezekiel. Magga nituddu na ta nisa nga adde paga tagga, kanayun nga nipasiguradu ni Jehova ta profeta na ira nga duffunan na ira. Angngarigan na, kinagi ni Jehova kada Isaac, Jacob, anna Jeremias yaw ira nga uvovug: “Kavulu mà.”​—Gen. 26:24; 28:15; Jer. 1:8.

4. Anni ira nga makapabannay nga uvovug i namasikan kani Ezekiel?

⁴ Anni i reaksion na magaru nga Israelita ta ilayyagayya ni Ezekiel? Kinagi ni Jehova: “Ari saw nga magginna nikaw i tangabbalayan na Israel, ta manaki da i magginna niakan.” (Eze. 3:7) Ta pammanaki da kani Ezekiel, si Jehova i pinanakitadda. Nipasiguradu danatun nga uvovug kani Ezekiel nga maski nu panakitadda yayya, ari na kayà kagian nga ari na ngana nakua i annungan na bilang profeta. Nipasiguradu paga ni Jehova kani Ezekiel nga sonu mesimmu i panentensia nga nilayyagayya na ta totolay, “mannammuadda saw nga egga bi i profeta ta nallatanadda.” (Eze. 2:5; 33:33) Magga napasikan si Ezekiel tatun nga makabannay nga uvovug tapenu metuppal na i ministerio na.

5. Base ta Isaias 44:8, paggafuan na sikattam?

⁵ Mapasikan gapa ittam ta pakannammu nga si Jehova i naddog ta nittam. Inagalan na ittam bilang ‘saksi’ na. (Isa. 43:10) Fugurammu yatun nga pribilehio! Kinagi bi ni Jehova kani  Ezekiel: “Ari ka nga maganassing.” Kakkagian na gapa ta nittam: “Ari kamu nga maganassing.” Ngatta ari tam nga ikassing danuri kumokkontra ta nittam? Megafu ta kagitta ni Ezekiel, si Jehova i naddog ta nittam anna uffunan na ittam.​—Bibbigan i Isaias 44:8.

6. (a) Kunnasi nga nipasiguradu ni Jehova i suporta na ta nittam? (b) Ngatta mabanna-bannayan anna mapasikan ittam?

⁶ Ipasiguradu ni Jehova i suporta na ta nittam. Angngarigan na, nage nga kinagi ni Jehova nga “Sikamu i saksì ira,” kinagi na labbi: “Nu maddaki ka ta danum, kavulu mà, anna ta bannag ira, ariaddaka noka malaggabban. Nu maddalakka ta afi, ari ka noka malussiang, apenas tu lanzoban naka.” (Isa. 43:2) Ta pamministerio tam, meparubang ittam ta napakaru nga problema nga gitta na malaggabban ittam ngana, anna ta kitazziga ira nga problema nga gitta na malussiang ittam. Maski nu kunnatun, metulu-tuloy tam i mallayyagayya ta uffun ni Jehova. (Isa. 41:13) Gitta na ta kaggawan ni Ezekiel, aru sangawe i mammanaki ta ilayyagayya tam. Ngem nonopattam nakuan nga nu panakitadda ittam, ari na kayà kagian nga ari tam ngana nakua i annungattam bilang Saksi ira na Dios. Mabanna-bannayan anna mapasikan ittam megafu ta pakannammu nga magayayya si Jehova ta matalo nga pangitulu-tuloy tam ta pangilayyagayya ta mensahe na. Kinagi ni apostol Pablo: ‘Bala-balattan noka na Dios i kada tadday segun ta kingngua da.’ (1 Cor. 3:8; 4:1, 2) Tadday nga sister nga nabayag ngana nga payunir i nakkagi: “Magayayya ngà megafu ta ammù nga bala-balattan ni Jehova i pappursigi tam.”

7. Kada manono ni Ezekiel i nasirmata na, anni i efekto natun ta nisa? (Innan i letratu ta vungun.)

⁷ Nasingan ni Ezekiel nga kuruga makapangngua i espiritu na Dios. Nasirmata na nga i masanto nga espiritu i manudduffun ta makapangngua ira nga anghel anna i mamagandar ta daddarakal nga lilli na nelangitan nga karuahe. (Eze. 1:20, 21) Anni i reaksion ni Ezekiel? Nitura na: “Ta pakasingakku tatun, nallakág ngà.” Fermi i pabbaw na yari tu nallakág yayya ta davvun. (Eze. 1:28) Turi kua, kada manono ni Ezekiel yatun nga makapabbaw nga sirmata, mapasikan i pangurug na nga ta uffun na espiritu na Dios, metuppal na i annungan na.

8-9. (a) Anni i nalawa ni Ezekiel megafu ta dob ni Jehova? (b) Kunnasi paga nga pinasikan ni Jehova si Ezekiel ta mariga nga annungan na?

⁸ Nidog ni Jehova kani Ezekiel: “Ana na tolay, tumaddag ka ta kibbidattaka.” Yatun nga dob kunne na gapa i espiritu na Dios i nangiyawa kani Ezekiel tu sikan nga kawagan na tapenu makalakka ta davvun. Nitura ni Ezekiel: “Minay niakan i espiritu anna pinataddag nà natun.” (Eze. 2:1, 2) Turi kua, ta pallayyagayya ni Ezekiel, nigiya yayya na “pakapangngua” na Dios, i masanto nga espiritu na. (Eze. 3:22; 8:1; 33:22; 37:1; 40:1) Pinasikan na espiritu na Dios si Ezekiel ta annungan nga nalawa na—i pallayyagayya ta totolay nga ‘matagga i ulu anna futu da.’ (Eze. 3:7) Kinagi ni Jehova kani Ezekiel: “Kingnguà tu kasittagga na muka da i muka mu anna kasittagga na frente da i frentem. Kingnguà tu kagitta na diamante i frentem, mas matagga paga anne ta batu. Ari ka maganassing ta nira, ni tu ta gimmukatadda.” (Eze. 3:8, 9) Gitta na kakkagian ni Jehova kani Ezekiel: ‘Ariammu ipamavulun nga makkafi ka megafu ta katagga na ulu danaw nga totolay. Pasikannattaka.’

⁹ Kabalin natun, niyangay na espiritu na Dios si Ezekiel ta lugar nga pallayyagayyan na. Nitura ni Ezekiel: “Masiki-sikan i pinamaguyu nio na pakapangngua ni Jehova.” Nappasa labbi i tanga-ligguan nage nga nalippawa tu mapia na profeta i mensahe nga mawag tu magutu  nga ilayyagayya na. (Eze. 3:14, 15) Tapus zinog yayya ni Jehova nga umay ta tana nu sitaw ‘minay nisa i espiritu.’ (Eze. 3:23, 24) Preparadu ngana si Ezekiel nga igafu i pallayyagayya na.

10. Anni nga uffun i kawagan tapenu metuppal tam i trabahu nga pallayyagayya, anna ngatta?

¹⁰ Anni nga uffun i kawagattam tapenu makapallayyagayya ittam? Tapenu matabbag yatun, nonopattam i nesimmu kani Ezekiel. Nage na nga igafu i pallayyagayya na, niddan yayya na espiritu na Dios tu sikan nga kawagan na. Kagitta ni Ezekiel, makapallayyagayya ittam laman gukaban na uffun na espiritu na Dios. Ngatta kawagattam i espiritu na Dios? Megafu ta kokkontran ittam ni Satanas tapenu iyemmattam i pallayyagayya tam. (Nep. 12:17) Ta pagimamma na tolay, ari tam vuluvuga maffu si Satanas. Ngem megafu ta pallayyagayya tam, affa-affutattam yayya! (Nep. 12:9-11) Kunnasi? Nu mallayyagayya ittam, ipasa-pasingattam nga ari tam ikassing i pangananassing ni Satanas. Kada mallayyagayya ittam, maffu si Satanas. Anni gafu i makagi tam megafu ta metulu-tuloy tam lagapa i mallayyagayya maski aru i kumokkontra? Manawag nga pasikannan ittam ni Jehova gukaban na masanto nga espiritu na anna mapagayayya tam yayya.​—Mat. 5:10-12; 1 Ped. 4:14.

11. Anni i makua na espiritu na Dios ta nittam, anna kunnasi tam nga tulu-tuloy nga malawa yatun?

¹¹ Anni paga nga pamasiguradu i mala tam meyannung ta figuratibo nga pamatagga ni Jehova ta muka anna frente ni Ezekiel? Mapasikan ittam na espiritu na Dios tapenu malampasan i maski anni nga makefugag ta pallayyagayya tam. (2 Cor. 4:7-9) Anni gafu i kuattam tapenu masiguradu tam nga tulu-tuloy nga malawa tam i espiritu na Dios? Mawag tu tulu-tuloy tam nga ipakimallo yatun anna makkomfiansa ittam nga ginnan ni Jehova i pakimallo tam ira. Yaw i nituddu ni Jesus meyannung ta tulu-tuloy nga pappakimallo: “Makkiddaw kamu . . . magaleg kamu . . . mattotto kamu.” Nu kuattam yatun, kunnaw i  kuan ni Jehova: “Iddan na ta Espiritu Santo danuri i makkiddaw sa.”​—Luc. 11:9, 13; King. 1:14; 2:4.

12. Base ta Ezekiel 2:9–3:3, naggafuan na naluku nga pabbibbigan, anna anni i naddian natun?

¹² Ari laman tu i espiritu na Dios i namasikan kani Ezekiel. Pinasikan gapa na uvovug ira na Dios i pangurug na. Nasirmata ni Ezekiel i lima nga agga-taron tu naluku nga pabbibbigan. (Bibbigan i Ezekiel 2:9–3:3.) Naggafuan natun nga naluku nga pabbibbigan? Anni i naddian na yatun? Kunnasi natun napasikan i pangurug ni Ezekiel? Innattam i tabbag. Naggafu i naluku nga pabbibbigan ta trono na Dios. Awayya na tu inusa ni Jehova i tadday ta appa nga anghel nga nappollu nga nasirmata ni Ezekiel nga mangiyawa ta nisa tatun nga naluku nga pabbibbigan. (Eze. 1:8; 10:7, 20) Netura tatun nga naluku nga pabbibbigan i uvovug ira na Dios—i apaddu nga mensahe na pamanunnu nga mawag tu ikagi ni Ezekiel ta rebelyoso ira nga naaripan. (Eze. 2:7) Netura i mensahe ta arubang anna likug natun nga naluku nga pabbibbigan.

13. Anni i kinagi ni Jehova nga kuan ni Ezekiel ta naluku nga pabbibbigan, anna ngatta mammi yatun?

¹³ Kinagi ni Jehova kani profeta Ezekiel nga mawag tu kanan na i naluku nga pabbibbigan tapenu “mabattug” yayya tatun. Sinuppal na yatun anna inufu na i naluku nga pabbibbigan. Anni i kebalinan natun nga parte na sirmata? Mawag tu iponag ni Ezekiel i mensahe nga ikagi na nga gitta na mabbalin yatun tu parte na baggi na. Megafu tatun, mafektan i kononaggan nga panageno na. Tapus, nakaddagan yayya ta “kasi-ammi na issi na pisokan” i naluku nga pabbibbigan. (Eze. 3:3) Ngatta nakagi na yatun? Megafu ta makapagayayya kani Ezekiel i pribilehio nga irepresenta si Jehova. Megitta yatun ta matageno na nu kuman yayya tu mammi. (Sal. 19:8-11) Kuruga mappabalo yayya megafu ta pinili yayya ni Jehova nga mabbalin tu profeta na.

14. Anni i nakoffun kani Ezekiel nga mabbalin tu preparadu ta pallayyagayya?

¹⁴ Turi kua, nikagi ni Jehova kani Ezekiel: “Ginnammu anna ipafutum i ngamin nga uvovug nga ikagì nikaw.” (Eze. 3:10) Nidog tatun ni Jehova tu ipatalatto ni Ezekiel ta nono na i uvovug ira nga netura ta naluku nga pabbibbigan anna pannonopan na tu mapia danatun. Turi ta kingngua ni Ezekiel yatun, mas nassikan i pangurug na. Egga ngana gapa i mafuersa nga mensahe nga ikagi na ta totolay. (Eze. 3:11) Turi ta nalippawa tu mapia ni Ezekiel i mensahe na Dios anna nipafutu na yatun, nakaprepara ngana yayya nga igafu i pallayyagayya anna itulu-tuloy yatun adde ta metuppal na.​—Ikumpara i Salmo 19:14.

15. Anni i mawag tu ‘ipafutu’ tam tapenu ari ittam magimmang nga mallayyagayya?

¹⁵ Tapenu ari ittam magimmang nga mallayyagayya, mawag gapa tu tulu-tuloy nga pasikannan na uvovug ira na Dios i pangurug tam. Mawag tu ‘ipafutu’ tam i ngamin nga ikagi ni Jehova ta nittam. Sangawe, makikkibbida si Jehova ta nittam gukaban na Uvovug na, i Biblia. Kunnasi tam masiguradu nga kanayun nga afektan na Uvovug na Dios i appana-panono, mataga-tageno, anna motibo tam ira?

16. Kunnasi tam mepatalatto ta futu tam i Uvovug na Dios?

¹⁶ Massikan ittam ta pisikal nu kuman ittam anna meponag na baggi tam i kanattam. Massikan gapa ittam ta espiritual nu gigiammuattam i Uvovug na Dios anna pannonopan tu mapia yatun. Yatun i magigiammu tam ta naluku nga pabbibbigan. Kayà ni Jehova nga “mabattug”  ittam ta Uvovug na, kebalinan na nga malippawa tam tu mapia yatun. Makua tam yatun gukaban na pakimallo, pabbibbig, anna pannono tu mapia. Makimallo ittam labbi tapenu meprepara i futu tam nga mangalawa ta appana-panono na Dios. Tapus mabbibbig ittam tu Biblia. Magimmang ittam gapa tu manganannuan tapenu pannonopan tu mapia i binibbig tam. Anni i efekto na nu kunnatun i kuattam? Nu mas nga pannonopattam tu mapia i Uvovug na Dios, mas nga mepatalatto yatun ta figuratibo nga futu tam.

17. Ngatta importante nga pannonopattam tu mapia i mabibbig tam ta Biblia?

¹⁷ Ngatta importante nga bibbigan anna pannonopattam tu mapia i Biblia? Megafu ta mangiyawa yatun tu sikan nga kawagattam tapenu melayyagayya tam i mensahe na Pappatulan sangawe anna mekagi i madaddammo nga mensahe na pamanunnu ta aranni ngana nga mappange. Nu pannonopattam gapa tu mapia i makakkasta ira nga kualidad ni Jehova, mas mabbalin tu meggo i relasiottam ta nisa. Bilang resulta, mabbalin tu memammo i nono tam anna makontentu ittam, gitta na matageno tam nu kuruga mammi anna masissingngo i kinnattam.​—Sal. 119:103.

18. Anni noka i fersadu nga alawatan na totolay ta teritoria tam, anna ngatta?

¹⁸ Ari ittam nga profeta gitta ni Ezekiel. Ngem determinadu ittam nga tulu-tuloy nga ilayyagayya i mensahe ni Jehova nga nipetura na ta Uvovug na adde sonu malanna-lanno nga metuppal tam i annungattam segun ta ikaya na. Sonu tiempo na panuppalan, ari saw nga merason na totolay ta teritoria tam nga ari ira nga naabisowan onu ari ira niddan na Dios tu chansa. (Eze. 3:19; 18:23) Fersadu nga alawatadda saw nga naggafu ta Dios i mensahe nga nilayyagayya tam.

19. Anni i mamasikan nittam tapenu tulu-tuloy tam nga metuppal i trabahu nga pallayyagayya?

¹⁹ Anni i mamasikan nittam nga mangituppal ta trabahu nga pallayyagayya? I tallu gabbalaman nga gannug nga namasikan kani Ezekiel. Itulu-tuloy tam i mallayyagayya megafu ta ammu tam nga si Jehova i naddog ta nittam, pasikannan ittam na masanto nga espiritu na Dios, anna pasikannan na Uvovug na Dios i pangurug tam. Ta uffun ni Jehova, mapaguyu ittam nga mallayyagayya anna “makapagattam [ittam] adde ta panuppalan.”​—Mat. 24:13.