1. Anni i matageno ni Jehova turi ira ta mapakalinno nga totolay? Ipakanawag.

IDDUKAN ni Jehova i minappakalinno nga totolay. Danuri laman mapakalinno i awayyana nga mapeggan tu meddu anna madukko nga relasion nisa. Ngem, “arayyu yayya ta maparayag ira.” (Sal. 138:6, NW ) Kayà tam ngamin nga mapagayayya si Jehova anna mabbalin tu meddu nisa, yatutta aru i makasta nga rasottam nga mappakalinno.

2. Anni i ammuattam taw nga artikulo?

² Taw nga artikulo, ammuattam i tabbag taw nga tallu nga pakkiavu: (1) Anni i kinapakalinno? (2) Ngatta mawag tu kultibattam yatun nga kualidad? (3) Anni ira nga situasion nga mariga i mappakalinno? Magigiammu tam nga nu kultibattam i kinapakalinno, mapagayayya tam si Jehova anna mabenefisiowattam.​—Prov. 27:11; Isa. 48:17.

3. Anni i kinapakalinno?

³ I kinapakalinno ay alinno nga appana-panono anna kawan tu pappakatannang onu papparayag. Anugutan na mapakalinno nga tolay nga kuruga atannang si Jehova kumpara nisa. Anugutanna paga nga mas atannang i tanakuan sa ta aru nga gannug. Anugutan paga na minappakalinno nga tolay nga egga ira i gannug nga mas mapia i maski sinni anne nisa.​—Fil. 2:3, 4.

4-5. Ngatta makagi tam nga egga danuri gittana minappakalinno ngem ari mabba?

⁴ Nu innammu i tadday nga tolay, baka nonopammu nga minappakalinno yayya gafu ta minappasirang. Onu baka marespeto  anna minaddios ira gafu laman ta nituddu yatun na maganada nira. Ngem ta kononaggadda, kakuruganna ay kuruga mapakatannang mabba ira. Ari mabbayag, mallawan noka nu anni talaga i affutu-futuadda.​—Luc. 6:45.

⁵ Karuan gapa ay ari nga minappasirang onu prangka, ngem ari gapa ira nga mapakatannang. (Juan 1:46, 47) Ngem danuri egga komfiansada ta baggida ay mawag tu ariadda mattalo ta sarilida nga abilidad tapenu ariadda nga mabbalin tu minappakatannang. Minappasirang tam man anna maabilidad onu ari, mawag tu gigiammuattam i mabbalin tu kurug nga minappakalinno.

6. Gitta na mabibbig ta 1 Corinto 15:10, anni i mala tam nga leksion ta ehemplo ni apostol Pablo?

⁶ Ikonsidera i angngarigan ni apostol Pablo. Kappabbaw i nipangusa nisa ni Jehova nga mangipataddag tu bagu ira nga kongregasion ta aru nga siudad. Posible gapa nga mas aru i nakuana ta ministerio anne ta maski sinni nga apostol ni Jesu-Cristo. Ngem ari nga niyatannang ni Pablo i baggina kumpara ta wawwaragina. Mapakalinno nga nikagina: “Sakan i kalinnakkan ta paddia-paddian ta ngamin nga apostol. Ari ngà paga lagu nga mepangngo nga magalan tu apostol ta zinara-darum ku i iglesia na Dios.” (1 Cor. 15:9) Ngem makagi ni Pablo nga makasta i sinaddagna kani Jehova, ari tu megafu ta kualidad onu annangnguana ira, nu ari, gafu ta ari matuku-tukug nga allo na Dios. (Bibbigan i 1 Corinto 15:10.) Makasta nga ehemplo na kinapakalinno si Pablo. Turi ta sinurakanna i Cristiano ira ta Corinto, arianna nga niparayag i baggina, maski nu egga karuan nga nakkritika nisa!​—2 Cor. 10:10.

7. Kunnasi nga nipasingan na tadday nga prominente nga brother ta moderno nga tiempo nga minappakalinno yayya?

⁷ Aru ngana nga aripan ni Jehova i napagaram ta istoria na pattolay ni Brother Karl  F. Klein, nga nasserbi bilang miembro na Manangngal nga Baggi. Ta istoria na pattolena, mapakalinno nga istorian ni Brother Klein i aru nga pakkafian anna problemana. Angngariganna, pinuruebanna nga mallayyagayya ta babalay ta ollollu pagalaman turi ta 1922. Fermi nga nazigatan yayya, yatutta arianna vuluvuga nga kingngua yatun ta tumunug nga dua ragun. Ta pappasa na tiempo, ta passerbina ta Bethel, nattaki i nonona kabalinna nga nakalawa tu tabarang. Nakaekspiriensa gapa yayya tu nervous breakdown megafu ta stress anna avvuru-vurung ngem nammapia gabbalaman yayya. Ngem napakaru nga kappagayayya anna importante ira nga asayment i neyawa nisa. Fugurammu yatun nga kinapakalinnona nga aminan i pakkafianna ira maski nu prominente yayya! Aru nga wawwaragi i magustuadda i prangka anna makapagaram nga istoria na pattolay ni Brother Klein. *

8. Kunnasi ittam moffunan na 1 Pedro 5:6 nga malippawa nga mapagayayya si Jehova megafu ta kinapakalinno tam?

⁸ I pinaka-importante nga rasottam nga kultiban i kinapakalinno ay tapenu mapagayayya tam si Jehova. Nipakanawag yaw ni apostol Pedro. (Bibbigan i 1 Pedro 5:6.) Kunnaw i komento na libru nga “Halika Maging Tagasunod Kita” meyannung ta nitura ni Pedro: “I papparayag ay megitta ta lason. Delikadu i efekto natun. Maski i pinakama-uto nga tolay ngem maparayag ay mabbalin tu awan tu serbina ta Dios. Ngem i minappakalinno ay egga i serbina kani Jehova. . . . Magayayya . . . [yayya] nga bala-balakkakka ta kinapakalinno mu.” * Nu kunnatun, egga kari paga i iddanamattam nga mas mapia anne ta mapagayayya i futu ni Jehova?​—Prov. 23:15.

9. Ngatta kayà na totolay i makiddukko nittam nu minappakalinno ittam?

⁹ Fuera paga ta mapagayayya tam si Jehova, mabenefisiowattam nu kultibattam i kinapakalinno. Nu minappakalinno ittam, kayà na totolay i makiddukko nittam. Tapenu malippawa tam nu ngatta, ipetam i baggi tam ta situasion na tanakuan. (Mat. 7:12) Pilippiga laman nittam i magayayya nga makilallang ta totolay nga ipipilitda i kayàda anna mammanaki nga akseptan i suhestion na tanakuan. Katulia natun, makapabannay i makilallang ta kapangngurug tam nu ipasingadda i ‘pangiddu, allo, anna pappakalinno.’ (1 Ped. 3:8) Nu kakayà tam i makiddukko ta kunnatun nga totolay,  kunnatun gapa ira nittam​—nu laman ta minappakalinno gapa ittam.

10. Ngatta mas malogon nga maattamman na minappakalinno nga totolay i problema ira ta pattolay?

¹⁰ Makkasta i pattoletam nu minappakalinno ittam. Kakuruganna, awayyana nga maka-obserba ittam tu gannug nga ari fustu onu ari patas ta pattolay. Kinagi ni Patul Solomon: “Nakasingan ngà tu aripan ira nga agga-kabayu ngem lumaka-lakag laman i prinsipe ira nga gittana aripan.” (Ecl. 10:7) Nu mittan, ari medayaw danuri talentadu. Ngem nu sinni paga danuri ari talentadu, ira i medayaw. Ngem nalippawa ni Solomon nga mawag nakuan nga akseptattam i realidad na pattolay imbes nga mannegatibo ta sirkumstansia ira. (Ecl. 6:9) Nu minappakalinno ittam, mas malogon nittam nga akseptan i ganna-gannug ta pattolay nga ari kuruga makasta.

11. Ngatta mawag tam i mappakalinno nu makalawa ittam tu tabarang?

¹¹ Kadaggaw, meparubang tam ta oportunidad nga mamurueba ta kinapakalinno tam. Ikonsidera tam i karuan nga situasion. Nu matabarangngan ittam. Nonopattam nakuan nga nu egga i manabarang nittam, awayyana nga serioso nga gannug i nakua tam. Tatun ira nga situasion, baka i ollu nga reaksiottam ay panakitan i tabarang. Awayyana nga kritikattam i nanabarang nittam onu i panabaranna. Ngem nu minappakalinno ittam, ipasingattam i balanse nga pagimamma.

12. Segun ta Proverbio 27:5, 6, ngatta appresiattam nu egga i manabarang nittam? Iyilustra.

¹² Appresian na minappakalinno nga tolay i tabarang. Tapenu iyilustra: Imajinammu nga egga ka ta study. Kabalimmu nga naka-istoria i aru ta wawwaragi, egga i nanguggung nikaw ta aggig anna masippo nga kinagina nikaw nga egga i nesingit nga makan ta ngipammu. Siguradu nga mepasiranakka. Ngem ari kari tu appresiammu nga kinagina nikaw yatun? Awayyana paga lagu nga nanono mu nga egga nakuan i nangikagi nikaw tatun ta gafu pagalaman! Kunnatun gapa, mapakalinno ittam nakuan nga appresian i kapangngurug tam nga naggutu nga tabarangngan ittam nu kawagan. Imammatattam yatun nga kofun, ari tu kontra tam.​—Bibbigan i Proverbio 27:5, 6; Gal. 4:16.

13. Kunnasi tam mepasingan i kinapakalinno nu makalawa i tanakuan tu pribilehio ta passerbi?

¹³ Nu makalawa i tanakuan tu pribilehio ira ta passerbi. “Nu masingakku i tanakuan nga makalawa tu pribilehio, nononopakku nu ngatta ari tu sakan i napili,” inamin na tadday nga elder nga mangngagan tu Jason. Nakatageno ka  ngana kari tu kunnatun? Ari nga marake nu “makkaraga” tam tu mas aru nga pribilehio. (1 Tim. 3:1) Ngem, immugurattam nakuan i appana-panono tam. Nu ariattam magimmugug, pattalovuattam i kinapakatannang ta giffutuattam. Angngariganna, baka nononopan na tadday nga brother nga yayya i pinaka-kualipikadu ta tadday nga pribilehio ta kongregasion. Onu baka nononopan na sister, ‘Mas kualipikadu i atawà anne tatun nga brother!’ Ngem, nu talaga minappakalinno ittam, lillitattam i kunnatun nga kinapakatannang.

14. Anni i magigiammu tam ta reaksion ni Moises turi ta nakalawa i tanakuan tu pribilehio ira?

¹⁴ Makagigiammu ittam ta reaksion ni Moises turi ta nakalawa i tanakuan tu pribilehio ira. Naappresia ni Moises i annunganna nga mangirollu ta nasion na Israel. Anni i reaksionna ni Moises turi ta niddan ni Jehova i karuan tu pribilehio nga kuan i karuan ta trabahuna? Ari yayya nga nappassil. (Num. 11:24-29) Mapakalinno yayya anna nipamavulunna i tanakuan nga uffunadda yayya nga mamanunnu ta totolay. (Ex. 18:13-24) Mas aru ngana i lallaki nga mangasikasu ta Israelita ira anna ari ngana nga mabayag i paginnagda ta desision. Ipasingan natun nga mas importante kani Moises i pammakapianan na tanakuan anne ta mismu ira nga pribilehiona. Talaga kakkasta nga ehemplo para nittam! Daddammattam nga nu kayà tam nga egga i serbi tam kani Jehova, mas masingan nakuan i kinapakalinno tam anne ta abilidad tam. Maski nu “atannang si Jehova, asikasuanna danuri minappakalinno.”​—Sal. 138:6, NW.

15. Anni nga bagu nga sirkumstansia i neparubang ta wawwaragi?

¹⁵ Nu meparubang ittam ta bagu nga sirkumstansia. Ta nappasa nga daga-ragun, aru danuri wawwaragi tam nga piga dagun ngana nga massesserbi kani Jehova i nanguli i asaymentda. Angngariganna, turi 2014, i direksion na organisasion ay awan ngana tu manangngal ta distrito, yatutta nekiddaw ta manangngal ira ta distrito kunne na gapa ta gi-attawadda nga alawatadda i bagu nga asaymentda.  Tatun lagapa nga dagun, ari ngana nga masserbi bilang manangngal ta sirkito danuri magedad tu 70. Danuri gapa brother nga maddagun tu 80 onu maturu paga ay ari ngana nga masserbi bilang koordineytor na elder ira. Kunne paga, ta nappasa nga daga-ragun, aru ta familia na Bethel i nare-asayn bilang payunir. Mawag gapa nga panawan na karuan i asaymentda megafu ta taki, obligasion ta familia, onu tanakuan paga nga rason.

16. Kunnasi nga nepasingan na wawwaragi i kinapakalinno ta pakibagayda ta panguli na situasiodda?

¹⁶ Ari nga mabi para taw nga wawwaragi i makibagay ta bagu nga serbisiu. Siguradu nga dakal i pangayada ta dati nga asaymentda, anna magga tinagibalorda yatun ta piga nga dagun. Maekspiriensa na karuan i “maddaddam” durante nga makibagay ira ta panguli na situasiodda. Ngem, masanay lagapa noka ira ta panguli. Ngatta? Gafu yatun ta ayada kani Jehova. Ammuda nga dedikadu ira ta Dios​—ari tu ta trabahu, ta pribilehio, onu ta asayment. (Col. 3:23) Magayayya ira nga itulu-tuloy i passerbida kani Jehova nga sigga-pakalinno ta adde na mawayyada. ‘Ipammakataloda ngamin i ikavurungadda’ nisa megafu ta ammuda nga ikavurunganna ira.​—1 Ped. 5:6, 7.

17. Ngatta magayayya ittam nga pagaramman ittam na Uvovug na Dios nga kultiban i kinapakalinno?

¹⁷ Ari kari nga magayayya ittam nga pagaramman ittam na Uvovug na Dios nga kultiban i kinapakalinno? Nu kultibattam yaw nga kakkasta nga kualidad, mabbenefisio ittam anna i tanakuan. Mawayya tam nga marubang i problema ira ta pattolay. Pinaka-importante ta ngamin, maddukko ittam ta nelangitan nga Yama tam. Magayayya ittam nga mammuan nga maski nu yayya ay “Tadday nga Atannang anna Dakal,” iddukan anna tagibaloranna danuri minappakalinno nga aripanna!​—Isa. 57:15.