1. Anni i situasion ni apostol Juan turi ta 95 C.E?

TA 95 C.E., marigi-riga i situasion ni apostol Juan. Lakay ngana yayya anna agga-fuku ta isla na Patmos, anna posible nga yayya ngana laman i matolay nga apostol. (Nep. 1:9) Ammuna nga egga ira i magapostata nga mangituddu tu falsu ira nga tuddu nga mamassirina ta Cristiano ira. Megafu tatun, gittana aranni ngana nga mofu i kurug ira nga Cristiano.​—Jud. 4; Nep. 2:15, 20; 3:1, 17.

2. Segun ta Nepakannammu 7:9-14, anni i kappagayayya nga sirmata i nalawa ni Juan? (Innan i letratu ta vungun.)

² Durante taw nga marigi-riga nga situasion ni Juan, niddan yayya na Dios tu kappagayayya nga sirmata na mappange. Tatun nga sirmata, nekagi ta anghel ira nga fugaddadda i makadaral ira nga paddag na dakal nga ziga adde ta ultimu nga kaselyo na tadday nga grupo na aripan. (Nep. 7:1-3) Mabbilang yatun nga grupo tu 144,000 nga makipammaguray kani Jesus ta langi. (Luc. 12:32; Nep. 7:4) Egga paga tanakuan nga grupo nga tinukoy ni Juan​—kuruga dakal nga grupo yatun yatutta kinagina: “Ta kabalin naw, nasingak-ku i magaru nga totolay nga awan tu makabilang ta karu da! Madduma-ruma i naggagafuanad-da nga nasion, rasa, tribu, anna madduma-ruma i paguvovug da. Agga-taddag ira ta arubang na trono anna Kordero.” (Bibbigan i Nepakannammu 7:9-14.) Nonopan ngana laman i ayayya ni Juan nga nammuanna nga ta mappange, napakaru noka i mepangngo i addayoda ta Dios!

3. (a) Ngatta pasikannan nakuan na sirmata ni Juan i pangurug tam? (b) Anni i ammuattam taw nga artikulo?

³ Nu kunnasi nga napasikan i pangurug ni Juan tatun nga sirmata, yammanno nakuan gapa nga pasikannan natun i pangurug tam gafu ta mattolay ittam ngana ta tiempo nga ketuppalan  natun nga sirmata! Ta tiempo tam, minillion i mamegafu nga maddayaw kani Jehova anna iddanamadda nga mepaliag ira ta dakal nga ziga anna mattolay tu mannanayun ta davvun. Taw nga artikulo, ammuattam nu kunnasi nga walu nga dekada ngana i nappasa, niyammammu ni Jehova i panakkilalan natun nga magaru nga totolay. Kabalinna ikonsidera tam i dua nga aspeto natun nga grupo: (1) i karuda anna (2) i nadduruma nga naggafuan na miembrona ira. Danaw nga punto nakuan i mamasikan ta pangurug na ngamin nga magiddanama nga mesali tatun nga nabendisionan nga grupo.

4. Anni nga kinakurug ta Biblia i ari malippawa na Kakristianuan, anna kunnasi nga neruma i kurugan na Estudiante ira na Biblia?

⁴ Ari nga ituttuddu na Kakristianuan i kinakurug ta Biblia nga egga noka i tiempo nga mattolay tu mannanayun ta davvun danuri minattuppal nga totolay. (2 Cor. 4:3, 4) Magaru ta relihion na Kakristianuan sangawe i mangituddu nga umay ta langi i ngamin nga masippo nga totolay nu matay ira. Ngem neruma i kurugan na baddi nga grupo na Estudiante ira na Biblia nga nangipublisa tu Watch Tower mamegafu ta dagun 1879. Nalippawada nga itoli noka na Dios i Paraiso ta davvun anna minillion noka nga minattuppal nga totolay i mattolay taw ta davvun​—ari tu ta langi. Ngem nappasa labbi i tiempo nigeda nga natindian tu manawag nu sinni i tukuyan danaw nga minattuppal nga totolay.​—Mat. 6:10.

5. Anni i dati nga kurugan na Estudiante ira na Biblia meyannung ta 144,000?

⁵ Siempre, nalippawa na Estudiante ira na Biblia maggafu ta Katurakan nga egga i grupo na totolay nga “natavvu ta tanga-ravvunan” tapenu makipammaguray kani Jesus ta langi. (Nep. 14:3) I miembro ira natun nga grupo ay 144,000 nga matalikarag anna dedikadu nga Cristiano, nga sigga-matalo nga nasserbi ta Dios durante ta keggada ta davvun. Anni gapa i kurugadda meyannung ta magaru nga totolay?

6. Anni i dati nga kurugan na Estudiante ira na Biblia meyannung ta magaru nga totolay?

⁶ Ta sirmata ni Juan, nasinganna nga “agga-taddag [i magaru nga totolay] ta arubang na trono anna Kordero.” (Nep. 7:9) Nakkonklusion i Estudiante ira na Biblia nga maddian ta langi i magaru nga totolay nga kagitta gapa na 144,000. Nu parehu nga maddian noka ta langi i 144,000 anna i magaru nga totolay, anni gafu i nadduman natun nga dua nga grupo? Abbo na Estudiante ira na Biblia nga i magaru nga totolay ay danuri Cristiano nga ariadda kuruga natuttul tu mapia i Dios ta keggada ta davvun. Maski nu natuttulda i moral ira nga estandarte na Biblia, baka i karuan nira ay nattalupaddian nga miembro na relihion na Kakristianuan. Nakkonklusion i Estudiante ira na Biblia nga ira danuri ayatadda i Dios ngem ari tu makalanno i ayada tapenu makualipika ira nga makipammaguray kani Jesus. Megafu ta ari tu kuruga masikan i pangayada ta Dios, kualipikadu laman ira nga umay ta langi anna manaddag ta arubang na trono, ari nga magitubang ta trono.

7. Segun ta Estudiante ira na Biblia, sinni danuri maddian ta davvun durante na Tanga-rivu Dagun, anna anni i kurugan na Estudiante ira na Biblia meyannung ta matalo nga lallaki gari?

⁷ Sinni gafu i maddian ta davvun? Kinurug na Estudiante ira na Biblia nga sonu egga ngana ta langi i 144,000 anna i magaru nga totolay, i minillion gapa nga tanakuan nga totolay ay meddan tu tiansa nga mattolay ta davvun tapenu magayayya ira ta benefisio ira na Tanga-rivu Dagun nga Pammaguray ni Cristo. Ari nga inekspekta na Estudiante ira na Biblia nga danatun nga minillion nga totolay ay masserbi kani Jehova nige nga mamegafu i Pammaguray ni Cristo. Imbes tu kunna, abboda nga  danatun nga totolay ay makagigiammu meyannung kani Jehova durante natun nga Tanga-rivu Dagun. Kabalinna, danuri nanuttul ta estandarte ira ni Jehova ay mabendisionan tu mannanayun nga inango ta davvun, ngem danuri narrebelde ay madaral. Nanonoda gapa nga karuan turi ira ta “mammaguray” ta davvun tatun nga tiempo na Tanga-rivu Dagun ay umay noka ta langi ta ultimu na Tanga-rivu Dagun. Kurugadda gapa nga nelagum taw nga “mammaguray” i karuan ta “mepappangngo nga totolay gari” (matalo nga lallaki nga natay nige na tiempo ni Cristo) nga mapaginnolay durante na Tanga-rivu nga Dagun.​—Sal. 45:16.

8. Anni i tallu nga grupo nga gittana egga papelda ta gakkag na Dios?

⁸ Abbo gafu na Estudiante ira na Biblia nga egga i tallu nga grupo: (1) i 144,000 nga makipammaguray kani Jesus ta langi; (2) i magaru nga totolay nga ari kuruga matalo nga Cristiano, nga manaddag noka ta arubang na trono ni Jesus ta langi; anna (3) i minillion nga totolay nga matudduan noka ta dala-dalan ni Jehova durante na Tanga-rivu Dagun nga Pammaguray ni Cristo. * Ngem ta natunno nga tiempo ni Jehova, inuffunanna ira tapenu malippawada yaw nga topiko tu mas manawag.​—Prov. 4:18.

9. (a) Kunnasi nga i magaru nga totolay ta davvun ay makataddag “ta arubang na trono anna Kordero”? (b) Ngatta rasonable yaw nga nannawag nga pakalippawa ta Nepakannammu 7:9?

⁹ Ta 1935, manawag nga nalippawa na Saksi ira ni Jehova nu sinni i mabbuu ta magaru nga totolay ta sirmata ni Juan. Nalippawada gabbalaman nga i magaru nga totolay ay ari tu literal nga umay noka ta langi anna tumaddag “ta arubang na trono anna Kordero.” Kuadda lallagu yatun tu simboliko. Maski nu ta davvun i paddianadda, mawayya na magaru nga totolay nga tumaddag “ta arubang na trono” gukaban na parrekunnisi ta autoridad ni Jehova anna pakimoray ta soberaniana. (Isa. 66:1) Makataddag ira ‘ta arubang na Kordero’ gukaban na pangipasingan tu pangurug ta sakrifisio nga tavvu ni Jesus. Kunnatun gapa i ideya nga mabibbig ta Mateo 25:31, 32 nu sitaw “ngamin i totolay”​—nelagum i marake—​ay makagi nga “magamma-ammung noka ta arubang” ni Jesus ta naglorian nga tronona. Manawag nga danatun nga totolay ay egga ta davvun, ari tu ta langi. Rasonable yaw nga nanguli nga pakalippawa. Iyesplika natun nu ngatta ari nakagi ta Biblia nga umay ta langi i magaru nga totolay. Tattadday laman nga grupo i nepromesan nga mattolay tu mannanayun ta langi​—i 144,000 nga “mammaguray ira [noka] ta tanga-ravvunan” kavulu si Jesus.​—Nep. 5:10.

10. Ngatta mawag nga matudduan i magaru nga totolay ta dala-dalan ni Jehova nige nga mamegafu i Tanga-rivu Dagun?

¹⁰ Namegafu turi 1935, nalippawa gabbalaman na Saksi ira ni Jehova nga i magaru nga totolay ta sirmata ni Juan ay tadday nga grupo na matalo nga Cristiano nga magiddanama nga mattolay tu mannanayun ta davvun. Tapenu mepaliag ira ta dakal nga ziga, mawag tu matudduan yatun nga grupo ta dala-dalan ni Jehova nige nga mamegafu i Tanga-rivu Dagun. Mawag tu egga i masikan nga pangurugda tapenu ‘egga i sikadda nga mallilli taw ta ngamin nga mesissimmu’ nige na Tanga-rivu Dagun nga Pammaguray ni Cristo.​—Luc. 21:34-36.

11. Ngatta inabbo na Estudiante ira na Biblia nga egga karuan nga mapaginnolay nga umay ta langi kabalin na Tanga-rivu Dagun?

¹¹ Kunnasi gapa i pagimamma nga egga noka i karuan nga kuruga matalo ta davvun nga mapaginnolay nga umay ta langi kabalin na Tanga-rivu Dagun? Mabibbig yatun nga posibilidad aru dagun ngana i nappasa ta Pebrero 15,  1913 nga isyu na The Watch Tower. Baka egga i mannono tu kunnaw, ‘Ngatta gapa ta danuri matalo nga aripan na Dios gari nga mapaginnolay noka ay maddian laman ta davvun, ngem danuri Cristiano nga ari kuruga matalo ay mabala-balakkan nga mattolay ta langi?’ Siempre, yatun nga appanono ay influwensiadu naw nga dua nga ugo nga pagabbo: (1) nga i magaru nga totolay ay maddian ta langi anna (2) nga i magaru nga totolay ay danuri ari kuruga matalo nga Cristiano.

12-13. Anni i parehu nga ammu na nazelugan anna na magaru nga totolay meyannung ta bala-baloda?

¹² Ngem kagitta na nagigiammu tam, namegafu ta 1935, mananawag nga nalippawa na Saksi ira ni Jehova nga danuri mapaliag ta Armagedon i tukuyan na magaru nga totolay ta sirmata ni Juan. Ira danuri i “nakeyattam ta nepallo nga kadara-darum” taw ta davvun, anna “kudda nga ikukkulle, ‘I kapaliag ay maggafu ta Dios tam nga agga-itubang ta trono, tuange gapa ta Kordero!’” (Nep. 7:10, 14) Kunne na paga, ituddu na Katurakan nga danuri napaginnolay nga mattolay ta langi ay makalawa tu “mas mapia” anne ta matalo nga lallaki gari. (Heb. 11:40) Yatutta matalikarag ngana i wawwaragi tam nga magiggimbita tu totolay tapenu masserbi kani Jehova anna mapeggan tu iddanama nga mattolay tu mannanayun ta davvun.

¹³ Magayayya danuri parte na magaru nga totolay ta iddanamada. Nalippawada nga si Jehova i mappili nu sitaw i passerbian na matalo ira nga aripanna, nu ta langi onu ta davvun. Parehu nga ammu na nazelugan anna na magaru nga totolay nga posible laman i bala-baloda megafu ta ari kapaga-pagan nga inaggallallo ni Jehova gukaban na sakrifisio nga tavvu ni Jesu-Cristo.​—Roma 3:24.

14. Kabalin na 1935, ngatta aru i mannono nu kunnasi matuppal i profesiya meyannung ta magaru nga totolay?

¹⁴ Kabalin nga nannawag i pakalippawa na totolay ni Jehova ta 1935, aru lagapa i mannono nu kunnasi nga danuri mattolay ta davvun ay mabbalin tu mas aru i biladda. Angngariganna, 12 anios pagalaman si Ronald Parkin turi ta nannammuan i panakkilalan na magaru nga totolay. “Tatun nga tiempo,” kunna, “ma-56,000 i publisher ira ta interu mundo anna nazelugan i mas aru nira. Yari tu gittana baddi laman i bilang na magaru nga totolay.”

15. Kunnasi nga nattulu-tuloy i pagammung ta magaru nga totolay?

¹⁵ Ngem ta tumunug ira nga dekada, egga ira i misionero nga neyasayn ta aru nga nasion, yari tu tulu-tuloy i pinakkaru na bilang na Saksi ira ni Jehova. Tapus turi ta 1968, negafu i programa para ta paggigiammu tu Biblia ta totolay gukaban na libru nga The Truth That Leads to Eternal Life. Megafu ta simple i pangipakanawag  naw ta kinakurug ta Biblia, mas aru nga totolay i minaranni kani Jehova. Ta unag laman na appa nga dagun, maturu tu 500,000 nga bagu nga disipulos i nabawtisowan. Durante nga makkakafi ngana i pakapangngua na Katolisismo ta Latin America anna ta tanakuan nga nasion kunne na gapa i pangalsa ta restriksion na trabahu tam ta Eastern Europe anna ta parte ira na Africa, minillion paga i nabawtisowan. (Isa. 60:22) Kanni laman ira nga dagun, nangilawan i organisasion ni Jehova tu aru nga efektibo nga rimienta ira tapenu moffunan i totolay nga gigiammuan i ituttuddu na Biblia. Manawag gafu nga inammung ni Jehova i magaru nga totolay nga mabbilang ngana tu maturu tu walu nga million ta maddaggun.

16. Sitaw i naggafuan na magaru nga totolay?

¹⁶ Turi ta nitura ni Juan i sirmatana, kinagina nga i magaru nga totolay ay “madduma-ruma i naggagafuanad-da nga nasion, rasa, tribu, anna madduma-ruma i paguvovug da.” Kaparehu natun i dati nga niprofesiya ni profeta Zacarias. Niturana: “Tatun nga agga-aggaw, mafulu nga lallaki nga naggafu ta ngamin nga lengguahe na nasa-nasion i maggafù, wan, gafutadda tu mapia i sinnun na tadday nga Judio anna kagiadda: ‘Kayàmi i mevulu nikamu, ta naginnami nga i Dios ay egga nikamu nga totolay.’”​—Zac. 8:23.

17. Anni i maddaggun nga makua tapenu moffunan i totolay ta ngamin nga nasion anna lengguahe?

 ¹⁷ Nalippawa na Saksi ira ni Jehova nga tapenu maammung i totolay ta ngamin nga lengguahe, mawag tu melayyagayya i mapia nga dumug ta aru nga lengguahe. Maturu tu 130 dagun ittam ngana nga mattattransleyt tu material ira para ta paggigiammu tu Biblia, ngem ta maddaggun kukukuattam i kakaruan nga transleysion ta interu historia ta ginatu nga lengguahe. Manawag nga milagro ni Jehova ta moderno nga aggaw i pagamma-ammung ta magaru nga totolay ta ngamin nga nasion. Megafu ta Biblia anna ta nebase-Biblia ira nga literatura ta aru nga lengguahe, nattaradday ta paddayaw kani Jehova danaw nga grupo maski nu naggafu ira ta nadduruma nga nasion. Anna nakilala gapa i Saksi ira ta matalikarag nga pallayyagayyada anna ta ayada nga kunna mawwaragi. Anni mabba nga pamasikan ta pangurug yatun!​—Mat. 24:14; Juan 13:35.

18. (a) Metonos ta Isaias 46:10, 11, ngatta ariattam makaddag ta pattuppal ni Jehova ta profesiya meyannung ta magaru nga totolay? (b) Ngatta ari matageno danuri magiddanama nga mattolay ta davvun nga neyetukan ira?

¹⁸ Egga i rasottam tapenu magayayya ta profesiya meyannung ta magaru nga totolay! Ariattam ngana makaddag nu makapabbaw i pattuppal ni Jehova tatun nga profesiya. (Bibbigan i Isaias 46:10, 11.) Dakal i appabalo danuri parte na magaru nga totolay kani Jehova ta iddanama nga niyawana nira. Ariadda matageno nga gittana neyetukan ira megafu ta ari ira nga nazelugan na espiritu na Dios tapenu makipasserbi kani Jesus ta langi. Ta interu nga Katurakan, makabibbig ittam tu matalo nga lallaki anna babbay nga negiya na masanto nga espiritu; ngem ari ira nga parte na 144,000. Tadday tatun si Juan Bautista. (Mat. 11:11) Si David paga i tadday tatun. (King. 2:34) Ira anna i tanakuan nga aru paga ay mapaginnolay noka ta paraiso nga davvun. Ira ngamin​—kavulu i magaru nga totolay—​ay mapeggan tu oportunidad nga ipasingan i kinamataloda kani Jehova anna ta soberaniana.

19. Nu malippawa tam i kebalinan na sirmata ni Juan meyannung ta magaru nga totolay, anni nakuan i kuattam?

¹⁹ Yaw pagalaman i ollollu nga pinattaradday na Dios i minillion nga totolay ta ngamin nga nasion tapenu dayawadda yayya. Maski nu ta langi onu ta davvun i iddanama tam, mawag tu kuattam i adde na mawayya tam tapenu manguffun tu mas aru nga totolay nga mabbalin tu parte na magaru nga totolay na “tanakuan nga karneru.” (Juan 10:16, NW ) Aranni ngana nga irattal ni Jehova i dakal nga ziga nga manaral ta ngamin nga gobiernu anna relihion nga namazziga ta totolay. Ngamin nga miembro na magaru nga totolay ay egga i makakkasta nga oportunidadda. Makapasserbi ira kani Jehova ta davvun adde ta mannanayun!​—Nep. 7:14.