1. Ngatta makimoray ittam nakuan kani Jehova?

MAWAG tu makimoray * ittam kani Jehova megafu ta yayya i Namaratu nittam. Yari tu egga i kepangngattanna nga mangipay tu estandarte ira para ta pinaratuna. (Nep. 4:11) Ngem i tadday paga nga makakumbinsi nga rason nu ngatta tuttulattam yayya ay megafu ta i pammagurena i kapianan. Ta interu historia, aru nga totolay i nammaguray ta kasittoleda. Ngem kumpara nira, si Jehova i pinakamasirib anna pinakameddu, minangngikallo, anna minangngikavurung nga Mammaguray ta ngamin.​—Ex. 34:6; Roma 16:27; 1 Juan 4:8.

2. Segun ta Hebreo 12:9-11, anni ira i rason nu ngatta makimoray ittam kani Jehova?

² Kayà ni Jehova nga tuttulattam yayya, ari megafu ta assittam nisa, nu ari, megafu ta ayatattam yayya anna imammatattam yayya bilang meddu nga Yama tam. Ta turana ta taga-Hebreo ira, nipakanawag ni Pablo nga mawag tu “mas pakimorayat-tam i nespirituan nga Yama tam” megafu ta sanayanna ittam para ta “pammakapianat-tam.”​—Bibbigan i Hebreo 12:9-11.

3. (a) Kunnasi tam mepasingan i pakimoray tam kani Jehova? (b) Anni ira nga pakkiavu i tabbagattam?

³ Makimoray ittam kani Jehova nu kuattam i adde na mawayya tam tapenu tuttulan yayya ta ngamin nga gannug anna nu ibita tam i tendensia tam nga mattalo ta sarili tam nga pakalippawa.  (Prov. 3:5) Mas alistu nittam i makimoray kani Jehova durante nga mannammuattam i makkarasta nga kualidadna. Ngatta? Megafu ta danaw nga kualidad ay masingan ta ngamin nga kukukuanna. (Sal. 145:9) Durante nga mas aru i magigiammu tam meyannung kani Jehova, mas nga ayatattam yayya. Anna nu ayatattam si Jehova, ariattam ngana kawagan i detalyadu nga lista na regulasion ira nga mangikagi nittam nu anni i kuattam anna nu anni i ariattam kuan. Yari tu mappursigi ittam nga itonos i appana-panono anna mataga-matageno tam ta mapia anna ikalussaw i marake. (Sal. 97:10) Ngem nu mittan, marigatattam nga tuttulan si Jehova. Ngatta? Anna anni i magigiammu na elder, na yama, anna na yena ira ta ehemplo ni Gobernador Nehemias; ni Patul David; anna ni Maria, nga yena ni Jesus? Tabbagan naw nga artikulo danaw nga pakkiavu.

4-5. Segun ta Roma 7:21-23, ngatta mariga i makimoray kani Jehova?

⁴ I tadday nga rason nu ngatta mariga i makimoray kani Jehova ay megafu ta namana tam nga liwa anna kina-imperfekto. Yari tu egga i tendensia tam nga marrebelde. Turi ta narrebelde da Adan anni Eva kontra ta Dios anna kinnadda i megamma nga vunga, namadday ira tu sarilida ira nga estandarte. (Gen. 3:22) Ta maddaggun, aru nga totolay i ari magimporta kani Jehova anna ira lagapa i maddisidi nu anni i fustu anna nu anni i mali.

⁵ Maski danuri makannammu anna mangiddu kani Jehova ay marigatan nu mittan nga interu-futu nga makimoray nisa. Naekspiriensa yaw ni apostol Pablo. (Bibbigan i Roma 7:21-23.) Kagitta ni Pablo, kayà tam nga kuan nu anni i fustu ta paningan ni Jehova. Ngem kanayuttam nakuan nga labanan i tendensia tam nga mangngua tu marake ira nga gannug.

6-7. Anni paga i rason nu ngatta mariga i makimoray kani Jehova? Mangistoria tu ekspiriensa.

⁶ I tadday paga nga rason nu ngatta mariga i makimoray kani Jehova ay megafu ta influwensia na kultura anna appanono na totolay ta naddakallattam. Mekontra i aru nga ideya na totolay ta uray ni Jehova, yari tu marigatattam kanayun nga labanan i influwensiada. Ikonsidera tam i tadday nga angngarigan.

⁷ Gagangay ta karuan nga lugar nga pilitadda i kabataan ira nga ifokus i pattoleda ta pagaleg ta aru nga kuartu. Neparubang ta kunnatun i sister nga si Mary. * Nigena nagigiammu i meyannung kani Jehova, nagiskuela yayya ta tadday nga prestihioso nga Unibersidad ta nasiodda. Ipilit na familia ni Mary nga magaleg yayya tu trabahu nga dakal i suelduna anna merespeto yayya. Kayàna gapa yatun. Ngem, turi ta nammuanna i meyannung kani Jehova anna inidduna yayya, nanguli i fokusna. Ngem kunna lagapa: “Nu mittan egga ira i tiansà nga mannegosio anna makaleg tu aru nga kuartu ngem makagurun mabi ta espiritual nga rutinà. Megafu ta nikadakallakku, marigatan ngà nga panakitan yatun. Mawag tu makimemallo ngà kani Jehova tapenu malabanan i tentasion nga akseptan i trabahu nga mangiyarayyu niakan ta passerbì nisa.”​—Mat. 6:24.

8. Anni i ikonsidera tam?

⁸ Mabenefisiowan ittam nu makimoray ittam kani Jehova. Ngem danuri egga autoridadda gitta na elder, na yama, anna yena ira ay moffunadda i tanakuan nu makimoray ira ta Dios. Ikonsidera tam i karuan nga angngarigan ta Biblia nga makoffun nittam nu kunnasi usan i autoridad nga mamagayayya kani Jehova.

9. Anni ira nga problema i neparubang kani Nehemias?

⁹ Nitalo ni Jehova ta elder ira i importante nga trabahu nga mappastor ta totolena. (1 Ped. 5:2) Aru i magigiammu na elder ira ta pangusito ta pinattratu ni Nehemias ta totolay ni Jehova. Megafu ta gobernador na Juda si Nehemias, dakal i autoridadna. (Neh. 1:11; 2:7, 8; 5:14) Nonopan ngana laman i problema ira nga neparubang kani Nehemias. Nammuanna nga zinapingan na totolay i templo anna ariadda suportan i pakawagan na Levita ira gitta na kagian na Dob. Ari nga parulattan na Judio ira i dob na Sabbath, anna nangatawa i karuan nga lallaki tu dayu nga babbay. Mawag nga asikasuan ni Gobernador Nehemias yaw nga mariga nga situasion.​—Neh. 13:4-30.

10. Anni i kingngua ni Nehemias ta problema nga neparubang sa?

¹⁰ Ari inabuso ni Nehemias i autoridadna gukaban na pangifuersa ta sarilina nga ideya ta totolay na Dios. Lallagu, nakimallo yayya ta giya ni Jehova, anna sinudduanna i totolay ta Dob ni Jehova. (Neh. 1:4-10; 13:1-3) Mapakalinno paga nga nakipattrabahu si Nehemias nira anna zinuffunanna paga ira ta pamataddag uli ta pader na Jerusalem.​—Neh. 4:15.

11. Segun ta 1 Tesalonica 2:7, 8, kunnasi nakuan tratuan na elder ira danuri egga ta kongregasion?

¹¹ Awayyana nga ari gapa meparubang i elder ira ta kunnatun, ngem aru i puededa nga maparigan kani Nehemias. Angngariganna, mallallappo ira para ta pammakapianan na wawwaragida. Ariadda gapa matageno nga mas atannang ira megafu ta autoridadda. Imbes tu kunna, ipasingadda i aggiddedduda ta kongregasion. (Bibbigan i 1 Tesalonica 2:7, 8.) Megafu ta mapakalinno anna meddu ira, masippo ira nga makiyuvovug ta tanakuan. Kunnaw i kinagi ni Andrew nga nabayag ngana nga elder: “Napansikku nga mas magginna i wawwaragi nu masippo anna meddu i  elder ira. Danaw nga kualidad i mamaguyu ta kongregasion tapenu makikoopera ta elder ira.” Kunna paga ni Tony nga nabayag ngana gapa nga elder: “Iyap-aplikà i tabarang nga mabibbig ta Filipos 2:3 anna kanayukku nga imammatan i tanakuan nga mas atannang anne niakan. Yaw i makoffun niakan tapenu ari mabbalin tu diktador.”

12. Ngatta importante nga minappakalinno i elder ira?

¹² Mawag tu minappakalinno i elder ira gitta ni Jehova. Maski nu si Jehova i Katannangan nga Mammaguray ta interu uniberso, ‘maggubbaw’ yayya tapenu iyatannang “i paddian na mariga ira.” (Sal. 18:35; 113:6, 7) Kakuruganna, ikalussaw ni Jehova danuri mapakatannang anna maparayag.​—Prov. 16:5.

13. Ngatta kawagan na tadday nga elder nga “fugaddan i zila na”?

¹³ I elder nga makimoray kani Jehova ay mawag tu ‘fugaddanna i zila na.’ Nu arianna kuan yatun, baka mataki i paguvovugna ta ari nga mangirespeto nisa. (Sant. 1:26; Gal. 5:14, 15) Kunni Andrew nga nakagi ta gafu: “Nu mittan, kayà ku tabbagan i wagi nga gittana awan tu respetona niakan. Ngem, megafu ta pinannonopakku tu mapia i ehemplo na matalo nga lallaki gari ta Biblia, noffunannà natun ta importansia na pappakalinno anna kinalumamo.” Mepasingan na elder ira i pakimoreda kani Jehova gukaban na meddu anna masippo nga pakiyuvovug ta kongregasion, nelagum ngana ta kasi-elderda.​—Col. 4:6.

14. Anni i papel nga niyawa ni Jehova ta yama ira, anna anni i ekspektanna nira?

¹⁴ Sinunno ni Jehova i yama bilang ulu na familia, anna ekspektan na Dios nga sanayanna anna disiplinanna i ánana. (1 Cor. 11:3; Efe. 6:4) Ngem limitadu laman i autoridad na yama​—egga lagapa i tattabbaganna kani Jehova, i pinaggafuan na ngagan na ngamin nga familia. (Efe. 3:14, 15) Ipasingan na yama ira i pakimoreda kani Jehova gukaban na pangusa ta autoridadda segun ta kayà na Dios. Aru i malada ta paggigiammu ta pattolay ni Patul David.

15. Ngatta makasta nga ehemplo para ta yama ira si Patul David?

¹⁵ Sinunno ni Jehova si David ari laman bilang ulu na familiana, nu ari, pati ta interu nga nasion na Israel. Bilang patul, daka-dakal i autoridad ni David. Egga ira i tiempo nga mali i pinangiyusana ta autoridadna anna nakangngua yayya tu madammo nga liwa. (2 Sam. 11:14, 15) Ngem nakimoray yayya kani Jehova gukaban na pinangalawana ta disiplina. Nivuvvuna i mayan na futuna kani  Jehova gukaban na pakimallo. Kingnguana paga i adde na mawayyana tapenu tuttulan i tabarang ni Jehova. (Sal. 51:1-4) Fuera tatun, mapakalinno nga inalawana i tabarang ari laman na lallaki, nu ari, pati na babbay. (1 Sam. 19:11, 12; 25:32, 33) Nakagigiammu si David ta liwana ira anna nisentrona i pattolena ta passerbi kani Jehova.

16. Anni i magigiammu na yama ira kani David?

¹⁶ Ikonsidera i karuan nga leksion nga mala na yama ira kani Patul David: Ari abusuan i autoridad nga niyawa nikaw ni Jehova. Aminan i liwa mu ira, anna akseptan i nebase-Biblia nga tabarang na tanakuan. Nu kuammu yatun, irespeto naka na familiam ta kinapakalinno mu. Nu makimallo kavulu i familiam, ivuvvu mu i futum kani Jehova​—ipaginnam nira i kadakal na pattalo mu nisa. Mas ta ngamin, kuan tu pinaka-importante ta pattolem i passerbi kani Jehova. (Deut. 6:6-9) I makasta nga ehemplom i tadday ta pinakamabalor nga meregalum ta familiam.

17. Anni nga papel i niyawa ni Jehova ta yena ira?

¹⁷ Niddan ni Jehova i yena tu importante nga papel ta familia, anna niddanna yayya tu autoridad ta ánana. (Prov. 6:20) Kakuruganna, dakal i influwensia na yena ta ánana anna egga efekto natun ta interu nga pattolay na ánana. (Prov. 22:6) Sifutan nu anni i magigiammu na yena ira kani Maria nga yena ni Jesus.

18-19. Anni i magigiammu na yena ira ta ehemplo ni Maria?

¹⁸ Kabisadu ni Maria i Katurakan. Nakultibana i monag nga respetona kani Jehova anna i madukko nga relasion nisa. Sigga-paran yayya nga nakimoray ta direksion ni Jehova, maski nu mawag tu manguli i interu pattolena.​—Luc. 1:35-38, 46-55.

¹⁹ Aru i puede nga maparigan na yena ira kani Maria. Anni? Ollu, pamattalupaddian ta pakikkofun kani Jehova gukaban na personal nga paggigiammu tu Biblia anna personal nga pakimallo. Mekadua, gukaban na sigga-paran nga panguli ta pattolay tapenu mapagayayya si Jehova. Angngariganna, awayyana nga pinadakal naka na magana nga alistu nga mappatu i uluda anna mataki i paguvovugda ta ánada. Yari tu abbo mu nga gagangay laman yatun nga pattratu ta ána. Maski paga nagigiammum ngana i estandarte ira ni Jehova, baka marigatakka nga mattalupaddian nga kalmadu anna mapasensia ta ána mu, mas ngana nu nababbannag ka tapus matagga paga i uluda. (Efe. 4:31) Nu kunnatun i matageno mu, kuruga importante nga mappoffukka kani Jehova. Kunna yena nga si  Lydia: “Nu mittan, kanayun ngà makimallo tapenu ariakku mapporay nu matagga i ulu na ana ku. Egga lagu ira i tiempo nga durante nga kibbidakku i ana ku ay gavva nga magimmang ngà anna silensio nga makimallo ngà kani Jehova tapenu uffunannà. Pakalmannà na pakimallo.”​—Sal. 37:5.

20. Anni paga i tanakuan nga problema na karuan nga yena, anna kunnasida malampasan yatun?

²⁰ Awayyana nga egga paga i tanakuan nga problema na karuan nga yena​—marigatan ira nga ipatageno i ayada ta ánada. (Tito 2:3, 4) Aru nga yena i ziminakal ta familia nu sitaw ariadda natageno i aya na maganada. Nu ziminakal ka ta kunnatun nga familia, ariammu mawag nga parigan i nakkamalian na magana mu. I yena nga makimoray kani Jehova ay mawag tu gigiammuanna nu kunnasi ipatageno i aya ta ánana. Awayyana nga marigatan yayya nga ulian i appana-panono, mataga-tageno, anna konduktana ira. Ngem posible yatun, anna danatun nga panguloli ay pammakapiananna anna na familiana.

21-22. Segun ta Isaias 65:13, 14, anni ira nga benefisio i malawa tam ta pakimoray kani Jehova?

²¹ Ammu ni Patul David i benefisio ira na pakimoray kani Jehova. Niturana: “I dorob ira na YAFU ay mapia, mamagayaya ta totolay nga mamarulo nira. I bili-bilin na YAFU ay matunung ira, pakalippawa na nono i iyawa da. Danaw i manuddu niakan nga dorobam-mu, ta pamarulo ku nira ay dakal i balo ku.” (Sal. 19:8, 11) Ta maddaggun, masingattam i nadduman danuri makimoray kani Jehova anna danuri mammanaki ta meddu nga tabaranna. Danuri makimoray kani Jehova ay “makkulle ta pagayayya . . . megafu ta makasta nga kondision na futuda.”​—Bibbigan i Isaias 65:13, 14.

²² Nu sigga-paran nga makimoray kani Jehova i elder ira, i yama ira, anna i yena ira, mapakastada i pattoleda, mas magayayya i familiada, anna mas mattaradday i interu nga kongregasion. Pinaka-importante, mapagayayyada si Jehova. (Prov. 27:11) Egga paga kari i mas makapagayayya nga bala-balo anne tatun?