1-2. Ngatta awayya na tu manono tam nga ari nga tattabbagan ni Jehova i pakimallo tam ira?

 “ALERAM-MU i pagayaya mu ta YAFU, ay iyawa na nikaw i karagatam-mu.” (Sal. 37:4) Makakkasta yatun nga promesa! Ngem ekspektattam kari nga insigida nga iyawa ni Jehova i ngamin nga kiddawattam sa? Ngatta mawag tu iyavu tam yatun? Pannonopan i tumunug ira nga situasion. Makikkimallo i tadday nga single nga sister nga maggigiammu nakuan yayya ta School for Kingdom Evangelizers. Ngem piga dagun ngana i nappasa, ari yayya nga nembitan. Kikkiddawan na tadday nga kabataan nga brother kani Jehova nga mammapia nakuan yayya ta grabe nga taki na tapenu mas aru i meyuffun na ta kongregasion. Ngem awan laman tu nangulian na gawa-gawayyan na. Ipaka-pakimallo na Cristiano ira nga magana nga mattalupaddian nakuan ta kinakurug i ana da. Ngem nadesision na ana da nga magimmang nga masserbi kani Jehova.

² Baka egga gapa i kiniddom kani Jehova, ngem ari paga nga natabbag. Megafu tatun, awayya na tu manono mu nga tattabbagan ni Jehova i pakimallo na tanakuan, ngem ari tu i pakimallo mu. Baka nanono mu gapa nga egga i kingnguam tu marake. Kunnatun i natageno ni Sister Janice. b Nipakimallo da na atawa na i pakkaraga da nga masserbi ta Bethel. Istorian na i natageno na tatun nga tiempo: “Siguradu ngà tu insigida kami nga makatallung ta Bethel.” Ngem nappasa i aru nga dagun, ari ira nga nembitan. Kagian ni Janice: “Maraddam ngà anna maguluan ngà. Nononopakku nu anni i nakkurangakku kani Jehova. Nipaka-pakimallo ku i pattallung mi ta Bethel. Ngatta ari na nga sinabbag yatun?”

3. Anni i gigiammuattam taw nga artikulo?

 ³ Nu karuan, awayya na tu nononopattam nu gigginnan kari ni Jehova i pakimallo tam ira. Nanono gapa yatun maski na matalo ira nga lallaki ta nappasa. (Job 30:20; Sal. 22:2; Hab. 1:2) Anni i mangumbinsi nikaw nga ginnan ni Jehova i pakimallo mu ira? (Sal. 65:2) Tapenu matabbag yatun nga pakkiavu, ollu labbi nga ammuattam i tabbag ta tumunug ira: (1) Anni i ekspektattam tu kuan ni Jehova? (2) Anni i ekspektan ni Jehova tu kuattam? (3) Anni ira i mawag tu uliattam ta karuan nga ikikkiddaw tam?

4. Segun ta Jeremias 29:​12, anni i nipromesa ni Jehova nga kuan na?

⁴ Nipromesa ni Jehova nga ginnan na i pakimallo tam ira. (Bibbigan i Jeremias 29:12.) Iddeddu na Dios tam i matalo ira nga masserbi sa, yatutta kanayun na nga ginnan i pakimallo da ira. (Sal. 10:17; 37:28) Ngem ari kayà kagian natun nga iyawa na ngana i ngamin nga ikikkiddaw tam. Baka kawagattam i maginnag adde ta napabagu nga mundo nige tam nga malawa i karuan ta ikikkiddaw tam.

5. Anni i ikokkonsidera ni Jehova meyannung ta pakimallo tam ira? Ipakanawag.

⁵ Ikokkonsidera ni Jehova nu anni i koneksion na ikikkiddaw tam ta gakkag na. (Isa. 55:​8, 9) Tadday ta gakkag na ay pannuan i davvun tu totolay nga magayayya nga tumuttul ta nisa bilang Mammagureda. Ngem kakkagian ni Satanas nga mas makasta nu immagurayan lagapa na totolay i baggi da. (Gen. 3:​1-5) Tapenu mapakurug ni Jehova nga laddug i kakkagian na Diablo, nipamavulu na nga immagurayan na totolay i baggi da. Ngem megafu ta pammaguray na totolay, napakaru i problema tam sangawe. (Ecl. 8:9) Ammu tam nga ari nga alsan ni Jehova i ngamin nga problema tam sangawe. Nu kuan na gare yatun, baka nonopan na karuan nga makasta mabba i pammaguray na tolay anna masolba natun i problema tam ira.

6. Ngatta kumbinsidu ittam nakuan nga kanayun nga meddu anna kapianan i kukukuan ni Jehova?

⁶ Awayya na tu madduruma i tabbag ni Jehova ta para-parefu ira nga kiddaw. Angngarigan na, nakimallo si Patul Hezekias nga pammapian yayya ni Jehova ta grabe nga taki na. Anni i tabbag ni Jehova? Pinammapia na yayya. (2 Pat. 20:​1-6) Ngem turi ta nakimemallo si apostol Pablo nga alsan nakuan ni Jehova i ‘sì na ta pattag,’ nga posible nga problema ta gawa-gawayyan, ari nga inalsa ni Jehova yatun nga problema na. (2 Cor. 12:​7-9, NW) Nonopan gapa i nesimmu kada apostol Santiago anna Pedro. Parefu ira nga kayà nga patayan ni Patul Herodes. Nakimemallo i kongregasion para kani Pedro anna magga kunnatun gapa i kingngua da para kani Santiago. Napatay si Santiago, ngem si Pedro gapa ay pinaliag na tadday nga anghel. (King. 12:​1-11) Baka nonopattam, ‘Ngatta nipaliag ni Jehova si Pedro, ngem si Santiago, ari?’ Awan tu kagian na Biblia meyannung tatun. c Ngem makasiguradu ittam nga “ari vuluvuga mabbalin tu killu” i kukukuan ni Jehova. (Deut. 32:4) Ammu tam gapa nga parefu nga faboran ni Jehova da Pedro anna Santiago. (Nep. 21:14) Nu karuan, baka ari nga tabbagan ni Jehova i pakimallo tam ira segun ta inekspekta tam. Ngem megafu ta mattalo ittam nga meddu anna kapianan i panabbag ni Jehova ta pakimallo tam ira, ari tam vuluvuga kuestionan nu ngatta kunnatun i tabbag na ta kiddaw tam.​—Job 33:13.

7. Anni nakuan i ari tam nga kuan, anna ngatta?

 ⁷ Ari tam nakuan gapa nga ikumpara i situasiottam ta tanakuan. Angngarigan na, baka espesipiko i kiniddaw tam kani Jehova nu kunnasi na ittam nga uffunan, ngem ari nga natabbag yatun. Turi kua, nakannammuattam nga egga gapa i nangipakimallo tu kunnatun balaman anna gitta na sinabbag yatun ni Jehova. Kunnatun i naekspiriensa ni Sister Anna. Nipakimallo na nga mammapia ngana nakuan i cancer na atawa na nga si Matthew. Tatun nga tiempo, dua gapa nga bako nga sister i egga balaman i cancer da. Nakimemallo si Anna para kani Matthew anna ta dua nga sister. Nammapia i sister ira, ngem natay si Matthew. Ta ollu na bi, nanono ni Anna nga siguru nammapia i dua nga sister gafu ta inuffunan ira ni Jehova. Ngem ngatta gafu ta ari na nga sinabbag i pakimallo ni Anna nga mammapia nakuan i atawa na? Siempre, ari tam masiguradu nu ngatta nammapia i dua nga sister. Ngem i siguradu nga ammu tam ay pangultimuan saw ni Jehova i ngamin nga pazziga-riga tam anna kakayà na nga paginnolayan i kokkofun na ira nga natay.​—Job 14:15.

8. (a) Segun ta Isaias 43:​2, kunnasi ittam nga uffunan ni Jehova? (b) Kunnasi nga makoffun i pakimallo nu egga i mariga nga problema tam? (Innan i video nga Makoffun Nittam i Pakimallo Tapenu Makapagattam.)

⁸ Kanayun ittam nga uffunan ni Jehova. Megafu ta si Jehova i minaggiddu nga Yama tam, manaki na nga masingan ittam nga mazziga-riga. (Isa. 63:9) Ngem maski kunnatun, ari na ittam nga ilisi ta ngamin nga problema, nga megitta ta bannag onu afi. (Bibbigan i Isaias 43:2.) Ngem nipromesa na nga uffunan na ittam tapenu malampasattam danatun. Maski anni paga nga problema i pappasattam sangawe, siguraduan na nga kanayun ittam lagapa nga makapasserbi ta nisa. Iddan na ittam gapa tu makapangngua nga masanto nga espiritu na tapenu makapagattam. (Luc. 11:13; Fil. 4:13) Makasiguradu ittam gafu nga kanayun nga iyawa na i eksakto nga mawag tam tapenu makapagattam anna mattalupaddian nga matalo ta nisa. d

9. Base ta Santiago 1:​6, 7, ngatta mawag nga mangurug ittam nga uffunan ittam ni Jehova?

⁹ Ekspektan ni Jehova nga mattalo ittam ta nisa. (Heb. 11:6) Nu karuan, gitta na awan ngana tu solusion na problema tam ira. Baka paddudattam paga ngana lagu nu uffunan kari ittam ni Jehova. Ngem ipasiguradu ta nittam na Biblia nga iddan ittam na Dios tu pakawayya nga ‘patulukan’ i problema tam ira. (Sal. 18:29) Imbes gafu tu madduda ittam, mawag nga makimallo anna mangurug ittam nga tabbagan ni Jehova i pakimallo tam ira.​—Bibbigan i Santiago 1:​6, 7.

10. Kunnasi ittam nga magguyu segun ta pakimallo tam ira? Mangiyawa tu angngarigan.

¹⁰ Ekspektan ni Jehova nga magguyu ittam segun ta nipakimallo tam ira. Angngarigan na, baka mappoffun i tadday nga brother kani Jehova nga meddan nakuan yayya tu day off ta trabahu tapenu maka-atende ta rehional nga kombension. Kunnasi nga tabbagan ni Jehova yatun nga pakimallo? Awayya na tu iddan na i brother tu gutu nga kibbidan i boss na. Ngem kawagan lagapa na brother nga umay ta boss na tapenu mappakannammu. Awayya na nga mamippiga na paga lagu nga kuan yatun. Baka mawag gapa nga makittali yayya tu iskediul ta katrabahu na. Nu kawagan gapa, puede na nga ikagi ta boss na nga maski awan ngana tu paga na pad-day off na.

11. Ngatta mamippiga tam nakuan nga ipakimallo i kayà tam nga kiddawan?

 ¹¹ Ekspektan ni Jehova nga mamippiga tam nga ipakimallo i kayà tam nga kiddawan sa. (1 Tes. 5:17) Kinagi ni Jesus nga ari nga insigida nga meyawa i karuan ta kiddaw tam ira. (Luc. 11:9) Ngem ari nakuan vuluvuga makkafi i nono mu! Mamippiga ka nakuan nga makimallo tu napafutuan. (Luc. 18:​1-7) Nu ari tam immangan nga ipakimallo i tadday nga gannug, mepasingattam kani Jehova nga talaga kayà tam yatun nga ikikkiddaw tam. Mepasingattam gapa nga mangurug ittam ta pakawayya na nga uffunan ittam.

12. (a) Anni i mawag tu iyavu tam ta baggi tam meyannung ta ikikkiddaw tam, anna ngatta? (b) Kunnasi tam masiguradu nga mepasingattam i pangirespeto kani Jehova ta pakimallo tam ira? (Innan i kahon nga “ Masingan Kari ta Kiddaw Ku ira nga Irespetò si Jehova?”)

¹² Nu ari nga natabbag i pakimallo tam, awayya na nga iyavu tam ta baggi tam i tallu nga pakkiavu. Ollu, ‘Fustu kari i ipaka-pakimallo ku?’ Maruddu nga abbo tam tu ammu tam i kapianan para ta nittam. Ngem ta pappasa na tiempo, baka ari tam balo nga pammakapianan yatun nga ikikkiddaw tam. Nu ipaka-pakimallo tam i tadday nga problema, awayya na tu egga i mas makasta nga solusion tatun anne ta ikikkiddaw tam. Karuan gapa ta ikikkiddaw tam ay awayya na tu ari nga metuttul ta uray ni Jehova. (1 Juan 5:14) Angngarigan na, ikonsidera i magana nga nakagi ta nappollu nga parapo. Kiniddoda kani Jehova nga ari nakuan nga panawan na ana da i kinakurug. Awan mabba tu marake tatun nga kiddaw da. Ngem ari nga fersan ni Jehova i maski sinni ta nittam nga passerbian yayya. Kayà na nga pilian na kada tadday nga passerbian yayya, nelavu i ána tam. (Deut. 10:​12, 13;  30:​19, 20) Mas makasta gafu nu ikiddaw na magana kani Jehova nga uffunan na ira nga madde i futu na ana da tapenu mapaguyu yayya nga ayatan si Jehova anna mabbalin tu kofun Na.​—Prov. 22:6; Efe. 6:4.

13. Base ta Hebreo 4:​16, kanni ittam nga uffunan ni Jehova? Ipakanawag.

¹³ I mekadua nga pakkiavu, ‘Para kani Jehova, tiempo ngana kari tapenu tabbagan na i kiddaw ku?’ Baka para ta nittam, mawag ngana nga insigida matabbag i pakimallo tam ira. Ngem i kurug, ammu ni Jehova i kapianan nga tiempo tapenu uffunan ittam. (Bibbigan i Hebreo 4:16.) Nu ari insigida nga natabbag i kiddaw tam, baka nonopattam nga ‘Ari’ i tabbag ni Jehova. Ngem baka gapa ‘Ari labbi’ i tabbag na. Angngarigan na, manono mu paga i kabataan nga brother nga nakimallo nga mammapia nakuan yayya? Nu milagro nga pinammapia yayya ni Jehova, baka kagian ni Satanas nga itulu-tuloy laman natun nga brother i passerbi na kani Jehova gafu ta noruan yayya ta taki na. (Job 1:​9-11; 2:4) Fuera tatun, egga ngana i sinunno nga tiempo ni Jehova sonu pammapian na i ngamin nga taka-taki. (Isa. 33:24; Nep. 21:​3, 4) Ngem adde ta ari paga nga zimittal yatun, ari tam ekspektan nga milagro nga mammapia ittam. Mas makasta gafu nu kiddawan natun nga brother kani Jehova i sikan anna memammo nga nono tapenu maattamman na i taki na anna matalo lagapa nga masserbi ta Dios.​—Sal. 29:11.

14. Anni i magigiammum kani Janice?

¹⁴ Manono mu paga si Janice nga nakimallo nga makatallung nakuan ira ta Bethel? Lima nga dagun labbi i nappasa nige na nga nalippawa nu kunnasi nga sinabbag ni Jehova i pakimallo na. Istorian na: “Inusa ni Jehova yatun nga tiempo tapenu tudduan nà anna tapenu  mapakastà i personalidad ku. Mawag tu mas mattalo ngà paga nisa, pakastakku paga i pap-personal studỳ, anna gigiammuakku i mabbalin tu magayayya maski paga nu sitaw ku nga passerbian si Jehova.” Turi kua, nagalan nga mas-circuit work si Janice anna i atawa na. Kunnaw i makagi ni Janice tatun ira nga nesimmu: “Sinabbag ni Jehova i pakimallo ku ira, ngem ari tu segun ta inekspektà. Nappasa labbi i piga nga tiempo nige ku nga naappresia yatun nga makakkasta nga regalu na. Ngem mappappabalo ngà ta natageno ku i aya anna pia na gafu ira ta nesimmu.”

15. Ngatta makasta nu karuan nga ari kuruga espesipiko i pakimallo tam ira? (Innan gapa i letratu ira.)

¹⁵ I mekatallu nga pakkiavu, ‘Anni i mawag nga uliakku ta pakimallo ku?’ Makasta nu espesipiko ittam ta pakimallo tam. Ngem nu karuan, mas makasta nu ari kuruga espesipiko i pakimallo tam ira tapenu malippawa tam i uray ni Jehova para nittam. Toliattam i angngarigan na single nga sister nga nipaka-pakimallo na nga maggigiammu nakuan yayya ta School for Kingdom Evangelizers. Kayà na nga maggigiammu tatun tapenu makapasserbi yayya nu sitaw mas dakal i pakawagan. Durante nga ipaka-pakimallo na nga magalan nakuan yayya nga magiskuela tatun, puede na gapa nga ikiddaw kani Jehova nga uffunan na yayya nga makasingan tu tanakuan paga ira nga chansa tapenu mapalawa na i ministerio na. (King. 16:​9, 10) Kabalin na nga ipakimallo yatun, awayya na i makkiavu ta manangngal ta sirkito nu sitaw i aranni nga kongregasion nga magawag tu mas aru nga payunir. Puede gapa yayya nga mattura ta branch office tapenu mammuan na i lugar ira nga mas dakal i pakawagan. e

16. Ta anni ittam nga siguradu?

¹⁶ Gitta na nagigiammu tam, makasiguradu ittam nga meddu anna kapianan i panabbag ni Jehova ta pakimallo tam ira. (Sal. 4:3; Isa. 30:18) Nu karuan, ari nga matabbag i pakimallo tam segun ta ekspektattam. Ngem kanayun ittam nga ginnan ni Jehova. Iddeddu na ittam anna ari na ittam vuluvuga pagurayan. (Sal. 9:10) Si Jehova gafu i ‘kanayun nga emmu pammakatalakkan’ anna ikagim ta nisa i ngamin nga vuru-vurummu.​—Sal. 62:8.