1. Ngatta mepangngo laman si Jehova ta eksklusibo nga debosiottam?

MEPANGNGO laman si Jehova ta eksklusibo nga debosiottam megafu ta yayya i Namaratu anna Minangngiyawa-Inango. (Nep. 4:11) Ngem, awayyana nga marigatattam nga kuan yatun. Maski nu ayatattam anna irespeto tam si Jehova, egga ira gannug ta pattoletam nga awayyana nga mabbalin tu kuruga importante nittam anna mangifugag nittam tapenu iyawa i eksklusibo nga debosion kani Jehova. Mawag tu matindiattam nu kunnasi yatun mesimmu. Ollu, gigiammuattam nu anni i kayà kagian na pangiyawa tu eksklusibo nga debosion kani Jehova.

2. Segun ta Exodo 34:14, anni i mawag nga kuattam nu eksklusibo i debosiottam kani Jehova?

² Ta Biblia, i kebalinan na pabbalin tu dedikadu ta Dios ay kapeggan tu monag nga aya nisa. Nu eksklusibo i debosiottam kani Jehova, yayya laman i dayawattam. Ariattam pagurayan i maski sinni onu maski anni nga manali nisa ta futu tam.​—Bibbigan i Exodo 34:14.

3. Ngatta egga i makasta ira nga rason nga ayatattam si Jehova?

³ Ngatta egga i makasta ira nga rason nga ayatattam si Jehova? Megafu ta nebase yatun ta kinakurug nga nagigiammu tam nisa. Nagustuattam i makkarasta nga kualidadna. Ammu tam anna anugutattam i ikayana anna i ikalussona ira. Matindiattam anna suportattam i gakkagna para nittam. Tadday nga pribilehio i pangipamavulunna nittam nga makikkofun nisa. (Sal.  25:14) Ngamin nga magigiammu tam meyannung ta Namaratu nittam ay mamaddukko nittam nisa.​—Sant. 4:8.

4. (a) Anni i usu-usan na Diablo tapenu makkafi i debosiottam kani Jehova? (b) Anni i ikonsidera tam taw nga artikulo?

⁴ Kokkontrolan na Diablo i mundo, anna usu-usanna i ganna-gannug naw tapenu tentanna ittam ta gagangay nga pakkaraga na totolay anna nepattaggan nga pakkafian. (Efe. 2:1-3; 1 Juan 5:19) Kayàna nga ayatattam gapa i tanakuan nga gannug tapenu ari laman tu si Jehova i ayatattam. Ikonsidera tam i dua nga gannug nu kunnasi yatun kuan na Diablo. Ollu, tentanna ittam nga ipoppollu i kinariku, anna mekadua, tentanna ittam nga pilian i marake nga dibersion.

5. Ngatta mawag nga magimmugug tam nga makultiba i pangaya ta kuartu?

⁵ Natural laman nga kayà tam nga mapeggan tu makalanno nga makan, makasta nga sinnun, anna disente nga paddianan. Maski kunnari paga, mawag tu magimmugug ittam nga makultiba i pangaya ta kuartu. Aru nga totolay ta maddaggun i “kuartu laman i agga-nono da” anna kakayàda i gannug ira nga magatang na kuartu. (2 Tim. 3:2) Ammu ni Jesus nga awayyana nga matenta i aripanna ira ta kunnaw nga pangaya. “Awan tu tolay nga mapparehu i passerbi na ta dua nga pakiyafuan,” kunni Jesus, “ta awayya na tu ikalussaw na i tadday anna iddukan na i tadday. Onu mas napasikkal i passerbi na ta tadday anna uyu-uyawan na i tadday. Arian na nga awayya tu maggiddan i pangaya ta Dios anna pangaya ta kuartu.” (Mat. 6:24) I tadday nga tolay nga massesserbi kani Jehova ngem aru gapa i usu-usanna nga tiempo anna sikanna tapenu mappariku, ay gittana massesserbi ta dua nga yafu. Arianna nga iyayawa i eksklusibo nga debosionna kani Jehova.

6. Anni i magigiammu tam ta tabarang ni Jesus ta kongregasion na Laodicea?

 ⁶ Nige na 100 C.E., niyopopog na miembro na kongregasion ta siudad na Laodicea: “Riku ngà, mapia i paddia-paddiak-ku; egga ngamin i mawag ku.” Ngem ta paningan ni Jehova anni Jesus, ‘kakkabbi ira anna pakallallo, awan tu anna-annida, uba ira, anna vuling ira paga.’ Sinabarangngan ira ni Jesus, ari tu megafu ta mariku ira, nu ari, megafu ta sobra i pangayada ta kuartu nga yatun i nanaral ta relasiodda kani Jehova. (Nep. 3:14-17) Nu matageno tam nga sisinu nga ayatattam i kuartu, mawag nga magguyu ittam insigida tapenu itunung i appana-panono tam. (1 Tim. 6:7, 8) Nu ariattam kuan yatun, magaddua i pangaya tam kani Jehova anna arianna akseptan i paddayaw tam. ‘Ikiddona i eksklusibo nga debosion.’ (Deut. 4:24) Kunnasi mabbalin tu mas importante ta pattoletam i kuartu?

7-9. Anni i magigiammum ta ekspiriensa na elder nga si David?

⁷ Ikonsidera i ehemplo ni David, tadday nga malallappo nga elder nga maddian ta United States. Para nisa, tadday yayya nga dedikadu nga empleyadu. Minatannang i posisionna ta kumpania nga pattrabahuanna anna minammatan paga lagu yayya na nasionna nga tadday ta pinakamalalaki tatun nga klase na trabahu ta nasiodda. “Tatun nga tiempo, pagabbo ku nga ebidensia na bendision ni Jehova i award ira nga nalawa ku,” kunni David. Ngem maggafu kari talaga yatun kani Jehova?

⁸ Sisinu nga nasingan ni David i marake nga efekto na trabahuna ta pakikkofunna kani Jehova. “Ta study anna ta ministerio, agga-nono ku i problema ira ta trabahu,” kunna. “Dakal i sueldù, ngem fermi i stress ku, anna problemadu i pagatawà.”

⁹ Nanono ni David nga mawag tu maddesision  yayya nu anni i mas importante nisa. “Dinisidì nga itunung i situasion,” kunna. Kayà ulian ni David i iskediulna anna nipakiyuvovugna yatun ta boss-na. I resultana? Nasisante yayya! Anni i kingnguana? “Insigida ta tumunug nga aggaw, nagaplay ngà bilang continuous auxiliary pioneer,” kunna. Tapenu masuportan i pakawagadda, nattrabahu si David anna i atawana bilang gumappakarenu. Ari nabbayag, pinegafuananna i marregular payunir, tapus nappayunir gapa i atawana. Pinili naw nga magatawa i pagalegan nga tagibaddikan na magaru, ngem ari tu i pagalegadda i pinaka-importante nira. Maski nu dies porsiento ngana laman na dati nga suelduda i malegadda, makalanno lagapa yatun ta vinulan nga paggastuadda. Kayàda nga si Jehova i ipoppolluda, anna nagigiammuda nga uffunan ni Jehova danuri mangipoppollu ta interes na Pappatulanna.​—Mat. 6:31-33.

10. Kunnasi tam memmuguran i futu tam?

¹⁰ Maski nu baddi onu aru i pakkukua tam, mawag tu immugurattam i futu tam. Kunnasi? Ariammu kultiban i pangaya ta kinariku. Anna ariammu pagurayan nga i sekular nga trabahum i mabbalin tu mas importante anne ta serbisium kani Jehova. Kunnasim mammuan nga mesissimmu nikaw yatun? Awayyam iyavu ta baggim: ‘Agga-nono ku kari i sekular nga trabahù nu egga ngà ta study onu ta ministerio? Mavuru-vurung ngà kari ta finansial nga pakawagakku ta mappange? I kuartu kari anna material nga ganna-gannug i paggafuan na problemami na atawà? Sigga-paran ngà kari nga kuan i alinno nga trabahu nga tagibaddikan na tanakuan tapenu mapeggan ngà tu mas aru nga tiempo ta passerbi kani Jehova?’ (1 Tim. 6:9-12) Nu ikonsidera danaw nga pakkiavu, kanayuttam nakuan nga nonopan nga iddeddukan ittam ni Jehova anna kuanna yaw nga promesa turi ira ta dedikadu nisa: “Ariat-taka vuluvuga nga panawan, ni et-taka nga pagurayan.” Yari tu nitura ni apostol Pablo: “Iyarayyu nu i attolay nu ta pangaya ta kuartu.”​—Heb. 13:5, 6.

11. Anni i mawayya nga kuan na dibersion ta tadday nga tolay?

¹¹ Kayà ni Jehova nga magayayya ittam ta pattolay, anna makoffun i dibersion tapenu makua tam yatun. Ta kakuruganna, kagian na Uvovug na Dios nga “awan ngana tu mas makasta para ta tolay nu ari i kuman anna minum anna magayayya ta ngamin nga pinabbannaganna.” (Ecl. 2:24) Ngem, egga i marake nga efekto nittam na aru nga dibersion na mundo.  Iyalinno danatun i moral nga estandarte na totolay, anna tudduanna i totolay nga akseptan onu ayatan paga lagu i gannug ira nga kondenan na Uvovug na Dios.

12. Segun ta 1 Corinto 10:21, 22, ngatta mawag nga magimmugug ittam ta pappili tu dibersion?

¹² Kayà tam iyawa kani Jehova i eksklusibo nga debosion, yari tu ariattam awayya kuman ta “akkakanan na Yafu” anna ta “akkakanan na demonio ira.” (Bibbigan 1 Corinto 10:21, 22.) Seniales na pakikkofun ta tanakuan i akkakan kavulu ira. Yatutta, nu piliattam i dibersion nga mangipoppoddu tu kinavayolente, espiritismo, imoralidad, onu tanakuan nga nepattaggan nga pakkaraga anna ugali, kagitta yatun na pakkakan kavulu i kalaban ira na Dios anna pakkakan ta makan nga nipreparada. Bilang resultana, ari laman tu pappeligrowattam i baggi tam, nu ari, daralattam i pakikkofuttam kani Jehova.

13-14. Segun ta Santiago 1:14, 15, ngatta mawag nga magimmugug tam nga umatto ta futu tam i marake nga pakkaraga? Iyilustra.

¹³ Ikonsidera nu kunnasi tam meyarig i dibersion ta literal nga makan. Nu kumattam, awayya tam pilian nu anni i ipay tam ta simu tam. Ngem oras nga nepa-unag tam ngana i kinnattam, ariattam ngana kontroladu nu kunnasi afektan natun i baggi tam. Magawa-gawayyan ittam nu piliattam i masustansia nga makan; makadaral gapa ta gawa-gawayyattam i ari masustansia nga makan. Ariattam masingan insigida i efekto natun, ngem masingattam yatun ta pappasa na tiempo.

¹⁴ Kunnatun gapa, nu mappili ittam tu dibersion, makontrol tam nu anni i iponag tam ta uto tam. Ngem kabalin natun, magga afektan na dibersion nga pinili tam i appanono anna i emosiottam. Makarefresko nittam i makasta nga dibersion; mamappeligro i marake nga dibersion. (Bibbigan i Santiago 1:14, 15.) Ari insigida masingan i efekto na marake nga dibersion, ngem masingattam yatun gabbalaman noka. Yari tu tabarangngan ittam na Biblia: “Arian nu nga illokowan i baggi nu; arian nu awayya nga illokowan i Dios. Ta nu anni laman i nimula na tolay, yatun gabbalaman i gataban na. Nu i pammulan na ay i neravvunan nga karagatan na baggi na, gataban na i patay.” (Gal. 6:7, 8) Talaga importante gafu nittam i pangibita ta dibersion nga mangipoppoddu ta gannug ira nga ikalussaw ni Jehova!​—Sal. 97:10.

15. Anni nga regalu i niyawa nittam ni Jehova tapenu magenjoy tam?

¹⁵ Aru nga aripan ni Jehova ta maddaggun i magenjoy ta paggiraw tu JW Broadcasting^®, i Internet television station tam nga marenu ta moral. Kagian na tadday nga sister nga si Marilyn: “Inuffunannà na JW Broadcasting tapenu mabbalin tu mas positibo, anna awayyà girawan ngamin yatun megafu ta makasta ngamin i magiraw tatun. Nu magitetadday ngà onu makkafi i nono ku, makaleg ngà tu girawakku nga makapagaram nga palappa onu programa na Morning Worship. Mas naddukko ngà kani Jehova anna ta organisasionna. Dakal i nangulian na pattolè megafu ta probision nga JW Broadcasting.” Mabebbenefisiowakka kari ta regalu ni Jehova? Kada vulan, egga i bagu ira nga programa na JW Broadcasting, anna egga ira i audio anna video nga programa anna makapagaram ira nga kansion nga awayyam girawan anna ginnan ta maski anni nga oras.

16-17. Ngatta mawag nga kontrolattam i pangusa tam ta tiempo ta paddibersion, anna kunnasi tam makua yatun?

¹⁶ Mawag tu magimmugug ittam ari laman ta klase na pagiraw nga kakayà tam, nu ari, ta kapaddu na tiempo nga usattam nga magenjoy tatun. Nu ariattam kuan yatun, awayyana tu mas aru i tiempo tam nga pagayayyatan i baggi tam anne ta passerbi kani Jehova.  Aru i marigatan nga mangontrol ta kapaddu na tiempo nga usadda ta paggiraw. Kagian na 18-anios nga si Abigail: “Uffunannà na paggiraw tu TV tapenu makarelaks kabalin na tangaggaw nga trabahu. Ngem nu ari ngà magimmugug, aru i mofu ku nga oras ta paggiraw tu TV.” Kagian gapa na kabataan nga si Samuel: “Mittan maggiraw ngà tu kakkaru nga baraddi nga video ira. Tadday lang bi i giniraw ku ta ollu ngem ariakku nasifutan nga tallu onu appa nga oras ngana balo i nofu ku.”

¹⁷ Kunnasim makontrol i kapaddu na tiempom nga maddibersion? I ollu nga dakkua ay i pangammu nu piga nga oras i aktual nga momosam tatun. Ngatta ta ariammu mangngua tu rekord ta tanga ligguan? Irekord mu nu piga nga oras i mosam ta paggiraw tu TV, paginternet, anna paggayam ta cellphone mu. Nu masingammu nga sossobra i mosam nga oras, awayyam mangngua tu iskediul. Iplanom nga usan tu ollu i tiempom ta mas importante ira nga gannug, tapus mangiskediul ka tu tiempo na paddibersion. I tumunug, mappoffukka kani Jehova nga matuttul mu i iskediul mu. Nu kunnatun, mapeggakka tu sikan anna tiempo nga kawagammu ta personal nga paggigiammum tu Biblia, paddayaw na familia, study ira, anna passerbi kani Jehova gukaban na trabahu nga pallayyagayya anna panuddu. Ariammu gapa kuruga makonsensia ta tiempo nga inusam ta paddibersion megafu ta pinagollum si Jehova.

18-19. Kunnasi tam mapakurug nga eksklusibo i debosiottam kani Jehova?

¹⁸ Kabalin nga nitura ni apostol Pedro i meyannung ta kadaral na mundo ni Satanas anna na mappange nga napabagu nga mundo, kunna: “Iddeddukak-ku nga kakkofun, ta paginnennag nu tatun nga Aggaw, kuan nu i adde na awayya nu nga mattolay ta marenu, awan tu kapaliwatan anna memammo ta pagimamma na Dios.” (2 Ped. 3:14) Nu parulattattam yaw nga tabarang anna mattalupaddian ittam nga marenu ta moral anna espiritual, mapakurug tam nga eksklusibo i debosiottam kani Jehova.

¹⁹ Ari nga magimmang si Satanas anna i sistemana nga tentan ittam nga ipoppollu i tanakuan ira nga gannug imbes nga si Jehova. (Luc. 4:13) Ngem maski anni paga i keparubangattam, ariattam ipamavulun i maski sinni onu maski anni nga manali kani Jehova ta futu tam. Determinadu ittam nga iyawa kani Jehova i mepangngo laman nisa​—i eksklusibo nga debosiottam!