1-2. Ngatta gigiammuattam nakuan i istoria ni Samson?

 ANNI i manono mu nu maginnam i ngagan nga Samson? Magga manono mu i tadday nga lalaki nga masiki-sikan. Kurug yatun. Ngem nakangngua si Samson tu marake nga desision nga namazziga ta nisa. Ngem i agga-sinnan ni Jehova ay i matalo nga ehemplo ni Samson. Yayya nga nilagum na yatun ta Biblia para ta pammakapiattam.

² Inusa ni Jehova si Samson ta pangngua tu kappabbaw ira nga gannug tapenu uffunan i pinili na nga totolay, i Israel. Ginatu nga dagun kabalin nga natay si Samson, nipelagum ni Jehova kani apostol Pablo i ngagan ni Samson ta lista na lalaki ira nga dakal i pangurug da. (Heb. 11:32-34) Mapagaram ittam na ehemplo ni Samson. Nattalo yayya kani Jehova maski ta mariga ira nga situasion. Innattam nu anni i magigiammu tam kani Samson anna nu kunnasi ittam nga mapagaram ta ehemplo na.

3. Anni i nalawa ni Samson nga annungan?

³ Tagga ta neyana si Samson, i Filisteo ira i mammaguray ta nasion na Israel anna tazza-tazziadda ira. (Uk. 13:1) Grabe i nikaziga-riga na Israelita ira gafu ta awan tu allo na pammagureda. Pinili ni Jehova si Samson tapenu “mangirollu ta pamaliag ta Israel kontra ta lima na Filisteo ira.” (Uk. 13:5) Kuruga mariga yatun nga annungan! Makua laman yatun ni Samson nu maddepende yayya kani Jehova.

4. Kunnasi nga inuffunan ni Jehova si Samson kontra ta Filisteo ira? (Ukum Ira 15:14-16)

 ⁴ Nattalo si Samson kani Jehova anna ta panguffun na. Mittan, minay ta Lehi i suddalu ira nga Filisteo tapenu gafutan si Samson. Egga ta Juda yatun nga lugar. Ngem gafu ta maganassing i lallaki na Juda, nanono da nga iyalawa si Samson ta kalabadda. Ginalutadda yayya tu mapia tu dua nga bagu nga lubig tapus niyangeda yayya ta Filisteo ira. (Uk. 15:9-13) Ngem “pinasikan yayya na espiritu ni Jehova” yatutta nobbaran na i nikagalu na. Tapus “nakaleg yayya tu apangal na lalaki nga asno nga bagu laman nga natay.” Ina na yatun anna inusa na tapenu patayan i 1,000 nga Filisteo!—Bibbigan i Ukum Ira 15:14-16.

5. Anni i ipasingan na pangusa ni Samson ta apangal na asno meyannung ta pattalo na kani Jehova?

⁵ Ngatta nangusa si Samson tu apangal na tadday nga asno? Ari tu gagangay nga meyusa yatun bilang armas. Ngem magga ammu ni Samson nga nakadepende i pangaffu na kani Jehova, ari tu ta maski anni nga armas nga usan na. Inusa naw nga matalo nga lalaki nu anni i egga ta nisa tapenu kuan i uray ni Jehova. Nangaffu si Samson megafu ta dakal i pattalo na kani Jehova.

6. Anni i magigiammu tam kani Samson ta pangngua tam ta teokratiko ira nga annungattam?

⁶ Mapasikan ittam gapa ni Jehova nga kuan i annungattam ira maski yuri ira i kuruga mariga. Baka masurpresa ittam nu kunnasi nga kuan na Dios yatun. Mattalo ka nga nu pinasikan ni Jehova si Samson, pasikannan naka gapa tapenu kuan i urena, basta maddepende ka ta panguffun na.—Prov. 16:3.

7. Anni nga angngarigan i mangipasingan ta importansia na pappegiya ta direksion ni Jehova?

⁷ Nakepasingan tu pattalo kani Jehova i aru nga wawwaragi tam nga mangungnguffun ta construction project ira na organisasion. Dati bi, i wawwaragi tam i mamadday tu disenio na bagu nga Kingdom Hall anna karuan paga nga building tam tapus ipataddag da yatun. Ngem megafu ta dumaka-dakal i pakawagan na organisasion ni Jehova, mawag tu egga ira i panguli nga kuan na organisasion. Kiniddaw na mangirollu ira nga brother i direksion ni Jehova  tapus pinuruebadda i bagu ira nga metodo, gitta na paggatang tu building ira nga dati ngana nepataddag tapus me-renovate ngana laman. Tadday si Robert ta nanguffun ta aru nga construction project tam ta interu nga mundo ta nappasa laman nga daga-ragun. Kagian na: “Ta ollu na bi, narigatan i karuan nga makibagay tatun nga panguli.” Kagian na paga: “Dumu-duma yatun ta piga dagun ngana nga nakasanayammi. Ngem sigga-paran i brother ira nga makibagay anna nasingammi tu bebbendisionan ni Jehova danatun nga panguli.” Tadday laman yaw ta angngarigan nu kunnasi nga igigiya ni Jehova i totolena tapenu makua i urena. Pannonopammu gafu yaw, ‘Mappepegiya ngà kari ta direksion ni Jehova anna kanayun ngà kari nga makibagay ta panguli ira ta serbisiù ta nisa?’

8. Anni i kingngua ni Samson turi ta mapanga-pangal yayya?

⁸ Baka meraddammammu i karuan paga nga kappabbaw nga gannug nga kingngua ni Samson. Mittan, magitaddena nga kinillaban anna pinatay i tadday nga leon. Tapus turi kua, pinatena gapa i 30 nga lalaki ta Askelon nga siudad na Filisteo ira. (Uk. 14:5, 6, 19) Ammu ni Samson nga ari na vuluvuga makua i kuddanatun nu awan tu uffun ni Jehova. Masingan yatun turi ta fermi nga mapanga-pangal yayya kabalin na nga pinatay i 1,000 nga Filisteo. Imbes tu maddepende yayya ta baggi na tapenu makaleg tu danum nga inuman na, nappaduffun yayya kani Jehova.—Uk. 15:18.

9. Kunnasi nga sinabbag ni Jehova i pakikurag ni Samson? (Ukum Ira 15:19)

⁹ Sinabbag ni Jehova i pakikurag ni Samson gukaban na milagro nga pamadday tu paggafuan na danum. Turi ta mininum si Samson tatun, “nanoli i sikan na anna nagawa-gawayyan uli yayya.” (Bibbigan i Ukum Ira 15:19.) Piga ragun ngana i nappasa, awayya na tu egga lagapa yatun nga paggafuan na danum turi ta nitura ni profeta Samuel i libru na Ukum Ira. Awayya na tu neperaddam ta Israelita ira nga nakasingan tatun nga paggafuan na danum nga duffunan ni Jehova i matalo ira nga aripan na ta tiempo na pakawagadda.

10. Anni i mawag tu kuattam tapenu duffunan ittam ni Jehova? (Innan gapa i letratu.)

¹⁰ Mawag gapa tu mappoffun ittam kani Jehova maski nu anni paga nga talento onu abilidad i egga ta nittam onu maski anni paga i netuppal tam ta passerbi ta nisa. Minappakalinno ittam nakuan anna anugutattam tu makua tam laman i ipakua ira ni Jehova nu mattalo ittam ta nisa. Nu kunnasi nga napasikan si Samson turi ta ininum na i danum nga niyawa ni Jehova, mapasikan ittam gapa ta espiritual nu approbetchattam i ngamin nga probision nga iyayawa ta nittam ni Jehova.—Mat. 11:28.

11. Anni i kuattam tapenu maapprobetcha tam i duffun ni Jehova? Mangistoria tu ekspiriensa.

¹¹ Tadday si Brother Aleksey ta wawwaragi tam nga magattattam ta grabe nga kapeppersigi ta Russia. Anni i nakaduffun ta nisa tapenu makapagattam lagapa yayya ta kitezziga ira nga situasion? Dati ngana nga makasta i espiritual nga rutina da na atawa na. Kagian na: “Ikagumakku nga itulu-tuloy lagapa i pap-personal studỳ anna i inaggaw nga pabbibbig ku tu Biblia. Kada umma, pabbidammi na atawà i daily text tapus makimallo kami kani Jehova.” Anni i magigiammu tam tatun? Imbes tu maddepende ittam ta baggi tam, mattalo ittam nakuan kani Jehova. Kunnasi? Pasikannattam nakuan i pangurug tam gukaban na makasta nga rutina na pap-personal study anna karuan paga nga espiritual nga aktibidad.  Nu kuattam danatun, bendisionan ni Jehova i appursigi tam nga passerbian yayya. Pinasikan na Dios si Samson. Magga pasikannan na ittam gapa.

12. Ngatta neruma i pakirelasion ni Samson kani Delaila ta ketratu na nga mekasal ta Filisteo nga babay?

¹² Imperfekto si Samson kagitta tam, yayya nga egga ira i marake nga desision nga nakua na. Angngarigan na, ari nabbayag kabalin nga nasserbi si Samson bilang hues, “iniddu na i tadday nga babay nga mangngagan tu Delaila nga maddian ta Tana na Sorek.” (Uk. 16:4) Nige natun, netratu ngana nga ikasal ni Samson i tadday nga Filisteo nga babay. ‘Ginakkag ni Jehova’ yatun nga pattaddeda megafu ta “magala-aleg yayya tu chansa tapenu labanan i Filisteo ira.” Turi kua, naddian si Samson ta balay na tadday nga minakkigannug nga babay ta Gaza nga siudad na Filisteo ira. Tatun nga tiempo, pinasikan na Dios si Samson tapenu meyakka na i puerta ira ta attallungan na siudad. Megafu tatun, mabi ngana laman nga matallung i siudad. (Uk. 14:1-4; 16:1-3) Ngem tadday nga Israelita si Delaila, yayya nga i pakirelasion ni Samson ta nisa ay ari tu chansa tapenu labanan i Filisteo ira.

13. Anni i kingngua ni Delaila kani Samson?

¹³ Inalawa ni Delaila i suhul nga dakal nga kuartu maggafu ta Filisteo ira tapenu traydoran si Samson. Posible nga iddeddu ni Samson si Delaila yatutta grabe i pattalo na ta nisa. Megafu tatun, ari na ngana nga nasingan i marake nga plano ni Delaila. Ngem maski anni paga i rason, namippiga nga pinilit ni Delaila si Samson nga ikagi ta nisa i paggafuan na sikan na adde ta pinabbigyan lapa yayya ni Samson. Kaddaraddam ta megafu tatun nga nakkamalian ni Samson, temporario nga nawawwan na  i sikan na anna i fabor ni Jehova.—Uk. 16:16-20.

14. Anni ira i marake nga naekspiriensa ni Samson megafu ta nattalo yayya kani Delaila?

¹⁴ Aru i marake nga naekspiriensa ni Samson megafu ta nattalo yayya kani Delaila imbes tu kani Jehova. Ginafu na Filisteo ira si Samson tapus vinuling da yayya. Nifuku da yayya ta Gaza nga dian na totolay ira nga pinasiranan na bi, tapus pinabbalidda yayya tu aripan nga gumaggiling. Kabalin natun, pinasiranadda yayya turi ta naggarammammung i Filisteo ira para ta tadday nga selebrasion. Napakaru i nitavvudda ta falsu nga dios da nga si Dagon gafu ta kurugadda nga nagafu da si Samson megafu ta uffun na. Nilawadda si Samson ta affukutan tapus niyangeda yayya ta selebrasiodda tapenu ‘paggaralakkadda.’—Uk. 16:21-25.

15. Kunnasi nga nipasingan ni Samson nga nattalo uli yayya kani Jehova? (Ukum Ira 16:28-30) (Innan i letratu ta vungun.)

¹⁵ Dakal i nakkamalian ni Samson, ngem ari yayya nagimmang nga kuan i uray na Dios. Nagaleg yayya tu chansa tapenu kuan i nipakua na Dios nisa kontra ta Filisteo ira. (Bibbigan i Ukum Ira 16:28-30.) Nipakimemallo ni Samson kani Jehova: “Pagurayammà nga mangibalo ta Filisteo ira.” Sinabbag ni Jehova yatun anna nitoli na ta nisa i nerumu-ruma nga sikan na. Megafu tatun, mas aru nga Filisteo i napatay ni Samson tatun nga tiempo anne ta napatena ira ta nappasa.

16. Anni i magigiammu tam ta nakaliwatan ni Samson?

¹⁶ Maski nu nazziga si Samson gafu ta nakkamalian na, ari yayya nagimmang nga kuan i uray ni Jehova. Maski gafu gapa nu makaliwa ittam anna mawag tu metunung ittam onu mawawattam i tadday nga pribilehio, ari ittam nakuan magimmang. Daddamman nga sigga-paran si Jehova nga pakoman ittam. (Sal. 103:8-10) Gitta ni Samson, maski nu egga ira i nakaliwatattam, aru lagapa i pangusan ni Jehova ta nittam.

17-18. Anni i magigiammum ta ehemplo ni Michael? (Innan gapa i letratu.)

¹⁷ Ikonsidera i ekspiriensa na kabataan nga si Brother Michael. Bi-busy yayya ta passerbi na kani Jehova. Tadday gare yayya nga ministerial nga aripan anna regular payunir. Ngem kaddaraddam ta nakaliwa yayya. Megafu tatun, nawawwan na i pribilehio na ira ta kongregasion. Istorian na: “Tatun bi nga tiempo, dere-derechu ngà laman ta passerbì kani Jehova.  Ngem gavva ngana laman tu gitta na nedompi ngà ta pader. Kakku mabba gapa ninono tu pagurayan nà ngana ni Jehova, ngem nanono ku nu metolì paga kari i dati nga relasiokku ta nisa onu makapasserbi ngà kari paga ta nisa ta kongregasion kagitta na dati nga kukukuakku.”

¹⁸ Makomendan si Michael ta ari yayya nga nagimmang. Kinagi na: “Nikagumakku nga mas maddukko kani Jehova gukaban na kanayun nga pappakimallo, paggigiammu, anna pannono tu mapia.” Pappasa na tiempo, netoli ni Michael i makasta nga sinaddag na ta kongregasion. Elder ngana yayya sangawe anna regular payunir. Kagian na: “I suporta anna i pamagaram nga nalawa ku, jebi yari maggafu ta elder ira, i nakaduffun ta nio tapenu matageno ku nga iddeddu na lapa ni Jehova. Makapasserbi ngà ngana uli ta kongregasion nga marenu i konsensià. Nagigiammù taw nga ekspiriensa nga pakoman ni Jehova i maski sinni nga kurug nga mabbabbabawi.” Makapakkomfiansa ittam gapa nga usan ittam ni Jehova anna bendisionan na ittam maski nu egga ira i nakkamaliattam, basta kuattam i ngamin nga mawayya tam tapenu itunung i dala-dalattam anna tulu-tuloy nga mattalo ta nisa.—Sal. 86:5; Prov. 28:13.

19. Kunnasi naka nga napasikan na ehemplo ni Samson?

¹⁹ Taw nga artikulo, nagigiammu tam i karuan laman ta nesimmu kani Samson. Imperfekto yayya ngem ari yayya nga nagimmang ta pangikaguman na nga masserbi kani Jehova, maski nu nakaliwa yayya ta pangatawa na kani Delaila. Tulu-tuloy lagapa nga inusa yayya ni Jehova. Makapabbaw yatun nga pinangusa na Dios nisa. Para kani Jehova, tadday yayya nga lalaki nga masikan i pangurug na, yatutta nilavu na yayya ta lista na matalo ira ta Hebreo kapitulo 11. Talaga makapagaram nga mammuan nga massesserbi ittam ta minaggiddu nga Yama ta langi anna kakayà na ittam nga pasikannan, jebi nu makkafi ittam! Yayya nga kagitta ni Samson, ipakimemallo tam gapa kani Jehova: “Daddammammà, fabor bi, anna pasikannammà.”—Uk. 16:28.