1. Ngatta tuttulattam nakuan i Mangigiya ta nittam nga si Jehova? Iyilustra.

 IMAJINAMMU nga nawawakka ta kakayyuan. Delikadu tatun megafu ta aru i simaron nga ayam kunne na gapa i poisonous nga insekto anna mulu-mula anna binatu i dalan. Magga mappappabalo ka nu egga i malalaki nga guide nga ammu na nu sitaw i peligro ira anna igiya naka tapenu meyarayyu ka tatun. Megitta tatun nga kakayyuan i mundo tam. Napappannu yatun tu peligro nga awayya na nga manaral ta espiritualidad tam. Ngem egga i perfekto nga Mangigiya ta nittam—si Jehova. Igiya na ittam tapenu meyarayyu ittam ta peligro anna madde tam i destinasiottam—mannanayun nga inango ta napabagu nga mundo.

2. Kunnasi ittam nga igiya ni Jehova?

² Kunnasi ittam nga igiya ni Jehova? Primeru nga usu-usan na i Biblia. Ngem usu-usan na gapa i totolay. Angngarigan na, usu-usan na “i mekatalo anna nannono nga doroban” nga mangiyawa tu espiritual nga makan tapenu makapaddesision ittam tu fustu. (Mat. 24:45) Usu-usan gapa ni Jehova i kualipikadu ira nga lallaki tapenu igiya ittam. Angngarigan na, mangiyawa tu pamagaram anna instruksion i manangngal ira ta sirkito anna elder ira ta kongregasion tapenu makayanattam i mariga ira nga situasion. Mappappabalo ittam tatun ira nga giya taw nga mariga nga pangurianan ira nga aggaw! Megafu tatun ira, kanayuttam nga mapagayayya si Jehova anna mattolay ittam saw tu mannanayun.

3. Anni i gigiammuattam taw nga artikulo?

³ Nu karuan, baka marigatan ittam nga tumuttul ta pangigiya ni Jehova, mas ngana nu imperfekto nga lallaki i nangiyawa tatun. Ngatta? Baka i direksion gare ay duma ta ikaya tam. Awayya na nga para nittam ari tu praktikal yatun nga direksion yari tu nononopattam nga ari nga naggafu yatun kani Jehova.  Ta kunnatun ira nga situasion, mas mattalo ittam nga si Jehova i mangigigiya ta totolena anna mabendisionan ittam nu tumuttul ittam. Tapenu gafu mas mattalo ittam kani Jehova, gigiammuattam taw nga artikulo (1) nu kunnasi na nga nigiya i totolena ta tiempo na Biblia, (2) nu kunnasi na ittam nga igigiya sangawe, anna (3) i bendision ira nu kanayun ittam nga tumuttul ta pangigiya na.

NIGIYA NI JEHOVA I NASION NA ISRAEL

4-5. Kunnasi nga nipasingan ni Jehova nga usu-usan na si Moises tapenu igiya i Israel? (Innan i letratu ta vungun.)

⁴ Sinunno ni Jehova si Moises nga igiya i Israelita ira tapenu makalawan ira ta Ehipto. Nipasingan mismu ni Jehova ta Israelita ira nga igigiya na ira gukaban ni Moises. Angngarigan na, egga i arigi nga kunam nga mangigiya nira ta aggaw anna arigi gapa nga afi nu gabi. (Ex. 13:21) Zinaddanan ni Moises yatun nga arigi adde ta nakadde i Israelita ira ta Uzzin nga Bebay. Ngem ta pakadde da tari, navuru-vurung i Israelita ira. Aranni ngana gare ira nga madaddag na suddalu ira nga Ehipsio ngem awan ngana tu paddalanadda ta bebay. Tatun nga tiempo, nanono na Israelita ira nga nakkamali si Moises ta pangiyangay na ta nira ta Uzzin nga Bebay. Ngem kurug kari yatun? Ari. Ginakkag talaga ni Jehova nga igiya ni Moises i totolena mappange tatun nga lugar. (Ex. 14:2) Tatun nga tiempo, kappabbaw i pinangipaliag na Dios ta nira.—Ex. 14:​26-28.

⁵ Ta tumunug nga 40 dagun, kanayun nga nattalo si Moises ta arigi nga kunam tapenu igiya i totolay na Dios ta katanapan. a Egga i tiempo nga nipay ni Jehova i arigi ta utun na tolda ni Moises tapenu masingan yatun na ngamin nga Israelita. (Ex. 33:​7, 9, 10) Tatun nga arigi nga makibbida si Jehova kani Moises, tapus si Moises gapa i mangiyadde ta instruksion ira ni Jehova ta totolay. (Sal. 99:7) Mananawag ta Israelita ira nga usu-usan ni Jehova si Moises tapenu igiya ira.

6. Nattuttul kari i Israelita ira ta pangigiya ni Jehova? (Numeros 14:​2, 10, 11)

⁶ Kaddaraddam ta maski nu mananawag ngana nga usu-usan ni Jehova si Moises tapenu igiya i Israelita ira, magaru lagapa i ari nangurug ta nisa. (Bibbigan i Numeros 14:​2, 10, 11.) Mamippiga nga kinuestiodda i pangigiya ni Moises ta nira. Megafu tatun, ari nga nakatallung ta Nepromesa nga Davvun yatun nga henerasion na Israelita ira.—Num. 14:30.

7. Sinni danuri siminuttul ta pangigiya ni Jehova? (Numeros 14:24) (Innan gapa i letratu.)

⁷ Ngem siminuttul ta pangigiya ni Jehova i karuan nga Israelita. Angngarigan na, kinagi ni Jehova: ‘Tulu-tuloy nga siminuttul niakan tu napafutuan si Caleb.’ (Bibbigan i Numeros 14:24.) Binendisionan na Dios si Caleb. Niyawa na paga lagu ta nisa i napili na nga davvun ta Canaan. (Jos. 14:​12-14) Makasta gapa nga ehemplo ta panuttul ta pangigiya ni Jehova i tumunug nga henerasion na Israelita ira. Turi ta sinalian ni Josue si Moises bilang natunno nga mangigiya ta Israelita ira, “fermi i pangikakua da ta nisa ta interu nga pinattolena.” (Jos. 4:14) Megafu tatun, binendisionan ira ni Jehova. Nakatallung ira ta Nepromesa nga Davvun.—Jos. 21:​43, 44.

8. Ipakanawag nu kunnasi nga nigiya ni Jehova i totolena ta tiempo na patul ira. (Innan gapa i letratu.)

⁸ Ta tumunug ira nga dagun, nanunno si Jehova tu hues ira tapenu igiya i totolena. Ta tiempo gapa na patul ira, nanunno si Jehova tu profeta ira. Nagginna ta tabarang na  profeta ira i matalo ira nga patul. Angngarigan na, mapakalinno nga nappetunung si Patul David kani profeta Natan. (2 Sam. 12:​7, 13; 1 Cro. 17:​3, 4) Nattalo gapa si Patul Jehosafat ta pangigiya ni profeta Jahaziel anna pinagaram na i totolay na Juda nga ‘mangurug ta profeta ira na Dios.’ (2 Cro. 20:​14, 15, 20) Turi ta madammo i problema ni Patul Hezekias, nappoffun yayya kani profeta Isaias. (Isa. 37:​1-6) Kada tumuttul i patul ira ta pangigiya ni Jehova, mabendisionan ira anna maprotektan i nasion. (2 Cro. 20:​29, 30; 32:22) Mananawag nakuan gafu ta ngamin nga usu-usan ni Jehova i profeta na ira tapenu igiya i totolena. Ngem magaru ta patul ira anna ta totolay i ari nga nagginna ta profeta ira ni Jehova.—Jer. 35:​12-15.

NIGIYA NI JEHOVA I CRISTIANO IRA TA OLLU NGA SIGLO

9. Sinni danuri inusa ni Jehova tapenu igiya i Cristiano ira ta ollu nga siglo? (Innan gapa i letratu.)

⁹ Turi ta ollu-siglo C.E., binuu ni Jehova i Cristiano nga kongregasion. Kunnasi na ira nga nigiya? Sinunno na si Jesus nga mabbalin tu ulu na kongregasion. (Efe. 5:23) Ngem ari nga si Jesus i mismu nga nangigiya ta kada tadday nga disipulo. Inusa na i apostoles anna i mannakam ira ta Jerusalem tapenu mangiyorollu. (King. 15:​1, 2) Egga gapa ira i natunno nga mannakam tapenu igiya i kongregasion ira.—1 Tes. 5:12; Tito 1:5.

10. (a) Siminuttul kari i magaru ta ollu-siglo ira nga Cristiano ta pangigiya nga nalawa da? (Kingngua 15:​30, 31) (b) Ngatta ari nga siminuttul i karuan ta tiempo na Biblia ta sinunno ni Jehova nga mangigiya ta nira? (Innan i kahon nga “ Nu Ngatta Ari nga Nangurug i Karuan.”)

¹⁰ Siminuttul kari i ollu-siglo ira nga Cristiano? Magaru ta nira i magayayya nga siminuttul ta instruksion nga nalawa da. Kakurugan na, ‘napannuan ira ta pagayayya gafu ta pinasikan natun i nono da.’ (Bibbigan i Kingngua 15:​30, 31.) Ngem kunnasi nga igiya ni Jehova i totolena ta tiempo tam?

IGIGIYA ITTAM NI JEHOVA SANGAWE

11. Mangistoria tu angngarigan nu kunnasi nga nigiya ni Jehova danuri mangiyorollu ta tiempo tam.

¹¹ Adde sangawe, igigiya lagapa ni Jehova i totolena. Kukukuan na yatun gukaban na Uvovug na anna na Ana na nga ulu na kongregasion. Makagi tam kari nga adde sangawe ay mangusa lagapa i Dios tu totolay tapenu igiya  ittam? Wan. Nonopammu i nesimmu kabalin na dagun 1870. Namegafu nga nalippawa ni Charles Taze Russell anna na kakavulu na nga importante nga dagun i 1914 nu meyannung ta Pappatulan na Dios. (Dan. 4:​25, 26) Nakagi da yatun megafu ta nabbase ira ta profesiya ira na Biblia. Nigiya kari ni Jehova i paggigiammu da tu Biblia? Magga. Turi ta 1914, pinakurug na nesimmu ira ta mundo nga namegafu ngana nga mammaguray i Pappatulan na Dios. Tatun gare nga tiempo, namegafu i World War I tapus egga ira i nawwara nga kappatay nga taka-taki, lunu-lunig, anna bisin. (Luc. 21:​10, 11) Mananawag gafu nga inusa ni Jehova danatun nga estudiante ira na Biblia tapenu uffunan i totolena.

12-13. Anni ira nga unnug i nakua durante na World War II tapenu mas aru i mallayyagayya anna manuddu?   

¹² Pannonopan gapa i nesimmu turi ta World War II. Ginigiammu na brother ira nga mangirollu ta world headquarters i Nepakannammu 17:8. Nalippawa da tatun nga ari nga marresulta yatun nga gerra ta Armagedon. Ammu da nga kabalin na gerra, egga saw i tiempo na imammo nga meyusa na Saksi ira ni Jehova tapenu layyagayyan i mas aru paga nga totolay. Maski gafu nu gitta na ari nga praktikal tatun nga tiempo, binuu na organisasion ni Jehova i Watchtower Bible College (School) of Gilead tapenu sanayan i misionero ira nga mallayyagayya anna manuddu ta nadduruma nga parte na mundo. Maski maddaggun i gerra, egga ira i neyasayn nga misionero. Fuera tatun, niyunnug gapa na mekatalo nga doroban i Course in Theocratic Ministry b tapenu sanayan i ngamin ta kongregasion nga mabbalin tu mas malalaki ta pallayyagayya anna panuddu. Megafu tatun ira nga unnug, neprepara i totolay na Dios para ta trabahu nga pallayyagayya.

¹³ Nu innattam yatun ira nga nesimmu, makagi tam nga igigiya ni Jehova i totolena tatun ira nga mariga nga tiempo. Namegafu gare turi ta World War II, makapallayyagayya i totolay ni Jehova ta nadduruma nga parte na mundo. Kakurugan na, mas aru nga totolay i nammammu da si Jehova anna minaru gapa i mallayyagayya.

14. Ngatta makapattalo ittam ta direksion nga maggafu ta organisasion ni Jehova anna ta natunno ira nga elder? (Nepakannammu 2:1) (Innan gapa i letratu.)

¹⁴ Ta tiempo tam, mappegiya lagapa kani Cristo i miembro ira na Manangngal nga Baggi. Kayà da gare nga mepasingan ta instruksion nga iyawa da ta wawwaragi i appana-panono ni Jehova anna ni Jesus ta ganna-gannug. Tapus i manangngal ira ta sirkito anna elder gapa i mangiyawa tu direksion ta kongregasion ira. c Egga ta “ziwanan nga lima” ni Cristo i nazelugan ira nga elder. (Bibbigan i Nepakannammu 2:1.) Ngem siempre, imperfekto danatun nga elder anna makkamali ira. Maski gapa si Moises, Josue, anna i apostol ira ay nakkamali. (Num. 20:12; Jos. 9:​14, 15; Roma 3:23) Ngem igigiya lagapa tu mapia ni Cristo i mekatalo nga doroban anna i natunno ira nga elder. Kuan na yatun “adde ta panuppalan na mundo.” (Mat. 28:20) Mattalo ittam nakuan gafu ta pangigiya ni Jehova gukaban na natunno ira nga mangirollu.

MABENDISIONAN ITTAM NU KANAYUN ITTAM NGA TUMUTTUL TA PANGIGIYA NI JEHOVA

15-16. Anni i magigiammum tari ira ta sinuttul da i pangigiya ni Jehova?

¹⁵ Nu kanayun ittam nga tumuttul ta pangigiya ni Jehova, mabendisionan ittam maski sangawe. Kunnatun da Andy anna Robyn. Nagginna ira ta tabarang na mekatalo nga doroban nga mappasimple tu pattolay. (Innan i study note na Mateo 6:22.) Megafu tatun, nakapav-volunteer ira ta construction project ira na organisasion. Kagian ni Robyn: “Naddiakkami ta baraddi nga babalay tapus nu mittan, awan tu kusina na. Nilakù gapa i gamit ku ta photography maski nu yatun nakuan i kakayà ku nga kuan. Siminangi ngà turi ta nilakù danatun. Ngem kagitta ni Sara nga atawa ni Abraham, naffokus ngà ta makuà sangawe para kani Jehova, ari tu ta nisakrifisiò.” (Heb. 11:15) Anni i bendision nga nalawa natun nga magatawa ta kingngua da? Istorian ni Robyn: “Kuruga magayayya kami ta ammu mi nga iyayawa mi i ngamin nga egga nikami para kani Jehova. Nu kuammi i asayment mi, gitta na masingi-singammi nu kunnasi saw i pattolay ta napabagu nga mundo.” Umanugu tatun si Andy anna kunnaw i kinagi na: “Magayayya kami ta meyusa mi i ngamin nga egga nikami tapenu suportan i Pappatulan.”

¹⁶ Anni paga i bendision na kanayun nga panuttul  ta pangigiya ni Jehova? Turi ta naggradua si Marcia ta high school, nagginna yayya ta tabarang ta nisa nga mappayunir. (Mat. 6:33; Roma 12:11) Kagian na: “Neyofer niakan nga magiskuela tu appa nga dagun ta unibersidad tu libre gafu ta iskolar ngà saw. Ngem egga ira i espiritual nga goal ku. Yatutta nav-vocational school ngà na laman tapenu egga saw i skill ku nga passuportà sonu mappayunir ngà. Tadday yatun ta kapianan nga desisiokku. Regular pioneer ngà ngana sangawe anna megafu ta tammi ku lagapa i oras ku ta trabahù, makapasserbi ngà paga bilang commuter ta Bethel anna mas aru i makuà para kani Jehova.”

17. Anni paga ira i bendision na kanayun nga panuttul ta pangigiya ni Jehova? (Isaias 48:​17, 18)

¹⁷ Nu karuan, makalawa ittam tu tabarang nga mapprotekta ta nittam. Angngarigan na, matabarangngan ittam kontra ta materialismo anna ta gannug ira nga manenta ta nittam nga ari tuttulan i dorob na Dios. Mabendisionan ittam gapa nu tuttulattam i kunnatun ira nga pangigiya ni Jehova ta nittam. Kanayun gare nga marenu i konsensia tam anna meyarayyu ittam ta aru nga problema. (1 Tim. 6:​9, 10) Megafu tatun, napafutuan nga medayaw tam si Jehova. Awan ngana tu tanakuan nga makeyawa nittam ta kurug nga pagayayya, imammo, anna pakkakontentu.—Bibbigan i Isaias 48:​17, 18.

18. Ngatta determinadu ka nga kanayun nga tuttulan i pangigiya ni Jehova?

¹⁸ Magga mangusa lagapa saw si Jehova tu totolay tapenu igiya ittam ta tiempo na dakal nga ziga anna mattulu-tuloy yatun adde sonu Marivu Dagun nga Pammaguray ni Cristo. (Sal. 45:16) Tumuttul ittam kari lapa saw tatun nga direksion maski nu tanakuan yatun ta ikaya tam? Nakadepende yatun ta pattuppal tam ta pangigiya ni Jehova sangawe. Kanayun ittam nakuan gafu nga tumuttul ta pangigiya ni Jehova anna na lallaki nga sinunno na nga manangngal ta nittam. (Isa. 32:​1, 2; Heb. 13:17) Mattalo ittam nakuan ta Mangigiya nittam nga si Jehova megafu ta iyarayyu na ittam ta mamappeligro ta espiritualidad tam anna igiya na ittam mappange ta destinasiottam—mannanayun nga inango ta napabagu nga mundo.