Neyana ngà turi ta 1934. Taga-Switzerland i magana ku ngem naddian ira ta Timmins, tadday nga pamminan nga ili ta Ontario, Canada. Ta ma-1939, nigafu na yenà i mabbibbig tu magazina nga Passifusifutan anna makistudy ta Saksi ira ni Jehova. Nivulu-vulu nà anna i annam nga wawwaragì. Ari nabbayag, nabbalin yayya tu Saksi.

Ari nga nagustuan ni Papa yatun nga desision na, ngem kakayà ni Mama i kinakurug anna ari na kayà nga panawan yatun. Matalo yayya maski turi ta bawal i trabahu na Saksi ira ni Jehova ta Canada ta dekada 1940. Kanayun nga masippo i tratu ni Mama kani Papa anna nirespeto na yayya maski nu marake i abbibida ni Papa nisa. Megafu ta makasta nga ehemplo ni Mama, nagustuammi gapa na wawwaragì i kinakurug. Pia ngana laman ta nanguli si Papa anna masippo ngana yayya nikami.

Turi ta Agosto 1950, nagatende ngà ta Theocracy’s Increase Assembly ta New York City. Aru nga wawwaragi ta nadduruma nga parte na mundo i nakilalà. Nakaginna ngà gapa tu makakkasta ira nga interviu na nag-graduate ira ta Gilead. Megafu tatun, kayà ku nga mas aru i kuakku para kani Jehova. Guggustù ngana i marregular payunir. Kalalabbe ku pagalaman ta balemi ta Canada, nagaplay ngà insigida. Sinabbag na branch office i tura ku, tapus kagiadda nio nga mappa-baptize ngà labbi. Nappa-baptize ngà turi ta Oktubre 1, 1950. Ta tumunug nga vulan, regular payunir ngà ngana anna ta Kapuskasing i ollu nga asayment ku. Ararayyu yatun ta dian na familià.

Ta 1951, niyavu na branch office ta Saksi ira nga makabida tu French nu kayà da i magali ta probinsia na Quebec nu sitaw French i lengguahe. Dakal i pakawagan tari. Megafu ta ammù parehu  i French anna English, inalawa ku yatun nga imbitasion. Neyasayn ngà ta Rouyn. Awan tu kilalà tari. I egga laman nio ay i address nga niyistorià ta gafu. Ngem okay gapa i ngamin. Nabbalikkami tu mapia nga makkofun ni Marcel. Na-enjoy ku i masserbi ta Quebec ta tumunug nga appa nga ragun tapus tatun ngà nga nabbalin tu special pioneer.

Ta keggà ta Quebec, nagayayya ngà ta nembitan ngà nga maggigiammu ta meka-26 nga klase na Gilead ta South Lansing, New York. Naggradua ngà turi ta Pebrero 12, 1956 tapus neyasayn ngà ta Ghana, b West Africa. Ngem nage ku nga makangay tari, mawag tu manoli ngà ta Canada adde ta mala ku i papeles ira nga mawag ku. Abbo ku nu piga ligguan ngà laman ta Canada.

Ngem naginnag ngà ta Toronto tu pitu nga vulan para tatun nga papeles. Tatun nga tiempo, pinaddian nà na familia nga Cripps ta baleda anna nakilalà si Sheila nga ana da. Nakka-aya kami. Turi ta aranni ngà ngana nga map-propose ta nisa, zimittal i visà. Nakimallo kami dua ni Sheila anna nadesisiommi nga umay ngà labbi ta asayment ku. Ngem nabbidammi nga makkatura kami tapus innaggammi i tiempo sonu puede kami ngana nga makkasal. Ari tu mabi yatun nga desision, ngem nasingammi tu yatun i fustu.

Tanga-vulan ngà nga nabbiahe ta tren, barku nga pang-kargamentu, anna eroplano, adde ta nakadde ngà balaman ta Accra, Ghana. Neyasayn ngà tatun bilang district overseer. Yayya nga mawag tu bisitakku i interu Ghana kunne na gapa i kabiko ira nga nasion natun nga Ivory Coast (Côte d’Ivoire sangawe) anna Togoland (Togo sangawe). Mas aru i tiempo nga magitadday ngà nga mabbiahe. Inusà i kotche nga niyawa na branch. Na-enjoy ku yatun ira nga tiempo!

Nu weekend, egga ira i asayment ku ta circuit assembly. Awan tu Assembly Hall mi. Yayya nga mamataddag i brother ira tu temporario nga pagasemblian. Usadda nga pagato i vulu ira anna  potungadda tu don na palma tapenu ari nga mapatuan i audience. Megafu gapa ta awan tu refrigerator ta cafeteria, egga ira i matolay nga ayam nga nakaprepara nga maparti tapenu mepakan ta naki-asembli ira.

Egga gapa i kappagalo ira nga ekspiriensa mi tatun ira nga asembli. Mittan, maddaggun mappalappa si Herb Jennings c nga kavulu ku nga misionero. Tapus egga i baka nga nakatammang ta cafeteria. Nakkarela yatun ta tangnga na stage anna na audience. Nagimmang nga nappalappa si Herb tapus gitta na ari nga ammu na baka i angngayan na. Egga i appa nga masisikan nga brother nga naggafu ta baka tapus nitoli da yatun ta cafeteria. Nappoppo i audience ta nesimmu.

Ta aggaw ira nga awan tu asembli, ipagirò i pelikula nga The New World Society in Action tari ira ta bario ta pallevu. Tapenu makuà yatun, nangibesing ngà tu furaw nga tela ta dua nga poste onu dua nga fun na kayu tapus tatukku nga ipagiraw i pelikula. Kakayà yatun na taga-tari! Aru ta nira i first time nga makagiraw tu video. Mappoppoppo ira ta sobra nga ayayya da kada makagiraw ira tu eksena na totolay nga mappa-baptize. Talaga nakaduffun yatun nga video tapenu masingadda nga mattaradday i Saksi ira ni Jehova ta interu mundo.

Kabalin na dua ragun ta Africa, excited ngà nga magatende ta 1958 nga internasional nga kombension ta New York City. Fermi i ayayya ku nga masingan uli si Sheila nga special pioneer ngana ta Quebec. Nakkatutura kami laman ngem sangawe ta makkavulu kami ngana uli, nap-propose ngà anna inalawa na yatun. Nattura ngà kani Brother Knorr d nu puede nga magiskuela ta Gilead si Sheila tapus mevulu nio ta Africa. Minanugu yayya. Turi kua, zimittal si Sheila ta Ghana. Nakkasal kami ta Accra turi ta Oktubre 3, 1959. Talaga binendisionan nakami ni Jehova megafu ta pinagollu mi yayya ta pattolemi.

Ta 1961, neyasayn kami ta nasion na Cameroon. Busy ngà megafu ta nekiddaw ta nio nga manguffun ngà nga mabbuu tu bagu nga branch office. Kekkaru i mawag tu gigiammuakku megafu ta sakan i bagu nga branch servant. Tapus ta  1965, nammuammi nga mavussi si Sheila. Aminakku nga mariga nga imajinan nga mabbalikkami tu magana. Ngem turi ta excited kami ngana tatun nga bagu nga responsibilidad mi anna nakaplano kami ngana nga manoli ta Canada, egga i kaddaraddam nga nesimmu.

Narian si Sheila. Kinagi na doktor nga lalaki nakuan yatun nga beybi mi. Maturu tu 50 dagun ngana i nappasa ngem ari mi lapa makattaman yatun. Maski nu maraddam kami ta nesimmu, kakayà mi i asayment mi tatun nga duma nga nasion yayya nga ari mi pinanawan yatun.

Maruddu nga mapeppersigi i wawwaragi ta Cameroon megafu ta neutral ira ta pulitika. Mas grabe yatun nu tiempo na eleksion na presidente. Turi ta Mayo 13, 1970, nesimmu i pinaka-ikassing mi. Negamma i Saksi ira ni Jehova tari. Kinumpiska na gobiernu i makakkasta anna bagu nga branch office tam nga lima vulammi pagalaman nga naddianan. Ta tanga-ligguan laman, napapanaw tatun nga nasion i ngamin nga misionero, kasali kami ni Sheila. Kezziga nga panawan i wawwaragi megafu ta iddeddu mi ira anna mavurukkami ta mesimmu nira.

Ta tumunug nga annam nga vulan, naddiakkami ta branch office ta France. Tarì nga tulu-tuloy nga inasikasu i pakawagan na wawwaragi ta Cameroon. Tapus ta Disiembre natun nga dagun, neyasayn kami ta branch ta Nigeria. Yatun ngana nga branch i nanangngal ta trabahu ta Cameroon. Makakkasta i nipangalawa na wawwaragi nikami ta Nigeria anna piga ragun gapa nga na-enjoy mi i nasserbi tari.

Ta 1973, egga i mariga nga desisionammi. Aru ngana i taka-takitan ni Sheila. Ta kegga mi ta New York para ta kombension, siminangi yayya anna kinagi na ta nio: “Ariakku ngana nga kaya! Nababbannag ngà ngana anna kanayun ngà nga mataki.” Maturu tu 14 dagun kami ngana ta West Africa. Proud ngà nisa gafu ta matalo nga passerbi na. Ngem egga ira i panguli nga mawag tu kuammi. Nabbidammi labbi i situasiommi tapus fermi nga nipakimallo mi yatun. Tapus nadesisiommi nga manoli ta Canada megafu ta mas maasikasu yayya tari. Pinanawammi i pammisionero mi anna i ngamin-tiempo nga passerbi. Yatun ngana i pinakamariga anna pinakamataki nga desision nga mawag tu kuammi.

Turi ta nakalabbe kami ngana ta Canada, nattrabahu ngà ta kofukku nga mallaku tu kotche ta tadday nga ili ta Toronto. Narrenta kami tu apartment tapus naggatakkami tu segunda-mano ira nga muebles ta balay. Nakali kami nga ari kami nga naggatu. Kayà mi nga kanayun lagapa nga simple i pattolemi. Iddanamammi nga makapasserbi kami uli ta ngamin-tiempo. Ngem ari mi inekspekta nga mabi kami laman nga nakatoli.

Nigafù i mav-volunteer kada Sabadu ta construction na bagu nga Assembly Hall ta Norval, Ontario. Pappasa na tiempo, neyasayn ngà bilang Assembly Hall overseer. Mediu nappipia ngana gapa i gawa-gawayyan ni Sheila yayya nga ammu mi tu makua na ngana yaw nga bagu nga asayment. Yayya nga nagali kami ta apartment  na Assembly Hall turi ta Hunio 1974. Magayayya kami ta nakatoli kami ta ngamin-tiempo nga passerbi!

Mapia ngana laman ta tulu-tuloy nga nappipia si Sheila. Nappasa i dua nga ragun, neyasayn kami nga mas-circuit work. I sirkito mi ay ta Manitoba, tadday nga probinsia ta Canada nga kilala megafu ta managga-tagga ka ta lamming tari. Ngem talaga enjoy mi i mapapatu nga pangalawa na wawwaragi tari. Nagigiammu mi nga ari tu importante nu sitaw kami nga masserbi. I mas importante ay tulu-tuloy kami nga masserbi kani Jehova.

Ta 1978, kabalin na piga ragun nga pas-circuit work, nembitakkami nga masserbi ta Bethel ta Canada. Ari nabbayag, egga i mariga nga nesimmu ta nio ngem nakagigiammu ngà. Nappalappa ngà bi tu tangoras-gaddua ta French ta tadday nga espesial nga miting ta Montreal. Ngem sisinu nga nawanan tu ganas i audience nga magginna ta nio. Gafu tatun, sinabarangngan nà na tadday nga brother ta Service Department. Inamikku nakuan tatun nga tiempo nga ari ngà mabba talaga malalaki mappalappa. Ngem marake i nipangalawa ku ta tabarang. Ari tu makasta i pinabbida mi dua anna nattaki i nono ku. Para gare ta nio, sobra ngana mabba i pinangivuya na anna ari nà man laman nga kinomendan. Nakkamali ngà. Ari ku nga gininna i tabarang megafu laman ta pinanabarang na ta nio anna megafu ta yayya i nanabarang.

Pappasa na piga nga aggaw, kinibbida nà na tadday nga miembro na Branch Committee meyannung tatun. Inamikku ta nisa nga marake i nipangalawa ku ta tabarang anna kinagì tu mabbabawi ngà. Tapus kinibbidà yari i brother nga nanabarang nio anna pinakoma nà. Ari ku nga makattaman yatun nga ekspiriensà. Nagigiammù i mabbalin tu mapakalinno. (Prov. 16:18) Namippiga nga nipakimallo ku yatun kani Jehova. Kuakku gapa i adde na mawayyà tapenu ari ngana tu negatibo i pangalawa ku ta tabarang.

Maturu ngana tu 40 dagun ngà ta Bethel ta Canada. Namegafu gapa turi ta 1985, pribilehiò i mabbalin tu parte na Branch Committee. Turi ta Pebrero 2021, natay i iddeddu ku nga si Sheila. Dakal i kawan na. Tapus egga paga ira i taka-taki ku. Ngem megafu ta busy anna magayayya ngà nga masserbi kani Jehova, ‘ari ku mataga-tageno i pappasa na aggaggaw.’ (Ecl. 5:20) Maski nu egga ira i tiempo nga marigatan ngà, mas aru i rasokku nga magayayya. Magayayya ngà megafu ta pinagollù si Jehova anna na-enjoy ku i 70 dagun nga pinasserbì ta ngamin-tiempo. Ipaka-pakimallo ku nga pagolluan gapa na kabataan tam ira si Jehova megafu ta kumbinsidu ngà nga mabbalin gapa tu magayayya i pattoleda. Posible laman yatun nu passerbiattam si Jehova.