1. Anni i mawayya nga kuan ni Jehova tapenu matuppal i gakkagna?

MABBALIN si Jehova ta maski anni nga kawagan tapenu matuppal i gakkagna. Angngariganna, awayya ni Jehova i mabbalin tu Gumattuddu, Minammasikan ta Nono, anna Evanghelisador. Piga laman danaw ta awayyana pabbalinan. (Isa. 48:17; 2 Cor. 7:6; Gal. 3:8) Maski kunnuri paga, usu-usanna gapa i totolay tapenu matuppal i gakkagna. (Mat. 24:14; 28:19, 20; 2 Cor. 1:3, 4) Mawayya gapa nga iyawa ni Jehova i sirib anna sikan nga kawagattam tapenu mabbalittam ta maski anni nga kawagan ta pangituppal ta urena. Megafu ngamin yaw ta kebalinan na ngagan ni Jehova, gitta na kakkagian tatun na karuan nga iskolar.

2. (a) Ngatta madduda ittam nu mittan nu usu-usan ittam ni Jehova? (b) Anni i ikonsidera tam taw nga artikulo?

² Kayà tam ngamin i mappeyusa kani Jehova, ngem baka paddudan na karuan nu usu-usan ira ni Jehova. Ngatta? Matagenoda nga limitadu i makuada megafu ta edad, situasion, onu abilidadda. Ngem egga gapa tanakuan nga makatageno tu makalanno ngana i kukukuadda anna ari ngana mawag tu ammungan i passerbida. Taw nga artikulo, gigiammuattam nu kunnasi nga iyayawa ni Jehova i pakawagan na maski sinni nittam tapenu matuppal i gakkagna. Tapus, usitakkattam i rekord ira na Biblia nu kunnasi niddan ni Jehova i aripanna ira​—lallaki anna babbay—​tu pakkaraga anna pakawayya nga mamarulo ta urena. Tapus, ikonsidera tam nu kunnasi ittam mappeyusa kani Jehova.

3. Gitta na mabibbig ta Filipos 2:13, kunnasi nga iyawa ni Jehova i pakkaraga nga magguyu?

³ Bibbigan i Filipos 2:13. * Meyawa ni Jehova nittam i pakkaraga nga magguyu. Kunnasina kuan yatun? Angngariganna, egga i tadday nga makawag tu uffun ta kongregasion onu egga i trabahu nga mawag makua. Onu nebibbig na elder ira i tadday nga tura na panga nga ofisina nga egga pakawagan ta tanakuan nga lugar. Awayyana nga meyavu tam ta baggi tam, ‘Anni tamma i meyuffukku?’ Onu baka neddan ittam tu mariga nga asayment anna ariattam ammu nu makua tam yatun tu mapia. Onu kabalittam binibbig i Uvovug na Dios, baka manono tam, ‘Kunnasì meyaplika yaw nga teksto na Biblia ta panguffun ta tanakuan?’ Ari ittam fuersan ni Jehova nga kuan i maski anni. Ngem nu masinganna ittam nga nononopattam nu anni i makua tam, moffunan ittam ni Jehova nga karagatan nga kuan nu anni i nanono tam tapenu maparulo i urena.

4. Kunnasi ittam iddan ni Jehova tu pakawayya nga magguyu?

⁴ Meyawa gapa ni Jehova nittam i pakawayya nga magguyu. (Isa. 40:29) Awayyana pakastan i natural nga abilidad tam ira gukaban na masanto nga espirituna. (Ex. 35:30-35) Gukaban na organisasionna, tudduan ittam ni Jehova nu kunnasi kuan i tadday nga trabahu. Nu egga noka i tiempo nga ari ka siguradu nu kunnasi ituppal i asayment mu, mappoffukka. Awayyam gapa i makkiddaw ta minangngiyawa nga nelangitan nga Yama tam tu “ari nga maguku-gukug nga pakapangngua.” (2 Cor. 4:7; Luc. 11:13) Aru i ehemplo ta Biblia nu kunnasi nga inuffunan ni Jehova i lallaki anna babbay gukaban na pangiyawana nira tu pakkaraga anna pakawayya nga magguyu. Durante nga ikonsidera tam danaw nga rekord, nonopammu nu kunnasi ka nga usan ni Jehova kagitta na pinangusana nira.

5. Anni i magigiammu tam nu kunnasi anna kanni nga inusa ni Jehova si Moises ta pangipaliag ta totolena ira?

⁵ Pinabbalin ni Jehova si Moises tu gumangngipaliag na Israelita ira. Ngem kanni yayya nga inusa ni Jehova? Nesimmu kari yaw turi ta natageno ni Moises nga kualipikadu ngana yayya gafu ta ‘natudduan yayya ta ngamin nga ammu na taga-Ehipto ira’? (King. 7:22-25) Ari. Inusa laman ni Jehova si Moises kabalinna nga inuffunan si Moises nga mabbalin tu mapakalinno anna malumamo nga lalaki. (King. 7:30, 34-36) Niddan ni Jehova si Moises tu gutu tapenu kibbidan i pinakamakapangngua nga patul na Ehipto. (Ex. 9:13-19) Anni i magigiammu tam nu kunnasi anna kanni nga inusa ni Jehova si Moises? Usu-usan ni Jehova danuri mangipasingan tu makadios nga kualidad anna danuri mattalo nisa para ta sikan.​—2 Cor. 4:7.

6. Anni i magigiammu tam ta pangusa ni Jehova kani Barzilai ta panguffun kani Patul David?

⁶ Piga siglo i nappasa, inusa ni Jehova si Barzilai tapenu uffunan si Patul David. “Mabisin anna nababbannag anna mapangal” si David anna i suddaluna ira turi ta sinammangngadda i anana nga si Absalom. Lakay ngana tatun nga tiempo si Barzilai, ngem pinappeligrona i inangona kunne na gapa i kakavuluna tapenu uffunan si David anna i suddaluna ira. Ari nga ninono ni Barzilai nga megafu ta lakay ngana yayya ay awan ngana tu serbina kani Jehova. Nu ari, vuka-palag nga inusana i egga nisa tapenu uffunan i aripan ira na Dios nga magawag. (2 Sam. 17:27-29) Anni i magigiammu tam? Maski nu anni paga i edad tam, awayya ittam nga usan ni Jehova tapenu meyawa i pakawagan na kapangngurug tam, maski ta diattam onu ta tanakuan nga nasion, nga makkurang i inaggaw nga  pakawagadda. (Prov. 3:27, 28; 19:17) Maski nu ariattam direkta nga moffunan ira, awayya tam maddona ta interu mundo nga trabahu tapenu egga ira i fundu nga mosa nga panguffun ta wawwaragi tam maski nu sitaw onu sonu anni kawagan yatun.​—2 Cor. 8:14, 15; 9:11.

7. Kunnasi nga inusa ni Jehova si Simeon, anna ngatta makapagaram yatun nittam?

⁷ Nipromesa ni Jehova kani Simeon, tadday nga matalo nga lakay ta Jerusalem, nga arianna masissiman i patay adde ta arianna masingan i Mesias. Talaga napagaram si Simeon tatun nga promesa, megafu ta piga ragun ngana nga iinnagganna i Mesias. Nabala-balakkan i pangurug anna pagattattamna. Tadday nga aggaw, “ta pakapangngua na Espiritu,” minay yayya ta templo. Nasinganna tatun i abbing nga si Jesus, anna inusa ni Jehova si Simeon tapenu mangiprofesiya meyannung taw nga abbing nga mabbalin tu Cristo. (Luc. 2:25-35) Maski nu posible nga natay ngana si Simeon nige nga pinegafuanan ni Jesus i ministeriona, magayayya yayya megafu ta inusa yayya ni Jehova, anna egga ira noka i makasta nga mesimmu nisa ta mappange! Sonu paraiso, masingan naw nga matalo nga lalaki nu kunnasi nga i pammaguray ni Jesus ay bendision ta ngamin nga familia ta mundo. (Gen. 22:18) Magayayya ittam gapa ta maski anni nga pribilehio nga iyawa nittam ni Jehova ta passerbi nisa.

8. Kunnasi ittam usan ni Jehova kagitta ni Bernabe?

⁸ Ta ollu siglo C.E., tadday nga lalaki nga minangngiyawa nga mangngagan tu Jose i nappeyusa kani Jehova. (King. 4:36, 37) Megafu ta malalaki si Jose ta pamasikan tu nono na tanakuan, inagalan yayya na apostoles tu Bernabe, kayàna kagian “Minammasikan ta Nono.” Angngariganna, nige nga nabbalin tu Cristiano si Saulo, aru nga wawwaragi i maganassing nisa megafu ta madumug yayya nga minammersigi ta kongregasion ira. Maski kunnari paga, pinasikan anna inuffunan yayya ni Bernabe. Siguradu nga inappresia ni Saulo yatun nga kinasippona. (King. 9:21, 26-28) Egga i tiempo nga nasingan na mannakam ira ta Jerusalem nga mawag na wawwaragi ta Antiokia ta Siria i pamagaram. Sinni i zinogda? Si Bernabe! Makasta i napilida. Kagian na Biblia nittam nga “nitabarang [ni Bernabe] nira ngamin tu ariad-da nga pangulian i napafutu nga angngurug da ta Yafu.” (King. 11:22-24) Kunnatun gapa ta maddaggun, awayyana ittam uffunan ni Jehova nga mabbalin tu tadday nga “minammasikan ta nono” ta kapangngurug tam. Angngariganna, posible nga usanna ittam tapenu pasikannan danuri natayan tu iddeddukan. Onu paguyuanna ittam nga bisitan onu tawagan i tadday nga mataki onu nadepres tapenu mangikagi tu makapabannay nga uvovug. Ipamavulummu kari nga usan naka ni Jehova kagitta ni Bernabe?​—1 Tes. 5:14.

9. Anni i magigiammu tam ta panguffun ni Jehova ta tadday nga brother nga mangngagan tu Vasily tapenu mabbalin nga kualipikadu nga espiritual nga pastor?

⁹ Inuffunan ni Jehova i tadday nga brother nga mangngagan tu Vasily tapenu mabbalin tu espiritual nga pastor. Ta natunno si Vasily nga mabbalin tu elder ta edad nga 26, maganassing yayya nga baka ari yayya nga kualipikadu nga uffunan ta espiritual i kongregasion, mas ngana danuri mepaparubang ta mariga ira nga situasion. Maski kunnari paga, nakalawa yayya tu makasta nga passanay ta elder ira anna gukaban na pagatendena ta Kingdom Ministry School. Nappursigi tu mapia si Vasily. Angngariganna, nangilista yayya tu baraddi nga addetan. Durante nga maddena i kada tadday, sisinu nga inaffuna i assingna ira. Kunnaw ngana i makagina: “I dati nga ikakkassikku, yayya ngana sangawe i mamagayayya niakan. Kada uffunannà ni Jehova nga malegan i eksakto nga teksto nga mamasikan ta tadday nga brother onu sister ta kongregasion, kuruga magayayya ngà.” Sikamu nga brother, nu kagitta ni Vasily  nga ipamavulunnu nga mappeyusa kani Jehova, awayya nga iyawa ni Jehova nikamu i abilidad nga tangngallan i mas darakal paga ira nga responsibilidad ta kongregasion.

10. Anni i kingngua ni Abigail, anna anni nga leksion i magigiammu tam ta ehemplona?

¹⁰ Daddaddaggan ni Patul Saul si David anna danuri matalo nisa, anna kawagadda i uffun. Nakkiddaw tu baddi nga makan i suddalu ira ni David ta mariku nga Israelita nga si Nabal. Matagenoda nga egga i kepangngattadda nga makkiddaw megafu ta popprotektadda i aya-ayam ni Nabal ta tana-tana. Ngem niyetukan ira na makasarili nga si Nabal. Nakaporay si David anna pinlanona nga patayan si Nabal anna i lallaki ta tangabbalayanna. (1 Sam. 25:3-13, 22) Ngem i atawa ni Nabal nga si Abigail ay ari laman nga guaguapa, nu ari minangngalippawa paga yayya. Magutu-gutu nga nappalittukag yayya kani David anna kinumbinsina nga ari nakuan yayya makaliwa ta daga gukaban na pamatay kani Nabal anna ta lallaki ta tangabbalayanna. Mataktika nga nirekomendana kani David nga ipammakatalona i ganna-gannug kani Jehova. Natukkal i futu ni David gafu ta mapakalinno nga paguvovug anna ta memmugug nga pagguyu ni Abigail. Nalippawana nga si Jehova i naddog kani Abigail. (1 Sam. 25:23-28, 32-34) Egga ira kualidad ni Abigail nga namapposible kani Jehova nga usan yayya. Kunnatun gapa, usan ni Jehova danuri Cristiano nga babbay nga mataktika anna minangngalippawa tapenu pasikannan i giffamiliadda anna i tanakuan ta kongregasion.​—Prov. 24:3; Tito 2:3-5.

11. Anni i kingngua na ána nga babbay ni Salum, anna sinni ta kaggawattam i mamarig nira?

¹¹ Aru nga siglo i nappasa, kasali i ána nga babbay ni Salum turi ira ta inusa ni Jehova nga mappakappia ta pader ira na Jerusalem. (Neh. 2:20; 3:12) Maski nu prinsipe i yamada, sigga-paran nga kuan na ána ni Salum yatun nga mariga anna peligroso nga trabahu. (Neh. 4:15-18) Dakal i neruman natun ta prominente nga lallaki na Tekoita nga ‘ari nga nappakalinno tapenu makibillay’ ta trabahu! (Neh. 3:5) Imajinan ngana laman i ayayya nga natageno na ána nga babbay ni Salum turi ta nebalin i proyekto ta unag na 52 aggaw! (Neh. 6:15) Ta kaggawattam, magayayya nga manguffun i sigga-paran ira nga sister tapenu kuan i espesial nga klase na sagradu nga passerbi​—i konstruksion anna i pammentena ta pataddag ira nga nededika kani Jehova. Kawagattam danaw nga maabilidad, entusiastiko, anna matalo ira nga sister tapenu mebalin yaw nga trabahu.

12. Kunnasi ittam usan ni Jehova kagitta ni Tabita?

¹² Pinaguyu ni Jehova si Tabita nga kanayun nga ‘mangngua tu mapia anna mabbalin tu minaggallallo,’ lalu ngana turi ira ta balu. (King. 9:36) Megafu ta kinavuka-palagna anna kinasippona, aru i siminangi ta patena. Ngem fermi i pagayayyada turi ta pinaginnolay yayya ni apostol Pedro. (King. 9:39-41) Anni i magigiammu tam kani Tabita? Abbing tam man onu manakam, lalaki onu babay, makangngua ittam ngamin tu praktikal ira nga gannug tapenu uffunan i wawwaragi tam ira.​—Heb. 13:16.

13. Kunnasi nga inusa ni Jehova i minappasirang nga sister nga si Ruth, anna anni i nakagina?

¹³ Kayà na minappasirang nga sister nga si Ruth i mabbalin tu misionera. Ta kabbinna, matalikarag nga mangiwara yayya tu tracts ta kada balay. “Kakayà ku yaw nga trabahu,” kunna. Ngem mariga para nisa i makibbida ta mismu nga makabbalay anna mangivuru-vura ta tanakuan meyannung ta Pappatulan na Dios. Maski nu minappasirang si Ruth, narregular payunir yayya ta edad nga 18. Ta 1946, nagatende yayya ta Watchtower Bible School of Gilead anna kabalinna nasserbi yayya ta Hawaii anna Japan. Inusa yayya ni Jehova tapenu mangngua tu  aru nga trabahu na pallayyagayya tatun ira nga nasion. Kabalin na maggi 80 nga ragun nga pakipartena ta pamministerio, nakagi ni Ruth: “Si Jehova i paggafuan na sikakku. Inuffunannà nga affutan i pappasirakku. Talaga mangurug ngà nga awayya usan ni Jehova i maski sinni nga mattalo nisa.”

14. Segun ta Colosas 1:29, anni i mawag nga kuattam tapenu usan ittam ni Jehova?

¹⁴ Ta interu nga historia, usu-usan ni Jehova i aripanna ira ta madduruma nga trabahu. Anni i pangiyusanna nikaw? Nakadepende yatun nu kuammu i adde na mawayyam. (Bibbigan i Colosas 1:29, NW.) Nu mappeyusa ka kani Jehova, awayya naka pabbalinan tu tadday nga matalikarag nga minallayyagayya, efektibo nga gumattuddu, malalaki nga mamasikan tu nono, maabilidad nga mattrabahu, minassuporta nga kofun, onu maski anni tapenu matuppal i urena.

15. Kagitta na nakagi ta 1 Timoteo 4:12, 15, anni nakuan i ipakimallo na mabbing ira nga brother kani Jehova nga kuadda?

¹⁵ Kumusta kamu nga mabbing nga brother nga mappapange ta pagadulto? Egga i dakal nga pakawagan para ta matalikarag ira nga lallaki tapenu uffunan i kongregasion bilang ministerial nga aripan. Ta aru nga kongregasion, mas aru i bilang na elder ira anne ta ministerial ira nga aripan. Sikamu nga mabbing nga brother, awayyanu kari nga kultiban i pakkaraga para ta kammungan ira nga responsibilidad ta kongregasion? Nu mittan makagi na karuan nga brother, “Kontento ngà ngana nga masserbi bilang publisher.” Nu kunnatun i matageno mu, makimallo ka kani Jehova nga uffunan naka nga kultiban i pakkaraga nga makualipika bilang ministerial nga aripan anna iddan naka ta pakawayya nga kuan i ngamin nga mawayyam nga passerbian yayya. (Ecl. 12:1) Kawagammi i uffummu!​—Bibbigan i 1 Timoteo 4:12, 15.

16. Anni nakuan i ikiddaw tam kani Jehova, anna ngatta?

¹⁶ Awayya naka pabbalinan ni Jehova ta maski anni nga kawagan tapenu metuppal i urena. Yari tu ikiddom nisa i pakkaraga nga kuan i trabahuna, anna ikiddom nisa nga iyawana nikaw i pakawayya nga kawagammu. Abbing ka man onu manakam, usammu ngana sangawe i tiempom, sikan, anna pakkukuam tapenu idayaw si Jehova. (Ecl. 9:10) Nu neddakka tu nabalor nga oportunidad nga mangngua tu mas aru paga nga passerbi kani Jehova, kammu insigida pammanakitan yatun anna nonopan nga ariammu makaya yatun. Anni ngana mabba nga pribilehio ta nittam i mapeggan tu maski baddi nga parte ta pangiyawa tu mepangngo nga dayaw ta minaggiddu nga Yama tam!