1. Nige nga natay si apostol Pedro, anni i nipapadday nisa ni Jehova?

 MATALO nga nasserbi si apostol Pedro kani Jehova ta aru nga dagun. Vinulu na si Jesus ta pallayyagayya na, nigafu na i trabahu nga pallayyagayya ta ari ira nga Judio, anna nabbalin gapa yayya tu miembro na manangngal nga baggi. Turi ta ammu na nga aranni ngana yayya nga matay, niddan yayya ni Jehova tu mas aru paga nga annungan. Turi ta 62-64 C.E., inusa yayya ni Jehova tapenu mamadday tu dua nga tura—i libru na Biblia nga 1 anna 2 Pedro. Ikaya na nga makoffun nakuan yatun ira nga tura ta Cristiano ira kabalin na patena.—2 Ped. 1:12-15.

2. Ngatta sassakto i tiempo na pinamadday ni Pedro ta tura na ira?

² Pinadday ni Pedro i tura na ta tiempo nga ‘madduma-ruma nga ziga-riga i attamman’ na kapangngurug na ira. (1 Ped. 1:6) Ikaya na marake ira nga totolay i mangitallung tu falsu ira nga tuttuddu anna marake ira nga annangngua ta kongregasion. (2 Ped. 2:1, 2, 14) Aranni ngana nga maekspiriensa na Cristiano ira nga maddian ta Jerusalem i “panuppalan na ngamin nga ganna-gannug”—i panaral na suddalu ira na Roma tatun nga siudad anna ta Judio nga sistema na ganna-gannug. (1 Ped. 4:7) Siguradu nga nakoffun yatun nga tura ni Pedro ta Cristiano ira tapenu maattammadda i maddaggun nga kapurueba da anna tapenu makapapprepara ira para ta problema ira nga mesimmu ta mappange. b

3. Ngatta gigiammuattam nakuan i nitura ira ni Pedro?

³ Maski nu para ta ollu-siglo ira nga Cristiano i tura ni Pedro, nilavu lagapa yatun ni Jehova ta Uvovug na. Yatutta mammakapia ittam sangawe tatun ira nga tura. (Roma 15:4) Gitta natun ira nga Cristiano, mattolay ittam ta mundo nga aru i magangngua tu marake yari tu mas mariga i masserbi kani Jehova.  Aranni tam ngana nga maekspiriensa i mas maziga ira nga problema anne ta ziga ira nga nappasan na Judio ira turi ta nadaral i Jerusalem. Egga ira i importante nga tabarang nga mabibbig tam ta dua nga tura ni Pedro. Makoffun nittam yatun tapenu tulu-tuloy tam nga innaggan i aggaw ni Jehova, malabanattam i assing ta tolay, anna mepasingattam i napafutuan nga pakka-aya-aya. Makoffun gapa i kuddanatun nga tabarang ta elder ira tapenu meyawa da i pakawagan na karneru ira.

4. Segun ta 2 Pedro 3:3, 4, anni i awayya na nga mamakkafi ta pangurug tam?

⁴ Aru nga totolay sangawe i ari mangurug ta profesiya ira ta Biblia. Awayya na tu uyu-uyawan ittam na kumokkontra ira megafu ta aru dagun ngana nga kakkagiattam nga araranni ngana i panuppalan. Kagian na karuan nga ari vuluvuga nga duttal yatun. (Bibbigan i 2 Pedro 3:3, 4.) Nu makaginna ittam tu kunnatun ta householder, katrabahu, onu kafamilia tam, awayya na nga makkafi i pangurug tam. Niyesplika ni Pedro i makoffun ta nittam.

5. Anni i makoffun nittam tapenu fustu i pagimamma tam ta panuppalan naw nga mundo? (2 Pedro 3:8, 9)

⁵ Nonopan na karuan nga kitabbayag ngana mabba nga daralan ni Jehova yaw nga marake nga mundo. Makoffun nittam i kinagi ira ni Pedro megafu ta iperaddam nittam natun nga nerumu-ruma i pagimamma ni Jehova ta tiempo kumpara ta nittam. (Bibbigan i 2 Pedro 3:8, 9.) Para kani Jehova, i marivu nga dagun ay kagitta laman na tangaggaw. Mapasensia si Jehova anna manaki na nga egga i madaral. Ngem sonu duttal i aggaw na, madaral yaw nga mundo. Talaga pribilehio para ta nittam nga usan i nabattang nga tiempo tam tapenu layyagayyan i ngamin nga totolay ta ngamin nga nasion.

6. Kunnasi ittam nga “maginnennag” para ta aggaw ni Jehova? (2 Pedro 3:11, 12)

⁶ Pagaramman ittam ni Pedro nga “maginnennag” para ta aggaw ni Jehova. (Bibbigan i 2 Pedro 3:11, 12.) Kunnasi? Kadaggaw, pannonopattam nakuan tu mapia i bendision ira nga malawa tam sonu napabagu nga mundo. Imajinammu nga inangattammu i marerenu nga paddag, kumakka tu masustansia ira nga makan, dafungammu i iddeddu mu ira nga napaginnolay, anna tudduammu i totolay nga nattolay ta nappasa ira nga siglo meyannung ta ketuppal na profesiya ira ta Biblia. Makoffun i kunnatun ira nga pannono tapenu metulu-tuloy mu i maginnag anna ari ka nga madduda nga araranni ngana i panuppalan. Megafu ta ‘ammu tam ngana’ i mesimmu ta mappange, ari ittam ngana nga ‘meyawawan’ na falsu ira nga tuttuddu.—2 Ped. 3:17.

7. Anni i awayya na nga efekto ta nittam na assing ta tolay?

⁷ Megafu ta ammu tam nga araranni ngana nga duttal i aggaw ni Jehova, ilayyagayya tam i mapia nga dumug. Ngem nu mittan, awayya na tu maganassing ittam nga mallayyagayya. Ngatta? Baka maganassing ittam ta tolay. Kunnatun i nesimmu kani Pedro. Ta gabi na kabista ni Jesus, naganassing yayya nga ikagi nga tadday yayya ta disipulo ni Jesus anna mamippiga na paga lagu nga nilimag nga ammammu na yayya. (Mat. 26:69-75) Ngem nalabanan ni Pedro i assing na anna turi kua, kunnaw i kinagi na: “Ari kamu nga maganassing ta maski sinni anna ari kamu mavurung.” (1 Ped. 3:14) Ipasiguradu natun nga mawayya tam nga labanan i assing ta tolay.

8. Anni i makoffun tapenu malabanattam i assing ta tolay? (1 Pedro 3:15)

⁸ Anni i makoffun tapenu malabanattam i assing ta tolay? Kunnaw i kinagi nittam ni  Pedro: “Ikakua nu lagu si Cristo ta napafutu, ta yaya i Yafu nu.” (Bibbigan i 1 Pedro 3:15.) Anni i kayà kagian natun? Mawag tu pannonopattam tu mapia i posision anna pakapangngua na Yafu anna Patul tam nga si Jesu-Cristo. Nu egga i chansam nga ilayyagayya i mapia nga dumug ngem maggudu-gudu ka onu maganassikka nga kuan yatun, daddammammu i Patul tam. Imajinammu nga mammaguray yayya ta langi anna kavulu na i minillion nga anghel. Daddammammu nga neyawa ta nisa “ngamin i pakawayya ta langi anna ta utun na davvun” anna kinagi na nga “kanayun ngà makitappaddian nikamu adde ta panuppalan na mundo.” (Mat. 28:18-20) Pagaramman ittam ni Pedro nga ‘kanayun ittam nakuan nga sigga-paran’ nga idefensa i pangurug tam. Ikaya mu kari i mallayyagayya ta trabahu, ta eskuela, onu ta informal? Datim ngana nga pannonopan nu kannim nga puede nga kuan yatun, tapus ipreparam i presentasiommu. Ipakimallo mu i gutu anna mattalo ka nga uffunan naka ni Jehova nga labanan i assing ta tolay.—King. 4:29.

9. Ta anni nga situasion nga ari nakepasingan si Pedro tu aya? (Innan gapa i letratu.)

⁹ Nagigiammu ni Pedro nu kunnasi i mangipasingan tu aya. Egga yayya turi ta kinagi yaw ni Jesus: “Ay sangoye, iyawa ku nikamu i bagu nga dob: makka-aya-aya kamu. Nu kunnasi na  pangaya ku nikamu, mawag tu kunnatun gapa i pakka-aya-aya nu.” (Juan 13:34) Ngem turi kua, naganassing si Pedro ta Judio ira nga Cristiano yari tu ari yayya kiminang kavulu na Hentil ira nga wawwaragi na. Kinagi ni apostol Pablo nga pagappappe yatun nga kingngua ni Pedro. (Gal. 2:11-14) Inalawa ni Pedro yatun nga pangitunung anna nakagigiammu yayya tatun. Ta dua nga tura na, nipasigo na nga ari makalanno nga basta laman matageno tam i pangaya ta wawwaragi tam. Mawag gapa nga ipasingattam yatun.

10. Resulta na anni i ‘napasikkal nga pangaya tam ta wawwagi ta angngurug’? Ipakanawag. (1 Pedro 1:22)

¹⁰ Kinagi ni Pedro nga egga nakuan i ‘napasikkal nga pangaya tam ta wawwagi ta angngurug.’ (Bibbigan i 1 Pedro 1:22.) I kunnatun nga pangaya ay resulta na ‘pamarulo ta kinakurug.’ Nelavu tatun nga kinakurug i tuddu nga ‘i Dios ay ari nga mamadduma-ruma.’ (King. 10:34, 35) Ari tam makagi nga tuttuttulattam i bilin ni Jesus meyannung ta aya nu pili-piliattam laman i ayatattam ta kongregasion. Fustu tu egga talaga i wawwaragi nga mas madukko ittam ta nira. Kunnatun gapa si Jesus. (Juan 13:23; 20:2) Ngem iperaddam nittam ni Pedro nga mawag tu ikagumattam nga ‘ayatan i wawwagi tam ta angngurug’ megafu ta parte ira na familia tam.—1 Ped. 2:17.

11. Anni i kayà kagian na ‘napafutuan’ nga pangaya ta tanakuan?

¹¹ Pagaramman ittam ni Pedro nga ‘makka-aya-aya ta napafutu.’ Taw nga konteksto, kayà kagian na “napafutu” nga pangaya ay iddukammu i tadday maski nu mariga yayya nga iddukan. Angngarigan na, kunnasi nu natakitan naka na tadday nga wagi? Awayya na nga ta gafu na, manono tam i mangibalo imbes tu mangipasingan tu aya. Ngem nagigiammu ni Pedro kani Jesus nga ari nga mamagayayya ta Dios i pangibalo. (Juan 18:10, 11) Nitura ni Pedro: “Arian nu nga ibalo i marakay nga makua nikamu. Arian nu nga paguvovugan ta marakay danuri i marakay i uvovugad-da nikamu. Ipakimallo nu lallagu tu bendisionan ira na Dios.” (1 Ped. 3:9) Nu egga i napafutuan nga pangaya mu, masippo anna makonsiderasion ka lagapa maski tari ira ta awayya na nga nakataki ta niko.

12. (a) Anni paga i makua tam megafu ta napafutuan nga aya? (b) Anni i ikagumammu nga kuan gitta na magiraw ta video nga Kumilos Para Mapanatili ang Kapayapaan at Pagkakaisa?

¹² Ta ollu nga tura ni Pedro, inusa na i uvovug nga ‘napafutuan nga aya.’ Takkabban na kunnatun nga aya i “aru nga liwa-liwa.” (1 Ped. 4:8) Posible nga nanono ni Pedro i nituddu ni Jesus nisa ta nappasa meyannung ta pamakoma. Tatun nga tiempo, awayya na tu ninono ni Pedro nga masippo yayya nga tolay megafu ta kinagi na nga sigga-paran yayya nga pakoman i wagi na tu “mamippitu.” Ngem nituddu ni Jesus ta nisa anna ta nittam nga mamakoma ittam nakuan adde ta “mamippitu-fulu nga pitu,” kayà na kagian, awan tu adde na. (Mat. 18:21, 22) Nu marigatakka nga iyaplika yatun nga tabarang, ari nakuan nga makkafi i nono mu. Ngamin mabba nga aripan ni Jehova, egga ira i tiempo nga narigatan ira nga megafu ta imperfekto ira. Importante gafu nga kuammu sangawe i anni laman nga kawagan tapenu mapakomam i wagim anna tapenu metolim i memammo nga relasiommu ta nisa. c

13. Ngatta awayya na nga marigatan i elder ira nga tangngallan i wawwaragi da?

¹³ Kabalin nga napaginnolay si Jesus, siguradu nga ari vuluvuga nakattaman ni Pedro  yaw nga kinagi na: “Tangngallam-mu i karnerù ira.” (Juan 21:16) Nu elder ka, mawag mu gapa nga iyaplika yatun nga tabarang. Awayya na nga mariga para ta tadday nga elder nga magaleg tu tiempo tapenu kuan yatun nga importante nga annungan. Mawag labbi gare nga tangngallan na elder ira i sarili da nga familia ta pisikal, emosional, anna ta espiritual. Ira gapa i mangirollu ta pallayyagayya anna ta papprepara anna pangipresenta ta parte ira ta study, asembli, anna kombension. Miembro gapa i karuan na Hospital Liaison Committee onu egga gapa i annungadda ta Local Design/Construction Department. Talaga bi-busy i elder ira!

14. Anni i mamaguyu ta elder ira nga tangngallan i karneru? (1 Pedro 5:1-4)

¹⁴ Pinagaram ni Pedro i kaparehu na ira nga manakam ta kongregasion nga “mappastor ta karneru ira na Dios.” (Bibbigan i 1 Pedro 5:1-4.) Nu elder ka, ammu mi nga iddeddu mu i wawwaragim anna kayà mu ira nga ipastor. Ngem nu mittan, baka matageno mu nga bi-busy ka onu nabannag ka ngana yari tu ari mu ngana nga metuppal yatun nga annungammu. Anni i makuam? Ikagim i ngamin nga pakavurungammu kani Jehova. Nitura ni Pedro: “I sinni laman nga masserbi, ay mawag tu iserbi na i sikan nga niyawa sa na Dios.” (1 Ped. 4:11) Awayya na nga egga ira i problema na wawwaragim nga ari nga masolba taw nga sistema. Ngem daddammammu nga si Jesu-Cristo i “Dakal na ngamin nga Pastor,” yayya nga mas dakal i meyuffun na ta nira anne ta meduffummu. Moffunan na ira sangawe anna sonu napabagu nga mundo. I ikiddaw laman na Dios ta elder ira ay iddukadda i wawwaragi da, tangngalladda ira, anna mabbalin tu ‘mepangngo nga apparigan’ na karneru ira.

15. Kunnasi nga tangngallan na tadday nga elder i karneru ira? (Innan gapa i letratu.)

¹⁵ Nabayag ngana nga elder si William anna nalippawa na nga importante i pash-shepherding. Turi ta namegafu i COVID-19 pandemic, kingngua da tu goal na kasi-elder na ira nga kumustan i kada miembro na grupo da kada ligguan. Niyesplika na nu ngatta: “Aru ta wawwaragi i magitetadday laman ta baleda anna awayya na tu mannegatibo insigida i appana-panono da.” Nu egga i problema na tadday nga wagi, ginnan yayya tu mapia ni William tapenu mammuan na i pakawagan na anna i pakavurungan  na ira. Tapus magaleg yayya tu publikasion onu video ta website tam nga mosa na tapenu uffunan i kapangngurug na ira. Kinagi na: “Yaw ngana i tiempo nga pinakakawagan i pash-shepherding. Uuffunattam lagu i tanakuan nga makilala si Jehova. E di mas ngana nga ikagumattam nakuan nga tangngallan i karneru ira tapenu ari da nga panawan i kinakurug.”

16. Kunnasi tam nga meyaplika i nagigiammu tam ta dua nga tura ni Pedro?

¹⁶ Pinabbiridattam i karuan laman nga magigiammu tam ta dua nga tura ni Pedro. Posible nga nasingammu ta baggim i puedem paga ira nga mapakasta. Angngarigan na, kayà mu kari nga mas mapannonopan tu mapia i bendision ira nga malawa mu ta napabagu nga mundo? Goal mu kari i mallayyagayya ta trabahu, ta eskuela, onu ta informal? Egga kari ira i manono mu tapenu mas mepasingammu i napafutuan nga pangaya ta wawwaragim? Elder ira, sigga-paran anna kakayà nu kari nga tangngallan i karneru ira ni Jehova? Nu usitakkammu i baggim anna masingammu nga egga paga ira i mawag nga pakastammu, ari nakuan nga makkafi i nono mu. ‘Minaggallallo i Yafu’ anna uffunan naka tapenu makuam yatun. (1 Ped. 2:3) Ipasiguradu nittam ni Pedro: “I Dios . . . i mallanno ta ngamin nga pakkurangan nu. Yaya mismu i mamasikan anna mamakaladda ta angngurug nu.”—1 Ped. 5:10.

17. Nu ari ittam nga magimmang anna ipamavuluttam nga lannappan ni Jehova i pakkurangattam, anni i mala tam nga bala-balo?

¹⁷ Dati bi nga natageno ni Pedro nga ari yayya nga mepangngo nga mevulu kani Jesus. (Luc. 5:8) Ngem ta uffun anna pangaya ni Jehova anna ni Jesus, ari nagimmang si Pedro nga tumuttul kani Cristo. Nabala-balakkan si Pedro nga ‘tullung ta mannanayun nga Pammagurayan na Yafu anna Manavvu nittam nga si Jesu-Cristo.’ (2 Ped. 1:11) Talaga dakal nga bala-balo yatun! Nu ari ka magimmang kagitta ni Pedro anna ipamavulummu nga lannappan ni Jehova i pakkurangammu, malawa mu gapa i bala-balo nga mannanayun nga inango. Mala mu noka i ‘kapaliag na ikararuam gafu ta angngurug mu.’—1 Ped. 1:9.