1. Anni i natageno ni Pedro ta milagro nga kingngua ni Jesus?

 TANGA-GABI ngana nga magimmanango si Pedro ngem awan vuluvuga tu nakanna na nga manango. Ngem kattaka-taka nga kinagi ni Jesus nisa: “Iyangem i barangay ta aralam anna iwaya nu nga makkakavvulu i iko ira tapenu makakanna kamu.” (Luc. 5:4) Nadduda si Pedro nu egga i makanna na tu manango, ngem sinuttul na lagapa i nipakua sa ni Jesus. Maggi mapisil ngana i iko ira megafu ta karu na nakanna da nga manango. Gafu ta nalippawa da Pedro anna na kakavvulu na nga milagro yatun nga nasingadda, “kuruga nappabbaw” ira. Kinagi ni Pedro: “Afu, arayyuam-mà ta minattagaruli ngà nga tolay!” (Luc. 5:6-9) Magga natageno ni Pedro nga ari yayya mepappangngo nga makavvulu ni Jesus.

2. Ngatta makaduffun ta nittam nu gigiammuattam i ehemplo ni Pedro?

² Fustu i kinagi ni Pedro nga ‘minattagaruli yayya nga tolay.’ Mabibbig tam ta Biblia nga egga ira i kinakkagi anna kinikkingngua na nga turi kua, nabbabawyan na gabbalaman. Matageno mu kari nu mittan i natageno ni Pedro? Egga kari i ugalim nga kayà mu nga ulian onu pakkafiammu nga nabayag mu ngana nga laba-labanan? Nu wan, massikan i nono mu nu gigiammuammu i ehemplo ni Pedro. Ngatta? Nonopammu yaw: Puede nakuan nga ari ngana nga ipetura ni Jehova ta Biblia i nakkamalian ira ni Pedro. Ngem nipesali na lagapa danatun tapenu makagigiammu ittam. (2 Tim. 3:16, 17) Nu magigiammu tam nga egga gapa ira i pakkafian anna mataga-tageno ni Pedro nga kagitta na ta nittam, maduffunan ittam natun nga malippawa nga ari ekspektan ni Jehova nga mabbalin ittam tu perfekto. Ikaya na laman nga ari ittam nga magimmang nga masserbi ta nisa maski nu egga ira i pakkafiattam.

3. Ngatta mawag tu ari ittam nga magimmang?

³ Ngatta mawag tu ari ittam nga magimmang? Egga i akkagianan nga “Practice makes perfect.” Kunnaw i keyarigan na:  Tapenu makabisadu na tadday nga musikeru i instrumento na, piga dagun labbi yayya nga mappraktis. Tatun nga tiempo, awayya na tu mamippiga yayya nga magugal. Ngem nu tulu-tuloy yayya nga mappraktis, mapakasta na lapa saw yatun. Maski sonu malalaki ngana yayya nga mattugtug, sinaggi-mittan lagapa nga magugal yayya. Ngem ari yayya nga magimmang nga mappraktis tapenu makkasta paga i pattugtug na. Mesimmu gapa ta nittam yatun. Awayya na tu makua tam uli i tadday nga pakkafian nga abbo tam tu nalsa tam ngana. Ngem ari ittam nakuan lagapa magimmang nga labanan yatun nga pakkafiattam. Makekagi onu makangngua ittam ngamin tu gannug nga sonu kua pabbabawyattam. Ngem nu ari ittam nga magimmang, duffunan ittam ni Jehova nga sisinu nga malsa danatun nga pakkafian. (1 Ped. 5:10) Ari nga nagimmang si apostol Pedro. Aru i magigiammu tam ta ehemplo na. Mapagaram ittam nga ari magimmang nga masserbi kani Jehova megafu ta allo nga nipasingan ni Jesus ta nisa maski nu egga ira i nakkamalian na.

4. Ta Lucas 5:5-10, anni i kinagi ni Pedro meyannung ta baggi na, ngem anni i kinagi ni Jesus ta nisa?

⁴ Ari nga ikagi na Biblia nu ngatta kinagi ni Pedro nga ‘minattagaruli yayya nga tolay’ onu nu anni ira nga liwa i nononopan na. (Bibbigan i Lucas 5:5-10.) Ngem awayya na tu egga ira i serioso nga nakkamalian na. Natageno ni Jesus i assing ni Pedro. Awayya na gare nga nononopan ni Pedro nga ari yayya nga malalaki. Ammu gapa ni Jesus nga mawayya ni Pedro nga mattalupaddian nga matalo. Yatutta masippo nga kinagi ni Jesus kani Pedro, “Ari ka nga maganassing.” Dakal i efekto ta pattolay ni Pedro natun nga pakkomfiansa ta nisa ni Jesus. Turi kua, pinanawan ni Pedro anna na wagi na nga si Andres i pagaleradda nga pagimmanango. Tapus vinulu da ngana si Jesus ta pamministerio na. Megafu tatun, napakaru i bendision ni Jehova ta nira.—Mar. 1:16-18.

5. Anni ira i bendision ni Pedro megafu ta nilabanan na i assing na ira anna nabbalin yayya tu tagatuttul ni Jesus?

⁵ Napakaru i makasta ira nga nesimmu kani Pedro gafu ta nabbalin yayya nga tagatuttul ni Cristo. Nasingan na nga pinammapia ni Jesus i mataki, namalawan tu demonio, anna namaginnolay paga lagu tu natay. b (Mat. 8:14-17; Mar. 5:37, 41, 42) Nemammatan gapa ni Pedro i tadday nga sirmata nga mangipasingan ta kuan saw ni Jesus bilang Patul na Pappatulan na Dios. Ari na vuluvuga nakattaman yatun nga nesimmu. (Mar. 9:1-8; 2 Ped. 1:16-18) Egga ira i nasingan ni Pedro nga ari na nakuan  nga nasingan nu ari yayya nga nabbalin tu tagatuttul ni Cristo. Magga magaya-ayayya yayya ta ari na nga nipamavulun nga affutan yayya na negatibo nga mataga-tageno na meyannung ta baggi na! Megafu tatun, nalawa na danatun nga bendision.

6. Insigida kari nga nalsa ni Pedro i pakkafian na ira? Ipakanawag.

⁶ Maski nu egga ira i nasingan anna naginna ni Pedro, narigatan lagapa yayya nga labanan i pakkafian na ira. Angngarigan na, turi ta niyesplika ni Jesus i kaziga-riga na anna kapatena tapenu matuppal i profesiya na Biblia, nivuya yayya ni Pedro. (Mar. 8:31-33) Namippiga gapa nga naddidiskusionan ni Pedro anna na karuan nga apostol nu sinni ta nira i katannangan ta paddian. (Mar. 9:33, 34) Ta ultimu nga gabi nige nga natay si Jesus, gavva-gavva nga siniwag ni Pedro i talinga na tadday nga lalaki. (Juan 18:10) Tatun balaman nga gabi, nappaffu si Pedro ta assing na ta totolay. Namittallu nga nilimag na nga ammammu na i kofun na nga si Jesus. (Mar. 14:66-72) Gafu tatun, nepallo i pinattangi ni Pedro.—Mat. 26:75.

7. Anni nga chansa i niyawa ni Jesus kani Pedro kabalin na nga naginnolay?

⁷ Maski nu nepallo i pinakkafi na nono ni apostol Pedro, ari yayya nga nilikuran ni Jesus. Kabalin na paginnolay ni Jesus, niddan na si Pedro tu chansa nga ipasingan nga iddeddu na lagapa yayya. Niyavu ni Jesus ta nisa nu awayya na kari nga tangngallan i karneru ira ni Jesus. (Juan 21:15-17) Minanugu si Pedro tatun. Yatutta egga yayya ta Jerusalem ta aggaw na Pentecostes anna tadday yayya ta ollu ira nga zinelugan na masanto nga espiritu.

8. Anni i serioso nga nakkamalian ni Pedro ta Antiokia?

⁸ Maski turi ta tadday ngana nga nazelugan nga Cristiano si Pedro, egga lagapa ira i pakkafian nga laba-labanan na. Ta 36 C.E., nemammatan mismu ni Pedro nga zinelugan ni Jehova tu masanto nga espiritu i ari nakugi nga Hentil nga si Cornelio. Manawag nga ipasingan natun nga ‘ari nga mamadduma-ruma i Dios’ anna malawa ta kongregasion Cristiano i Hentil onu ari nga Judio ira. (King. 10:34, 44, 45) Kabalin natun, nakipakkan ngana si Pedro ta Hentil ira nga ari na vuluvuga nga kingngua ta nappasa. (Gal. 2:12) Ngem matageno na karuan nga Judio nga Cristiano nga ari nakuan tu mepamavulun nga makkavulu nga kuman i Judio anna Hentil ira. Turi ta minay ta Antiokia i karuan nga kunnatun i appana-panono da, niyemmang ni Pedro i makipakkan ta wawwaragi na ira tu Hentil. Ngatta? Awayya na tu ikassing na nga mapalussaw i Judio ira nga Cristiano. Nasingan ni apostol Pablo yatun nga pagappappe, yayya nga nivuya na si Pedro ta pagara-arubangadda ngamin. (Gal. 2:13, 14) Maski nu naffu si Pedro na pakkafian na tatun nga tiempo, ari yayya nga nagimmang. Anni i nakaduffun ta nisa?

9. Kunnasi nga ipasingan na Juan 6:68, 69 nga matalo si Pedro?

⁹ Matalo si Pedro. Ari yayya nga nappefugag ta maski anni ta panuttul na kani Jesus. Mittan, nipasingan na yatun turi ta egga i kinagi ni Jesus nga ari nga nalippawa na disipulos na ira. (Bibbigan i Juan 6:68, 69.) Aru i nagimmang ngana ta panuttul kani Jesus maski ari da paga nga ininnaggan onu kiniddaw i pakanawag na. Ngem ari tu kunnatun si Pedro. Matalo yayya anna kinagi na nga si Jesus laman i “dian na uvovug nga mangiyawa ta inango nga adde ta ngangangay.”

10. Kunnasi nga nipasingan ni Jesus nga makkomfiansa yayya kani Pedro? (Innan gapa i letratu.)

¹⁰ Ari nga nilikuran ni Jesus si Pedro. Ta ultimu nga gabi na pinattolay na ta davvun, ammu na tu likuran yayya ni Pedro anna na karuan  nga apostol. Ngem kinagi ni Jesus kani Pedro nga makkomfiansa yayya nga makatoli yayya anna mattalupaddian nga matalo. (Luc. 22:31, 32) Nalippawa gare ni Jesus nga “masikan i nono ngem makafi i baggi.” (Mar. 14:38) Maski gafu nu nilimag ni Pedro nga ammammu na si Jesus, ari lagapa yayya nga nilikuran ni Jesus. Turi ta napaginnolay si Jesus, nappasingan yayya kani Pedro nga posible nga ta tiempo nga magitetadday si Pedro. (Mar. 16:7; Luc. 24:34; 1 Cor. 15:5) Magga nassikan i nono ni Pedro tatun nga kingngua ni Jesus megafu ta fermi i pinakkafi na nono na ta nakaliwatan na!

11. Kunnasi nga nipasiguradu ni Jesus kani Pedro nga duffunan yayya ni Jehova?

¹¹ Nipasiguradu ni Jesus kani Pedro nga duffunan yayya ni Jehova. Turi ta napaginnolay ngana si Jesus, nammilagro mana yayya tapenu makakanna da Pedro anna i karuan nga apostol tu aru nga manango. (Juan 21:4-6) Gafu tatun nga milagro, magga napasikan i nono ni Pedro nga mabi laman nga iyawa ni Jehova i material ira nga kawagan na. Posible nga nanono na i kinagi bi ni Jesus nga iyawa ni Jehova i pakawagan danuri na ‘pagolluadda i Pappatulan.’ (Mat. 6:33, NW) Megafu tatun, pinagollu ni Pedro ta pattolena i pallayyagayya, ari tu i pagaleran na nga pagimmanango. Ta aggaw na Pentecostes 33 C.E., magutu-gutu nga nallayyagayya si Pedro yayya nga rinivu i noffunan na tapenu alawatan i mapia nga dumug. (King. 2:14, 37-41) Kabalin natun, zinuffunan na gapa i Samaritano anna i Hentil ira nga alawatan si Cristo. (King. 8:14-17; 10:44-48) Awan tu duda nga makapabbaw i pinangusa ni Jehova kani Pedro tapenu itallung ta kongregasion i ngamin nga klase na totolay.

12. Kunnasi nga makaduffun i ehemplo ni Pedro nu egga i tadday nga pakkafian nga nabayag tam ngana nga laba-labanan?

¹² Duffunan ittam ni Jehova tapenu ari ittam nga magimmang. Awayya na tu mariga nga kuan yatun jebi nu nabayag tam ngana nga laba-labanan i tadday nga pakkafian. Nu mittan, baka mas mariga nga labanan i pakkafiattam ira anne ta pakkafian ira ni Pedro. Ngem meddan ittam ni Jehova tu sikan tapenu ari ittam nga magimmang. (Sal. 94:17-19) Angngarigan na, tadday nga brother i piga dagun nga homoseksual i nipattolena nige na nga nakannammuan i kinakurug. Inuli na i interu nga pattolena anna nattolay yayya segun ta Biblia. Ngem egga lagapa i marake ira nga pakkaraga  nga laba-labanan na nu mittan. Anni i nakaduffun ta nisa tapenu ari nga magimmang? Kinagi na: “Pasa-pasikannan ittam ni Jehova.” Kunna paga: “Ta uffun na espiritu ni Jehova . . . , nagigiammù nga posible nga [tulu-tuloy] nga makapattolay ittam segun ta kayà ni Jehova . . . nawayya ni Jehova nga usan ngà anna maski nu egga ira i pakkafiakku, pasa-pasikannan nà lagapa.”

13. Kunnasi tam nga maparigan i ehemplo ni Pedro nga mabibbig ta Kingngua 4:13, 29, 31? (Innan gapa i letratu.)

¹³ Nasingattam nga namippiga nga naganassing ta tolay si Pedro. Ngem gafu ta nakkiddaw yayya tu gutu kani Jehova, nawayya na i magutu nga mallayyagayya. (Bibbigan i Kingngua 4:13, 29, 31.) Mawayya tam gapa nga labanan i assing tam ira. Kunnatun i kingngua ni Brother Horst nga taga-Nazi Germany. Ari laman tu mamittan nga na-pressure yayya ta eskuela da nga mangikulle tu “Heil Hitler!” Imbes tu poryan yayya na magana na, nakimallo lallagu ira kavvulu na anna nikiddoda kani Jehova nga paggutukan na nakuan yayya. Ta uffun na magana ni Horst anna na pattalo na kani Jehova, nawayya na gabbalaman nga itaddaggan i pangurug na. Kunnaw i nakagi na turi kua: “Ari nà vuluvuga pinagurayan ni Jehova.” c

14. Kunnasi nga maduffunan na minangngikavurung ira nga elder danuri nakkafi i nono da?

¹⁴ Ari ittam vuluvuga nga likuran ni Jehova anna ni Jesus. Kabalin nga nilimag ni Pedro si Jesus, egga i importante nga desisionan na. Magimmang ngana kari yayya bilang disipulo ni Cristo onu tulu-tuloy lagapa yayya? Nipakimemallo ni Jesus kani Jehova nga ari nakuan makkafi i pangurug ni Pedro. Kinagi ni Jesus kani Pedro i meyannung tatun nga pakimallo anna nikagi na gapa ta nisa i pakkomfiansa na  nga mawayya na gabbalaman saw nga pasikannan i wawwaragi na. (Luc. 22:31, 32) Siguradu nga nassikan i nono ni Pedro kada meraddamman na yatun nga kinakkagi ni Jesus! Nu egga gapa i importante nga desisionattam, awayya na tu usan ni Jehova i minangngikavurung ira nga elder tapenu pasikannan i nono tam. Kawagattam yatun tapenu mattalupaddian ittam nga matalo. (Efe. 4:8, 11) Ikakkaguman na nabayag ngana nga elder nga si Paul nga iyawa i kunnatun nga pamanna-bannay. Iyava-avu na tari ira ta nakkafi i nono da nu kunnasi bi ira nga ollu nga niyaranni ni Jehova ta kinakurug. Tapus ipasiguradu na ta nira nga ari ira vuluvuga nga likuran ni Jehova megafu ta matalo nga aya na. Kunnaw i konklusion na, “Nasingakku nga aru nga nakkafi i nono da i ari nga nagimmang megafu ta uffun ni Jehova.”

15. Kunnasi nga ipasingan na ehemplo ni Pedro anna ni Brother Horst nga kurug i Mateo 6:33?

¹⁵ Nu kunnasi nga niyawa ni Jehova i material nga kawagan ni Pedro anna na karuan tu apostol, iyawa na gapa i material nga kawagattam nu pagolluattam i ministerio ta pattoletam. (Mat. 6:33) Kabalin na World War II, plinano ni Horst nga nakagi ta nappasa ira nga parapo i mappayunir. Ngem kitappobre yayya anna magalangan yayya nu masuportan na i baggi na anna makapattalupaddian ta pappayunir. Anni gafu i kingngua na? Nanono na nga purueban si Jehova. Ta interu ligguan na bisita na manangngal ta sirkito, nallawan yayya ta ministerio. Ta ultimu natun nga ligguan, nakaddagan yayya turi ta niyalawa ta nisa na manangngal ta sirkito i tadday nga sobre ngem ari na kinagi nu sitaw i naggafuan na. Egga ta unag natun i makalanno nga kuartu tapenu masuportan na i pappayunir na ta piga vulan. Minammatan ni Horst yatun nga regalu bilang pamasiguradu nga duffunan yayya ni Jehova. Gafu tatun, pinagollu na i interes ira na Pappatulan ta interu pattolena.—Mal. 3:10.

16. Ngatta makasta nu gigiammuattam paga i meyannung kani Pedro anna ta nitura na ira?

¹⁶ Siguradu nga fermi i ayayya ni Pedro nga ari yayya nga inarayyuan ni Jesus kagitta na ollu bi nga nikiddaw na ta nisa! Nitulu-tuloy nga sinanay ni Jesus si Pedro tapenu mabbalin tu matalo nga apostol anna makakkasta nga ehemplo para ta Cristiano ira. Aru i magigiammu tam tatun nga pinassanay na. Nikagi ni Pedro i karuan tatun ira nga nagigiammu na ta dua nga tura na nga nipatulug na ta kongregasion ira ta ollu nga siglo. Magigiammu ta tumunug nga artikulo i karuan laman ta pameraddam nga mabibbig tatun ira nga tura anna nu kunnasi tam nga meyaplika danatun.