1. Anni i mensahe ni profeta Isaias ta kasi-Israelita na ira?

 DINESKRIBA ni profeta Isaias si Jehova bilang “Dios na kinakurug.” I uvovug nga netransleyt tu “kinakurug” literal nga kebalinan na “amen.” (Isa. 65:​16, ftn.) I kebalinan na “amen” ay “paray nakuan” onu “siguradu.” Nu meyusa ta Biblia i uvovug nga “amen” tapenu deskriban si Jehova onu si Jesus, garantiya yatun nga kurug i kagiadda. Yaw gafu i manawag nga mensahe ni Isaias ta kasi-Israelita na ira: Nu anni i niprofesiya ni Jehova, kanayun nga mapattalakkan yatun. Pinakurug yatun ni Jehova gukaban na pangituppal na ta kada promesa na.

2. Ngatta makapattalo ittam ta promesa ira ni Jehova meyannung ta mappange tam, anna anni ira nga pakkiavu i tabbagattam?

² Makapattalo kari ittam gapa ta promesa ira ni Jehova meyannung ta mappange tam? Ma-800 dagun kabalin na tiempo ni Isaias, nipakanawag ni apostol Pablo nu ngatta makapattalo ittam ta promesa ira na Dios. Kinagi ni Pablo: ‘Arian na awayya nga malladda-laddug i Dios.’ (Heb. 6:18) Nonopammu yaw: Arian na nga awayya tu mallawan ta tattadday nga latua i mammi anna masing nga danum. Kunnatun gapa si Jehova. Yayya i Paggafuan na kinakurug, yatutta ari yayya vuluvuga malladdug. Makapattalo ittam gafu ta ngamin nga kakkagian ni Jehova, nelagum i ngamin nga promesa na para ta mappange tam. Taw nga artikulo, tabbagattam danaw nga pakkiavu: Anni i nipromesa ni Jehova ta nittam ta mappange? Anni nga garantiya i niyawa ni Jehova nga mesimmu noka i promesa na?

3. (a) Anni nga promesa na Dios i kakayà na aripan na ira? (Nepakannammu 21:​3, 4) (b) Anni i reaksion na karuan nu ikagi tam ta nira yatun nga promesa?

³ Gigiammuattam i promesa nga kakayà na aripan ira na Dios ta interu mundo. (Bibbigan i Nepakannammu 21:​3, 4.) Nipromesa  ni Jehova nga “awan ngana noka tu matay, onu maraddam, onu tumangi-tangi, onu magattam ta taki.” Aru ta nittam i mangusa tatun nga teksto tapenu banna-bannayan i layyagayyattam anna tapenu ipasingan ta nira nu kunnasi saw i pattolay ta Paraiso. Anni i reaksion na karuan nu ikagi tam ta nira yatun nga promesa? Baka kagiadda, “Kekkasta nu mesimmu yatun, ngem gitta na imposible.”

4. (a) Turi ta nipromesa ni Jehova i meyannung ta paraiso, anni i ammu na nga mesimmu ta kaggawattam? (b) Fuera ta pappromesa ni Jehova, anni paga i kingngua na?

⁴ Tagga ta nipetura ni Jehova kani apostol Juan yaw nga promesa nga Paraiso, magga ammu na nga ta kaggawattam, ikagi tam yatun nga iddanama ta tanakuan kada ilayyagayya tam i mensahe na Pappatulan. Dati ngana gapa nga ammu ni Jehova nga aru saw i madduda tatun nga promesa meyannung ta “bagu ira nga gannug.” (Isa. 42:9; 60:2; 2 Cor. 4:​3, 4) Yayya nga kunnasi tam gafu makumbinsi i tanakuan anna i baggi tam nga talaga mesimmu saw i bendision ira nga mabibbig ta Nepakannammu 21:​3, 4? Nangiyawa si Jehova tu makakumbinsi ira nga rason nu ngatta makapattalo ittam tatun. Anni danatun?

5. Ngatta makapattalo ittam ta promesa na Dios nga Paraiso, anna sitaw tam nga mabibbig yatun?

⁵ Ta tumunug ira nga versikulo, mabibbig tam nu ngatta mapattalakkattam i promesa ni Jehova nga Paraiso. Mabibbig tam tatun: “Kinagi nuri na agga-itubang ta trono, ‘Talibaguak-ku sangoye ngamin i ganna-gannug!’ Kinagi na gapa niakan, ‘Itura mu yaw ta kurug danaw nga uvovug anna awan tu paddudam-mu nira.’ Kinagi na paga niakan, ‘Netuppal ngana! Sakan i Alfa anna Omega—i Ollu anna i Pangurianan.’”—Nep. 21:​5, 6a.

6. Ngatta mapadakal na pamasiguradu ira ta Nepakannammu 21:​5, 6 i pattalo tam ta promesa na Dios?

⁶ Ngatta padakallan naw ira nga versikulo na Biblia i pattalo tam ta promesa na Dios? Kagian na libru nga Apocalipsis Kasukdulan Nito meyannung tatun: “Gitta na si Jehova mismu i maffiffirma tu tadday nga garantiya, onu titulu, tapenu siguraduan nga malawa na matalo nga totolay yatun ira nga bendision ta mappange.” b Mabibbig ta Nepakannammu 21:​3, 4 i promesa na Dios. Ngem ta versikulo 5 anna 6, malegattam i gitta na firma ni Jehova nga mangipasiguradu nga kurug yatun nga promesa na. Innattam ngana tu mapia i uvovug ira nga inusa ni Jehova tatun nga pamasiguradu na.

7. Sinni i naguvovug ta gafu na versikulo 5, anna ngatta espesial yatun?

⁷ Kunnaw i mabibbig ta gafu na pamasiguradu na Dios: “Kinagi nuri na agga-itubang ta trono.” (Nep. 21:5a) Espesial yatun ira nga uvovug gafu ta tadday yatun ta tallu laman nga beses nu sitaw si Jehova mismu i naguvovug ta libru nga Nepakannammu. Ari gafu tu tadday nga makapangngua nga anghel i nangikagi tatun nga pamasiguradu anna ari gapa tu i napaginnolay nga si Jesus, nu ari, si Jehova mismu! Ipasigo natun nga talaga mapattalakkan i uvovug ira na tumunug nga mabibbig tam. Ngatta makagi tam yatun? Megafu ta “ari vuluvuga nga malladdug” si Jehova. (Tito 1:2) Talaga mesimmu gafu ta mappange i mabibbig tam ta Nepakannammu 21:​5, 6. 

8. Kunnasi nga nipasigo ni Jehova nga talaga mesimmu i nipromesa na? (Isaias 46:10)

⁸ Tumunug nga gigiammuattam i kinagi ni Jehova ta Nepakannammu 21:5. Ta orihinal  nga lengguahe, nigafu na yatun gukaban na pakkagi tu uvovug nga awayya na nga metransleyt tu “Innan nu!” onu “Magginna kamu!”‏ Namippiga nga neyusa ta libru na Nepakannammu i kaparehu natun ira nga uvovug. Segun ta tadday nga referensia, meyusa gapa i exclamation mark tatun nga uvovug tapenu apan i atension na mabbibbig ta tumunug nga mekagi. Anni kari i tumunug nga nikagi na Dios? Mabibbig tam: “Talibaguak-ku sangoye ngamin i ganna-gannug!” Fustu gapa tu ta mappange paga i panguli ira nga kakkagian ni Jehova. Ngem para ta nisa, megafu ta sobra i kasiguradu na nga mesimmu yaw nga promesa, maguvovug yayya nga gitta na mesissimmu ngana sangoye onu sangawe danatun ira nga panguli.​—Bibbigan i Isaias 46:10.

9. (a) Anni nga dua nga gannug i tukuyan na uvovug ira nga ‘talibaguan ngamin nga ganna-gannug’? (b) Anni saw i mesimmu ta maddaggun nga “langi” anna “davvun”?

⁹ Gigiammuattam i tumunug nga uvovug ira ta Nepakannammu 21:5: ‘Talibaguan sangoye ngamin i ganna-gannug.’ Tatun nga kapitulo na Biblia, tumukoy danatun nga uvovug ta dua nga kuan ni Jehova—i panali anna i pangitoli. Ollu, anni kari i talian ni Jehova? Ta Nepakannammu 21:1 mabibbig tam: “Awan ngana yuri i dana nga langi anna davvun.” I “dana nga langi” ay tumukoy ta gobiernu ira nga kontroladu ni Satanas tuange ta demonio na ira. (Mat. 4:​8, 9; 1 Juan 5:19) Ta Biblia, neyusa i uvovug nga “davvun” tapenu tumukoy ta maddian ira tatun. (Gen. 11:1; Sal. 96:1) Tumukoy gafu i ‘dana nga davvun’ ta marake ira nga totolay sangawe. Ari laman tu basta pakastan onu pakappian saw ni Jehova i maddaggun nga langi anna i davvun, nu ari lagu, interamente nga talianan na saw yatun. Talian na saw i maddaggun nga langi anna i maddaggun nga davvun tu “bagu nga langi anna bagu nga davvun.” Kayà kagian natun nga immagurayan saw na tadday nga bagu nga gobiernu i matunung nga totolay.

10. Anni noka i talibaguan ni Jehova?

¹⁰ Ta Nepakannammu 21:​5, tumunug nga mabibbig tam i kagian ni Jehova meyannung ta gannug ira nga talibaguan na. Sifutan nga ari nga kinagi ni Jehova: “Kuakku sangoye i ngamin nga bagu nga ganna-gannug.” Lallagu, kinagi na: “Talibaguak-ku sangoye ngamin i ganna-gannug.” Pabbalinan noka ni Jehova i davvun anna i totolay tu gitta na bagu gukaban na pamabbalin ta nira tu perfekto. Gitta na niprofesiya ni Isaias, kuan noka ni Jehova i interu nga davvun tu makakkasta nga lugar nga kagitta na hardin na Eden. Maski sittam gapa noka ay mapabbalin tu bagu megafu ta interamente nga pammapian na i kada tadday ta nittam. Mapammapia noka danuri pilay, vuling, anna bangngag, anna mapaginnolay paga lagu danuri natay.​—Isa. 25:8; 35:​1-7.

11. Anni nga dob anna anni nga rason i niyawa ni Jehova kani Juan?

¹¹ Anni paga i kinagi na Dios tapenu ipasiguradu nga mapattalakkattam yayya? Kinagi ni Jehova kani Juan: “Itura mu yaw ta kurug danaw nga uvovug anna awan tu paddudam-mu nira.” (Nep. 21:5) Ari laman tu nidog ni Jehova nga “itura mu.” Nangikagi gapa yayya tu rason. Kagian na, “Ta kurug danaw nga uvovug anna awan tu paddudam-mu nira.” Kayà na kagian, kanayun nga mapattalakkan anna fustu i kakkagian na Dios. Mappabalo ittam ta sinuttul ni Juan i dob nga “itura mu.” Megafu gare tatun, mabibbig tam i promesa na Dios nga Paraiso anna mapannonopattam tu mapia i makakkasta ira nga bendision ta mappange.

12. Ngatta fustu laman nga makagi ni Jehova: “Netuppal ngana!”

 ¹² Anni i tumunug nga kagian na Dios? “Netuppal ngana!” (Nep. 21:6) Ngatta kinagi ni Jehova tatun nga netuppal ngana i promesa na ira? Megafu ta awan vuluvuga tu makefugag ta nisa ta pangituppal na ta gakkag na. Tapus egga paga i kagian ni Jehova nga mangipasiguradu ta nittam nga magga mesimmu noka i promesa na. Anni yatun?

13. Ngatta kinagi ni Jehova yaw: “Sakan i Alfa anna Omega”?

¹³ Kagitta na nakagi ta gafu, namittallu nga nakiyuvovug mismu si Jehova ta sirmata na ira kani Juan. (Nep. 1:8; 21:​5, 6; 22:13) Ta kada tadday tatun ira nga sirmata, kunnaw i kinagi ni Jehova: “Sakan i Alfa anna Omega.” I Alfa i ollu nga letra na alfabeto na Griego ira anna i Omega gapa i ultimu nga letra na. Ipasingan na pangusa ni Jehova ta deskripsion nga “Alfa anna Omega” nga nu egga i gannug nga igafu na, siguradu nga bala-balinan na yatun adde ta metuppal na.

14. (a) Mangiyawa tu angngarigan nu kanni nga gitta na kinagi ni Jehova i “Alfa” anna nu sonu anni gapa nga gitta na kagian na i “Omega?” (b) Anni nga pamasiguradu i mabibbig ta Genesis 2:​1-3?

¹⁴ Kabalin nga pinaratu ni Jehova si Adan anna si Eva, nikagi na i orihinal nga gakkag na. Kunnaw i kagian na Biblia: “Binendisionan gapa ira na Dios tapus kinagi na nira: ‘Maggaka kamu tapenu umaru kamu, pannuan nu i davvun anna tangngallan nu yatun.’” (Gen. 1:28) Tatun nga tiempo, gitta na kinagi ni Jehova i “Alfa.” Manawag i pinakkagi na taw nga gakkag na: Duttal noka i tiempo nga pannuan na perfekto anna minattuppal nga gaka-gaka da Adan anna Eva i davvun anna pabbalinadda yatun tu tadday nga paraiso. Sonu matuppal ngana yatun, gitta na ikagi saw ni Jehova i  “Omega.” Kabalin nga naparatu “i langi anna i davvun anna i ngamin nga egga tatun,” nangikagi si Jehova tu tadday nga pamasiguradu. Malegan yatun ta Genesis 2:​1-3. (Bibbigan.) Kinagi ni Jehova nga sagradu i mekapitu nga aggaw. Anni i kayà na kagian yatun? Ipasiguradu ni Jehova nga magga ituppal na i gakkag na para ta totolay anna para ta davvun. Nalanna-lanno noka nga metuppal yatun ta ultimu na mekapitu nga aggaw.

15. Ngatta gitta na nafugaddan ni Satanas i gakkag na Dios para ta totolay?

¹⁵ Turi ta narrebelde da Adan anna Eva, nabbalin ira tu minattagaruli anna nepasa da i liwa anna patay ta gaka-gaka da. (Roma 5:12) Megafu tatun, gitta na nafugaddan ni Satanas i gakkag na Dios nga pannuan i davvun tu perfekto anna minattuppal nga totolay. Gitta na pinabbalin gapa ni Satanas nga imposible ngana kani Jehova nga ikagi i “Omega.” Para kani Satanas, ari nga mawayya ni Jehova nga ituppal i promesa na. Anni ngana gafu i kuan ni Jehova? Baka nanono ni Satanas nga patayan ngana laman na Dios da Adan anna Eva tapus mamaratu tu bagu nga perfekto nga magatawa tapenu ituppal i gakkag na para ta totolay. Ngem nu kingngua yatun na Dios, magga akusan Yayya ni Satanas nga laddug. Ngatta? Megafu ta base ta Genesis 1:​28, kinagi ngana ni Jehova kada Adan anna Eva nga i gaka da i mamannu ta davvun.

16. Anni i awayya na nga nanono ni Satanas tapenu maakusan na si Jehova nga naffaliu ta gakkag na?

¹⁶ Anni paga i awayya na nga ninono ni Satanas nga kuan na Dios? Awayya na tu nanono ni Satanas nga pamavulunan ni Jehova da Adan anna Eva nga makka-ana, ngem ari ira vuluvuga mabbalin tu perfekto. (Ecl. 7:20; Roma 3:23) Nu mesimmu yatun, magga akusan na Diablo si Jehova nga naffaliu yayya ta gakkag na. Ngatta? Megafu ta ari nga ituppal natun i gakkag na Dios, nga pannuan i Paraiso nga davvun tu perfekto anna minattuppal nga gaka-gaka da Adan anna Eva.

17. Anni i solusion ni Jehova ta rebelyon ni Satanas anna na ollu nga totolay, anna anni noka i metuppal natun? (Innan gapa i letratu.)

¹⁷ Kapianan i solusion ni Jehova ta rebelyon ni Satanas anna na ollu nga totolay. Ngem baka nakaddagan si Satanas tatun nga kingngua ni Jehova. (Sal. 92:5) Imbes nga mabbalin tu laddug si Jehova, pinakurug na lallagu nga kurug i kinagi na, megafu ta nipamavulun na nga makka-ana da Adan anna Eva. Imbes gapa tu naffaliu si Jehova ta gakkag na, pinakurug  na lallagu nga navviktoria yayya. Siniguradu na nga metuppal i gakkag na gukaban na pangiyawa tu tadday nga “gaka” nga mangipaliag ta minattuppal nga gaka-gaka da Adan anna Eva. (Gen. 3:15; 22:18) Siguradu nga nakaddagan si Satanas ta niyunnug ni Jehova nga tavvu! Ngatta? Neyawa gare i tavvu megafu ta ari makasarili nga aya. (Mat. 20:28; Juan 3:16) Awan kani Satanas yatun nga kualidad ta makasarili yayya. Anni gafu i metuppal megafu ta tavvu? Ta kabalin na Tanga-rivu Dagun nga Pammaguray ni Cristo, maddian noka ta tadday nga paraiso nga davvun i perfekto anna minattuppal nga gaka-gaka da Adan anna Eva, gitta na orihinal nga ginakkag ni Jehova. Tatun nga tiempo, gitta na ikagi saw ni Jehova i “Omega.”

18. Anni i tallu nga pamasiguradu nga niyawa na Dios ta nittam? (Innan gapa i kahon nga “ Tallu nga Rason Nu Ngatta Mattalo ta Promesa ni Jehova.”)

¹⁸ Nagigiammu tam taw nga artikulo i rason ira nu ngatta makasiguradu ittam nga mabbalin noka tu Paraiso i davvun. Anni gafu i ikagi tam ta tanakuan tapenu mepasiguradu ta nira nga talaga mesimmu yatun? Ollu, si Jehova mismu gare i nappromesa. Mabibbig ta libru na Nepakannammu: “Kinagi nuri na agga-itubang ta trono, ‘Talibaguak-ku sangoye ngamin i ganna-gannug!’” Si Jehova ay ma-uto, makapangngua, anna talaga karagatan na nga ituppal i promesa na. Mekadua, talaga siguradu nga metuppal i promesa ni Jehova megafu ta para ta nisa, gitta na nesimmu ngana yatun. Yayya nga kinagi na: “Kurug danaw nga uvovug anna awan tu paddudam-mu nira. . . . Netuppal ngana!” Mekatallu, nu pegafuanan ni Jehova i tadday nga gannug, bala-balinan na yatun adde ta metuppal na, yayya nga makagi na: “Sakan i Alfa anna Omega.” Pakurugan noka ni Jehova nga si Satanas i laddug anna naffaliu ta gakkag na.

19. Nu paddudan na layyagayyammu i promesa na Dios nga Paraiso, anni i kuammu?

¹⁹ Daddamman nga kada ikagim ta layyagayyammu i pamasiguradu na Dios, mas dumakal gapa i pattalo mu ta promesa ira ni Jehova. Yayya nga sonu tumunug nga ibibbig mu i Nepakannammu 21:4 meyannung ta makakkasta nga promesa nga Paraiso tapus kagian na, “Kekkasta nu mesimmu yatun, ngem gitta na imposible,” anni gafu i kuammu? Makasta nu ibibbig anna ipakanawag mu i versikulo 5 anna 6. Ipasingammu nu kunnasi nga nipasiguradu ni Jehova nga mesimmu i promesa na gitta na pangitura na ta mismu nga firma na.​—Isa. 65:16.