Nasingadda i Pangaya na Wawwaragi
MADDIAN si Yomara anna i dua nga wagi na nga lalaki nga si Marcelo anna si Hiver ta baddi nga bario ta Guatemala. Nappa-Bible study si Yomara ta Saksi ira anna turi kua, nappa-Bible study ngana gapa i dua nga wagi na. Ngem egga i problema. Vuling ira tallu anna ari da ammu i mabbibbig tu braille yatutta ibibbig na mab-Bible study ta nira i parapo anna i teksto ira ta Biblia na leksion nga gigiammuadda.
Ngem egga paga i problema. Marigatan ira nga magatende ta study. Nu awan tu mamulu ta nira, ari da nga makua i mabbiahe tu 40 nga minuto mappange ta pinaka-aranni nga Kingdom Hall. Yari tu inuffunan ira na wawwaragi ta kongregasion tapenu maka-atende ira ta ngamin nga study. Nu egga gapa i parte da ta midweek nga study, uffunan ira na wawwaragi tapenu ma-memorize da i parte da.
Turi ta Mayo 2019, namegafu ngana nga egga i study ta bario da. Tatun nga tiempo, egga i magatawa nga regular payunir nga nagali ta bario da. Goal da nga tudduan yatun nga mawwaragi nga mabbibbig anna mattura tu braille maski nu ari da mismu nga ammu nu kunnasi da nga kuan yatun. Minay ira ta library tapenu gigiammuan i meyannung ta braille system anna nu kunnasi da nga metuddu i pangusa tatun.
Si Marcelo nga makkomento ta study
Ta pappasa na piga nga vulan, antigu ngana natun nga tallu nga mawwaragi i mabbibbig tu braille. Megafu tatun, mas nga napprogreso ira ta espiritual. a Sangawe, regular payunir ngana da Yomara, Marcelo, anna Hiver. Ministerial nga aripan ngana gapa si Marcelo. Bi-busy ira ta espiritual ira nga aktibidad ta interu ligguan. Megafu ta lallappo da, napagaram gapa i tanakuan nga mallallappo.
Mappappabalo i tallu nga mawwaragi megafu ta meddu nga panguffun na kongregasion. “Namegafu paga turi ta first time mi nga nakilala i Saksi ira, nipasingadda ngana ta nikami i kurug nga aya na Cristiano,” kinagi ni Yomara. Kinagi gapa ni Marcelo: “Egga ira i masippo nga kokkofummi ta kongregasion anna parte kami na interu-mundo nga pawwaragi nga pattaraddayan na aya.” Iddanaman ni Yomara anna na wawwaragi na i tiempo sonu masingadda nga pabbalinan ni Jehova tu paraiso i davvun.—Sal. 37:10, 11; Isa. 35:5.
a Nadisenio i brosiur nga Learn to Read Braille tapenu uffunan i tadday nga vuling onu egga i problema na ta paningan na tapenu magigiammu nu kunnasi i mabbibbig anna mattura ta braille.
Baka Kaya Mu Gapa i
I KEYUSAN NA DONASIOMMU IRA
Tulduk ira nga Dakal i Efekto Na ta Pattolay
Ari tam laman nga mamadday tu braille ira nga publikasion, tuttudduattam gapa i totolay nga mabbibbig tu braille.
