OOBSERBAN na weather forecaster i mabubbuu nga letratu ta radar. Masinganna i masikan nga bagiu nga mappange ta lugar nu sitaw aru i populasionna. Megafu ta ikavurunganna i seguridad na totolay, kingnguana i ngamin nga mawayyana tapenu abisowan ira durante nga egga paga oras.

Kunnatun gapa, abisowan ni Jehova i totolay nga magalerto ta mappapange nga “bagiu” nga mas delikadu paga ta maski anni nga maginnada ta tadday nga weather report. Kunnasina kukukuan yatun? Anna ngatta makasiguradu tam nga iddiddanna tu makalanno nga tiempo i totolay tapenu magguyu? Para ta tabbag ira, ikonsidera tam mabbi nu kunnasi nga nangiyawa si Jehova tu abiso onu pamappalan ta nappasa nga tiempo.

Ta tiempo na Biblia, nangabiso si Jehova tu madduruma ira nga “bagiu” onu pamanunnu ira nga irattalna turi ira ta sadya nga ari tumuttul ta bili-bilinna. (Prov. 10:25; Jer. 30:23) Ta kada situasion, kagiananna labbi i totolay nga mafektan anna tudduanna ira nu anni i mawag nga kuadda tapenu tuttuladda yayya. (2 Pat. 17:12-15; Neh. 9:29, 30) Tapenu moffunanna i totolay nga mangngua tu mepangngo nga panguloli, usanna i matalo ira nga aripanna tapenu iyanunsio i pamanunnuna anna tapenu uffunan i totolay nga magguyu insigida.​—Amos 3:7.

Tadday si Noe tatun nga matalo nga aripan. Ta aru nga dagun, magutu nga inabisowanna i imoral anna vayolente nga totolay ta kaggawanna meyannung ta mappapange nga tangapamundowan nga Delubio. (Gen. 6:9-13, 17) Kinagina gapa nira nu anni i mawag nga kuadda tapenu mepaliag ira ta delubio. Fermi i talikarag ni Noe nga nallayyagayya yatutta nagalan yayya nga “minangngilayyagayya tu kinatunung.”​—2 Ped. 2:5, NW.

Maski nu kingngua ni Noe i ngamin nga mawayyana, ari nagginna i totolay ira nige na Delubio ta mensahe nga naggafu ta Dios. Nipasingadda nga awan tu kinamataloda. Bilang resultana, natay ira turi ta zimittal i Delubio gafu ta “nalaggabban ira ngamin.” (Mat. 24:39; Heb. 11:7) Durante nga umara-aranni i kadaralda, ariadda vuluvuga makagi nga nakkurang i Dios ta pangabiso nira.

Nu mittan, baddi i tiempo nga iyawa ni Jehova nige nga mamegafu i “bagiu” na pamanunnuna. Maski kunnari paga, siguraduanna nga makalanno i tiempo nga magguyu danuri mafektan. Angngariganna, nangiyawa labbi yayya tu abiso mekunnay ta Mafulu nga Kastigo nga nesimmu ta Ehipto. Bilang angngarigan, nidob ni Jehova si Moises anni Aaron tapenu abisowan si Faraon anna i aripanna ira meyannung ta mekapitu nga ziga-riga, i makadaral nga pabbagiu tu allalagu. Megafu ta duttal ta tumunug paga nga aggaw i allalagu, nangiyawa kari i Dios tu makalanno nga tiempo tapenu makaleg ira tu attaguan anna matammangngadda i pabbagiu? Kagian na Biblia: “Egga ira i aripan ni Faraon nga naganassing ta kinagi ni Jehova yari tu insigida nga pinatalludda ta babaleda i aripadda ira anna nilirumda i aya-ayamda, ngem ari nga kinurug na tanakuan i kinagi ni Jehova anna pinagurayadda ta tana-tana i aripadda anna i aya-ayamda.” (Ex. 9:18-21) Manawag nga aru nga abiso i niyawa ni Jehova, tapenu danuri insigida magguyu ay mepaliag ta marake nga efekto na kastigo.

Naabisowan gapa si Faraon anna i aripanna ira meyannung ta mekamafulu nga kastigo. Ngem matagga i uluda anna ariadda gininna yatun. (Ex. 4:22, 23) Bilang resultana, nasingadda i ipapatay na kaka nga ánada nga lallaki. Kaddaraddam yatun! (Ex. 11:4-10; 12:29) Egga paga kari i tiempoda nga magguyu turi ta naabisowan ira? Wan! Insigida inabisowan ni Moises i Israelita ira ta mappange nga mekamafulu nga kastigo anna sinudduanna ira nu kunnasi mapaliag i familiada. (Ex. 12:21-28) Piga nga totolay i nagginna ta instruksion  ni Moises? Segun ta pattantia, egga tallu million nga totolay, nelagum i Israelita ira kunne na gapa “i dakal nga grupo” na ari nga Israelita anna na Ehipsio ira nga nanaw ta Ehipto i nepaliag ta pamanunnu na Dios.​—Ex. 12:38; ftn.

Ipasingan naw ira nga ehemplo nga kanayun nga mangiyawa si Jehova tu makalanno nga oportunidad ta totolay tapenu magginna ta abisona. (Deut. 32:4) Anni i motibo na Dios ta pangnguana tatun? Nivuru-vura ni apostol Pedro nga si Jehova “arian na nga ikaya tu egga i madaral, ngem ikaya na tu pallikuran na ngamin nga totolay i katagaruliad-da.” (2 Ped. 3:9) Wan, ikavurungan na Dios i totolay ira. Ikayana tu mabbabawi ira anna mangngua ira tu panguloli nige na paddattal na pamanunnuna.​—Isa. 48:17, 18; Roma 2:4.

Ta maddaggun gapa, mawag tu magginna i ngamin nga totolay ta importante nga abiso nga meyayyadde ta interu mundo. Ta kegga paga ni Jesus ta davvun, niyabisona nga madaral ta “dakal nga ziga” i maddaggun nga sistema na ganna-gannug. (Mat. 24:21, NW ) Meyannung tatun nga mappange nga pamanunnu, nangiyawa yayya ta disipulosna tu detalyadu nga profesiya nga dineskribana i ekspektadda nga masingan anna maekspiriensada ta mappange nga tiempo. Dineskriba ni Jesus i mesimmu ira ta interu mundo nga masingi-singattam ta kaggawattam.​—Mat. 24:3-12; Luc. 21:10-13.

Metonos tatun nga profesiya, ikikkiddaw ni Jehova nga makimoray i ngamin ta meddu nga pammagurena. Kayàna nga mapeggan i minakkimoray nga totolay tu magayayya nga pattolay ta maddaggun kunne na gapa i bendision ta mappange ta matunung nga napabagu nga mundona. (2 Ped. 3:13) Ikaya ni Jehova nga mattalo i totolay ta promesana. Uffunanna ira gukaban na pangiyawana ta mensahe nga makepaliag ta inangoda. Yaw i “Mapia nga Dumug na Pammaguray na Dios,” nga neprofesiya ni Jesus nga ‘melayya-gayya noka ta tanga-ravvunan tapenu kannammuan na ngamin nga sinolay.’ (Mat. 24:14) Inorganisa na Dios i kurug ira nga maddayarayaw nisa tapenu ‘ipakannammu,’ onu ilayyagayya i mensahena ta 240 nga nasa-nasion ngana ta maddaggun. Ikaya ni Jehova nga aru nga totolay i magginna ta abisona adde ta posible tapenu mepaliag ira ta mappange nga “bagiu” na matunung nga pamanunnuna.​—Zef. 1:14, 15; 2:2, 3.

Ari ngana gafu importante nga ipakkiavu nu mangiyawa si Jehova tu makalanno nga tiempo tapenu magginna i totolay ta abisona. Napakurug ngana na ebidensia nga kanayunna kukukuan yatun. I importante gafu nga pakkiavu ay: Magginna kari i totolay ta abiso na Dios durante nga egga paga i tiempo? Paray nakuan tu itulu-tuloy tam bilang mensahero na Dios nga uffunan i mas aru nga totolay adde ta posible tapenu mepaliag ira ta kadaral naw nga sistema na ganna-gannug.