NU NAKAPASIAR ka ngana ta baddi nga isla na Sangir Besar ta Indonesia piga ragun i nappasa, baka nasingammu ngana tari i tallu nga wawwaragi tam nga sister ta bebay. Kilala ira tari ta isla gafu ta pallayyagayya da tapenu uffunan i totolay nga mantindian i Biblia. Ngem ta pakasingammu nira ta bebay, baka duma i kukukuadda.

Ollu, umay danatun nga babbay ta danum tapus maddammo ira tu daddarakal nga batu nga ipagiyangay da ta pipi. Karuan tatun ira nga batu ay kasiddarakal na bola nga pang-soccer. Kabalin natun, magitubang ira ta bangkito anna martilyowadda i batu ira tapenu mabbalin tu mas baddi anne ta illug na manu. Kabalin natun, ipagipay da i baraddi nga batu ta plastic ira nga baldi anna ipagiyune da ta gibbalayadda. Tapus ipagivuru da i nonnug da ira nga batu ta darakal nga saku nga awayya na nga mepagitakay ta truck ira. Meyusa danatun nga materiales para ta konstruksion na dalan.

Si Hulda i tadday tatun ira nga sister. Ipamavulu na paddia-paddian na nga mas aru i tiempo na para tatun nga trabahu anne tari ta dua tu sister. Maruddu nga usan na i nallakuan na para ta inaggaw nga paggastuan na familia na. Ngem tatun nga tiempo, egga i tanakuan paga tu goal na. Kayà na i maggatang tu tablet tapenu meyusa na nga pang-JW Library^® app. Ammu garay ni Hulda nga makaduffun i video ira anna i karuan paga nga mayan natun nga app ta ministerio na kunne na gapa tapenu mas magigiammu na i Biblia.

Gafu tatun, inammungan ni Hulda tu dua oras i pattrabahu na kada umma. Tanga-vulan-gaddua na nga kingngua yatun. Napakaru nga batu i nababbo na adde ta napappannu i baddi nga truck. Turi kua, makalanno ngana i kuartu na nga paggatang tu tablet.

Istorian ni Hulda, “Maski nu fermi i bannag ku anna mataka-taki i baggì ta pammammo ku tu bata-batu, mabi ku laman nga nakattaman yatun ira kustu ta neyusà ngana yaw nga bagu nga tablet tapenu mas mammakasta i pallayyagayyà anna tapenu mas mabi ngà nga makapapprepara ta study ira.” Kinagi na paga nga nakaduffun ta nisa yatun nga tablet ta gafu na pandemic megafu ta nabbalin tu online i pakistudy anna pallayyagayya. Masaya ittam para kani Hulda ta nadde na i goal na.