1. Anni i mangumbinsi nittam nga mattotolay ittam ngana ta “pangurianan ira nga aggaw”?

NEYANA ka kari kabalin na dagun 1914? Nu kunnatun, nattolay ka ta “pangurianan ira nga aggaw” na maddaggun nga sistema na ganna-gannug. (2 Tim. 3:1) Naginna tam ngamin i neprofesiya ni Jesus nga mesissimmu ta maddaggun. Nelavu taw i gerra, pakkurang na makan, lunu-lunig, tulu-tulagan, paggrabe na kinarake, anna pameppersigi ta totolay ni Jehova. (Mat. 24:3, 7-9, 12; Luc. 21:10-12) Nasingattam gapa nu kunnasi i kondukta na totolay segun ta niprofesiya ni apostol Pablo. (Innan i kahon nga “ I Kondukta na Totolay ta Maddaggun.”) Bilang minaddayarayaw kani Jehova, kumbinsidu ittam nga mattotolay ittam ngana ta “ultimu nga parte na aggaggaw.”​—Mik. 4:1.

2. Anni ira nga pakkiavu i mawag tam nga tabbagan?

² Megafu ta aru ngana nga tiempo i nappasa namegafu paga ta 1914, siguradu nga mattotolay ittam ngana ta ultimu na “pangurianan ira nga aggaw.” Megafu ta aranni ngana i pangultimuan naw nga sistema, mawag tu ammuattam i tabbag ira na karuan nga importante nga pakkiavu: Anni ira i mesimmu ta ultimu na “pangurianan ira nga aggaw”? Anna anni i ekspektan ni Jehova nga kuattam durante nga innaggattam danaw nga mesimmu?

3. Segun ta neprofesiya ta 1 Tesalonica 5:1-3, anni noka i iproklama na nasa-nasion?

³ Bibbigan i 1 Tesalonica 5:1-3, NW. Tinukoy ni Pablo i “aggaw ni Jehova.” Kagitta na nakagi taw nga teksto, tukuyan naw i  periodo na tiempo nu sitaw mamegafu i pangatake ta “Madumu-rumug nga Babilonia,” i imperio na falsu nga relihion, anna mangultimu ta Armagedon. (Nep. 16:14, 16; 17:5) Nige laman na pamegafu natun nga “aggaw,” iproklama noka na nasa-nasion i “Imammo anna seguridad!” Usu-usan gapa na lider ira na nasa-nasion i kunnatun nga termino nu paguvovugadda i pamakasta ta relasion ta nallatanan na nasa-nasion. * Ngem neruma noka i proklamasion nga “imammo anna seguridad” nga dineskriba na Biblia. Ngatta? Sonu mesimmu yaw, nonopan na totolay nga navviktoria i lider na nasa-nasion nga pabbalinan tu mas memammo i mundo. Ngem ta kakuruganna, tatun ngana mamegafu i “dakal nga ziga” tapus “gavva [noka] nga duttal nira i kadaral.”​—Mat. 24:21.

4. (a) Anni paga i ariattam ammu meyannung ta proklamasion na “imammo anna seguridad”? (b) Anni ngana i ammu tam tatun?

⁴ Egga ira i detalye nga ammu tam meyannung ta proklamasion na “imammo anna seguridad.” Ngem, egga ira tanakuan nga gannug nga ariattam ammu. Ariattam ammu nu anni i rason nu ngatta onu kunnasida iproklama yatun. Anna ariattam ammu nu mittan laman nga proklamasion yatun onu egga noka i matturunug nga anunsio. Maski anni noka i mesimmu, yaw i ammu tam: Ariattam nakuan mappelogo nga nonopan nga kurug tu makerattal tu imammo ta interu mundo i lider na nasa-nasion. Nu ari, yatun lagu nga proklamasion i sifutattam kagitta na kinagi na Biblia. Yatun noka i pagisenialan nga mamegafu ngana i “aggaw ni Jehova”!

5. Kunnasi ittam uffunan na 1 Tesalonica 5:4-6 nga mapprepara para ta “aggaw ni Jehova”?

⁵ Bibbigan i 1 Tesalonica 5:4-6, NW. Pagaramman ittam ni Pablo nu kunnasi tam masiguradu nga nakaprepara ittam ta “aggaw ni Jehova.” Mawag nakuan tu “ari ittam nga agga-katurug nga kagitta na karuan.” Mawag gapa tu “agga-lukag” ittam anna mattalupaddian nga alerto. Angngariganna, mawag nga mabbalittam nga alerto tapenu ariattam mekompromiso i neutralidad tam gukaban na ari pakiparte ta pulitikal ira nga isyu. Nu makiparte tam tatun, mabbalin ittam tu ‘kukua na mundo.’ (Juan 15:19) Siguradu ittam nga i Pappatulan na Dios laman i makerattal tu imammo ta interu mundo.

6. Anni i kayà tam nga iyuffun ta tanakuan, anna ngatta?

⁶ Fuera paga ta pattalupaddiattam nga agga-lukag, kayà tam gapa nga uffunan i tanakuan nga malukag gukaban na panuddu nira ta neprofesiya na Biblia nga mesimmu noka ta mundo. Daddammattam nga oras tu namegafu ngana i dakal nga ziga, ari ngana tu yatun pagalaman i tiempo nga pegafuanan na totolay i masserbi kani Jehova. Yari tu ari metalattan i trabahu tam nga pallayyagayya! *

7. Anni i ekspektan ni Jehova nga kuattam ta maddaggun?

⁷ Megafu ta baddi ngana laman i tiempo nige nga mamegafu i “aggaw” ni Jehova, ekspektanna nga kanayun ittam nga okupadu ta pallayyagayya. Siguraduattam nakuan nga ‘mallallappo ittam nga kanayun ta trabahu tam nga masserbi ta Yafu.’ (1 Cor. 15:58) Niprofesiya ni Jesus nu anni i kuattam. Tagga ta kinagina i importante ira nga mesimmu ta pangurianan ira nga aggaw, niyammunna: “Mawag tu melayya-gayya tu ollu i Mapia nga Dumug ta ngamin nga nasion.” (Mar. 13:4, 8, 10; Mat. 24:14) Nonopammu: Kada mallayyagayya ka, makipapparte ka ta ketuppal natun nga profesiya na Biblia!

8. Kunnasi nga mappopprogreso i trabahu nga pallayyagayya na Pappatulan?

⁸ Anni i makagi tam ta papprogreso na trabahu nga pangilayyagayya ta Pappatulan? Kada ragun, aru nga totolay i magginna ta mapia nga dumug na Pappatulan. Angngariganna, innammu i pagaru na bilang na mangilayyagayya ta Pappatulan ta pangurianan ira nga aggaw. Ta 1914, egga i 5,155 nga publisher ta 43 nga nasion. Ta maddaggun, egga ngana i 8.5 million nga publisher ta 240 nga nasion! Maski kunnari paga, ari paga nabalin i trabahu tam. Mawag tu kanayun lagapa nga okupadu ittam nga ilayyagayya nga i Pappatulan na Dios laman i solusion ta problema na totolay.​—Sal. 145:11-13.

9. Ngatta mawag nga itulu-tuloy tam i pangilayyagayya ta mensahe na Pappatulan?

⁹ Ari mabalin i trabahu nga pallayyagayya ta Pappatulan adde ta ari kagian ni Jehova nga magimmang ngana yatun. Kunnasi kapaddu ngana laman na tiempo i nabattang tapenu mammammu na totolay si Jehova nga Dios anna si Jesu-Cristo? (Juan 17:3) Ariattam makagi. Ngem ammu tam nga adde ta ari paga namegafu i dakal nga ziga, i maski sinni nga “mepangngo nga mangalawa tu mannanayun nga inango” ay awayyana paga nga alawatan i mapia nga dumug anna pilian nga masserbi kani Jehova. (King. 13:48, NW ) Kunnasi tam uffunan i totolay durante nga egga paga i tiempo?

10. Anni nga uffun i iyawa ni Jehova nittam tapenu tudduan i totolay meyannung ta kinakurug?

¹⁰ Gukaban na organisasion ni Jehova, iyawana nittam i ngamin nga kawagattam tapenu tudduan i totolay meyannung ta kinakurug. Angngariganna, linigguan nga makalawa tam tu passanay ta midweek study tam. Uffunan ittam naw nga study nu anni i kagiattam ta gafu nga pallayyagayya anna passinoli. Anna tudduanna ittam nu kunnasi i pangikondukta  ta paggigiammu tu Biblia. Nangiyawa gapa i organisasion ni Jehova tu rimienta ira ta Teaching Toolbox tam. Makoffun danaw nga rimienta tapenu . . .

• mapegafuanan i paguvovug,

• mapadakal i interes,

• moffunan i totolay nga mangammu paga ta Biblia,

• ituddu i kinakurug ta Bible study ira, anna

• imbitan i interesadu ira nga bisitan i website anna i Kingdom Hall tam.

Siempre, ari makalanno nga basta egga danaw nga rimienta tam. Mawag nga usattam danatun. * Angngariganna, nu kabalin na makarefresko nga pakiyuvovug ta tadday nga interesadu, nangibattakka nisa tu tract onu magazina, awayyana nga metuloy paga i mabbibbig adde sonu maka-uvovug mu mangana yayya. Responsibilidad tam nga mabbalin nga okupadu kanayun ta trabahu nga pangilayyagayya ta Pappatulan.

11. Ngatta nakua i Online Bible Study Lessons?

¹¹ Egga paga i tadday nga angngarigan nu kunnasi uuffunan ni Jehova i totolay nga ammuan i kinakurug. Ikonsidera i Online Bible Study Lessons ta jw.org^®. Ngatta nakua danaw nga leksion? Kada vulan, rinivu nga totolay ta mundo i mas-search ta Internet tu leksion ira ta Biblia. Uffunan na leksion ira ta website tam i totolay ira tapenu mammuadda i kinakurug ta Uvovug na Dios. Awayyana tu magalangan nga mangaksepta ta paggigiammu tu Biblia i karuan nga makibbidam. Nu kunnatun, ipasingammu nisa yaw nga seksion ta website tam onu mangi-send ka nisa tu link na sampol ira nga leksion. *

12. Anni i magigiammu na tadday nga tolay ta Online Bible Study Lessons?

¹² Danaw ira i topiko ta Online Bible Study Lessons tam: “The Bible and Its Author,” “The Bible’s Main Characters,” anna “The Bible’s Message of Hope.” Ituddu naw ira nga topiko nu:

• Kunnasi uffunan na Biblia i tadday nga tolay

• Sinni si Jehova, si Jesus, anna i anghel ira

• Ngatta pinaratu na Dios i totolay

• Ngatta egga i ziga-riga anna kinamarake

Ivuru-vura paga na leksion ira nu kunnasi nga si Jehova . . .

• pangultimuanna i pazziga-riga anna patay,

• paginnolayanna i natay, anna

• taliananna i ari efektibo nga gobiernu na totolay tu Pappatulan na Dios.

13. Talianan kari na online lessons i unnug na pangikondukta tu Bible study? Ipakanawag.

¹³ Ari nga talianan na online lessons i unnug nga pangikondukta tu Bible study. Niddan ittam ni Jesus tu pribilehio nga mangngua tu disipulos. Iddanamattam nga purueban nakuan na interesadu ira i online lessons, magustuadda i magigiammuda, anna kayàda paga i matudduan. Nu kunnatun, awayyana nga akseptadda noka i paggigiammu tu Biblia. Ta ultimu na kada leksion, mepagaram ta maggigiammu nga mangipasa tu request tapenu egga i personal nga manuddu nisa tu Biblia. Gukaban na website tam, egga i average nga 230 nga request ta paggigiammu ta Biblia kadaggaw ta interu mundo! Talaga kawagan yatun nga personal nga pakipaggigiammu!

14. Segun ta instruksion ni Jesus nga nerekord ta Mateo 28:19, 20, anni nakuan i mawag nga kuattam, anna ngatta?

¹⁴ Bibbigan i Mateo 28:19, 20. Durante nga ikondukta tam i paggigiammu tu Biblia,  kuattam i adde na mawayya tam nga ‘pabbalinan ira tu disipulo anna tudduan ira nga parulattan ngamin i bili-bilin ni Jesus.’ Mawag tu uffunattam i totolay nga masingadda i importansia na pappili kani Jehova anna passuporta ta Pappatulanna. Kayàna kagian nga pagarammattam ira nga iyaplikada i magigiammuda, idedikada i inangoda kani Jehova, anna mappabawtiso. Yatun laman i makepaliag nira ta aggaw ni Jehova.​—1 Ped. 3:21.

15. Awan ngana tu tiempo tam para ta anni, anna ngatta?

¹⁵ Kagitta na nakagi ta gafu, baddi ngana laman i tiempo nige nga manuppal yaw nga sistema na ganna-gannug. Megafu taw, awan ngana tu tiempo tam nga itulu-tuloy nga tudduan danuri awan tu papprogresoda anna awan tu pakkaragada nga mabbalin tu disipulos ni Cristo. (1 Cor. 9:26) Ari tu metalattan i trabahu tam! Aru paga nga totolay i ari makannammu ta mensahe na Pappatulan nige nga mofutan tu tiempo.

16. Segun ta Nepakannammu 18:2, 4, 5, 8, anni i mawag nga kuattam? (Innan gapa i footnote.)

¹⁶ Bibbigan i Nepakannammu 18:2, 4, 5, 8. Kagian naw nga teksto ira nu anni i ekspektan ni Jehova nga kuan na maddayarayaw nisa. Mawag tu siguraduan na ngamin nga kurug nga Cristiano nga ari ira makilelavu ta Madumu-rumug nga Babilonia. Nige nga nagigiammu na tadday nga Bible study i kinakurug, posible nga miembro yayya na tadday nga falsu nga relihion. Awayyana nga nagatende anna nakipartisipa yayya ta aktibidadda, onu nangiyawa yayya tu donasion para ta organisasiodda. Nigena maapruban nga mabbalin tu unbaptized publisher, mawag tu siguraduanna nga ari ngana yayya parte natun nga falsu nga relihion. Mawag tu mattura yayya ta dati nga relihionna onu ta maski anni nga organisasion nga konektadu ta Madumu-rumug nga Babilonia nga mappalsa ngana yayya nga miembro natun. *

17. Anni nga klase na trabahu i mawag nga lillitan na tadday nga Cristiano, anna ngatta?

¹⁷ Mawag nga siguraduan na kurug nga Cristiano nga i pagaleganna ay awan tu koneksionna ta Madumu-rumug nga Babilonia. (2 Cor. 6:14-17) Angngariganna, ari nakuan yayya empleyadu na simbahan. Kunnari gapa, maski nu egga i proyekto na kumpania nga pattrabahuanna ta tadday nga fasilidad nga konektadu ta falsu nga paddayaw, ari nakuan nga aru nga trabahu i kuan tatun na tadday  nga Cristiano. Anna nu egga i sarilina nga negosio, magga arianna nga makikontrata ta maski anni nga trabahu nga parte na Madumu-rumug nga Babilonia. Ngatta ta mawag tu determinadu tam taw? Megafu ta ariattam ikaya nga makiparte ta falsu nga tuttuddu anna marake nga annangngua na relihioso ira nga organisasion nga maritta ta paningan na Dios.​—Isa. 52:11. *

18. Kunnasi nga nitaddaggan na tadday nga brother i prinsipio ira na Biblia meyannung ta pagaleganna?

¹⁸ Piga ragun ngana i nappasa, nikiddaw na kontraktor ta tadday nga elder nga makkarpinteru ta tadday nga simbahan ta ili nu sitaw maddian i brother. Ammu natun nga kontraktor nga kanayun nga mammanaki i brother nga mattrabahu ta simbahan ira. Ngem tatun nga tiempo desperadu i kontraktor nga makaleg tu mangngua tatun nga trabahu. Maski kunnari paga, nitaddaggan na brother i prinsipio ira na Biblia anna nanakitanna i trabahu. Ta tumunug nga ligguan, nepasingan ta lokal nga diariu i letratu na karpinteru nga nangikabit tu krus ta simbahan. Nu nikompromiso na brother i taddagna, awayyana tu letratuna i egga ta diariu. Nonopan nu kunnasi nga nakadaral nakuan yatun ta reputasion na kapangngurugna ira! Imajinammu gapa nu anni nakuan i natageno ni Jehova.

19-20. (a) Anni ngana i nagigiammu tam? (b) Anni paga i mawag nga gigiammuattam?

¹⁹ Kagian na Biblia nga i tumunug nga importante nga profesiya nga aranni ngana nga mesimmu ay i pangiproklama na lider ira na mundo tu “imammo anna seguridad.” Megafu ta panuddu ni Jehova ta nittam, ammu tam tu ari merattal na lider ira na mundo i kurug anna manayun nga imammo. Anni gafu i kuattam nige nga mesimmu yatun kunne na gapa nu duttal ngana i gavva nga kadaral? Ekspektan ni Jehova nga mabbalittam nga okupadu ta pangilayyagayya ta mensahe na Pappatulan anna mappursigi ta pangngua tu mas aru nga disipulos. Kunnari gapa, mawag nga nesina ittam ta falsu nga relihion. Kayàna kagian nga mawag tu iyemmattam i makimiembro anna ibita i pagalegan nga konektadu ta Madumu-rumug nga Babilonia.

²⁰ Egga paga i tanakuan ira nga mesimmu ta ultimu na “pangurianan ira nga aggaw.” Egga gapa ira i tanakuan nga gannug nga ekspektan ni Jehova nga kuattam. Anni danaw, anna kunnasi tam iprepara i baggi tam ta ngamin nga aranni ngana nga mesimmu ta mappange? Mammuattam yatun ta tumunug nga artikulo.