1. Kunnasi nga nattalupaddian nga matalo kani Jehova i tallu nga Saksi nga nadeskriba taw nga parapo?

IMAJINAN i tumunug nga tallu nga eksena nga nelagum i Saksi ira ni Jehova. (1) Egga ta eskuela i tadday nga abbing nga babay tagga ta nikiddaw na mestra nga makipartisipa i ngamin nga estudiante ta tadday nga fiesta ofisial. Ammu na abbing nga manaki na Dios yaw nga okasion, yayya nga marespeto nga nanakitanna i makipartisipa. (2) Mallayyagayya i tadday nga minappasirang nga abbing nga lalaki. Nanonona nga egga kaeskuelana nga maddian ta tumunug nga balay nga manguyu-uyaw ta Saksi ira ni Jehova tagga. Ngem naggutu lagapa i abbing nga nattotto ta balay. (3) Mallallappo i tadday nga yama tapenu mapakan i familiana, ngem mittan, nikiddaw na amona nga maddarogas yayya onu mangngua tu ilegal. Maski nu puede nga mawawanna i trabahuna, niyesplika na yama nga mawag tu mabbalin yayya nga mapammakatalakkan anna tuttulan i dob megafu ta ikikkiddaw yatun na Dios ta aripanna ira.​—Roma 13:1-4; Heb. 13:18.

2. Anni ira nga pakkiavu i ikonsidera tam, anna ngatta?

² Anni nga kualidad i nasingammu nira nga tallu? Baka aru i manono mu, gitta na kinagutu anna pammakatalakkan. Ngem egga i mananawag nga kualidad nga importante​—i integridad. Kada tadday tatun nga tallu ay nakepasingan tu kinamatalo kani Jehova. Manaki na maski sinni nira nga ikompromiso i estandarte na Dios. I integridad i namaguyu nira. Siguradu nga magayayya si Jehova megafu ta nepasingan na kada tadday nira yatun nga kualidad. Kayà tam gapa nga pagayayyatan i Yama tam ta langi. Yatutta tabbagattam danaw nga tallu nga pakkiavu: Anni i integridad? Ngatta mawag tam i integridad? Kunnasi tam mapasikan i determinasiottam nga pattalupaddianan i integridad ta mariga ira nga tiempo?

3. (a) Kunnasi nga mepasingan na aripan ira na Dios i integridad? (b) Anni ira nga angngarigan i mangipalippawa nittam ta kayà kagian na integridad?

³ Kunnasi nga mepasingan na aripan ira na Dios i integridad? Gukaban na kapeggan tu napafutuan anna maladda nga aya kani Jehova, anna bilang resulta, kanayun nga pangngua ta makapagayayya nisa. Ikonsidera nu kunnasi neyusa i uvovug nga integridad ta Biblia. Yaw i tadday nga simple nga kebalinan na “integridad”: kumpleto, awan tu defektona, onu buu. Angngariganna, nangitavvung i Israelita ira tu aya-ayam kani Jehova, anna nikagi na Dob nga mawag tu awan tu defekto danatun. * (Lev. 22:21, 22) Ari mepamavulun i ili na Dios nga mangitavvung tu ayam nga pilay, awan tu talingana, onu vulag; ni tu mangitavvung ira tu mataki nga ayam. Importante kani Jehova nga yatun nga ayam ay kumpleto, awan tu defektona, onu buu. (Mal. 1:6-9) Ngatta importante kani Jehova i buu onu kumpleto? Angngariganna, manaki tam nu egga ginatattam nga frutas onu libru nga egga daralna, onu gamit nga kurang i partena. Kayà tam nga kumpleto, awan tu defektona, onu buu yatun. Kunnatun gapa i kayà ni Jehova nu meyannung ta aya tam sa, anna i kinamatalo tam. Mawag tu kumpleto, awan tu defektona, onu buu yatun.

4. (a) Ngatta makepasingan tu integridad maski i imperfekto nga tolay? (b) Segun ta Salmo 103:12-14, anni i ekspektan nittam ni Jehova?

⁴ Nonopattam kari nga mawag tu perfekto ittam tapenu mapeggan tu integridad? Siempre ari, megafu ta ammu tam nga imperfekto ittam anna makangngua tu aru nga liwa. Ikonsidera i dua nga rason nu ngatta ariattam nakuan nonopan nga mawag tu perfekto ittam tapenu mapeggan tu integridad. Ollu, ari maffokus si Jehova ta liwi-liwa tam. Kagian na Biblia: “Nu i katagaruliam-mi, AFU, ay nilistam, sinni i makelilli ta panentensiam?” (Sal. 130:3) Ammu ni Jehova nga imperfekto ittam anna minattagaruli, yari tu minammakoma yayya nittam. (Sal. 86:5) Mekadua, ammu ni Jehova i limitasiottam ira, anna arianna ekspektan nga kuattam i mas paga anne ta mawayya tam kuan. (Bibbigan i Salmo 103:12-14.) Kunnasi ittam gafu mabbalin tu kumpleto, awan tu defektona, onu buu ta paninganna?

5. Para ta ili ni Jehova, ngatta aya i sekreto na integridad?

⁵ Para ta ili ni Jehova, i sekreto na integridad ay aya. I aya tam ta Dios anna i matalo nga debosiottam nisa bilang nelangitan nga Yama tam ay mawag tu kanayun nga kumpleto, awan tu defektona, onu buu. Nu mattalupaddian nga kunnatun i aya tam maski nu mapurueban ittam, kayàna kagian nga egga i integridad tam. (1 Cro. 28:9; Mat. 22:37) Ikonsidera tam mangana i tallu nga Saksi nga nakagi ta gafu. Ngatta kunnari i kingnguada? Manaki kari na abbing nga babay nga magenjoy ta eskuela, onu kayà kari na abbing nga lalaki nga mepasiranan ta babalay, onu kayà kari na yama nga mawanan tu trabahu? Siempre ari. Ammuda garay nga egga i matunung ira nga estandarte ni Jehova, anna nakafokus i nonoda ta makapagayayya ta nelangitan nga Yamada. Megafu ta ayatadda yayya, agga-nonoda yayya nigeda nga maddesision. Megafu tatun, napakurugda nga egga i integridadda.

6. (a) Ngatta mawag mu i integridad? (b) Kunnasi nga ari nakepasingan da Adan anni Eva tu integridad?

⁶ Ngatta mawag tam ngamin i integridad? Mawag mu i integridad megafu ta kinuestion ni Satanas si Jehova, anna kuestionan naka gapa. Kingngua natun nga rebelioso nga anghel i baggina nga Satanas, onu “Kumokkontra,” tagga ta hardin na Eden. Zinaralna i makasta nga ngagan  ni Jehova gukaban na pamalawan nga i Dios ay marake, makasarili, anna ari mapattalakkan nga Mammaguray. Kaddaraddam ta pumanig da Adan anni Eva kani Satanas, yayya nga narrebelde ira kontra kani Jehova. (Gen. 3:1-6) Aru i tiansada nga paladdan i ayada kani Jehova megafu ta klase na pattoleda ta Eden. Ngem tagga ta pinurueban ira ni Satanas, nepasingadda nga defektibo i ayada kani Jehova, anna ari tu kumpleto, onu buu yatun. Mawag gafu tu matabbag yaw nga pakkiavu: Egga kari i maski sinni nga tolay nga mattalupaddian nga matalo kani Jehova nga Dios megafu ta ayada nisa? Kayàna kagian, makepasingan kari tu integridad i totolay? Limittuag yatun nga pakkiavu megafu ta nesimmu kani Job.

7. Kagitta na ipasingan na Job 1:8-11, anni i natageno ni Jehova ta integridad ni Job? Anni i natageno ni Satanas ta integridad ni Job?

⁷ Nattolay si Job ta tiempo nguri ta egga ta Ehipto i Israelita ira. Nerumu-ruma i integridadna. Ngem gitta tam, imperfekto yayya. Nakaliwa yayya. Ngem iniddu ni Jehova si Job gafu ta integridadna. Posible nga dati ngana nga uyu-uyawan ni Satanas si Jehova meyannung ta integridad na totolay. Yayya nga nisentro ni Jehova i atension ni Satanas kani Job. Napakurug nga laddug si Satanas megafu ta klase na pattolay natun nga lalaki! Nikiddaw ni Satanas nga pamavulunan yayya ni Jehova nga purueban i integridad ni Job. Mattalo si Jehova ta kofunna nga si Job, yayya nga nipamavulunna si Satanas nga purueban yayya.​—Bibbigan i Job 1:8-11.

8. Kunnasi nga inatake ni Satanas si Job?

⁸ Minattazzi si Satanas, anna minammapatay yayya. Pinuntiriana i pakkukua ni Job, inana ngamin nga egga sa, pinatena i aripanna ira, anna zinaralna i reputasionna. Nigatona i familia ni Job, anna pinatena i mafulu nga meddu  nga ánana. Tapus ziniga-rigana si Job tagga ta pinattakina yayya tu mababbanni nga vutali ta interu baggina mamegafu ta ulu adde ta dapagna. Nakkonsimision i atawa ni Job anna napannuan tu daddam; kinumbinsina si Job nga magimmang ngana nga masserbi ta Dios, ibariawna i Dios tapenu matay ngana yayya. Nikiddaw mismu ni Job nga matay yayya, ngem pinattalupaddianna lagapa i integridadna. Pinurueban mangana ni Satanas i tanakuan nga metodo na pangatake. Nangusa yayya tu tallu nga lalaki nga kakavulu ni Job. Piga aggaw nga binisita danatun nga lallaki si Job, ngem awan tu banna-bannay nga neyawada. Lallagu, marake i kinaga-kagida sa anna krinitikada yayya. Nipaliwada ta Dios i ngamin nga problema ni Job anna kinagida nga awan tu pakialam na Dios ta integridad ni Job. Kudda paga lagu nga marake nga tolay si Job yayya nga mepangngo laman nisa i terible ira nga mesissimmu nisa!​—Job 1:13-22; 2:7-11; 15:4, 5; 22:3-6; 25:4-6.

9. Maski naziga-riga si Job, anni i manakina nga kuan?

⁹ Kunnasi nga inarubang ni Job ngamin danatun nga problema? Ari yayya tu perfekto. Napporay yayya ta falsu ira nga mamanna-bannay, anna nakekagi yayya tu kokkomforme. Nidefensana i mismu nga kinatununna anne ta kinatunung na Dios. (Job 6:3; 13:4, 5; 32:2; 34:5) Ngem maski ta kazigatan ira nga situasionna, manaki lagapa ni Job nga likuran si Jehova nga Dios. Kanna kinurug i laddug ira nga kinagi na falsu nga kokkofun. Kunna: “Ariakku vuluvuga manono nga ideklara takamu nga totolay nga matunung! Adde sonu matay ngà ariakku alsan i integridad ku!” (Job 27:5) Ipasingan danatun nga kinagina nga napattalupaddian ni Job i integridadna, maski anni i mesimmu. Manaki ni Job nga alsan i integridadna; makua tam gapa yatun.

10. Kunnasi ka nga nesali ta isyu nga pinalattuag ni Satanas meyannung kani Job?

¹⁰ Kunnasi ka nga nesali ta isyu nga pinalattuag ni Satanas meyannung kani Job? Gittana palawanan ni Satanas nga ariammu talaga iddukan si Jehova nga Dios, anna magimmakka masserbi nisa tapenu mepaliag mu i baggim, anna falsu i integridad mu! (Job 2:4, 5; Nep. 12:10) Anni i makagim tatun? Talaga matakitakka, ari kari? Ngem nonopan yaw: Dakal i pattalo ni Jehova niko, yayya nga makasta nga tiansa i niyawana niko. Ipamavulunna nga purueban ni Satanas i integridad mu. Makkomfiansa si Jehova nga mapattalupaddiammu i integridad mu anna nipromesana nga uffunan naka nga pakurugan nga laddug si Satanas. (Heb. 13:6) Anni ngana mabba nga pribilehio nga pattalakkan na Soberano ta uniberso! Malippawa mu kari nu ngatta kuruga importante i integridad? Megafu tatun, malabanattam i kinaladdug ira ni Satanas anna medefensa tam i mapia nga ngagan na Yama tam anna masuportattam i ammagurena. Anni i makua tam tapenu mapattalupaddiattam i integridad tam?

11. Anni i magigiammu tam kani Job?

¹¹ Mas nga pinaggrabe ni Satanas i pangatakena taw nga problemadu nga “pangurianan ira nga aggaw.” (2 Tim. 3:1) Taw nga mariga ira nga tiempo, kunnasi tam mas determinadu nga pattalupaddianan i integridad tam? Aru mangana i magigiammu tam kani Job. Nabayag paga nige na kapuruebana ira, namippiga ngana nga nepasingan ni Job i integridadna kani Jehova ta nappasa. Ikonsidera i tallu nga leksion nga mala tam nisa tapenu determinadu ittam nga pattalupaddianan i integridad tam.

12. (a) Segun ta Job 26:7, 8, 14, anni i kingngua ni Job tapenu mappabbaw anna mas ikakua si Jehova? (b) Kunnasi tam gapa makua yatun?

¹² Megafu ta nappabbaw si Job ta ngamin nga kingngua ni Jehova, napaladda ni Job i ayana ta Dios. Aru nga tiempo nga  nappakanonono si Job meyannung ta kappabbaw ira nga pinaratu ni Jehova. (Bibbigan i Job 26:7, 8, 14.) Nappabbaw yayya tagga ta ninonona i davvun, i langi, i kunam ira, anna i arugug, ngem nirekunnisina nga baddi laman i ammuna ta ganna-gannug nga pinaratu ni Jehova. Tinagibalorna gapa i uvovug ira ni Jehova. “Inunnug ku i kinaga-kagina ira,” kunni Job ta pattukoyna ta uvovug ira na Dios. (Job 23:12) Fermi i appabbaw ni Job kani Jehova anna kuruga irespetona yayya. Iddukanna i Yamana anna kayàna nga pagayayyatan yayya. Yatutta mas determinadu si Job nga pattalupaddianan i integridadna. Kuattam gapa nakuan i kingngua ni Job. Mas aru ngana i ammu tam meyannung ta kasta ira na pinaratu anne ta ammu na totolay ta tiempo ni Job. Egga paga nittam i interu nga Biblia tapenu uffunan ittam nga ammuan nu sinni talaga si Jehova. Makoffun nittam i ngamin nga magigiammu tam tapenu mapannuan tu pappabbaw i futu tam. I pappabbaw anna respeto tam gapa kani Jehova i mamaguyu nittam nga ayatan anna tuppalan yayya anna mas karagatan nga pattalupaddianan i integridad tam.​—Job 28:28.

13-14. (a) Segun ta Job 31:1, kunnasi nga napakurug ni Job nga minattuppal yayya? (b) Kunnasi tam matuttul i ehemplona?

¹³ I pattuppal ni Job ta ngamin nga gannug i nakoffun sa nga pattalupaddianan i integridadna. Ammu ni Job nga tapenu makepasingan tu integridad, mawag tu mattuppal yayya. Kakuruganna, kada pattuppal nga kuattam ay mamasikan ta determinasiottam nga pattalupaddianan i integridad tam. Nappursigi si Job nga tuttulan i Dios ta inaggaw nga pattolena. Angngariganna, inimmuguranna i agguyu-guyuna meyannung ta babbay. (Bibbigan i Job 31:1.) Gafu ta sigga-atawan yayya, ammuna nga ari mepangngo nga iddanna tu romantiko nga atension i maski sinni nga babay fuera ta atawana. Ta maddaggun, pannuan ittam na mundo tu imoral nga tentasion. Gitta ni Job, mammanaki ittam kari nga mangiyawa tu ari mepangngo nga atension ta ariattam nga atawa? Panakitattam kari gapa nga innan i bastus  onu i pornograpiko ira nga letratu? (Mat. 5:28) Nu mappursigi ittam nga inaggaw nga kontrolan i baggi tam, mas determinadu ittam nga pattalupaddianan i integridad tam.

¹⁴ Sinuppal gapa ni Job si Jehova nu meyannung ta pagimammana ta material nga gannug. Malippawa ni Job nga nu mattalo yayya ta pakkukuana ira, makakua yayya tu madammo nga liwa anna mawag tu makastigo yayya. (Job 31:24, 25, 28) Mattolay ittam gapa ta sobra i kamaterialistikona nga mundo. Nu balanse i pagimamma tam ta kuartu anna pakkukua, gitta na itabarang nittam na Biblia, mas determinadu ittam nga pattalupaddianan i integridad tam.​—Prov. 30:8, 9; Mat. 6:19-21.

15. (a) Anni nga iddanama i nakoffun kani Job nga pattalupaddianan i integridadna? (b) Ngatta makoffun nittam nga kanayun nga agga-nono i iddanama nga iyawa ni Jehova?

¹⁵ Napattalupaddian ni Job i integridadna gukaban na paffokus ta iddanama nga bala-balattan yayya na Dios. Mangurug yayya nga importante kani Jehova i integridad tam. (Job 31:6) Maski ta problemana ira, komfiansa si Job nga bala-balattan gabbalaman yayya ni Jehova. Siguradu nga nakoffun yaw nga pakkomfiansana tapenu mapattalupaddian i integridadna. Kuruga nagayayya si Jehova ta integridad ni Job yayya nga abundansia nga binala-balakkanna yayya maski nu imperfekto paga yayya! (Job 42:12-17; Sant. 5:11) Mas dakal nga bala-balo i maginnennag kani Job. Masikan kari i pattalo mu nga bala-balattan ni Jehova i integridad mu? Ari nanguli i Dios tam. (Mal. 3:6) Nu daddammattam nga tagibaloranna i integridad tam, kanayun nga matotolay ta futu tam i pagiddanama tam ta makakkasta nga mappange.​—1 Tes. 5:8, 9.

16. Anni nakuan i determinadu nga kuattam?

¹⁶ Determinadu ka gafu nakuan nga pattalupaddianan i integridad mu! Egga ira tiempo nga matageno mu nga awan tu tanakuan nga kagittam nga mangngua tu kunnatun, ngem ari ka magitetadday. Kasali ka ta minillion nga matalo nga pinattalupaddiadda i integridadda ta interu mundo. Mebilakka gapa ta lallaki anna babbay nga nakepasingan tu pangurug anna napattalupaddiadda i integridadda ta nappasa, maski ta peligro na patay. (Heb. 11:36-38; 12:1) Determinadu ittam nakuan gafu ngamin nga mattolay segun ta kinagi ni Job: “Ariakku alsan i kinamatalo ku!” Paray nakuan tu medayaw si Jehova tu mannanayun megafu ta integridad tam!