1. Anni i araranni ngana nga kuan ni Jesus?

 MATTOTOLAY ittam ta tiempo nga egga ira i dakal nga panguli! Aranni ngana nga panunnutan ni Jesus i kada tolay taw ta davvun. Kinagi ni Jesus i mesimmu ira nige na pamanunnu na. Kinagi na ta disipulos na i “panakkilalan” na kegga na anna na “panuppalan na mundo.” (Mat. 24:3) Netura yaw nga profesiya ta Mateo kapitulo 24 anna 25 anna ta Marcos kapitulo 13 anna Lucas kapitulo 21.

2. Anni i gigiammuattam taw nga artikulo, anna ngatta makoffun yaw ta nittam?

² Nangiyawa si Jesus tu abiso gukaban na tallu nga ilustrasion: i karneru anna i kanzing ira, i nannono anna awan tu nono na nga mammaginganay, anna i talento ira. Makoffun yaw ira nga ilustrasion tapenu malippawa tam nga panunnutan ni Jesus i tadday base ta annangngua na. Taw nga artikulo, gigiammuattam yatun ira nga ilustrasion anna nu kunnasi tam meyaplika danatun. Pagolluattam i meyannung ta karneru anna ta kazzing ira.

I KARNERU ANNA I KAZZING IRA

3. Sonu anni nga panunnutan ni Jesus i totolay?

³ Ta ilustrasion meyannung ta karneru anna ta kazzing, nikagi ni Jesus nga panunnutan na i totolay base ta pangalawa  da ta mapia nga dumug anna ta passuporta da ta nazelugan nga wawwaragi na. (Mat. 25:​31-46) Ta tiempo na “dakal nga ziga” nige na Armagedon, panunnutan na nu sinni i karneru anna kazzing ira. (Mat. 24:​21, NW) Nu kunnasi nga isina na pastor i karneru ta kazzing ira, isina gapa saw ni Jesus danuri matalo nga massuporta ta nazelugan nga wawwaragi na turi ira ta ari nga massuporta.

4. Base ta Isaias 11:​3, 4, ngatta makasiguradu ittam nga patas saw i pamanunnu ni Jesus? (Innan gapa i letratu.)

⁴ Ipasingan na profesiya ta Biblia nga bilang natunno nga Hues ni Jehova, patas noka i pamanunnu na ta totolay. (Bibbigan i Isaias 11:​3, 4.) Oobserban na i kukukuan na totolay, i nononopadda, anna i kakkagiadda, pati i pattratu da ta nazelugan ira nga wawwaragi na. (Mat. 12:​36, 37; 25:40) Ammu saw ni Jesus nu sinni danuri nassuporta ta nazelugan nga wawwaragi na anna ta trabahu da. a Kunnasi tam nga masuportan i wawwaragi ni Cristo? Uffunattam ira ta trabahu nga pallayyagayya. Mapanunnutan nga “matunung” danuri massuporta ta nira anna egga i chansa da nga ‘mattolay nga awan tu adde na’ ta davvun. (Mat. 25:46; Nep. 7:​16, 17) Anni mabba kasta na nga bendision turi ira ta mattalupaddian nga matalo! Nu matalo ira ta tiempo na dakal nga ziga anna ta tumunug paga ira nga mesimmu, ari nga mavurran i ngagadda ta “libru na matolay.”—Nep. 20:15.

5. Anni i magigiammu tam ta ilustrasion meyannung ta karneru anna ta kazzing ira, anna sinni i mammakapia tatun?

⁵ Pakurugammu nga matalo ka. Primeru nga magaplika i ilustrasion ni Jesus para tari ira ta magiddanama nga mattolay tu mannanayun ta davvun. Ipasingadda i pangurug da gukaban na panguffun ta wawwaragi ni Cristo ta pallayyagayya anna ta matalo nga pattuttul ta pangigiya na mekatalo anna nannono nga doroban nga sinunno ni Jesus. (Mat. 24:45) Ngem mawag gapa tu ginnan danuri na para ta langi i abiso natun nga ilustrasion. Obserban gare ni Jesus i kukukuadda, i nononopadda, anna i kakkagiadda. Mawag gapa tu pakurugadda tu matalo ira. Egga i dua nga ilustrasion ni Jesus para ta nazelugan ira. Mabibbig tam gapa danatun ta Mateo kapitulo 25. Pagolluattam i ilustrasion meyannung ta nannono anna ta awan tu nono na nga mammaginganay.

I NANNONO ANNA I AWAN TU NONO NA NGA MAMMAGINGANAY

6. Kunnasi nga nipasingan na lima nga mammaginganay nga nannono ira? (Mateo 25:​6-10)

⁶ Ta ilustrasion ni Jesus meyannung ta mammaginganay, inistoria na i meyannung ta mafulu nga mammaginganay nga nallawan tapenu dafungan i nobio. (Mat. 25:​1-4) Iddanamadda ngamin nga vulunan i nobio ta abbodan. Kinagi ni Jesus nga i lima ta nira ay “nannono,” ngem i lima ay “awan tu nono na.” I nannono ira nga mammaginganay ay agga-paran anna alerto. Agga-paran ira nga innaggan i nobio maski nu tangnga na gabi ngana i dattal na. Yayya nga nangivulu ira tu allamparan nga panulu da ta zibbo. Nangivulu paga lagu ira tu reserba nga denu nu angngarigan na tu nabinnay i dattal na nobio. Agga-paran gafu ira tapenu ari nga maddo i allamparadda. (Bibbigan i Mateo 25:​6-10.) Turi ta zimittal ngana i nobio, nevulu ta nisa ta abbodan i nannono ira nga mammaginganay. Kunnatun gapa saw i nazelugan ira nga Cristiano. Nu mapakurug da nga kanayun ira nga alerto anna matalo adde ta  dattal ni Cristo, mapanunnutan ira nga mepangngo nga mevulu ta Nobio nga si Jesus ta Pappatulan na ta langi. b (Nep. 7:​1-3) Kunnasi gapa i lima nga ari tu nannono nga mammaginganay?

7. Anni i nesimmu ta lima nga awan tu nono na nga mammaginganay, anna ngatta?

⁷ Agga-paran i nannono ira nga mammaginganay turi ta zimittal i nobio. Ngem ari nga kunnatun i lima nga mammaginganay nga awan tu nono da. Magimmamatay ngana i tulu da anna awan tu nivulu da nga reserba nga denu. Turi ta nammuadda nga aranni ngana nga duttal i nobio, nanaw ira tapenu gumatang tu denu. Awan lallagu ira tari turi ta zimittal i nobio. Tatun nga oras, “i lima nga agga-paran i denu da ay nevulu ta nobio ta abbodan. Turi ta nakatallung ira ngamin, naserran ngana i puerta.” (Mat. 25:10) Turi gapa ta nanoli ngana i awan tu nono na ira nga mammaginganay anna kayà da i tullung, kinagi na nobio ta nira: “Ariat-takamu nga amma-ammu.” (Mat. 25:​11, 12) Ari nga agga-paran yatun ira nga mammaginganay nga innaggan i dattal na nobio. Anni i magigiammu tatun na nazelugan ira?

8-9. Anni i magigiammu na nazelugan ira ta ilustrasion meyannung ta mammaginganay ira? (Innan gapa i letratu.)

⁸ Pakurugammu tu agga-paran anna alerto ka. Ari nga niprofesiya ni Jesus nga egga saw i dua nga grupo na nazelugan ira. Ari na kinagi nga i tadday nga grupo ay nakaprepara nga maginnag adde ta panuppalan anna i tadday gapa ay ari. Nipakanawag na laman nga ari nga malawa na nazelugan ira i bala-balo da nu ari ira nga agga-paran nga magattam anna mabbalin tu matalo adde ta panuppalan. (Juan 14:​3, 4) Serioso nga abiso yatun! Para langi man onu para davvun i iddanama tam, ginnattam nakuan i abiso ta ilustrasion meyannung ta mammaginganay ira. Mawag tu sigga-alerto anna agga-paran nga magattam  adde ta panuppalan i kada tadday nittam.—Mat. 24:13.

⁹ Ta ilustrasion meyannung ta mammaginganay ira, nipasigo ni Jesus nga mawag tu agga-paran anna alerto ittam. Kabalin natun, inistoria na i ilustrasion meyannung ta talento ira. Ipasigo natun nga mawag tu mallallappo ittam.

I TALENTO IRA

10. Kunnasi nga nipasingan na dua nga doroban tu matalo ira? (Mateo 25:​19-23)

¹⁰ Ta ilustrasion ni Jesus meyannung ta talento ira, kinagi na i dua nga doroban nga matalo ta yafu da anna i tadday nga doroban nga ari tu matalo. (Mat. 25:​14-18) Nige nga nabbiahe i yafu da, nikargo na ta nira i talento ira. Daka-dakal nga balor na kuartu yatun. Nipasingan na dua nga doroban nga matalo ira megafu ta nallallappo ira tapenu magganansia i kuartu na yafu da. Megafu tatun, ta panoli na yafu da, nadoble i balor na kuartu nga niyawa na ta nira. Kinomendan ira na yafu da anna ‘nakitappagayayya ira nisa.’ (Bibbigan i Mateo 25:​19-23.) Ngem kunnasi gapa i mekatallu nga doroban? Anni i kingngua na ta kuartu nga nikargo ta nisa na yafu na?

11. Anni i nesimmu ta “talakag” nga doroban, anna ngatta?

¹¹ I mekatallu nga doroban ay nakalawa tu tadday nga talento ngem “talakag” yayya. Ekspektan na yafu na nga mallallappo yayya tapenu magganansia i talento. Ngem imbes tu kunnatun, nikokkog na yatun. Ta panoli na yafu na, awan tu meyentriga naw nga doroban tu ganansia na kuartu nga neyawa sa. Ari tu makasta i ugali natun nga doroban. Imbes tu makidispensa yayya gafu ta ari na nga napagganansia i kuartu na yafu na, inagalan na paga i yafu na nga “istrikto.” Ari nga nagayayya i yafu tatun nga doroban. Yatutta ina da ta nisa i talento tapus netabbo paga yayya ta lawan na balay na yafu na.—Mat. 25:​24, 26-30.

12. Sinni i irepresenta sangawe na dua nga matalo nga doroban?

¹² Irepresenta na dua nga matalo nga doroban i matalo ira nga nazelugan. Imbitan ira na Yafu nga si Jesus nga ‘makitappagayayya ta  nisa.’ Malawa da i bala-balo da ta langi, i ollu nga kapaginnolay. (Mat. 25:​21, 23; Nep. 20:5b) Abiso gapa para ta nazelugan ira i talakag nga doroban. Kunnasi?

13-14. Anni i magigiammu na nazelugan ira ta ilustrasion meyannung ta talento ira? (Innan gapa i letratu.)

¹³ Pakurugammu tu malappo ka. Kagitta na ilustrasion meyannung ta mammaginganay ira, ari nga niprofesiya ni Jesus nga mabbalin tu talakag i nazelugan ira ta ilustrasion meyannung ta talento ira. Ipakanawag na laman nga nu mawawan i talikarag da, ariadda ‘mapakurug nga napili anna nagalan ira’ anna ari ira makatallung ta Pappatulan ta langi.—2 Ped. 1:10.

¹⁴ Manawag ta ilustrasion ira ni Jesus meyannung ta mammaginganay anna ta talento ira nga mawag tu agga-paran, alerto, anna malallappo i ngamin nga nazelugan. Ngem egga paga kari i kinagi ni Jesus nga abiso para ta nazelugan ira? Wan! Mabibbig yatun ta Mateo 24:​40, 41.

SINNI DANURI “MALA”?

15-16. Kunnasi nga nepasigo ta Mateo 24:​40, 41 nga mawag tu mappara-paran i nazelugan ira?

¹⁵ Nige nga niyistoria ni Jesus i tallu nga ilustrasion, kinagi na i ultimu nga kapanunnu na nazelugan ira nga mangipasingan nu sinni nira i matalo. Kinagi na i dua nga lallaki ta akkomanan anna i dua nga babbay nga maddaggun nga maggiling. Parefu i kukukuan na lallaki anna maski na babbay. Ngem kinagi ni Jesus nga “mala i tadday ay mabattang i tadday.” (Bibbigan i Mateo 24:​40, 41.) Tapus pinagaram na i tagatuttul na ira: “Yatun tu mappara-parak-kamu ta arian nu nga ammu nu anni nga aggaw i panoli na Yafu nu.” (Mat. 24:42) Kunnatun gabbalaman i kinagi ni Jesus kabalin na nga niyistoria i ilustrasion meyannung ta mammaginganay ira. (Mat. 25:13) Parefu kari i punto natun ira nga kinagi na? Wan! Danuri laman kurug anna matalo nga nazelugan i “mala” anna makatallung ta Pappatulan ni Jesus ta langi.—Juan 14:3.

¹⁶ Pakurugammu tu mappara-parakka. Ari nga mesipo tari ira ta ‘totolay nga pinili na Dios’ i maski sinni nga nazelugan nga ari nga mappara-paran. (Mat. 24:31) Mawag gapa tu mappara-paran anna mattalupaddian nga matalo danuri magiddanama nga mattolay tu mannanayun taw ta davvun.

17. Ngatta ari ittam nakuan madismaya nu egga lagapa ira i pilian ni Jehova nga mabbalin tu nazelugan ta tiempo tam?

¹⁷ Ammammu tam tu mapia si Jehova, yayya nga mattalo ittam nga kanayun nga fustu i kuan na. Ari ittam gafu madismaya nu egga lagapa ira i pilian ni Jehova nga mabbalin tu nazelugan ta tiempo tam. c Manono tam i kinagi ni Jesus nga trabahador ira nga nattrabahu ta alas-singko ta fugag ta ilustrasion meyannung ta pammulan tu ubas. (Mat. 20:​1-16) Parehu laman i netaddan tari ira ta nagalan nga mattrabahu ta fugag anna tari ira ta namegafu nga nattrabahu ta umma. Maski anni gafu nga tiempo i nikapili na nazelugan ira, malawa da i bala-balo da ta langi nu kanayun ira nga matalo.

MAGGINNA TA ABISO IRA

18-19. Anni ira i nagigiammu tam ta tallu nga ilustrasion?

¹⁸ Anni ira i nagigiammu tam? Para turi ira ta magiddanama nga mattolay tu mannanayun ta davvun, ipasigo na ilustrasion meyannung ta karneru anna ta kazzing nga mawag tu kanayun ira nga matalo kani Jehova, sangawe anna sonu dakal nga ziga. Nage na Armagedon, panunnutan ni Jesus nga mepangngo  nga ‘mattolay nga awan tu adde na’ i matalo ira.—Mat. 25:46.

¹⁹ Ginigiammu tam gapa i dua nga ilustrasion nga abiso para ta nazelugan ira. Ta ilustrasion ni Jesus meyannung ta mammaginganay, pinakurug na lima ta nira nga nannono ira. Agga-paran anna alerto ira nga innaggan i dattal na nobio maski nu nabinnay yatun. Ngem ari tu agga-paran i awan tu nono na nga mammaginganay. Yayya nga ari ira nga pinatallung na nobio ta boda na. Mawag gapa tu agga-paran ittam nga innaggan i panaral ni Jesus taw nga mundo maski kunnasi paga kabayag yatun. Ginigiammu tam gapa ta ilustrasion ni Jesus meyannung ta talento ira i dua nga matalo nga doroban nga malallappo. Nallallappo ira para ta yafu da yatutta napagayayya da yayya. Ngem napapanaw i talakag nga doroban. Anni i magigiammu tam tatun? Kanayun ittam nakuan nga malallappo ta passerbi kani Jehova adde ta panuppalan. Ginigiammu tam gapa nga mawag tu kanayun nga mappara-paran i nazelugan ira tapenu “mala” ira anna makatallung ta Pappatulan ni Jesus ta langi. Iinnaggadda ngana i tiempo sonu ‘maamma-ammung ira nga metadday’ kani Jesus ta langi. Kabalin na gerra na Armagedon, mabbalin ira tu nobia ni Jesus ta kasal na Kordero.—2 Tes. 2:1; Nep. 19:9.

20. Anni i ibala-balo ni Jehova tari ira ta magginna ta abiso na ira?

²⁰ Araranni ngana i pamanunnu ni Jesus. Ngem ari ittam nakuan nga maganassing. Nu kanayun ittam nga matalo, iyawa na minaggiddu nga Yama tam ta langi “i ari nga maguku-gukug nga pakapangngua” tapenu ‘egga i sikattam nga umarubang ta Ana na Tolay.’ (2 Cor. 4:7; Luc. 21:36) Mapagayayya tam i Yama tam nu magginna ittam ta abiso ta ilustrasion ira ni Jesus, para langi man onu para davvun i iddanama tam. Megafu ta masissippo si Jehova, i ngagattam ay ‘metura ta libru’ na inango.—Dan. 12:1; Nep. 3:5.