1. Segun ta Mateo 11:28-30, anni i nipromesa ni Jesus?

EGGA makakkasta nga nipromesa ni Jesus ta ammung na totolay nga maggigginna nisa. “Umay kamu niakan,” kunna, “ta pagibannagat-takamu.” (Bibbigan i Mateo 11:28-30.) Ari laman tu adde ta promesa danatun nga kinagina. Nonopan i kingnguana para ta babay nga mazziga-riga gafu ta grabe nga takina.

2. Anni i kingngua ni Jesus para ta mataki nga babay?

² Desperadu nga makiyoffun i babay. Aru ngana nga manguru i napporuanna gafu ta ayana nga mammapia. Dose ragun ngana yayya nga mazziga-riga, ngem awan lagapa tu nangulianna. Segun ta Dob, maritta yayya. (Lev. 15:25) Sangaw, nadumugna nga moru ni Jesus danuri mataki, yatutta inalegna si Jesus. Ta naleganna yayya, siniggegna i barebay na sinnun ni Jesus, ganganalaman ay nammapia yayya! Ngem ari laman tu i takina i inuru ni Jesus, nu ari, nitolina nisa i dignidadna. Angngariganna, turi ta kiniyuvovug yayya ni Jesus, inusana i meddu anna marespeto nga termino nga “ana ku.” Siguradu nga napalubbangan, onu napagaram tatun i babay!​—Luc. 8:43-48.

3. Anni ira nga pakkiavu i tabbagattam?

³ Daddamman nga minaranni i babay kani Jesus. Inapertanna i minaranni nisa. Kunnatun gapa ta tiempo tam​—mawag tu apertattam nga “umay” kani Jesus. Ta tiempo tam, ari nga mammilagro si Jesus tapenu uruan i pisikal ira nga taki danuri “umay” nisa. Ngem tulu-tuloy yaw nga pagimbitana: “Umay kamu niakan, . . . ta pagibannagat-takamu.” Taw nga artikulo, matabbag i lima nga pakkiavu: Kunnasi tam nga “umay” kani Jesus? Anni i kayà kagian ni Jesus turi ta kinagina: “Kattuan nu i takkilù”? Anni i magigiammu tam kani Jesus? Ngatta mapasikattam uli nu kuattam i trabahu nga ipakuana nittam? Anna  kunnasi tam tulu-tuloy nga mapasikan uli ta pangattu tam ta takkilu ni Jesus?

4-5. Anni ira i kuattam tapenu ‘makangay’ kani Jesus?

⁴ Tadday nga makua tam tapenu “umay” kani Jesus ay gukaban na paggigiammu ta ganna-gannug nga kinagi anna kingnguana. (Luc. 1:1-4) Sittam lagapa i makarresponsibilidad nga gigiammuan nu anni i kagian na Biblia meyannung kani Jesus. “Umay” ittam paga kani Jesus gukaban na paddesision nga mappabawtiso anna mabbalin tu disipulo ni Cristo.

⁵ Tadday paga nga makua tam tapenu “umay” kani Jesus ay gukaban na pappoffun ta elder ira na kongregasion nu kawagattam. Usu-usan ni Jesus danaw nga ‘regalu nga totolay’ tapenu pastoran i karneruna. (Efe. 4:7, 8, 11; Juan 21:16; 1 Ped. 5:1-3) Mawag tu sittam i umaranni tapenu mappoffun nira. Ariattam nakuan ekspektan nga mabibbig na elder ira i nononopattam anna ammuda ngana i kawagattam. Kunnaw i kinagi na brother nga si Julian: “Gafu ta egga i taki ku, kawagakku nga panawan i asayment ku ta Bethel, ngem tadday ta kofukku ira i nangirekomenda nio nga mappa-shepherding ngà. Ta ollu, abbo ku nu kakku kawagan yatun. Ngem, nappoffun ngà balaman, anna yatun nga shepherding i tadday ta kakastan pagalaman nga regalu nga nalawa ku.” Moffunan ittam na matalo ira nga elder, gitta nuri na dua nga elder nga nabbisita kani Julian, nga ammuan i “annonopan ni Cristo,” tapenu malippawa anna maparigattam i pannono anna pagimammana. (1 Cor. 2:16; 1 Ped. 2:21) Nu moffunadda ittam, kurug tu tadday yatun ta kapianan nga meregaluda nittam.

6. Anni i kayà kagian ni Jesus ta pakkagina tu: “Kattuan nu i takkilù”?

⁶ Turi ta kinagi ni Jesus i “kattuan nu i takkilù,” posible nga i kayàna kagian ay “Parulattannu i autoridad ku.” Posible gapa nga i kayàna ikagi ay “Makittakkilu ka niakan, anna makka-uffutta nga mattrabahu para kani Jehova.” Maski anni paga tatun, parehu nga egga i melagum nga trabahu.

7. Segun ta Mateo 28:18-20, anni nga trabahu i mepakua nittam, anna ta anni ittam nga makasiguradu?

⁷ Inalawa tam i imbitasion ni Jesus turi ta nidedika tam i pattoletam kani Jehova anna nappabawtiso ittam. Para ta ngamin yatun nga imbitasion anna ari vuluvuga nga pammanakitan ni Jesus i maski sinni nga napafutuan nga kayàna i masserbi ta Dios. (Juan 6:37, 38) Neyawa ta ngamin nga disipulos ni Jesus i pribilehio nga makiparte ta trabahu nga nipakua ni Jehova kani Jesus. Makasiguradu ittam nga kanayun noka nga uffunan ittam ni Jesus tapenu metuppal yatun nga trabahu.​—Bibbigan i Mateo 28:18-20.

8-9. Ngatta kakayà na minappakalinno nga totolay nga umaranni kani Jesus, anna anni ira i iyavu tam ta baggi tam?

⁸ Kakayà na minappakalinno nga totolay nga umaranni kani Jesus. (Mat. 19:13, 14; Luc. 7:37, 38) Ngatta? Innan i nadduman ni Jesus anna na Fariseo ira. I Fariseo ira ay awan tu pagidduda anna minappakatannang ira. (Mat. 12:9-14) Si Jesus ay minaggiddu anna minappakalinno. I Fariseo ira ay ambisioso anna iparayagda i atannang nga posisiodda ta komunidad. Manaki ni Jesus i kunnatun. Sinudduanna i disipulosna nga mappakalinno ira anna passerbiadda i tanakuan. (Mat. 23:2, 6-11) Pinatulu na Fariseo ira i tanakuan nga tolay gukaban na pangananassing nira. (Juan 9:13, 22) Binanna-bannayan ni Jesus i tanakuan gukaban na meddu nga pattratu anna masippo nga pakibbida nira.

⁹ Naparigammu ngana kari danaw nga  leksion kani Jesus? Iyavu ta baggim: ‘Imammatannà kari na tanakuan nga malumamo anna minappakalinno? Sigga-paran ngà kari nga kuan i alinno ira nga trabahu tapenu mapasserbian i tanakuan? Masippo ngà kari ta tanakuan?’

12-14. Ngatta makapasikan i trabahu nga nipakua ni Jesus nittam?

¹² Ngatta mapasikattam uli nu kuattam i ipatrabahu nittam ni Jesus? Aru i rason nu ngatta, ngem ikonsidera tam laman i karuan.

¹³ Egga nittam i kapianan nga mangirollu. Si Jehova nga Katannangan nga Mangirollu tam ay ari tu maporay nga yafu nga awan tu appabalona ta aripanna ira. Appresianna i makua tam ira. (Heb. 6:10) Anna iddanna ittam tu pakawayya nga mawag tam tapenu meyabaga tam i responsibilidad tam. (2 Cor. 4:7; Gal. 6:5) Si Jesus nga Patul tam ay mangirollu gukaban na ehemplona. (Juan 13:15) I elder ira nga manangngal nittam ay paparigadda si Jesus, “i Makawayya nga Pastor.” (Heb. 13:20; 1 Ped. 5:2) Mappursigi ira nga mabbalin tu masippo, makapagaram, anna magutu durante nga tudduan anna protektadda ittam.

¹⁴ Egga nittam i kapianan nga kokkofun. Awan ngana tu tanakuan nga kagitta tam nga egga i meddu ira nga kofun anna makapagayayya nga trabahu. Nonopan yaw: Egga i pribilehio tam nga makipattrabahu ta totolay nga napeggan tu katannangan ira nga moral nga estandarte, ngem ari tu minappakatannang. Talentadu i kokkofuttam ngem ammuda i limitasiodda, anna ikonsiderada nga mas atannang i tanakuan anne nira. Imammatadda ittam ari laman nga katrabahu, nu ari kokkofun gapa. Kuruga madukko yatun nga pakkaravulu, yatutta sigga-paran ira nga isakrifisio i inangoda para nittam!

15. Anni nakuan i matageno tam ta trabahu nga kukukuattam?

¹⁵ Kukukuattam i kapianan nga trabahu. Ituttuddu tam ta totolay i kinakurug meyannung kani Jehova anna ilawattam i kinaladdug ira nga kinagi na Diablo. (Juan 8:44) Padammakkan ni Satanas i totolay gukaban na pangipakattu nira tu gannug ira nga ariadda makaya akkatan. Angngariganna, kayàna nga mangurug ittam nga ari ittam pakoman ni Jehova ta liwi-liwa tam anna ari ittam mepangngo ta pangidduna. Kiteddammo danatun nga akkatan, anna fermi nga kinaladdug danatun! Nu “umay” ittam kani Cristo, mapakoma i liwi-liwa tam. Anna i kurug ay kuruga ayatan ittam ngamin ni Jehova. (Roma 8:32, 38, 39) Talaga  makapagayayya nga uffunan i totolay nga mattalo kani Jehova anna masingan nga makkasta i pattoleda!

16. Ngatta i responsibilidad ira nga niyawa ni Jesus nittam ay neruma ta ngamin nga tanakuan paga nga responsibilidad tam?

¹⁶ I responsibilidad ira nga niyawa ni Jesus nittam ay neruma ta ngamin nga tanakuan paga nga responsibilidad tam. Angngariganna, ta kabalin na tangaggaw nga sekular nga trabahu, aru i nababbannag anna ari tu magayayya. Ngem kabalin gapa na tangaggaw nga passerbi kani Jehova anna kani Cristo, kuruga magayayya ittam. Baka nababbannag ittam kabalin na tangaggaw nga trabahu anna mawag tu fuersattam i baggi tam nga makistudy tatun nga gabi. Ngem maruddu nga kabalin na study, lubbe ittam nga narefreskowan anna napasikan. Kunnatun gapa i matageno tam nu mallayyagayya anna mappersonal study. Nu apertattam nga kuan danatun, marefreskowan anna mapasikan ittam uli!

17. Anni nakuan i pagimamma tam ta situasiottam anna anni nakuan i pagimmugurattam?

¹⁷ Mawag tu realistiko ittam. Egga i pagaddetan na sikan na kada tadday nittam. Yatutta immugurattam nakuan nu anni ira i kuattam. Angngariganna, baka mofu i sikattam ta pagunnug tu material ira nga pakkukua. Daddamman i kinagi ni Jesus ta mariku nga mabbing nga lalaki nga nakkiavu nisa: “Anni i mepangngo tu kuak-ku tapenu malawa ku i inango nga adde ta ngangangay?” Yatun nga lalaki ay mamarulo ngana ta Dob. Posible gapa nga masippo yayya nga tolay megafu ta espesipiko nga tinukoy na Evanghelio ni Marcos nga ‘sigga-aya i paningan’ ni Jesus nisa. Kunnaw i niyembita ni Jesus tatun nga mabbing nga mammaguray: “Em-mu nga ilaku ngamin i kukuam ira,” kunni Jesus, “anna tumuttul ka ngana niakan.” Kayà na lalaki nga tuttulan si Jesus. Ngem “kuruga riku” garay yayya yatutta arianna mapanawan i pakkukuana ira. (Mar. 10:17-22) Bilang resulta, pinammanakitanna i niyofer ni Jesus nisa anna tulu-tuloy nga nappa-aripan yayya ta “kuartu.” (Mat. 6:24) Nu sikaw yayya, anni i piliammu?

18. Anni nakuan i iddattam tu tiempo, anna ngatta?

¹⁸ Makasta nu iddattam tu tiempo nga usitakkan i prayoridad tam ira ta pattolay. Ngatta? Tapenu masiguradu tam nga masirib i pangusa tam ta sikattam. Ikonsidera i kinagi na kabataan nga si Mark: “Aru dagun nga abbo ku tu simple i pattolè. Payunir ngà gapa, ngem mas aru i usakku nga tiempo anna sikakku ta pagaleg tu kuartu anna nu kunnasi mabbalin tu komfortable i pattolè. Nononopakku nu ngatta tamma ari ngà kontento. Tapus natindiakku nga mas garay nga pagolluakku i personal ira nga interes ku anna vunu-vuna ngana laman nga tiempo anna sikan i iyayawa ku kani Jehova.” Inuli ni Mark i appana-panono anna istilo na pattolena tapenu mas paga nga makapasserbi yayya kani Jehova. “Mavurung ngà nu mittan,” kunni Mark, “ngem ta uffun ni Jehova anna ta suporta ni Jesus, nakapaffokus ngà ta passerbì kani Jehova.”

19. Ngatta kuruga importante nga mapeggan ittam tu fustu nga pagimamma?

¹⁹ Tulu-tuloy nga mapasikattam uli ta pangattu ta takkilu ni Jesus nu kuattam i tallu nga gannug. Ollu, pattalupaddianattam i fustu nga pagimamma. Trabahu ni Jehova i kukukuattam, yatutta kuattam nakuan yatun segun ta urena. Sittam i trabahador, anna si Jehova i Yafu. (Luc. 17:10) Nu segun lagapa ta uray tam i pangngua tam ta trabahuna, parigatattam lagapa i baggi tam. Maski paga i masiki-sikan nga toru ay magga mabigaran anna mabannag nu pakepepayna i urena anna kontranna i takkilu  nga kontroladu na yafuna. Ngem mawayya tam nga ituppal i extraordinariu ira nga gannug anna malampasattam i maski anni nga problema nu tuttulattam i pangigiya ni Jehova. Daddamman nga awan tu maski sinni nga makawayya nga fugaddan i ketuppal na urena!​—Roma 8:31; 1 Juan 4:4.

20. Anni nakuan i motibo tam ta pangattu ta takkilu ni Jesus?

²⁰ Mekadua, mattrabahu nga egga i marenu nga motibo. I motibo tam ay idayaw i meddu nga Yama tam, si Jehova. Danuri totolay ta tiempo ni Jesus nga i motiboda ay pakkakkam anna makasarili ay nabbalin tu ari magayayya anna pinagurayadda i nipakua nira ni Jesus. (Juan 6:25-27, 51, 60, 66; Fil. 3:18, 19) Ngem danuri i motiboda ay megafu ta ari makasarili nga aya ta Dios anna ta kasittolay ay magayayya nga nituppalda i responsibilidadda ta interu pattoleda ta davvun, anna egga i iddanamada nga makipasserbi kani Cristo ta langi. Gittada, mattalupaddian ittam nga magayayya gukaban na kapeggan tu marenu nga motibo ta pangattu ta takkilu ni Jesus.

21. Segun ta Mateo 6:31-33, anni i ekspektattam nga kuan ni Jehova?

²¹ Mekatallu, mapeggan tu mepangngo ira nga ekspektasion. Pinili tam ngana i mattolay nga kanayun nga massakrifisio anna mallallappo. Niyabiso ni Jesus nga madara-darum ittam noka. Ngem ekspektattam nga iddan ittam ni Jehova tu sikan tapenu attamman i maski anni nga problema. Durante nga magatta-attam ittam, mas malladda i relasiottam kani Jehova. (Sant. 1:2-4) Ekspektattam gapa nga iyawa ni Jehova i pakawagattam ira, pastoran ittam ni Jesus, anna pagaramman ittam na wawwaragi tam. (Bibbigan i Mateo 6:31-33; Juan 10:14; 1 Tes. 5:11) Egga paga kari i kurang nittam?

22. Anni i ipappabalo tam?

²² Nabanna-bannayan i babay nga pinammapia ni Jesus ta mismu nga aggaw nga noru yayya. Ngem makalawa laman yayya tu mannanayun nga banna-bannay nu laman ta mabbalin yayya tu matalo nga disipulo ni Cristo. Anni tamma i kingnguana? Nu pinilina nga kattuan i takkilu nga ipakattu ni Jesus, nonopammu i bala-balona​—awayyana paga i masserbi kavulu ni Jesus ta langi! Maski anni paga i isakrifisiona tapenu matuttul si Cristo ay balewala kumpara tatun nga bendision. Maski anni paga i iddanama tam​—mannanayun nga inango ta langi onu ta davvun, dakal i appabalo tam ta inalawa tam yaw nga imbitasion ni Jesus: “Umay kamu niakan!”