Neyana ngà turi ta 1948 ta tadday nga bario ta southwest na Nigeria. Tatun nga tiempo, na-baptize bilang Saksi ni Jehova i angkal ku nga si Moustapha nga wagi ni yamà anna i kakà nga si Wahabi. Turi ta siam i dagukku, natay i yamà. Kuruga maraddam ngà. Kinagi ni Manung Wahabi nga masingammi paga i yama mi sonu paginnolay. Kuruga nabannayan ngà tatun yari tu nappa-Bible study ngà. Na-baptize ngà turi ta 1963. Ari nabbayag kabalin na yatun, na-baptize i tallu paga nga wawwagì nga lallaki.

Ta 1965, nevulu ngà ta manung ku nga si Wilson ta Lagos anna na-enjoy ku i makikavvulu ta regular payunir ira na Igbobi Congregation. Napagaram ngà ta pagayayya anna talikarag da. Yari tu ta Enero 1968, nappayunir ngà ngana gapa.

Nangorganisa tu espesial miting i tadday nga Bethelite nga si Brother Albert Olugbebi kavulu kami nga kabataan tapenu ikagi ta nikami nga mawag ta northern Nigeria i espesial payunir ira. Manono ku paga i magayayya nga pangikagi ni Brother Olugbebi tu kunnaw: “Abbing kamu, anna puede nu usan i tiempo anna sikan nu para kani Jehova. Napakaru i makua nu tari!” Ikaya ku nga parigan si Isaias anna umay nu sitaw i pangidoban  niakan ni Jehova. Yari tu nagaplay ngà bilang espesial payunir.​—Isa. 6:8.

Ta Mayo 1968, neyasayn ngà nga magespesial payunir ta siudad na Kano ta northern Nigeria. Maddaggun bi tatun i Biafran War nga namegafu ta dagun 1967 adde ta 1970. Narresulta tu pazziga-riga i parralaban anna aru i natay ta northern Nigeria tapus nagadde yatun ta east na Nigeria. Kinumbinsi nà na tadday nga minangngikavurung nga brother nga ari ngana umay. Ngem kinagì ta nisa: “Mabbalo ta pangikavurung mu nio. Ngem nu ikaya ni Jehova nga masserbi ngà taw nga annungan, siguradu ngà nga ari nà pagurayan.”

Makaparaddam i nesimmu ta Kano. Nadara-daral i dakal nga siudad megafu ta gerra. Ta pallayyagayya mi, makasingakkami nu karuan tu bangkay ira nga natay ta gerra. Maski nu aru i kongregasion ta Kano, magaru ta wawwaragi i nakkapanaw. Awan paga tu 15 na wawwaragi i nabattang. Naganassing ira anna nakkafi i nono da. Ngem fermi i pagayayya natun ira nga wawwaragi turi ta zimittal kami nga annam nga espesial payunir. Kuruga nabanna-bannayan yaw ira nga wawwaragi ta pamagarammi. Zinuffunammi ira nga maorganisa uli i study ira anna i trabahu nga pallayyagayya anna mangi-send uli tu field service report anna magorder uli tu literatura ta branch.

Bilang espesial payunir, pinegafanammi nga gigiammuan i lengguahe nga Hausa. Ta pakaginna na taga-tari ira ta mensahe na Pappatulan ta sarili da nga lengguahe, aru ta nira i nagginna. Ngem manaki na miembro ira na primeru nga relihion tari i pallayyagayya mi. Yari tu mawag nga mas magimmugug kami. Mittan, egga i lalaki nga agga-tammi tu ila anna zinaddag nakami na partner ku. Pia na laman ta mas paspas kami nga makkarela yari tu ari nakami nadaddag! Maski nu egga ira peligro, si Jehova i ‘nangipaliag’ nikami anna namegafu nga minaru i bilang na publisher ira. (Sal. 4:8) Sangawe, maturu ngana tu 500 i publisher ta 11 nga kongregasion ta Kano.

Ta Agosto 1968, kabalin na piga vulan nga pinaddiakku ta Kano, nedog ngà ta Niamey, i sentro  na Republic of Niger, kavulu i dua paga nga espesial payunir. Naekspiriensa mi mismu nga i Niger ta West Africa i tadday ta pinakamapatu nga rehion ta interu mundo. Mawag mi nga gigiammuan nga mallayyagayya maski nu kiteppatu anna mawag mi gapa nga gigiammuan i ofisial nga lengguahe da, i French. Maski nu kitazziga yaw ira nga situasion, nattalo kami kani Jehova anna nigafu mi i mallayyagayya ta sentro kavulu i pilippiga nga publisher nga maddian tari. Ari nabbayag, maggi ngamin ta Niamey nga ammu na i mabbibbig ay nakalawa tu kopia na libru nga mosa ta pab-Bible study nga The Truth That Leads to Eternal Life. Ala-alegan nakami paga lagu na totolay tapenu laman makkiddaw tu kopia da!

Turi kua, nammuammi nga ari nga ikaya na autoridad i Saksi ira ni Jehova. Angngarigan na, mabbente i nagatende ta pinaka-ollu nga circuit assembly mi tatun nga nasion ta Hulio 1969. Excited kami ngana nga mabawtisowan i dua nga bagu nga publisher. Ngem ta ollu nga aggaw na asembli, zimittal i pulis ira anna nipeyemmang da i programa. Niyangay da i espesial payunir ira anna i circuit overseer ta istasion na pulis. Kabaliddakami nga pinakkiavutan, nimandu da ta nikami nga manoli kami ta tumunug nga aggaw. Nanono mi nga baka mamanggulu i pulis ira. Yari tu nangiyunnug kami tu palappa para ta bawtismo ta pribadu nga balay anna pasekreto nga binawtisowammi i kandidato ira ta tadday nga bannag.

Kabalin na piga nga ligguan, pinapanaw nà na gobiernu kavulu i lima paga nga espesial payunir ta Niger. Egga laman i 48 nga oras mi nga manaw anna sarili mi lagapa nga diskarte nu kunnasi kami makapanaw. Siminuttul kami anna nadderechu kami ta branch office ta Nigeria, nu sitaw nakalawa kami tu bagu nga asayment.

Neyasayn ngà ta Orisunbare nga bario na Nigeria nu sitaw na-enjoy ku i mavunga nga ministerio kavulu i baddi nga grupo na publisher ira nga maddian tatun. Ngem kabalin na annam nga vulan, inagalan nà na branch office nga magitadday nga manoli ta Niger. Ta ollu na bi nakaddagan ngà anna maggudu-gudu ngà. Ngem kakayà ku ngana nga masingan uli i wawwaragi ta Niger!

Nanoli ngà ta Niamey. Ta kommanan na, nakanose nà na negosiante nga Nigerian nga tadday ngà nga Saksi anna egga ira i pakkiavu na meyannung ta Biblia. Nab-Bible study kami, anna turi ta niyemmang na ngana i massigariliu anna magillellaw, nabawtisowan yayya. Magayayya ngà nga mallayyagayya kavulu i wawwaragi ta madduruma nga parte na Niger. Nasingakku gapa nu kunnasi nga inalawa na totolay tatun i kinakurug ta pappasa na daga-ragun. Ta ollu nga paddattal ku, egga laman i 31 nga Saksi ta nasion, ngem ta panaw ku, egga ngana i 69.

Ta Disiembre 1977, nanoli ngà ta Nigeria tapenu mat-training. Ta ultimu na tallu nga ligguan  nga kurso, nipabibbig ta nio na Branch Committee coordinator nga si Malcolm Vigo i tadday nga tura nga naggafu ta Sierra Leone branch. Magaleg ira tu single nga brother nga magawa-gawayyan anna payunir nga mabbida tu English anna French tapenu makapasserbi bilang circuit overseer ta Guinea. Nikagi ni Brother Vigo nga sakan i ma-train tatun nga asayment. Talaga nipakanawag na nga mariga yatun nga asayment. Nitabarang na nio, “Pannonopammu labbi nige mu nga akseptan.” Ngem insigida nga nitabbag ku, “Megafu ta si Jehova i naddog niakan, umay ngà.”

Nageroplano ngà nga minay ta Sierra Leone anna nakilalà i wawwaragi ta branch office. Kinagi nio na tadday nga miembro na Branch Committee, “Ariattam kuruga ammu nu kumusta i wawwaragi tam ta Guinea.” Maski nu sakup na Sierra Leone branch i trabahu nga pallayyagayya ta Guinea, awan tu kontak da ta publisher ira megafu ta magulu nga situasion na pulitika tatun nga lugar. Maski namippiga ira nga naddob tu brother nga mabbisita ta wawwaragi ta Guinea, ari da lapa nga nakua. Yatutta zinog dà nga umay ta Conakry nga sentro na Guinea tapenu manga tu permiso ta gobiernu nga maddian ngà tari.

Ta paddattal ku ta Conakry, minay ngà ta embassy na Nigeria anna kinibbidà i ambasador. Kinagì ta nisa nga kakayà ku i mallayyagayya ta Guinea. Inabisowan nà nga ariakku maddian tari megafu ta awayyà i maaresto onu mas marake paga i mesimmu. Nikagi na nio, “Manoli ka ta Nigeria anna tari ka mallayyagayya.” Kinagì gapa nisa, “Determinadu ngà nga ari manaw.” Yari tu nattura i ambasador ta Minister of the Interior na Guinea tapenu duffungan nà. Zinuffungan nà gapa natun nga minister.

Kabalin na yatun, nanoli ngà ta branch office na Sierra Leone anna nipakannammù ta brother ira i meyannung ta desision na minister. Sobra i ayayya da turi ta naginna da i pamendision ni Jehova ta pabbiahè. Niddan nà balaman na gobiernu tu permiso nga maddian ta Guinea!

Ta 1978 adde ta 1989, nasserbi ngà ta circuit work ta Guinea, Sierra Leone, anna nas-substitute circuit overseer ta Liberia. Ta ollu na, kanayun ngà nga mattaki. Mesimmu yaw nu karuan ta arayyu ira nga lugar. Ngem kuan na wawwaragi i adde na mawayya da tapenu iyangay dà ta hospital.

Mittan, nakanna ngà na grabe nga malaria anna nagipo ngà. Ta nipammapià, nakannammuakku tu abbo na wawwaragi nga matay ngà ngana. Yari tu nabbiridadda nu sitaw ngà mekokko! Maski paga maggi nipatè danatun nga nesimmu, ariakku nga ninono nga panawan i asayment ku ira. Kumbinsidu ngà nga i Dios laman i makeyawa tu kapianan nga proteksion megafu ta maski matay ittam, paginnolayan na ittam.

Ta 1988, nakilalà si Dorcas, tadday nga payunir nga makasta i espiritualidad na anna minappakalinno. Nakkasal kami anna vinulu nà ta asayment ku ta sirkito. Minaggiddu anna minassakrifisio nga atawa si Dorcas. Magadde ta 25 kilometro i karayyu na tumunug ira nga kongregasion nga  bisitammi. Fugurammu yatun nga lakarammi dua tapus agga-yakka mi paga i bagahe mi. Ta mas arayyu gapa ira nga kongregasion nga nabbisitammi, finuyo i dalan anna awayyam meludag, yayya nga magaleg kami tu maski anni nga pattakayan tapenu makadattal kami.

Masiki-sikan i nono ni Dorcas. Angngarigan na, egga i tiempo ira nga maddaki kami ta danum nga napannu tu vaya. Mittan, nabbiahe kami tu lima nga aggaw. Ngem nadaral i kayu nga tetay nga paddalangammi, yari tu mawag tu mabbarangay kami. Ta pallakka ni Dorcas tapenu makkazza ta barangay, nanavu yayya ta adallam nga danum. Ariammi ammu dua i mattanniaw, tapus kekkaru i vaya tatun nga danum. Pia ngana laman ta egga i mabbing nga lallaki nga nangisalba nisa. Maski piga tiempo ngana i nappasa, manono mi lapa yatun nga kappaganassing nga nesimmu. Ngem nitulu-tuloy mi i asayment mi.

Ta gafu na 1992, nakaddagakkami ta nakannammuammi nga mavussi si Dorcas. Yaw ngana kari i pagultimuan na pagespesial payunir mi? Nanono mi, “Regalu yaw ni Jehova nikami!” Yatutta ningaganammi i ana mi nga babay tu Jahgift. Appa tu ragun kabalin nga neyana si Jahgift, neyana gapa si Eric. Parehu nga regalu naggafu kani Jehova yaw nga dua nga ana mi. Nasserbi si Jahgift ta remote translation office ta Conakry anna ministerial nga aripan gapa si Eric.

Maski nu niyemmang labbi ni Dorcas i pagespesial payunir, nattuloy lapa yayya ta parregular payunir habang tattangngawan na i abbing ira. Ta uffun ni Jehova, nattulu-tuloy ngà lapa ta pagespesial payunir ku. Turi ta dakal ngana i ána mi, nakatoli ta pagespesial payunir si Dorcas. Ta sangawe, parehu kami nga field missionary ta Conakry.

Kanayun ngà nga umay maski nu sitaw i pangiyangayan niakan ni Jehova. Kanayun nga matageno mi na atawà i papprotekta anna pamendision na. Megafu ta pattalo kani Jehova imbes tu ta material ira nga gannug, nelisi kami ta aru nga problema anna pakavurungan. Megafu ta nesissimmu nikami, makagi mi nga si Jehova nga “Dios nga mamaliag nikami” i Paggafuan na kurug nga proteksion. (1 Cro. 16:35) Makkomfiansa ngà nga immuguran ni Jehova i inango na ngamin nga mattalo nisa.—1 Sam. 25:29.