MAGIGIAMMU NGA ARTIKULO 36
Makasta nga Balita i Armagedon!
‘Pinattaraddeda ira ta lugar nga Armagedon.’—NEP. 16:16.
KANSION 150 Alegan i Dios Tapenu Mapaliag
SUMARIO *
1-2. (a) Ngatta makasta nga balita para ta totolay i Armagedon? (b) Anni ira nga pakkiavu i ikonsidera tam taw nga artikulo?
NAGINNANU ngana kari nga inusa na totolay i termino nga “Armagedon” para ta nuklear nga gerra onu ta kadaral na davvun? Ngem ta Biblia, makasta nga balita i Armagedon anna rason yatun tapenu magayayya ittam! (Nep. 1:3) Ari daralan na gerra na Armagedon i totolay, nu ari, ipaliagna ira! Kunnasi?
2 Ipasingan na Biblia nga ipaliag na gerra na Armagedon i totolay gukaban na pamagultimuna ta pammaguray na totolay. Mepaliag natun nga gerra i totolay gukaban na panaral ta kinamarake anna pamattalupaddian ta kinatunung. Mepaliag paga natun i totolay gukaban na papprotekta ta davvun ta panara-daral. (Nep. 11:18) Tapenu mas malippawa danatun nga punto, ikonsidera tam i appa nga pakkiavu: Anni i Armagedon? Anni ira i mesimmu nige natun? Kunnasi ittam melagum ta mapaliag ta Armagedon? Kunnasi ittam makapattalupaddian nga matalo durante nga aranni ngana i Armagedon?
ANNI I ARMAGEDON?
3. (a) Anni i kebalinan na termino nga “Armagedon”? (b) Base ta Nepakannammu 16:14, 16, ngatta makagi tam nga ari tu literal nga lugar i Armagedon?
3 Bibbigan i Nepakannammu 16:14, 16. Mittan laman nga nallawan i uvovug nga “Armagedon” ta Katurakan, anna naggafu yatun ta Hebreo nga termino nga kebalinanna ay “Vukig na Megido.” (Nep. 16:16) I Megido ay siudad na Israel gari. (Jos. 17:11) Ngem i Armagedon ay ari nga tumukoy ta maski anni nga literal nga lugar ta davvun. I kakuruganna, tumukoy yatun ta situasion nu sitaw mattaradday nga mangontra kani Jehova i “ngamin nga patul ira ta tanga-ravvunan.” (Nep. 16:14) Ngem, taw nga artikulo, usattam gapa i termino nga “Armagedon” tapenu tukuyan i gerra nga tumunug insigida sonu mattaradday i ngamin nga patul ira ta tanga-ravvunan. Kunnasi tam ammu nga tumukoy i “Armagedon” ta simboliko nga lugar? Ollu, awan tu literal nga vukig na Megido. Mekadua, atazzi i lugar ta pallevu na Megido tapenu mapattaradday i “ngamin nga patul ira ta tanga-ravvunan” anna i suddaluda ira tuange ta armasda ira nga panggerra. Mekatallu, gitta na magigiammu tam taw nga artikulo, mamegafu noka i gerra na Armagedon sonu atakeyan na “patul ira” na mundo i totolay na Dios nga nakkewara ta interu mundo.
4. Ngatta ningagan na Dios i ultimu nga dakal nga gerrana ta lugar nga Megido?
4 Ngatta ningagan ni Jehova i ultimu nga dakal nga gerrana ta lugar nga Megido? Ta tiempo na Biblia, aru nga gerra i nesimmu ta Megido anna ta aranni nga Tana na Jezreel. Egga ira i tiempo nga direkta nga inuffunan ni Jehova i totolena tatun ira nga gerra. Angngariganna, “ta dana-danum na Megido,” zinuffunan na Dios i Israelita nga si Hues Barak tapenu affutan i armada na Canaanita nga nirollu ni Sisera. Nappabalo kani Jehova si Barak anna i profetisa nga si Debora ta milagro nga pinavviktoriada. Nikansiodda: “Ta langi nakillaban i biti-bitun . . . kontra kani Sisera. Niyanug ira na bannag na Kison.”—Uk. 5:19-21.
5. Anni i dakal nga padduman na gerra na Armagedon ta pinakiggerra ni Barak?
5 Niyultimu da Barak anni Debora i kansiodda tu kunnaw: “Madaral nakuan i kalabammu ira, O Jehova, ngem danuri mangaya nikaw ay megitta nakuan ta bilag nga mallattuag nga mananawag.” (Uk. 5:31) Ta Armagedon, siguradu nga maffu noka i kalaban ira na Dios, ngem mapaliag danuri magiddu ta Dios. Ngem egga paga i dakal nga pakkaduman natun nga dua nga gerra. Ta Armagedon, ari noka makillaban i totolay na Dios. Ariadda vuluvuga noka nga manammi tu armas! I ‘sikadda ay i pattalupaddian nga kalmadu anna i pangipasingan tu pattalo’ kani Jehova anna ta nelangitan nga armadana.—Isa. 30:15; Nep. 19:11-15.
6. Kunnasi nga affutan ni Jehova i kalabanna ira ta gerra na Armagedon?
6 Kunnasi noka nga affutan na Dios i kalabanna ira ta gerra na Armagedon? Posible nga nadduruma noka i usanna. Awayyana nga usan i lunig ira, allalagu, anna kili-kila. (Job 38:22, 23; Eze. 38:19-22) Puedena nga parralabanan i kalabanna ira. (2 Cro. 20:17, 22, 23) Awayyana usan i anghel ira tapenu patayan i marake ira. (Isa. 37:36) Maski anni paga nga metodo i usan na Dios, siguradu i pavviktoriana. Ngamin nga kalabanna ay madaral noka. Anna ngamin nga matunung ira ay mapaliag noka.—Prov. 3:25, 26.
ANNI IRA I MESIMMU NIGE NA ARMAGEDON?
7-8. (a) Segun ta 1 Tesalonica 5:1-6, anni nga nerumu-ruma nga proklamasion i ikulle na lider ira na mundo? (b) Ngatta peligroso yaw nga kinaladdug?
7 Meproklama i “imammo anna seguridad” nige na “aggaw ni Jehova.” (Bibbigan i 1 Tesalonica 5:1-6, NW.) Ta 1 Tesalonica 5:2, tumukoy i “aggaw ni Jehova” ta “dakal nga ziga.” (Nep. 7:14, NW ) Kunnasi tam mammuan nu kanni mamegafu i dakal nga ziga? Kagian na Biblia nittam nga egga noka i nerumu-ruma nga proklamasion. Masserbi noka yatun nga senial ta pangiyanunsio ta dakal nga ziga.
8 Yatun noka i neprofesiya nga proklamasion na “imammo anna seguridad.” Ngatta kunnatun noka i kagian na lider ira na mundo? Makipartisipa kari i lider ira na relihion? Posible. Ngem yatun nga proklamasion ay tadday mangana nga kinaladdug nga naggafu ta demonio. Yaw nga kinaladdug ay talaga peligroso megafu ta ipatagenona ta totolay nga memammo ngana ira, ngem i kurug, mamegafu ngana i kadakallan nga ziga ta interu historia na tolay. Wan, “gavva nga duttal nira i kadaral, gitta na taki nga matageno na babay nga magana.”
Anni gafu i mesimmu ta matalo ira nga aripan ni Jehova? Awayyana nga makaddag ira ta gavva nga paddattal na aggaw ni Jehova, ngem preparadu ira noka tatun.9. Kunnasi i patturunug na panaral ni Jehova ta mundo ni Satanas?
9 Ari nga pittanan nga daralan ni Jehova i interu nga mundo ni Satanas gitta na kingnguana ta tiempo ni Noe. Lallagu, egga i dua nga parte na panaralna. Ollu, daralanna i Babilonia nga Dakal, i tangapamundowan nga imperio na falsu nga relihion. Mekadua, sonu Armagedon, daralanna i nabattang nga parte na mundo ni Satanas, nelagum ngana i pulitikal, militar, anna komersial nga sistema ira natun. Gigiammuattam ngana i detalye ira natun nga dua nga importante nga mesimmu.
10. Segun ta Nepakannammu 17:1, 6 anna 18:24, ngatta daralan noka ni Jehova i Babilonia nga Dakal?
10 “I kakastigo na babay nga madumu-rumug ta pakigannug.” (Bibbigan i Nepakannammu 17:1, 6; 18:24.) Grabe nga pamasiran ta ngagan na Dios i nirattal na Babilonia nga Dakal. Kinaladdug meyannung ta Dios i nitudduna. Kagitta na imoral nga babay, ari nga matalo kani Jehova i falsu nga relihion gafu ta suportanna i gobiernu na totolay. Inusana i pakapangnguana tapenu abusuan i miembrona ira anna pakkuartuanna ira. Aru ngana i pinatay na falsu nga relihion, nelagum ngana i aripan ira na Dios. (Nep. 19:2) Kunnasi noka nga daralan ni Jehova i Babilonia nga Dakal?
11. Anni i maporay nga “ayam nga uzzin,” anna kunnasi yatun nelagum ta ketuppal na uray na Dios meyannung ta Babilonia nga Dakal?
11 Daralan ni Jehova i “babay nga madumu-rumug ta pakigannug” gukaban na “mafulu nga taggug” na maporay nga “ayam nga uzzin.” Yaw nga figuratibo nga maporay nga ayam ay irepresenta na United Nations. Irepresenta na mafulu nga taggug i maddaggun ira nga pulitikal nga pakapangngua nga massuporta tatun nga organisasion. Ta tiempo nga sinunno na Dios, atakeyan noka danatun nga pulitikal nga pakapangngua i Babilonia nga Dakal. “Apad-da noka ngamin i kukua na ira, anna panawad-da yaya nga awan tu sissinnun na” gukaban na panga ta kinarikuna anna pangibulgar Nep. 17:3, 16) Yatun nga gavva nga kadaral—nga gittana tangaggaw laman nga mesimmu—ay kakkadda-kaddag turi ira ta massuporta nisa. Mas ngana ta nabayagna ngana nga ipara-parayag: ‘Tadday ngà nga reyna! Ari tu balu; ari ngà vuluvuga nga maraddam noka!’—Nep. 18:7, 8.
ta kinarakena. (12. Anni i ari ipamavulun ni Jehova nga kuan na nasa-nasion, anna ngatta?
12 Ari ipamavulun na Dios nga daralan na nasa-nasion i totolena. Magayayya i totolay na Dios nga nengangan ira sa, anna sinuttulda i bilinna nga panawadda i Babilonia nga Dakal. (King. 15:16, 17; Nep. 18:4) Kingnguada gapa i adde na mawayyada tapenu duffunan i tanakuan nga makapanaw ta Babilonia nga Dakal. Yatutta danuri aripan ni Jehova ay ari nga ‘mesipo ta kakastigona.’ Ngem, mapurueban lagapa i pangurugda.
Maski sitaw i paddianan na totolay na Dios ta interu mundo, mattalo ira nisa sonu mamegafu i pangatake (Innan i parapo 13) *
13. (a) Sinni i Gog? (b) Segun ta Ezekiel 38:2, 8, 9, anni i kuan na Gog ta totolay na Dios nga pamegafu na Armagedon?
13 Pangatake na Gog. (Bibbigan i Ezekiel 38:2, 8, 9.) Kabalin nga daralan ni Jehova i ngamin nga falsu nga relihion, tadday ngana laman noka i relihion ta davvun. Danuri aripan laman ni Jehova i mabattang. Siempre magga mapporay si Satanas. Ipasinganna i porena gukaban na pangusa tu “maritta nga mensahe,” i falsu nga informasion nga naggafu ira ta demonio nga manulsul ta alyansa na nasa-nasion nga mangatake ta aripan ira ni Jehova. (Nep. 16:13, 14, NW ) Yatun nga alyansa ay nagalan tu “Gog na davvun na Magog.” Sonu igafu na nasa-nasion i pangatakeda ta totolay ni Jehova, mamegafu ngana i gerra na Armagedon.—Nep. 16:16.
14. Anni noka i mammuan na Gog?
14 Mattalo i Gog ta “sikan laman na tolay”—ta militar nga pakapangnguana. (2 Cro. 32:8) Ngem mattalo ittam kani Jehova nga Dios tam nga gittana awan tu serbi natun ta nasa-nasion. Ngatta? Megafu ta maski nu makapangngua i Babilonia nga Dakal, ari yayya nga nepaliag na diosna ira ta maporay nga “ayam” anna ta ‘mafulu nga taggugna’! (Nep. 17:16) Yatutta ekspektan ni Gog nga mabina laman ittam nga affutan. “Kagitta na kunam nga mangallag ta davvun,” atakeyanna noka i totolay ni Jehova. (Eze. 38:16) Ngem mammuan noka na Gog nga nasiluan ira. Kagitta ni Faraon ta Uzzin nga Bebay, mammuan noka na Gog nga si Jehova i laba-labananna.—Ex. 14:1-4; Eze. 38:3, 4, 18, 21-23.
15. Anni ira i kuan ni Cristo tapenu mavviktoria?
15 Defensan noka ni Cristo anna na nelangitan nga armadana i totolay na Dios anna permanente nga daraladda i alyansa na nasa-nasion anna i suddaluda ira. (Nep. 19:11, 14, 15) Anni gafu i mesimmu ta kadakallan nga kalaban ni Jehova, nga si Satanas, nga nalladdug ta nasa-nasion anna nanulsul nira nga atakeyan i totolay na Dios ta Armagedon? Itabbo noka ni Jesus si Satanas tuange ta demoniona ira ta avvu nga ari nga matuku-tukug i karalamna, nu sitaw mefuku ira tu marivu nga dagun.—Nep. 20:1-3.
KUNNASI ITTAM MAPALIAG TA ARMAGEDON?
16. (a) Kunnasi tam mepasingan nga ‘ammu tam i Dios’? (b) Ngatta mabbalin tu bendision sonu Armagedon i pakannammu tam kani Jehova?
16 Maski nu nabayag tam ngana ta kinakurug onu ari, tapenu mapaliag ta Armagedon, mawag tu ipasingattam nga ‘ammu tam i Dios’ anna ‘magginna tam ta Mapia nga Dumug nga meyannung ta Yafu tam nga Jesus.’ (2 Tes. 1:7-9) ‘Ammu tam i Dios’ nu ammu tam i kayàna ira, i panakitanna ira, anna i estandartena ira. Mepasingattam paga nga ammu tam yayya nu ayatattam anna tuttulattam yayya anna iyawa tam nisa i eksklusibo nga debosiottam. (1 Juan 2:3-5; 5:3) Nu kuattam danatun, ammuan ittam gapa na Dios, yari tu mala tam i faborna. (1 Cor. 8:3) Megafu tatun, mapaliag ittam ta gerra na Armagedon!
17. Anni i kebalinan na pamarulo ta “Mapia nga Dumug nga meyannung ta Yafu tam nga Jesus”?
17 Nelagum ta “Mapia nga Dumug nga meyannung ta Yafu tam nga Jesus” i ngamin nga kinakurug nga nituddu ni Jesus, gitta na mabibbig tam ta Uvovug na Dios. Maparulo tam i mapia nga dumug nu iyaplika tam yatun ta pattoletam. Nelagum paga tatun i kanayun nga pamagollu ta interes na Pappatulan, pattolay segun ta matunung ira nga estandarte na Dios, anna pangilayyagayya ta Pappatulan na Dios. (Mat. 6:33; 24:14) Kunne na paga i passuporta ta nazelugan nga wawwaragi ni Cristo durante nga iyabagada i madammo ira nga responsibilidad nga pangilayyagayya ta mapia nga dumug anna pagangngua tu disipulos.—Mat. 25:31-40.
18. Kunnasi nga bala-balattan na nazelugan nga wawwaragi ni Cristo danuri nanguffun nira?
18 Aranni ngana nga bala-balattan na nazelugan ira nga aripan na Dios danuri “tanakuan nga karneru” ta ngamin nga pinanguffudda nira. (Juan 10:16, NW ) Kunnasi? Nige mamegafu na gerra na Armagedon, egga ngana ta langi i ngamin nga 144,000 bilang imortal nga espiritu. Parte ira na nelangitan ira nga armada nga manaral kani Gog anna protektadda i “magaru nga totolay” ni Jehova. (Nep. 2:26, 27; 7:9, 10) Wan, anni mabba nga pribilehio na magaru nga totolay nga suportadda i nazelugan ira nga aripan ni Jehova durante nga egga paga ira taw ta davvun!
KUNNASI ITTAM MAKAPATTALUPADDIAN NGA MATALO DURANTE NGA ARANNI NGANA I PANUPPALAN?
19-20. Maski anni paga i problema tam, kunnasi ittam makapattalupaddian nga matalo durante nga aranni ngana i Armagedon?
19 Durante taw ta pangurianan ira nga aggaw, aru nga totolay i magatta-attam ta problema ira. Maski kunna, puede tam lagapa nga sigga-pagayayya nga magattam. (Sant. 1:2-4) Makoffun nittam i kanayun nga napafutuan nga paddasal. (Luc. 21:36) Ariattam laman nakuan nga makimallo, nu ari, inaggaw tam nakuan nga gigiammuan i Uvovug na Dios anna monag nga pannonopan yatun, nelagum ngana i profesiya ira nga aranni ngana nga mesimmu. (Sal. 77:12) Danaw nga aktibidad, nelagum ngana i pakiparte tam ta ministerio, i mamattalupaddian nga matuyag ta pangurug anna iddanama tam!
20 Nonopan ngana laman i ayayya mu sonu madaral ngana i Babilonia nga Dakal anna sonu nabaling ngana i Armagedon! Pinaka-importante, nonopan paga i ayayya mu sonu irespeto na ngamin i ngagan na Dios anna i kepangngattanna nga mammaguray! (Eze. 38:23) Wan, makasta nga balita i Armagedon para ta makannammu ira ta Dios, mamarulo ta Anana, anna magattam adde ta panuppalan.—Mat. 24:13.
KANSION 143 Patuloy na Magbantay at Maghintay
^ par. 5 Nabayag ngana nga iinnaggan na totolay ni Jehova i Armagedon. Taw nga artikulo, gigiammuattam nu anni i Armagedon, anni ira i mesimmu nige na Armagedon, anna nu kunnasi ittam makapattalupaddian nga matalo durante nga aranni ngana i Armagedon.
^ par. 71 DESKRIPSION NA LETRATU: Importante ira nga mesimmu noka ta pallevu tam. (1) Makiparte ittam ta ministerio adde ta posible, (2) mattalupaddian i programa tam ta paggigiammu, anna (3) mattulu-tuloy i pattalo tam ta proteksion na Dios.
^ par. 85 DESKRIPSION NA LETRATU: Pulis ira nga tallungadda ngana i balay na tadday nga familia nga Cristiano nga mattalo nga ammu ni Jesus anna na anghelna ira i mesissimmu.