1-2. (a) Ngatta nakagi ni apostol Pablo nga aya “i kadakallan” nga kualidad? (b) Anni ira nga pakkiavu i tabbagattam?

 TAGGA ta nitura ni apostol Pablo i meyannung ta angngurug, aggiddanama, anna aya, nikagi na ta ultimu nga “i kadakallan ta kebalinan taw nga tallu [nga kualidad], ay i aya.” (1 Cor. 13:13) Ngatta nakagi ni Pablo yatun? Ta mappange gare, kattam ngana kawagan i angngurug ta promesa ira na Dios meyannung ta napabagu nga mundo onu i aggiddanama ta promesa ira megafu ta natuppal ngana danatun. Ngem kanayuttam nga kawagan nga ipasingan i aya kani Jehova anna ta totolay. Kakurugan na, i aya tam ta nira ay mas malladda adde noka.

² Megafu ta kanayun nga kawagattam i aya, tabbagattam i tallu nga pakkiavu. Ollu, ngatta makka-aya-aya ittam nakuan? Mekadua, kunnasi tam nga ipasingan i pakka-aya-aya tam? Mekatallu, kunnasi tam nga mapattalupaddian nga maladda i pakka-aya-aya tam?

3. Anni ira i rasottam nu ngatta makka-aya-aya ittam?

³ Ngatta importante ta nittam i makka-aya-aya? Nu ayatattam i wawwaragi, mapakurug tam nga sittam i kurug nga Cristiano. Nikagi ni Jesus ta apostoles na: “Nu egga nikamu i pakka-aya-aya, kannammuan ngamin na totolay tu disipulo takamu.” (Juan 13:35) Pattaraddayan ittam gapa na pakka-aya-aya  tam. Kinagi ni Pablo nga i aya “i mamattaradday nikamu ta meggo nga pavvurulun.” (Col. 3:14) Ngem egga paga i importante nga rason nu ngatta makka-aya-aya ittam nakuan. Nitura ni apostol Juan ta kapangngurug na ira: “I sinni laman nga mangaya ta Dios ay mawag tu ayatan na gapa i wagi na!” (1 Juan 4:21) Nu makka-aya-aya ittam, pakurugattam nga ayatattam i Dios.

4-5. Anni i koneksion na aya tam ta Dios ta aya tam ta kataggi-tadday? Iyilustra.

⁴ Anni kari i koneksion na aya tam ta Dios ta aya nga ipasingattam ta wawwaragi? Tapenu iyilustra, innattam i koneksion na futu tam ta tanakuan nga parte na baggi tam. Nu i-check na doktor i pulsu tam tapenu masingan nu makafi onu masikan yatun, awayya na nga makala tu tanakuan ira nga informasion meyannung ta kondision na futu tam. Kunnasi tam nga meyaplika yaw nga prinsipio meyannung ta aya?

⁵ Nu kunnasi nga makala tu informasion i doktor meyannung ta kondision na futu tam nu i-check na i pulsu tam, masingattam gapa nu maladda i pangaya tam ta Dios nu innattam i aya tam ta tanakuan. Nu nasifutattam nga nakkafi i aya tam ta kapangngurug tam ira, awayya na tu seniales yatun nga nakkafi ngana gapa i aya tam ta Dios. Ngem nu kanayun ittam nga mangipasingan tu aya ta kapangngurug tam, seniales yatun nga maladda i aya tam ta Dios.

6. Ngatta serioso nga problema nu mamegafu ngana makkafi i aya tam ta wawwaragi? (1 Juan 4:​7-9, 11)

⁶ Nu mamegafu ngana makkafi i aya tam ta wawwaragi, serioso nga problema yaw. Ngatta? Megafu ta ipasingan natun nga makkafi ngana gapa i espiritualidad tam. Manawag yatun ta niperaddam ta nittam ni apostol Juan: ‘Nu ari nga ayatan na sinni laman i wagi na nga masingan na, kunnasi gafu na pangaya na ta Dios nga arian na nga masingan?’ (1 Juan 4:20) Anni i magigiammu tam? Magayayya laman si Jehova nittam nu “makka-aya-aya ittam.”​—Bibbigan i 1 Juan 4:​7-9, 11.

7-8. Kunnasi tam mepasingan i pakka-aya-aya?

⁷ Namippiga nga nedog ta Uvovug na Dios nga “makka-aya-aya.” (Juan 15:​12, 17; Roma 13:8; 1 Tes. 4:9; 1 Ped. 1:22; 1 Juan 4:11) Ngem i aya ay tadday nga panageno nga awan vuluvuga tu makasingan. Kunnasi tam gafu nga mepasingan ta tanakuan nga ayatattam ira? Gukaban na kakkagiattam anna kukukuattam.

⁸ Aru i makua tam tapenu mepasingattam i aya tam ta wawwaragi. Yaw i karuan tatun: “Makkagi tu kurug ta kataggi-tadday.” (Zac. 8:16) ‘Sigga-imammo nakuan i pavvurulu nu.’ (Mar. 9:50) Magollu kamu nga ‘mangipasingan tu pangikakua ta kataggi-tadday.’ (Roma 12:10) ‘Alawatan nu i kataggi-tadday.’ (Roma 15:7) “Makkapaka-pakoma kamu.” (Col. 3:13) “Makka-uffu-uffuk-kamu nga mangattu ta ziga na kataggi-tadday.” (Gal. 6:2) “Makkabanna-bannay kamu.” (1 Tes. 4:18) ‘Makkapasa-pasikan kamu ta nono.’ (1 Tes. 5:11) “Makkapaki-pakimallo kamu.”​—Sant. 5:16.

9. Ngatta pangipasingan tu aya i pamanna-bannay ta tanakuan? (Innan gapa i letratu.)

⁹ Innattam i tadday nga makua tam tapenu mepasingattam i aya ta tanakuan. Kinagi ni Pablo: “Makkabanna-bannay kamu.” Ngatta pangipasingan tu aya i pamanna-bannay ta tanakuan? Segun ta referensia ta paggigiammu tu Biblia, i uvovug nga “banna-bannayan” nga niyusa ni Pablo ay kebalinan na  nga “agga-taddag ta biko na tadday nga tolay tapenu patuyaggan yayya nu meparubang ta nepallo nga kapurueba.” Yatutta nu banna-bannayattam i tadday nga wagi nga mazziga-riga, maduffunattam yayya nga arian na magimmang nga matalo nga masserbi kani Jehova. Kada pasikannattam i nono na tadday nga wagi, ipasingattam nga ayatattam yayya.—2 Cor. 7:​6, 7, 13.

10. Ngatta konektadu i allo ta banna-bannay?

¹⁰ Konektadu i pakatageno tu allo anna pangiyawa tu banna-bannay. Ngatta? Megafu ta i minaggallallo nga tolay ay mapaguyu nga banna-bannayan i tanakuan anna ikaguman nga duffunan ira ta ziga-riga da. Yatutta ollu labbi nga matageno tam i allo, tapus saka ittam manuffun. Masingattam yatun nga koneksion ta pinangideskriba ni Pablo kani Jehova. Nikagi na nga si Jehova i “minaggallallo nga Yama anna Dios nga paggafuan na ngamin nga uffun.” (2 Cor. 1:3) Megafu ta si Jehova i “minaggallallo nga Yama” anna “paggafuan na ngamin nga uffun,” mapaguyu yayya nga banna-bannayan ittam “ta ngamin nga ziga-riga” tam. (2 Cor. 1:4) Nu kunnasi tu i marenu nga danum nga maggafu ta latua ay mangiyawa tu banna-bannay ta mapangal ira, si Jehova ay mangiyawa tu banna-bannay anna kapalubbang ta problemadu ira. Kunnasi tam nga maparigan si Jehova ta pakatageno ta allo anna ta pangiyawa tu banna-bannay ta tanakuan? Tadday tu makua tam ay gukaban na pangultiba ta kualidad ira nga manguffun nittam nga makatageno tu allo anna mangiyawa tu banna-bannay ta tanakuan. Anni i karuan taw nga kualidad?

11. Base ta Colosas 3:12 anna 1 Pedro 3:​8, anni ira nga kualidad i makaduffun tapenu kanayun nga ayatan anna banna-bannayan i tanakuan?

¹¹ Anni i makaduffun tapenu kanayun ittam nga makka-aya-aya anna “makkabanna-bannay” ta kada aggaw? Mawag tu kultibattam i pakipattageno, pakka-iddu-iddu na wawwaragi, anna kinasippo. (Bibbigan i Colosas 3:12; 1 Pedro 3:8.) Kunnasi nga makaduffun yaw ira nga kualidad nittam? Nu nasanay ittam ngana nga mangipasingan tu allo ta wawwaragi anna kurug nga ikavurungattam ira, magga iyawa tam i banna-bannay nga kawagadda nu problemadu ira. Gitta na kinagi ni Jesus, “nu anni i egga ta nono, yatun laggapa i mallawan ta simu. I mapia nga tolay ay mapia i uvovugan na ta mapia i affutu-futuan na.” (Mat. 12:​34, 35) I pangiyawa gafu tu banna-bannay ta wawwaragi tam nga magawag ay pangipasingan tu aya tam nira.

12. (a) Ngatta ari tam nakuan ipamavulu nga mawawan i aya tam ta kataggi-tadday? (b) Anni i pakkiavu nga tabbagattam?

¹² Ikaya tam nga “makka-aya-aya ittam.” (1 Juan 4:7) Ngem mawag tu daddammattam i abiso ni Jesus nga “mallummin noka i aya na aru nga totolay ta ikattolay da.” (Mat. 24:12) Ari nga kinagi ni Jesus nga magaru ta disipulos na ira ay magimmang ngana nga mangipasingan tu aya ta kataggi-tadday. Ngem mawag tu ariattam nga ipamavulu nga afektan na kawan tu aya na totolay tawe ta mundo i pattratu tam ta kataggi-tadday. Megafu ta ammu tam yatun, innattam i tabbag taw nga pakkiavu: Kunnasi tam nga makannammuan nu maladda i aya tam ta wawwaragi?

13. Kunnasi tam nga makannammuan nu maladda i aya tam ta wawwaragi?

¹³ Makannammuattam nu kunnasi kaladda i aya tam nu usitakkattam i reaksiottam ta espesipiko ira nga situasion. (2 Cor. 8:8) Tadday  tatun ira nga situasion ay kinagi ni apostol Pedro: “Ollu ta ngamin, makka-aya-aya kamu ta napafutu ta i aya ay takkabban na i aru nga liwa-liwa.” (1 Ped. 4:8) Yatutta, makannammuattam nu maladda i aya tam depende ta reaksiottam ta pakkafian anna pakkamalian na tanakuan.

14. Base ta 1 Pedro 4:​8, anni nga klase nga aya i kawagattam nga ipasingan? Iyilustra.

¹⁴ Pannonopattam i kinagi ni Pedro. Nakagi ta ollu nga parte na versikulo 8 i klase na aya nga mawag tu ipasingattam—i ‘napafutu nga aya.’ I uvovug nga niyusa ni Pedro nga ‘napafutu’ ay literal nga kebalinan na “nanna tu mapia.” I mekadua nga parte na versikulo ay tukuyan na i efekto na napafutu nga aya. Takkabban natun i liwa-liwa na wawwaragi tam. Imajinan i tadday nga lamesa nga napakaru i mancha na. Posible nga manga ka tu tadday nga tela tapus annakammu onu sonnatammu yatun ta lamesa tapenu takkabban ari laman tu tadday onu dua nga mancha, nu ari, napakaru nga mancha. Kunnatun gapa nu egga i napafutu nga aya tam ta wawwaragi, makaya tam nga takkabban onu pakoman ari laman tu tadday onu dua nga pakkamalian, nu ari, “aru nga liwa-liwa.”

15. Nu kuruga maladda i aya tam ta wawwaragi, anni i makua tam? (Colosas 3:13)

 ¹⁵ Kuruga maladda nakuan i aya tam ta tanakuan nga makaya tam nga pakoman i pakaliwatan na kapangngurug tam ira​—maski paga kuruga mariga yatun. (Bibbigan i Colosas 3:13.) Nu mapakoma tam i tanakuan, mepasingattam nga maladda i aya tam anna kayà tam nga pagayayyatan si Jehova. Anni paga i makaduffun nittam tapenu mapalampas i kellussaw ira nga ugali anna pakkamalian na tanakuan?

16-17. Anni paga i makaduffun tapenu mapalampas tam i baraddi nga nakaliwatan na tanakuan? Iyilustra. (Innan gapa i letratu.)

¹⁶ Maffokus ta positibo nga ugali na wawwaragi tam ari tu ta negatibo. Imajinammu nga egga ka ta tadday nga gathering kavulu i wawwaragi ira. Nagenjoy ka anna kabalin na gathering, nap-picture kamu. Ngem namiddua kamu paga nga nap-picture, ta baka laman marake i nikala na ollu nga picture. Egga ngana gafu i tallu nga picture nu. Ngem napansimmu nga ta tadday nga picture, egga i brother nga agga-muzzu. Anni i kuammu tatun? I-delete mu yatun megafu ta egga paga i dua nga picture nga agga-ngizzi i ngamin, maski yari i brother.

¹⁷ Awayya tam igitta ta picture nga ni-save tam i nesimmu ira nittam nga ari tam nga makattaman. Aru i makasta nga nesimmu nga kavulu tam i wawwaragi. Ngem kunnasi nu ta  tadday tatun nga tiempo, nakekagi onu nakangngua i wagi tu nakataki ta nittam? Anni nakuan i kuattam? Mawag nga ikagumattam nga kattaman yatun nga ari nga makasta nga nesimmu, nu kunnasi tu i-delete tam i tadday nga picture nga ari nga makasta i nikala na. (Prov. 19:11; Efe. 4:32) Kattamattam ngana gafu i baddi nga nakaliwatan na wagi megafu ta manono tam i aru nga makapagayayya nga tiempo nga kavulu yayya. Danatun nga tiempo i ari tam kayà nga kattaman.

18. Anni ira i nagigiammu tam taw nga artikulo meyannung ta aya?

¹⁸ Ngatta ikaya tam nga mattalupaddian nga maladda i pakka-aya-aya tam? Gitta na nagigiammu tam, nu mangipasingan ittam tu aya ta wawwaragi, ipasingattam nga ayatattam si Jehova. Kunnasi tam nga ipasingan yatun nga aya? Tadday nga makua tam ay pangiyawa tu banna-bannay. Mawayya tam nga kanayun nga “makkabanna-bannay” nu egga i allo tam ta tanakuan. Kunnasi tam nga mapattalupaddian nga maladda i pakka-aya-aya tam? Kuattam i adde na mawayya tam nga pakoman i nakaliwatan na wawwaragi maski paga mariga yatun nga kuan.

19. Ngatta mas mawag nga ipasingan i pakka-aya-aya tam sangawe?

¹⁹ Ngatta mas kawagan nga ipasingan i pakka-aya-aya tam sangawe? Sifutan i rason nga nikagi ni Pedro: “Aranni ngana i panuppalan na ngamin nga ganna-gannug. Mawag gafu tu . . . makka-aya-aya kamu ta napafutu.” (1 Ped. 4:​7, 8) Habang umara-aranni i panuppalan naw nga marake nga mundo, anni i ekspektattam? Kinagi ni Jesus ta tagatuttul na ira: “Ikalussaw dakamu noka ngamin na sinolay megafu niakan.” (Mat. 24:9) Tapenu maattamman i pangikalussaw, mawag nga mattalupaddian ittam nga nattaradday. Nu kuattam yatun, ari ittam mapassirina ni Satanas megafu ta i aya i ‘mamattaradday nittam ta meggo nga pavvurulun.’—Col. 3:14; Fil. 2:​1, 2.