NU KARUAN, egga ira i grupo na uvovug nga pakatotoli nga ikagi na gumattura ira na Biblia. Ikonsidera tam i tallu nga rason nu ngatta awayya na nga kingngua da yatun:

Nu kanni nga netura yatun. Ta Israel tagga, magaru ta totolay ay awan tu personal nga kopia na ta Dob. Maginna da laman i kebibbig na Dob nu maggarammammung i nasion ta tabernakulo. (Deut. 31:​10-12) Siguradu nga aru gapa i istorbo ta pagginna da habang agga-taddag ira ta piga nga oras tapus kekkaru i totolay. (Neh. 8:​2, 3, 7) Tatun ira nga tiempo, makoffun i pangipakoli ta importante ira nga grupo na uvovug tapenu ari nga makattaman na totolay i teksto ira anna meyaplika da yatun. Makoffun gapa i pangipakoli tatun ira tapenu ari da makattaman i detalyadu ira nga gannug, kagitta na regulasion ira na Dios anna hudisial ira nga desision.—Lev. 18:​4-22; Deut. 5:1.

Nu kunnasi nga netura yatun. Maggi 10 porsiento na Biblia ay kansion—kagitta na libru na Salmo, Kansion ni Solomon, anna Silasigo. Nu karuan, egga ira i pakatotoli nga uvovug ta kansion ira. Makoffun yatun tapenu mepasigo i tema na kansion anna moffunan gapa i maggigginna nga ma-memorize i lyrics. Angngarigan na, sifutan i uvovug ira ta Salmo 115:​9-11: “Sikamu nga taga-Israel, mammakatalo kamu ta YAFU, yaya i manguffun anna mangiyegu nikamu. Sikamu nga papari na Dios, mammakatalo kamu ta YAFU, yaya i manguffun anna mangiyegu nikamu. Sikamu ngamin nga maddaya-rayaw ta YAFU, i YAFU laman i pammakatalakkan nu! Yaya i manguffun anna mangiyegu nikamu.” Siguradu nga nakoffun ta gumakkansion ira i pangitotoli tatun ira nga uvovug tapenu mepatalatto ta nono anna futu da i makakkasta ira nga kinakurug.

Nu ngatta netura yatun. Nu karuan, pakatotoli nga ikagi na gumattura ira ta Biblia i importante ira nga uvovug. Angngarigan na, turi ta nidob ni Jehova ta Israelita nga ari ira nga kuman tu daga, zinog na si Moises nga pakatotoli nga ikagi i rason. Kayà gare na Dios nga ipasigo nga egga ta daga i inango na pinaratu, kayà na kagian, isimbolo na daga i inango. (Lev. 17:​11, 14) Yatutta turi ta nitura na apostoles anna mannakam ira ta Jerusalem i gannug ira nga mawag nga lillitan na tadday nga Cristiano tapenu mapagayayya da i Dios, nipasigo da mana nga mawag tu lillitan i daga.—King. 15:​20, 29.

Maski nu egga ira i uvovug nga pakatotoli nga nakagi ta Biblia, ari na kayà kagian natun nga kayà ni Jehova nga itotoli tam yatun ira nga uvovug. Angngarigan na, kinagi ni Jesus: “Nu makimallo kamu, arian nu nga itotoli i kakkagian nu.” (Mat. 6:​7, NW) Nangikagi paga lagu yayya tu gannug ira nga awayya tam nga ipakimallo nga mekunnay ta uray na Dios. (Mat. 6:​9-13) Awayya tam gafu nga itotoli nga ipakimallo i parehu ira nga gannug, ngem ari tam nga itotoli i i para-parehu ira nga uvovug.—Mat. 7:​7-11.

Egga gafu i makasta ira nga rason nu ngatta pakatotoli nga nekagi i karuan nga uvovug onu grupo na uvovug ta Biblia. Tadday laman yatun ta panuddu ta nittam na Kadakallan nga Instruktor tam tapenu mabbenefisio ittam.—Isa. 48:​17, 18.