1. Anni i kinagi ni Jesus ta disipulos na meyannung ta tiempo na panuppalan, anna anni i nitabarang na ta nira?

 PIGA nga aggaw nige na patay ni Jesus, niyavu ta nisa na appa nga disipulos na: “Anni i panakkilalan . . . na panuppalan na sistema na ganna-gannug?” (Mat. 24:3, NW ) Posible nga nononopan danatun nga disipulos nu kunnasi da nga mammuan nga aranni ngana i panuppalan na Judio nga sistema na ganna-gannug. Ta tabbag ni Jesus, ari na laman kinagi i meyannung ta panuppalan na Judio nga sistema. Kinagi na gapa i “panuppalan na sistema na ganna-gannug” nga pattolayattam ngana sangawe. Kunnaw i kinagi ni Jesus meyannung ta tiempo na panuppalan: “Awan vuluvuga tu makannammu ta idadattal natun nga aggaw onu oras, maski i anghel ira ta langi, onu i Ana; i Yama laman i makannammu.” Tapus sinabarangngan na i ngamin nga disipulos na nga ‘mawag tu sigga-paran’ ira.​—Mar. 13:32-37.

2. Ngatta mawag nga sigga-alerto i ollu-siglo ira nga Cristiano?

² Mawag nga sigga-alerto onu sigga-paran i Judio ira nga Cristiano ta ollu nga siglo megafu ta nakadepende tatun i inango da. Kinagi ni Jesus ta tagatuttul na ira i panakkilalan nga aranni ngana i panuppalan na Judio nga sistema na ganna-gannug. Kinagi na: “Noka nu masingan nu tu nalevu ngana ta suddalu ira i Jerusalem, ammu nu tu aranni ngana i kadaral na.” Tatun nga tiempo, mawag nga tuttuladda i tabarang ni Jesus nga “makkarela ta kavukiran.” (Luc. 21:20, 21) Napaliag i nagginna tatun nga tabarang turi ta zinaral na Romano ira i Jerusalem.

3. Anni i gigiammuattam taw nga artikulo?

 ³ Mattotolay ittam ngana ta tiempo na panuppalan naw nga marake nga sistema na ganna-gannug. Yari tu mawag nga tangngallattam i appana-panono tam anna sigga-alerto ittam. Taw nga artikulo, gigiammuattam nu kunnasi tam matangngallan i appana-panono tam nu sifutattam i mesissimmu ira ta mundo, nu kunnasi ittam nga magimmugug, anna nu kunnasi tam nga usan ta kapianan i nabattang nga tiempo tam.

4. Ngatta interesadu ittam nakuan nga masingan nu kunnasi nga tuttuppalan na mesissimmu ira sangawe ta mundo i profesiya ira ta Biblia?

⁴ Egga ira i makasta nga rason nu ngatta interesadu ittam nga masingan nu kunnasi nga tuttuppalan na mesissimmu ira sangawe ta mundo i profesiya ira ta Biblia. Angngarigan na, dati ngana nga kinagi ni Jesus ta nittam i mesimmu ira tapenu mammuattam nu aranni ngana nga manuppal i sistema ni Satanas. (Mat. 24:3-14) Pinagaram ittam ni apostol Pedro nga sifutan i ketuppal ira na profesiya tapenu ari nga makkafi i pangurug tam. (2 Ped. 1:19-21) Kunnaw i nakagi ta gafu na ultimu nga libru na Biblia: ‘Yaw nga libru i neturakan na ganna-gannug nga nipakannammu na Dios kani Jesu-Cristo tapenu mepasingan ta doroban na ira i ganna-gannug nga mesimmu ta mappange.’ (Nep. 1:1) Yatutta kuruga interesadu ittam ta mesissimmu ira sangawe ta mundo anna kayà tam nga mammuan nu ketuppalan kari yatun na profesiya ira ta Biblia. Baka kakayà tam gapa nga paggiristorian yatun ira nga mesissimmu.

5. Anni i mawag nga lillitattam, ngem anni gapa i mawag nga kuattam? (Innan gapa i letratu ira.)

⁵ Nu mapabbiridan i profesiya ta Biblia, mawag tu lillitattam nga makkagi tu sarili tam ira nga ispekulasion. Ngatta? Manaki tam nga makkagi tu maski anni nga awayya na nga makadaral ta pattaradday na kongregasion. Angngarigan na, baka mammuattam nga nabbirida i lider ira na gobiernu nu kunnasi da nga solban i tadday nga problema tapenu mapeggan tu imammo anna seguridad. Imbes tu kagiattam nga tuttuppalan ngana natun i profesiya ta 1 Tesalonica 5:3, mawag tu ammuattam i pinakabagu nga nepublisa nga informasion. Nu ibase tam i paggiristoria tam ta nipublisa na organisasion ni Jehova, makoffun ittam tapenu ‘mapakatadday i ginnonopan anna gi-urayan’ na kongregasion.​—1 Cor. 1:10; 4:6.

6. Anni ira i magigiammu tam ta 2 Pedro 3:11-13?

⁶ Bibbigan i 2 Pedro 3:11-13. Uffunan ittam ni apostol Pedro tapenu matangngallattam i appana-panono tam nu sifutattam i profesiya ta Biblia. Pagaramman na ittam nga ‘kuattam i adde na awayya tam’ tapenu mepasingan nga sigga-nono ittam ta dattal na aggaw ni Jehova. Ngatta? Ari nga megafu ta kayà tam nga mammuan i aggaw onu oras nu kanni nga irattal ni Jehova i Armagedon, nu ari, kayà tam gare nga usan i nabattang nga tiempo tapenu ‘mattolay nga masanto anna mekunnay ta Dios.’ (Mat. 24:36; Luc. 12:40) Kayà tam gafu nga mattalupaddian nga marenu i kondukta tam anna siguraduan nga masingan ta passerbi tam kani Jehova i monag nga pangaya tam ta nisa. Tulu-tuloy tam nga makua yatun nu magimmugug ittam.

7. Kunnasi tam mepasingan nga magimmugug ittam? (Lucas 21:34)

⁷ Kinagi ni Jesus ta disipulos na ira nga mawag tu sifutadda i mesissimmu ta mundo. Ngem kinagi na gapa nga mawag tu magimmugug  ira. Yatun i manawag nga netabarang ta Lucas 21:34. (Bibbigan.) Kinagi tatun ni Jesus: “Magimmugug kamu.” I tadday nga tolay nga magimmugug ay alerto ta maski anni nga puede nga manaral ta relasion na kani Jehova anna lillitan na yatun tapenu mattalupaddian yayya ta aya na Dios.​—Prov. 22:3; Jud. 20, 21.

8. Anni i nitabarang ni apostol Pablo ta Cristiano ira?

⁸ Sinabarangngan ni apostol Pablo i Cristiano ira nga mawag tu magimmugug ira. Angngarigan na, kinagi na taga-Efeso ira: ‘Magimmugug kamu ta attolay nu. Arian nu nga parigan i totolay nga awan tu uto; parigan nu danuri i nannono.’ (Efe. 5:15, 16) Kanayun nga puntirian ni Satanas i espiritualidad tam, yayya nga tabarangngan ittam na Biblia nga ‘aleran i ikaya na Yafu nga ipakua nittam’ tapenu maprotektan i baggi tam.​—Efe. 5:17.

9. Kunnasi tam nga maleran i ikaya ni Jehova nga ipakua nittam?

⁹ Ari nga mabibbig ta Biblia i ngamin nga manaral ta relasiottam kani Jehova. Egga ira i gannug nga maruddu tu sittam i maddesision megafu ta awan tu direkta nga nakagi ta Biblia. Tapenu makapaddesision ittam tu mapia, mawag tu alerattam onu ammuattam i uray onu “i ikaya na Yafu nga ipakua.” Makua tam yatun nu kanayuttam nga gigiammuan i Biblia anna pannonopan yatun tu mapia. Nu mas gare nga malippawa tam i uray ni Jehova anna “egga nittam i annonopan ni Cristo,” mas makapattolay ittam kagitta “danuri i nannono” maski nu awan tu espesipiko nga dob nga mangikagi nu anni i mawag tu kuattam. (1 Cor. 2:14-16) Mabi laman nga mammuan i karuan ta peligro ira, ngem ari gapa mataga-tageno i karuan.

10. Anni i karuan ta peligro nga mawag tu pagimmugurattam?

¹⁰ Yaw i karuan ta peligro nga mawag tu pagimmugurattam: pagalembong, pagillellaw, pabbalin tu vutu, makabigag nga paguvovug, vayolente ira nga pagiraw, pornograpia, anna karuan paga nga kuddanatun. (Sal. 101:3) Kanayun nga magala-aleg tu chansa i kontra tam nga Demonio tapenu daralan i relasiottam kani Jehova. (1 Ped. 5:8) Nu ari ittam nga magimmugug, memula ni Satanas ta nono anna futu tam i passil, palladdug, pagagum, lussaw, pappakatannang, anna pangipappan tu taki na nono. (Gal. 5:19-21) Ta gafu na, baka nonopattam nga ari mabba nga delikadu yatun ira nga manonono anna mataga-tageno tam. Ngem nu ari tam insigida nga baddulan danatun, tulu-tuloy yatun nga dumakal kagitta na poisonous nga mula nga mamappeligro ta nittam.​—Sant. 1:14, 15.

11. Anni i tadday nga peligro nga ari tam kuruga mataga-tageno, anna ngatta mawag tu pagimmugurattam yatun?

¹¹ I tadday nga peligro nga ari tam kuruga mataga-tageno ay i marake nga kakavvulu. Ikonsidera yaw nga situasion. Egga i katrabahum nga ari tu Saksi ni Jehova. Gafu ta kayà mu nga makasta i anningan na ta Saksi, masippo ka ta nisa anna uuffunammu yayya. Nu karuan gapa, makikavulu ka nisa nu lunch break adde ta kana-kanayun ngana yatun. Nu karuan egga ira i istorian na nga imoral nga ari mu nga magustuan. Ngem kustu kua, nasanay ka ngana ta kunnatun ira nga istoria tapus gitta na okay ngana laman yatun nikaw. Mittan, inagalan naka na katrabahum nga minukkamu kanu kabalin na trabahu nu, tapus na-hoo ka gapa. Ari nabbayag, matageno mu nga kaparefum ngana yayya nga mannono. Nu kunnatun ngana i nesimmu, kunnasi paga tamma kabayag nige mu nga maparigan i kukukuan na? Siempre, masippo anna marespeto ittam ta ngamin. Ngem  mawag tu daddammattam nga daka-dakal i influwensia ta nittam na kanayuttam ira nga kavulu. (1 Cor. 15:33) Nu magimmugug ittam, kagitta na nitabarang ni Jesus nga kuattam, malillitattam i ari kawagan nga pakikavulu tari ira ta ari nga mattolay segun ta estandarte ni Jehova. (2 Cor. 6:15) Masingattam nga delikadu yatun yayya nga arayyuattam.

12. Anni i mawag tu kuan na disipulos ni Jesus habang innaggadda i panuppalan na sistema na ganna-gannug?

¹² Egga i mawag tu kuan na disipulos ni Jesus habang innaggadda i panuppalan na sistema na ganna-gannug. Zinog na ira nga ilayyagayya da i mapia nga dumug “ta Jerusalem, ta interu nga Judea tuange ta Samaria adde ta ngamin nga tuppu-tuppag na davvun.” (King. 1:6-8) Daka-dakal nga trabahu yatun para ta tagatuttul ira ni Jesus! Nu kuadda i adde na mawayya da tapenu mallayyagayya, meyusa da ta kapianan i tiempo da.

13. Ngatta mawag nga usattam ta kapianan i tiempo tam? (Colosas 4:5)

¹³ Bibbigan i Colosas 4:5, NW. Tapenu memmugurattam i baggi tam, mawag tu ikonsidera tam nu kunnasi tam usu-usan i tiempo tam. Mafektan gare na “ari ekspektan nga mesimmu” i maski sinni ta nittam. (Ecl. 9:11) Baka gavva ittam nga matay.

14-15. Kunnasi tam meyusa ta kapianan i tiempo tam? (Hebreo 6:11, 12) (Innan gapa i letratu.)

 ¹⁴ Meyusa tam ta kapianan i tiempo tam nu kuattam i uray ni Jehova anna paladdattam i relasiottam ta nisa. (Juan 14:21) Mawag nga ‘pakaladdattam anna ariattam nga ibbattan i angngurug tam anna mallallappo ittam nga kanayun ta trabahu nga masserbi ta Yafu.’ (1 Cor. 15:58) Tapenu sonu duttal i panuppalan, panuppalan man na inango tam onu panuppalan naw nga marake nga mundo, awan saw tu pabbabawyattam.​—Mat. 24:13; Roma 14:8.

¹⁵ Adde sangawe, igigiya lagapa ni Jesus i disipulos na ta pangilayyagayya da ta Pappatulan na Dios ta interu nga mundo. Sinuppal ni Jesus i promesa na. Usu-usan na i organisasion ni Jehova tapenu sanayan ittam ta pallayyagayya anna iyawa i ngamin nga kawagattam tapenu melayyagayya i mapia nga dumug. (Mat. 28:18-20) Makua tam i ekspektan ni Jesus ta nittam nu malallappo ittam ta pallayyagayya anna panuddu. Mawag gapa nga magalerto ittam durante nga iinnaggattam nga daralan ni Jehova yaw nga sistema na ganna-gannug. Nu iyaplika tam i tabarang ta Hebreo 6:11, 12, ariattam vuluvuga ibbattan i iddanama tam “adde ta pangurianan.”​—Bibbigan.

16. Anni i determinadu nga kuattam?

¹⁶ Egga ngana i sinunno ni Jehova nga aggaw anna oras nu sonu anni na nga daralan i sistema ni Satanas. Sonu duttal yatun nga tiempo, siguradu nga tuppalan ni Jehova i profesiya ira nga nipetura na ta Uvovug na. Baka nu karuan, gitta na kitebbayag nga duttal i panuppalan naw nga sistema. Ngem “ari noka nga matalattan” i aggaw ni Jehova! (Hab. 2:3) Determinadu ittam nakuan gafu nga ‘ari magimmang nga maginnag kani Jehova’ anna ‘mapasensia nga maginnag ta Dios na kapaliag tam.’—Mik. 7:7.