MAGIGIAMMU NGA ARTIKULO 41
Mattalupaddian nga Matalo Durante ta “Dakal nga Ziga”
“Ayatannu si Jehova sikamu ngamin nga matalo nisa! Iyegutan ni Jehova i matalo ira.”—SAL. 31:23, NW.
KANSION 129 Itulu-tuloy Tam i Magattam
SUMARIO *
1-2. (a) Anni i aranni ngana nga iproklama na lider ira na nasa-nasion? (b) Anni ira nga pakkiavu i mawag nga matabbag?
IMAJINAMMU nga kababalin laman nga iproklama na lider ira na nasa-nasion i nabayagda ngana nga gakkag nga “imammo anna seguridad.” Baka iparayagda nga kuruga memammo ngana i mundo. Kayà na lider ira na nasa-nasion nga nonopattam nga kontroladuda i mundo. Ngem awan vuluvuga tu kontrolda ta tumunug nga mesimmu! Ngatta ta kunnatun? Segun ta profesiya na Biblia, “gavva nga duttal nira i kadaral, . . . anna awan noka nira i makelilli.”—1 Tes. 5:3, NW.
2 Egga ira importante nga pakkiavu nga mawag tu matabbag: Anni noka i mesimmu durante na “dakal nga ziga”? Anni i ekspektan ni Jehova nga kuattam noka? Anni ira nga kualidad i mawag tu mas kultibattam sangawe tapenu makapattalupaddiattam noka nga matalo durante ta dakal nga ziga?—Mat. 24:21, NW.
ANNI NOKA I MESIMMU DURANTE TA “DAKAL NGA ZIGA”?
3. Segun ta Nepakannammu 17:5, 15-18, kunnasi noka nga daralan na Dios i “Madumu-rumug nga Babilonia”?
3 Bibbigan i Nepakannammu 17:5, 15-18. Madaral noka i “Madumu-rumug nga Babilonia”! Gitta na nakagi ta gafu, awan vuluvuga tu kontrol na lider ira na nasa-nasion nu anni i mesimmu tatun nga tiempo. Ngatta? Megafu ta “nipay na Dios ta nono da tu mapakatadday i uray da nga mangngua ta gakkag na.” Anni yatun nga gakkag? I panaral ta interu mundo nga imperio na falsu nga relihion, nelagum ngana i Kakristianuan. * Ipay noka na Dios yaw nga gakkag ta giffutuan na ‘mafulu nga taggug’ na maporay nga “ayam nga uzzin.” Irepresenta na mafulu nga taggug i ngamin nga gobiernu nga massuporta ta maporay nga “ayam”—i United Nations. (Nep. 17:3, 11-13; 18:8) Sonu atakeyan danatun nga gobiernu i falsu nga relihion, tatun ngana mamegafu i dakal nga ziga. Gaggavva anna kappaganassing noka yatun nga mesimmu anna afektanna i ngamin ta davvun.
4. (a) Anni noka i posible ira nga rason na lider ira na nasa-nasion nu ngatta atakeyadda i falsu nga relihion? (b) Anni i posible nga kuan noka na dati ira nga miembro danatun nga relihion?
4 Ari tam ammu nu anni i rason ira noka na lider ira na nasa-nasion nu ngatta atakeyadda i Madumu-rumug nga Babilonia. Baka irasodda noka nga i relihion ira ta mundo i makefugag ta imammo anna kanayun ira nga makisawsaw ta pulitika. Onu baka irasodda noka nga aru ngana i nakakkam danatun nga relihioso nga organisasion tu kinariku anna pakkukua. (Nep. 18:3, 7) Sonu atakeyan na lider ira na nasa-nasion i falsu nga relihion, posible nga ariadda noka nga daralan i ngamin nga miembro natun ira nga relihion. I daraladda lallagu ay i relihioso ira nga organisasion. Sonu nadaral ngana danatun nga organisasion, malippawa na dati ira nga miembro nga ari nga natuppal na lider ira na relihiodda i nipromesada ira. Gafu tatun, posible nga tallikuradda noka i relihiodda.
5. Anni i nipromesa ni Jehova meyannung ta dakal nga ziga, anna ngatta?
5 Ari nga kagian na Biblia nu kunnasi kabayag noka i kadaral na Madumu-rumug nga Babilonia, ngem ammu tam nga manganannuan laman i kesimmu natun. (Nep. 18:10, 21) Nipromesa ni Jehova nga ‘pababbanna i bilang na aggaw’ na dakal nga ziga tapenu mapaliag i “totolay nga pinili na” kunne na gapa i kurug nga relihion. (Mar. 13:19, 20) Ngem anni i ikikkiddaw ni Jehova nga kuattam sonu namegafu ngana i dakal nga ziga adde ta gerra na Armagedon?
ITULU-TULOY NGA ITADDAGGAN I MARENU NGA PADDAYAW KANI JEHOVA
6. Ngatta ari tu makalanno i basta pappalsa bilang miembro na falsu nga relihion?
6 Gitta na nammuattam ta nappasa nga artikulo, ekspektan ni Jehova nga danuri maddayarayaw nisa ay isinada i baggida ta Madumu-rumug nga Babilonia. Ngem ari tu makalanno i basta pappalsa bilang miembro na falsu nga relihion. Mawag tu determinadu ittam nga itaddaggan i kurug nga relihion—i marenu nga paddayaw kani Jehova. Ikonsidera i dua nga mawag tu kuattam.
Ariattam nakuan nga immangan i paggarammammung tam, maski ta mariga ira nga tiempo (Innan i parapo 7) *
7. (a) Kunnasi tam makapattalupaddian nga itaddaggan i matunung ira nga moral nga estandarte ni Jehova? (b) Kunnasi tam mepasingan i importansia na paggarammammung nga mabibbig ta Hebreo 10:24, 25, netallugaring ta maddaggun?
7 Ollu, mawag tu mattalupaddian nga itaddaggattam i matunung ira nga moral nga estandarte ni Jehova. Ariattam nakuan vuluvuga nga akseptan i imoral nga kondukta na totolay ta mundo. Angngariganna, kondenattam i ngamin nga klase na seksual nga imoralidad, nelavu ngana i pagatawa na makka-sekso kunne na gapa i tanakuan paga nga homoseksual nga kondukta. (Mat. 19:4, 5; Roma 1:26, 27) Mekadua, mawag tu itulu-tuloy tam nga maddayaw kavulu i kapangngurug tam ira. Kuattam yatun maski sitaw nga lugar, ta Kingdom Hall, onu nu kawagan, ta pribadu nga babalay na Saksi ira onu maski ta sekreto nga lugar. Maski anni noka i mesimmu, ariattam magimmang nga umay nga makistudy. Ta kakuruganna, mawag tu maggarammammung ittam “netallugaring ta masingat-tam tu aranni ngana i Aggaw na Yafu.”—Bibbigan i Hebreo 10:24, 25.
8. Anni noka i posible nga pangulian na mensahe tam ta mappange?
8 Ta tiempo na dakal nga ziga, posible nga manguli noka i mensahe nga iproklama tam. Ta maddaggun, ilayyagayya tam i mapia nga dumug na Pappatulan anna mappursigi ittam nga mangngua tu disipulos. Ngem tatun nga tiempo, posible nga i ilayyagayya tam ay kuruga prangka nga mensahe. Ikumpara na Biblia yatun nga mensahe ta daddarakal nga allalagu. (Nep. 16:21) Posible nga i ilayyagayya tam noka ay i araranni ngana nga kadaral na mundo ni Satanas. Egga noka i tiempo nga mammuattam nu anni i eksakto nga mensahe nga ilayyagayya tam anna nu kunnasi tam ilayyagayya yatun. Mangusa tam pano noka tu parehu ira nga metodo ta ministerio nga usu-usattam ngana ta piga ragun? Onu mangusa tam kari noka tu tanakuan nga metodo? Ariattam paga ammu. Maski kunnasi noka i pallayyagayya tam, magga pribilehio tam noka nga magutu nga iproklama i mensahe na pangukum ni Jehova!—Eze. 2:3-5.
9. Anni noka i reaksion na totolay ta mensahe tam, ngem ta anni ittam nga makasiguradu?
9 Dakal i posibilidadna nga megafu ta mensahe noka nga ikagi tam, fuersan ittam noka na nasa-nasion nga permanente nga iyemmang i pallayyagayya tam. Nu kunnasi nga maddepende tam sangawe kani Jehova para ta ministerio tam, magga kawagattam noka i suportana tatun nga tiempo. Makasiguradu ittam nga pannuan ittam noka na Dios tu pakawayya nga ituppal i urena.—Mik. 3:8.
SIGGA-PARAKKA NAKUAN SONU ATAKEYADDA I TOTOLAY NA DIOS
10. Segun ta profesiya na Lucas 21:25-28, anni noka i matageno na magaru nga totolay ta mesimmu sonu dakal nga ziga?
10 Bibbigan i Lucas 21:25-28. Sonu dakal nga ziga, makaddagan noka i totolay nga makasingan nga i ngamin nga pattalakkadda nga abboda nga matuyag ta mundo ay mamegafu nga madaral. ‘Mazziga-riga’ noka ira anna maganassing ira nga baka mapatay ira ta pinakagrabe nga tiempo na historia na totolay. (Zef. 1:14, 15) Tatun nga tiempo, magga mas mazziga noka i paddia-paddian maski danuri na totolay ni Jehova. Megafu ta mattalupaddiattam nga nesina ta mundo, posible nga mazziga-riga ittam. Posible nga egga noka ira tiempo nga mawanan ittam tu karuan ira nga pakawagan.
11. (a) Ngatta mabbalin noka tu puntiria i Saksi ira ni Jehova? (b) Ngatta ariattam nakuan ikassing i dakal nga ziga?
11 Duttal noka i tiempo nga danuri totolay nga nadaral ngana i relihiodda ay mattaki i nonoda gafu ta egga pagalaman i relihion nga Saksi ni Jehova. Ma-imajittam nga pagguruluadda noka yaw, maski ta social media. Ikalussaw ittam na lider ira na nasa-nasion anna na mammaguray nira nga si Satanas megafu ta i relihiottam ngana laman i nabattang nga ari paga nadaral. Ari noka nga matuppal i gakkagda nga interamente nga pawanan i ngamin nga relihion ta utun na davvun. Yatutta sittam ngana noka i puntiriada. Tatun nga tiempo, i lider ira na nasa-nasion i mabbalin tu Gog na Magog. * Mattaradday ira noka anna atakeyadda i totolay ni Jehova gukaban na ngamin nga pakapangnguada. (Eze. 38:2, 14-16) Awayyana nga mavurungan ittam nu anni ira noka i mesimmu ta dakal nga ziga megafu ta ariattam ammu i eksakto ira nga detalye. Ngem tadday nga gannug i siguradu: Ariattam nakuan ikassing i dakal nga ziga. Iddan noka ittam ni Jehova tu instruksion ira nga mangipaliag nittam. (Sal. 34:19) Mawayya tam noka i “tumaddag anna tumangag” megafu ta ammu tam noka nga “aranni ngana i kapaliag” tam. *
12. Kunnasi nga iprepara ittam ta maddaggun na “mekatalo anna nannono nga doroban” tapenu agga-paran ittam ta mesimmu ta mappange?
12 Maddaggun ngana nga iprepara ittam na “mekatalo anna nannono nga doroban” tapenu makapattalupaddian ittam nga matalo durante na dakal nga ziga. (Mat. 24:45) Nadduruma i pangipreparada nittam, ngem ikonsidera i tadday nga angngarigan: i eksakto ta tiempo ira nga programa na kombensiottam ta dagun 2016 adde ta 2018. I palappa ira tatun ira nga kombension i namagaram nittam nga mas paga kultiban i kualidad ira nga kawagattam durante nga umara-aranni ngana ittam ta aggaw ni Jehova. Repasuattam danatun nga kualidad.
TULU-TULOY NGA MAS PAGA KULTIBAN I KINAMATALO, PAGATTA-ATTAM ANNA KINAGUTU MU
Mapprepara ngana sangawe tapenu mepaliag ta “dakal nga ziga” (Innan i parapo 13-16) *
13. Kunnasi tam nga mas paga nga makultiba i kinamatalo tam kani Jehova, anna ngatta mawag tu kuattam yatun ta maddaggun?
13 Kinamatalo: I tema na 2016 nga programa na kombension ay “Mattalupaddian nga Matalo Kani Jehova!” Sinudduan ittam naw nga programa nga nu matuyag i personal nga relasiottam kani Jehova, mabbalin ittam nga matalo nisa. Neperaddam nittam nga mawayya tam i maddukko kani Jehova gukaban na napafutuan nga pakimallo anna malappo nga paggigiammu ta Uvovugna. I pangngua tatun i mangiyawa nittam tu sikan nga attamman i maski anni nga mariga nga problema. Durante nga umara-aranni i dakal nga ziga, ekspektattam nga mas marriga paga i kapurueba ira na kinamatalo tam ta Dios anna ta Pappatulanna. Magga ari ittam immangan nga paguyoyungan na totolay. (2 Ped. 3:3, 4) Netallugaring nga mesimmu yaw megafu ta ariattam suportan i maski anni nga parte na mundo ni Satanas. Mawag tu mas paga nga kultibattam i kinamatalo ta maddaggun tapenu makapattalupaddiattam nga matalo durante ta dakal nga ziga.
14. (a) Anni noka i panguloli meyannung ta brother ira nga mangirollu ta davvun? (b) Ngatta mawag tu matalo ittam tatun nga tiempo?
14 Sonu dakal nga ziga, egga noka i panguloli meyannung ta brother ira nga mangirollu ta davvun. Duttal noka i tiempo tu ngamin nga nazelugan nga egga paga ta davvun ay maammung nga umay ta langi tapenu makipartisipa ira noka ta gerra na Armagedon. (Mat. 24:31; Nep. 2:26, 27) Kayà kagian natun nga ariattam ngana noka nga kavulu ta davvun i Manangngal nga Baggi. Ngem mattalupaddian lagapa nga organisadu noka i magaru nga totolay. Egga noka i kualipikadu ira nga brother nga miembro na tanakuan nga karneru nga mangirollu. Mawag tu ipasingattam noka i kinamatalo tam gukaban na passuporta taw ira nga brother anna panuttul ta direksiodda nga naggafu ta Dios. Nakadepende noka ta panuttul tam i kapaliag tam!
15. Kunnasi tam mas makultiba i pagatta-attam, anna ngatta importante nga kuattam yatun sangawe ngana?
15 Pagatta-attam: I tema na 2017 nga programa na kombension ay “Pasikannammu i Nono Mu!” Inuffunan ittam naw nga programa tapenu mas paga nga makultiba i pagatta-attam tam ta kapurueba ira. Nammuattam nga i pakawayya tam nga magatta-attam ay nakadepende ta pattalo tam kani Jehova, ari tu gafu ta situasiottam. (Roma 12:12) Ariattam nakuan kattaman i nipromesa ni Jesus: ‘I sinni laman nga magatta-attam adde ta panuppalan ay mapaliag.’ (Mat. 24:13) Kebalinan naw nga promesa nga mawag tu mattalupaddian ittam nga matalo maski nu anni nga ziga i keparubangattam. Nu attammattam i kada kapurueba ta maddaggun, mabbalin noka nga mas matuyag i pangurug tam nige na pamegafu na dakal nga ziga.
16. Anni i mamaggutu nittam, anna kunnasi tam nga mas makultiba i kinagutu sangawe?
16 Kinagutu: I tema na 2018 nga programa na kombension ay “Maggutu Ka!” Niperaddam nittam naw nga programa nga ari tu nakadepende ta abilidad tam ira i kapeggattam tu kinagutu. Gitta gabbalaman na pagatta-attam, mawag tu mattalo ittam kani Jehova tapenu mabbalin tu kurug nga magutu. Kunnasi tam nga makultiba i mas paga nga pattalo kani Jehova? Gukaban na pabbibbig tu Biblia kadaggaw anna pannono tu mapia nu kunnasi nga nipaliag ni Jehova i totolena ta nappasa. (Sal. 68:20; 2 Ped. 2:9) Sonu atakeyan ittam na lider ira na nasa-nasion durante ta dakal nga ziga, yatun noka i tiempo nga mas kawagattam i maggutu anna mattalo kani Jehova. (Sal. 112:7, 8; Heb. 13:6) Nu mattalo ittam kani Jehova sangawe, mapeggan ittam tu kawagan nga kinagutu sonu atakeyan ittam na Gog. *
SIGGA-IDDANAMA NGA INNAGGAN I KAPALIAG MU
Si Jesus anna i nelangitan nga armadana ay makiggerra noka sonu Armagedon tapenu daralan i kalaban ira na Dios! (Innan i parapo 17)
17. Ngatta ariattam vuluvuga ikassing i Armagedon? (Innan i letratu ta vungun.)
17 Kagitta na nakagi ta nappasa nga artikulo, aru nittam i nattolay durante ta tiempo na pangurianan ira nga aggaw. Ngem egga gapa i iddanama tam nga mepaliag ta dakal nga ziga. I gerra noka na Armagedon i pinaka-ultimu na ultimu naw nga sistema na ganna-gannug. Maski kunnari paga, awan vuluvuga tu ikassittam. Ngatta? Megafu ta gerra yaw ni Jehova anna ariattam kawagan i makillaban. (Prov. 1:33; Eze. 38:18-20; Zac. 14:3) Sonu idog ni Jehova, irollu ni Jesu-Cristo i armada na Dios ta gerra. Kavuluna noka i napaginnolay nga nazelugan ira anna i rinivu-rivu nga anghel ira. Mavvurulu ira nga makillaban kontra kani Satanas, i demoniona ira, anna i neravvunan nga suddaluna.—Dan. 12:1; Nep. 6:2; 17:14.
18. (a) Anni i nipasiguradu nittam ni Jehova? (b) Kunnasi nga pakkomfiansan naka na Nepakannammu 7:9, 13-17 meyannung ta mappange?
18 Nipasiguradu ni Jehova: “Awan tu armas nga mapadday kontra nikaw i mavviktoria.” (Isa. 54:17) “Magaru nga totolay” nga matalo nga massesserbi kani Jehova i “nakeyattam ta nepallo nga kadara-darum” i mapaliag noka! Anna tulu-tuloy ira nga masserbi nisa. (Bibbigan i Nepakannammu 7:9, 13-17.) Anni ngana karu na ebidensia nga iyawa na Biblia tapenu makapakkomfiansa ittam ta mappange! Ammu tam nga “iyegutan ni Jehova i matalo ira.” (Sal. 31:23, NW ) Magayayya noka danuri mangaya anna mangidayaw kani Jehova nga makasingan ta pamakasantona ta ngaganna.—Eze. 38:23.
19. Anni nga makapagayayya nga iddanama i magigginnag nittam ta aranni ngana nga mappange?
19 Nonopan nu anni i kebalinan na 2 Timoteo 3:2-5 nu ideskribana i totolay nga maddian ta napabagu nga mundo sonu awan ngana tu influwensia ni Satanas. (Innan i kahon nga “ I Kondukta na Totolay ta Napabagu nga Mundo.”) Kunnaw i komento ni Brother George Gangas, * nga nasserbi nga miembro na Manangngal nga Baggi: “Anni ngana kasta na mundo nu i ngamin ay brother onu sister tam! Aranni ngana nga mapeggakka tu pribilehio nga mattolay ta bagu nga sistema na ganna-gannug. Mattolay ka noka adde ta matolay si Jehova. Mattolay ittam noka tu mannanayun.” Talaga makapagayayya yatun nga iddanama!
KANSION 122 Magpakatatag!
^ par. 5 Ammu tam nga araranni ngana nga maekspiriensa na totolay i “dakal nga ziga.” Anni noka i mesimmu ta aripan ira ni Jehova tatun nga tiempo? Anni i ekspektan ni Jehova nga kuattam noka? Anni ira nga kualidad i mawag tu mas kultibattam sangawe tapenu makapattalupaddiattam noka nga matalo durante ta dakal nga ziga? Ammuattam danatun taw nga artikulo.
^ par. 3 KEBALINAN NA TERMINO: I Kakristianuan ay tumukoy ta relihion ira nga makkakkagi nga Cristiano ira ngem ariadda ituddu ta totolay nga dayawadda si Jehova segun ta estandartena ira.
^ par. 11 KEBALINAN NA TERMINO: I termino nga Gog na Magog (anna i napababba nga formana nga Gog) ay tumukoy ta alyansa na nasa-nasion nga makillaban noka kontra ta marenu nga paddayaw ta ultimu na dakal nga ziga.
^ par. 11 Para ta mas detalyadu nga kepakanawag na ngamin nga mesimmu nige na gerra na Armagedon, innan i kapitulo 21 na libru nga Namamahala Na ang Kaharian ng Diyos! Para ta mas aru nga detalye meyannung ta pangatake na Gog na Magog anna nu kunnasi nga idefensa noka ni Jehova i totolena durante na Armagedon, innan i kapitulo 17 anna 18 na libru nga Ibinalik ang Dalisay na Pagsamba kay Jehova.
^ par. 16 Ipasiguradu nittam na tema na 2019 nga programa na kombension nga “Mannanayun i Aya!” nga makapattalupaddian ittam nga arayyu ta peligro megafu ta meddu nga proteksion ni Jehova.—1 Cor. 13:8.
^ par. 19 Innan i artikulo nga ‘Ang Kaniyang mga Gawa ay Sumusunod sa Kaniya’ ta Disiembre 1, 1994 nga isyu na Ang Bantayan.
