1. Kunnasi nga napasikan i aripan ira na Dios ta ollu nga tiempo?

 MARUDDU nga ideskriba na Uvovug na Dios i matalo ira nga totolay bilang masikan. Ngem ari gapa tu kanayun ngana laman nga natageno da tu masikan ira. Angngarigan na, egga ira i tiempo nga natageno ni Patul David tu ‘megitta yayya ta vukig nga ari maguyu.’ Ngem egga gapa ira i tiempo nga ‘nepallo i assing na.’ (Sal. 30:7) Maski gapa nu masiki-sikan si Samson turi ta inuffunan yayya na espiritu na Dios, ammu na nga nu awan yatun nga sikan maggafu ta Dios, ‘makkafi yayya anna mabbalin tu kagitta na ordinariu nga tolay.’ (Uk. 14:5, 6; 16:17) Nabbalin laman tu masikan danatun nga matalo nga totolay megafu ta pinasikan ira ni Jehova.

2. Kunnasi nga nassikan si apostol Pablo kada makkafi yayya? (2 Corinto 12:9, 10)

² Ammu gapa ni apostol Pablo nga kawagan na i sikan nga maggafu kani Jehova. (Bibbigan i 2 Corinto 12:9, 10.) Kagitta na aru ta nittam, egga gapa ira i problema ta gawa-gawayyan ni Pablo. (Gal. 4:13, 14) Narigatan gapa yayya nga kuan i fustu nu mittan. (Roma 7:18, 19) Egga gapa ira i tiempo nga navvuru-vurung yayya anna naganassing ta posible ira nga mesimmu ta nisa. (2 Cor. 1:8, 9) Ngem kada matageno ni Pablo nga nakkafi yayya, nabbalin yayya tu masikan. Kunnasi? Niyawa ni Jehova kani Pablo i sikan nga kawagan na tapenu maattamman na i ziga-riga na.

3. Anni ira nga pakkiavu i tabbagattam taw nga artikulo?

³ Nipromesa ni Jehova nga pasikannan na ittam gapa. (1 Ped. 5:10) Ngem kattam nga ekspektan nga malawa tam yatun nga sikan maski awan vuluvuga tu pangikaguman nga kuattam. Tapenu meyilustra, mawag i makina tapenu magandar i tadday nga takay. Ngem mawag tu ibatay na driver i seliniador tapenu umabante yatun nga takay. Sigga-paran gapa si Jehova nga iddan ittam tu sikan nga kawagattam. Ngem mawag tu egga ira i pangikaguman nga kuattam tapenu mala yatun.  Anni kari i niyawa ni Jehova tapenu massikan ittam? Anni gapa i mawag tu kuattam tapenu malawa yatun nga sikan? Mammuattam danatun nu ikonsidera tam nu kunnasi nga pinasikan ni Jehova i tallu nga karakter ta Biblia—si profeta Jonas, si Maria nga yena ni Jesus, anna si apostol Pablo. Ammuattam gapa nu kunnasi nga pasa-pasikannan ni Jehova i aripan na ira sangawe.

4. Kunnasi tam nga malawa i sikan maggafu kani Jehova?

⁴ I tadday nga makua tam tapenu malawa i sikan maggafu kani Jehova ay gukaban na pakimallo ta nisa. Nu makimallo ittam, iyawa ni Jehova ta nittam i “ari nga maguku-gukug nga pakapangngua.” (2 Cor. 4:7) Mapasikan ittam gapa nu bibbigattam i Biblia anna pannonopan tu mapia yatun. (Sal. 86:11) I mensahe ni Jehova ta nittam ta Biblia ay “makapangngua.” (Heb. 4:12) Nu makimallo ka kani Jehova anna bibbigammu i Uvovug na, malawa mu i sikan nga kawagammu tapenu makapagattam ka, kanayukka lagapa nga magayayya, onu metuppal mu i mariga nga annungan. Ammuattam nu kunnasi nga pinasikan ni Jehova si profeta Jonas.

5. Ngatta nagawag si profeta Jonas tu sikan?

⁵ Nagawag si profeta Jonas tu sikan. Sinammangngan na i tadday nga mariga nga annungan nga nipakua ta nisa ni Jehova. Gafu tatun, maggi natay yayya anna i kaparehu na ira nga pasaheru ta barku megafu ta masikan nga bagiu. Turi ta nitabbo da yayya ta bebay, sinillung yayya na daka-dakal nga manango anna kitazzibbo ta unag na san natun. Anni tamma i natageno ni Jonas? Ta ollu, awayya na tu nanono na nga tatun ngana yayya nga matay. Baka nanono na gapa nga pinagurayan ngana yayya ni Jehova. Magga fermi i vurung ni Jonas.

6. Base ta Jonas 2:1, 2, 7, anni i namasikan kani Jonas turi ta kegga na ta san na manango?

⁶ Anni i kingngua ni Jonas tapenu malawa na i sikan tagga ta egga yayya ta unag na san na dakal nga manango? Nakimallo yayya kani Jehova. (Bibbigan i Jonas 2:1, 2, 7.) Maski nu ari nga nattuppal si Jonas kani Jehova, nabbabawi yayya anna mangurug yayya tu ginnan ni Jehova i pakimallo na. Pinannonopan gapa tu mapia ni Jonas i Katurakan. Ngatta makagi tam yatun? Ta pakimallo na gare nga mabibbig ta Jonas kapitulo 2, aru i uvovug tatun nga kaparehu balaman na uvovug ira nga mabibbig ta libru na Salmo. (Angngarigan na, ikumpara i Jonas 2:2, 5 ta Salmo 69:1; 86:7.) Manawag nga kabisadu ni Jonas danatun nga teksto. Megafu gapa ta pinannonopan na danatun turi ta kitazziga i situasion na, napasikan yayya nga duffunan yayya ni Jehova. Turi kua, netoli gabbalaman si Jonas ta mamaga nga davvun, anna sigga-paran ngana nga inalawa anna sinuppal na i nipakua ni Jehova ta nisa.​—Jon. 2:10–3:4.

7-8. Kunnasi nga nakalawa tu sikan i tadday nga brother nga taga-Taiwan turi ta egga i problema na ira?

⁷ Makoffun ta nittam i ehemplo ni Jonas nu egga ira i pappasa-pasattam nga madduruma tu problema. Angngarigan na, marigi-rigatan si Brother Zhiming b nga taga-Taiwan gafu ta egga ira i grabe tu taki na. Fuera tatun, nepallo gapa i pangontra ta nisa na kafamilia na gafu ta pangurug na kani Jehova. Ngem pasa-pasikannan yayya ni Jehova gukaban na pakimallo anna paggigiammu. “Nu egga ira i problema,” aminan na, “fermi i vuru-vurukku, yayya nga ari ngà nga makaparrelaks tapenu makapap-personal study.” Ngem mappaduffun yayya  kani Jehova. Kagian na: “Makimallo ngà labbi kani Jehova, tapus ma-earphones ngà ngana anna magginna tu Kingdom song ira. Nu mittan gapa, kakkansionakku danatun tu makafi adde ta marelaks ngà ngana. Tapus pegafanakku ngana i maggigiammu.”

⁸ Napasikan si Zhiming nga attamman i mariga ira nga situasion gafu ta nagigiammu na ira ta pap-personal study na. Angngarigan na, turi ta nabalin i major nga operasion na, kinagi na nurse ta nisa nga megafu ta alalinno i bilang na red blood cell na, mawag na i mappasalin tu daga. Ngem ta gabi nige natun nga operasion ni Zhiming, egga i nabibbig na meyannung ta tadday nga sister nga naopera kagitta na. Mas fermi i pinakkazza na red blood cell natun nga sister anne ta nisa. Ngem ari nga nappasalin tu daga yatun nga sister anna nammapia lagapa. Gafu tatun nga ekspiriensa, napasikan si Zhiming nga ari makkompromiso.

9. Anni i awayyam nga makua nu nakkafi ka megafu ta kapurueba? (Innan gapa i letratu ira.)

⁹ Nu problemadu ka, matageno mu kari nga marigatakka nga makimallo kani Jehova gafu ta sobra i avvuru-vurummu? Onu matageno mu kari tu ari ka ngana nga makagigiammu gafu ta nababbannag ka ngana? Daddamman nga makomprendi ni Jehova i situasiommu. Yayya nga maski nu ababba laman i pakimallo mu, makasiguradu ka nga iyawa na ta niko i eksakto nga kawagammu. (Efe. 3:20) Nu marigatakka nga mabbibbig anna maggigiammu megafu ta mataki onu nabannag ka onu sobra i vuru-vurummu, awayyam i magginna tu audio recording na Biblia onu na nebase-Biblia ira nga publikasiottam. Awayyam gapa magginna tu kansiottam ira onu maggiraw tu video ta jw.org. Nu makimallo ittam kani Jehova anna alegattam i tabbag na pakimallo tam ira ta espiritual ira nga probision nga niyawa na, pagurayattam yayya nga pasikannan ittam.

10. Kunnasi ittam nga mapasikan na kapangngurug tam ira?

¹⁰ Awayya nga usan ni Jehova i kapangngurug tam ira tapenu pasikannan ittam. “Kuruga dakal i meyuffud-da” ta nittam nu egga i kapurueba tam onu nu marigatan ittam ta annungattam. (Col. 4:10, 11) Mas ngana nga  kawagattam i kokkofun ta “tiempo na ziga.” (Prov. 17:17) Nu makkafi ittam, awayya ittam nga uffunan na kapangngurug tam ira ta pisikal, emosional, anna espiritual. Ikonsidera tam nu kunnasi nga napasikan na tanakuan si Maria nga yena ni Jesus.

11. Ngatta mawag ni Maria i sikan?

¹¹ Nagawag si Maria tu sikan. Nonopan nu kunnasi yayya nga kaproblemadu tagga ta nakalawa yayya tu madammo nga annungan maggafu kani anghel Gabriel. Ari paga yayya nga nekasal, ngem mavvussi yayya. Awan gapa tu ekspiriensa na nga mamadakal tu sarili na nga ana, ngem mepatangngal ta nisa i abbing nga mabbalin saw tu Mesias. Ari gapa yayya nakibbiko ta maski sinni nga lalaki. Kunnasi na gafu saw nga iyesplika ngamin yatun ta nobio na nga si Jose?—Luc. 1:26-33.

12. Base ta Lucas 1:39-45, kunnasi nga nalawa ni Maria i sikan nga kawagan na?

¹² Kunnasi nga nalawa ni Maria i sikan nga kawagan na tapenu ituppal i nerumu-ruma anna madammo nga annungan na? Nappaduffun yayya ta tanakuan. Angngarigan na, niyavu na kani Gabriel i karuan paga nga detalye meyannung ta annungan na. (Luc. 1:34) Ari nabbayag kabalin natun, ararayyu i biniahe na mappange ta “kabakulugan” na Judea tapenu bisitan i parientes na nga si Elizabet. Makasta i nattuppalan natun nga pabbisita na. Kinomendan ni Elizabet si Maria anna inusa yayya ni Jehova tapenu ikagi i tadday nga makapagaram nga profesiya meyannung ta abbing nga agga-vussi ni Maria. (Bibbigan i Lucas 1:39-45.) Kinagi ni Maria nga si Jehova ay “nipasingan na i sikan na pakawayya na.” (Luc. 1:46-51) Gukaban gafu ni Gabriel anna ni Elizabet, pinasikan ni Jehova si Maria.

13. Anni i nesimmu turi ta nappaduffun i tadday nga sister ta kapangngurug na ira?

¹³ Mapasikan naka gapa na kapangngurug mu ira kagitta ni Maria. Nagawag tu kunnatun nga sikan si Sister Dasuri nga taga-Bolivia. Nahospital i yama na turi ta nadiskubre na doktor ira tu egga i taki na nga awan ngana tu uru na. Kakayà ni Dasuri nga kuan i adde na mawayya na tapenu tangngallan i yama na. (1 Tim. 5:4) Ngem ari tu kanayun nga mabi yatun. Aminan na, “Namippiga nga natageno ku nga kakku ngana nga makaya.” Nappaduffun kari yayya? Ta ollu na bi, ari. “Manaki ku nga madammakkan i wawwaragi ta nio,” kunna. “Kukku ta nono ku, ‘si Jehova i mangiyawa ta uffun nga kawagakku.’ Ngem nanono ku balaman nga nu isisinà i baggì ta tanakuan, puru-puruebakku nga magitadday nga solban i problemà ira.” (Prov. 18:1) Yayya nga nadesision ni Dasuri nga mattura ta karuan nga kokkofun na anna nikagi na ta nira i situasion na. Istorian na, “Ari nga makalanno i uvovug ira tapenu mekagì nu kunnasi nà nga napasikan na iddeddukakku ira nga kapangngurug ku.” Kunna paga: “Nangiyangay ira tu makan ta hospital anna nangipabibbig ira ta nio tu makapabannay ira nga teksto na Biblia. Anni mabba kasta na nga mammuan nga ari ittam nga magitadday. Parte ittam ngamin na dakal nga familia ni Jehova. Kayà na wawwaragi nga manguffun, makipattangi, anna pagaramman ittam nga ari magimmang nga masserbi kani Jehova.”

14. Ngatta alawatattam nakuan i panguffun na elder ira?

¹⁴ Usu-usan ni Jehova i elder ira tapenu pasikannan ittam. Mebilang ira tu regalu nga usu-usan na tapenu pasikannan anna banna-bannayan ittam. (Isa. 32:1, 2) Yayya nga nu egga i problemam, istoriammu yatun ta elder ira. Ari ka nakuan nga magalangan nga alawatan i uffun nga iyawa da ta niko. I elder ira i usu-usan ni Jehova tapenu mapasikan naka.

15. Anni nga iddanama i nabala-balor ta nittam ngamin nga Cristiano?

¹⁵ Mapasikan ittam na iddanama tam nga nebase ta Biblia. (Roma 4:3, 18-20) Bilang Cristiano, nabala-balor i iddanama tam nga mattolay noka tu mannanayun ta makakkasta nga paraiso ta davvun onu ta Pappatulan ta langi. Mapasikan ittam na iddanama tam nga attamman i kapurueba ira, ilayyagayya i mapia nga dumug, anna ituppal i madduruma nga annungan ta kongregasion. (1 Tes. 1:3) Yatun gabbalaman nga iddanama i namasikan kani apostol Pablo.

16. Ngatta nagawag tu sikan si apostol Pablo?

¹⁶ Nagawag si Pablo tu sikan. Ta tura na ta taga-Corinto ira, nikumpara na i baggi na ta tadday nga banga nga napadday ta pila anna mabi laman nga mabakka. Inarubang na i “gulu-gulu,” ‘egga nisa i padduda,’ ‘nadara-darum yayya,’ anna ‘grabe i naka-nakua’ nisa. (2 Cor. 4:8-10) Nitura ni Pablo danatun turi ta mekatallu nga pabbiahe na bilang misionero. Ngem tatun nga tiempo, ari na nga ammu nga egga paga balo i mas mariga ira nga pappasan na. Meparubang yayya ta pamubbug na totolay, kaaresto, kadaral na barku, anna kefuku.

17. Base ta 2 Corinto 4:16-18, anni i namasikan kani Pablo nga attamman i ziga na ira?

¹⁷ Napasikan si Pablo nga magattam megafu ta agga-nono na i iddanama na. (Bibbigan i 2 Corinto 4:16-18.) Kinagi na ta taga-Corinto ira nga maski nu “manisinu nga makkafi” i neravvunan nga baggi na, ari na nga ipamavulun nga pakkafian natun i nono na. Agga-nono ni Pablo i mappange na. I iddanama na nga mattolay noka tu mannanayun ta langi ay ‘mas dakal nga dayaw nga awan tu kagitta na.’ Megafu tatun, sigga-paran yayya nga attamman i maski anni nga ziga tapenu laman mala yatun nga bala-balo. Pinannonopan tu mapia ni Pablo yatun nga iddanama anna megafu tatun, natageno na nga ‘kagaggaw nga natalibagu yayya.’

18. Kunnasi nga napasikan si Tihomir anna i familia na ta iddanama da?

¹⁸ Napasikan si Brother Tihomir nga taga-Bulgaria megafu ta iddanama na. Piga dagun  ngana i nappasa, natay ta aksidente i wagi na nga si Zdravko. Nepallo i daddam ni Tihomir megafu tatun. Ngem tapenu mabanna-bannayan yayya kunne na gapa i atawa na anna i ana da, inimajidda nu anni saw i mesimmu ta paginnolay. Istorian na, “Angngarigan na, paggiristoriammi nu sitaw mi saw nga dafungan si Zdravko, nu anni saw i ipakammi sa, nu sinni saw ira i imbitammi ta ollu nga gathering sonu maginnolay ngana yayya, anna nu anni ira i istoriammi nisa meyannung ta pangurianan ira nga aggaw.” Kagian ni Tihomir nga napasikan ira na pannono da ta iddanama da tapenu tulu-tuloy nga magattam anna maginnag ta tiempo sonu paginnolayan ni Jehova i wagi na.

19. Anni i kuammu tapenu mas magiddanama ka? (Innan gapa i letratu.)

¹⁹ Anni i kuammu tapenu mas magiddanama ka? Nu i iddanamam ay mattolay tu mannanayun ta davvun, bibbigammu i deskripsion na Biblia ta Paraiso anna pannonopammu tu mapia yatun. (Isa. 25:8; 32:16-18) Pannonopammu nu kunnasi saw i pattolay sonu napabagu nga mundo. Imajinammu nga egga ka tari. Sinni ira i masingammu? Anni ira i maginnam? Anni i matageno mu? Tapenu gapa mas maimajimmu yatun, innammu i picture ira na Paraiso ta publikasiottam ira, onu maggiraw ka tu music video ira, gitta na Sonu Paraiso, Araranni Ngana, onu Pag-asa na Hinihintay. Nu kanayuttam nga nonopan i iddanama tam ta napabagu nga mundo, mabbalin tu “alappaw anna manganannuan laman” i problema tam ira. (2 Cor. 4:17) Pasa-pasikannan naka gafu ni Jehova gukaban na iddanama nga niyawa na ta niko.

20. Maski paga nu matageno tam nga makafi ittam, kunnasi ittam nga mapasikan?

²⁰ Maski paga nu matageno tam nga makafi ittam, daddammattam nakuan nga “i Dios i kavulu tam.” (Sal. 108:13) Dati ngana nga niyawa ni Jehova i mawag mu tapenu malawa mu i sikan nga maggafu ta nisa. Nu mawag mu gafu i uffun tapenu makuam i annungammu, tapenu maattammammu i problemam, onu tapenu magayayya ka lagapa kanayun, makimemallo ka kani Jehova anna mappegiya ka ta nisa gukaban na pap-personal studym. Alawatammu i pamagaram na kapangngurug mu ira. Kanayummu nakuan gapa nga nonopan i iddanamam. Nu kunnatun i kuammu, ‘mapasikan i nono mu gafu ta dakal nga pakapangngua na Dios tapenu mapasensiam nga attamman ngamin i mesissimmu nikaw.’—Col. 1:11.