1-2. Ngatta mammakapia ittam ta pinamaratu nittam ni Jehova?

 TURI TA pinaratu ni Jehova i totolay, niddan na ittam tu abilidad nga mabbalin tu magayayya ta pangiyawa anne ta pangalawa. (King. 20:35) Kebalinan na kari yaw nga ari ittam vuluvuga magayayya ta pangalawa? Ari. Magayayya ittam nu makalawa ittam tu regalu. Ngem mas makatageno ittam tu pagayayya nu sittam i mangiyawa. Ta kakurugan na, mammakapia ittam megafu ta pinaratu ittam ni Jehova tu kunnatun. Ngatta?

² Sittam lagapa gare i makangngua tu gannug nga mas mamagayayya nittam. Makua tam yatun nu magaleg ittam tu chansa nga mangiyawa. Anni mabba kasta na ta niddan ittam ni Jehova tu kunnatun nga abilidad!—Sal. 139:14.

3. Ngatta “magayayya nga Dios” si Jehova?

³ Ipasiguradu na Biblia nga mangiyawa tu pagayayya i pangiyawa. Yari ta ari ittam gafu mattaka nga kagian na Biblia nga “magayayya nga Dios” si Jehova. (1 Tim. 1:​11, NW) Yayya i pinaka-ollu anna kadakallan nga Minangngiyawa. Nitura ni apostol Pablo nga yayya i “mangiyawa ta inango, pagguyu-guyu anna kata-katolay tam.” (King. 17:28) Kurug talaga nga naggafu kani Jehova “ngamin i mapia anna awan tu pakkurangan na nga regalu.”—Sant. 1:17.

4. Anni i makoffun tapenu mabbalin ittam tu mas magayayya?

⁴ Magga kayà tam ngamin i mabbalin tu mas magayayya megafu ta pangiyawa. Makua tam yatun nu parigattam i kinavuka-palag ni Jehova. (Efe. 5:1) Innattam gapa taw nga artikulo i makua tam nu ari nga maappresia i pangiyawa tam. Makoffun yatun tapenu kanayun ittam lagapa nga mangiyawa ta tanakuan anna mabbalin tu mas magayayya.

PARIGAN I KINAVUKA-PALAG NI JEHOVA

5. Anni ira i iyayawa ni Jehova ta nittam?

⁵ Kunnasi nga ipasa-pasingan ni Jehova nga vuka-palag yayya?  Ikonsidera tam i karuan nga angngarigan. Iddan ittam ni Jehova tu material ira nga gannug. Ari gapa tu kanayun nga pabbalinan ni Jehova nga komfortable i pattoletam. Ngem mapia ngana laman ta siguraduan na nga egga ta nittam i kawagattam. Angngarigan na, iddan na ittam tu makan, sinnun, anna paddianan. (Sal. 4:8; Mat. 6:​31-33; 1 Tim. 6:​6-8) Iyayawa kari ni Jehova ta nittam danaw nga gannug megafu laman ta obligadu yayya nga kuan yatun? Ari. Ngatta gafu ta kuan ni Jehova yatun para ta nittam?

6. Anni i magigiammu tam ta Mateo 6:​25, 26?

⁶ Iyayawa ni Jehova i pisikal nga kawagattam megafu ta iddukan na ittam. Ikonsidera tam i kinagi ni Jesus ta Mateo 6:​25, 26. (Bibbigan.) Inusa ni Jesus i pinaratu ira tapenu manuddu. Angngarigan na, kinagi na meyannung ta mammanu ira: “Ari ira nga mabbini onu maggatag tu ipappad-da ta abayaw.” Ngem sifutan i tumunug nga kinagi na: “Tolayan ira na Yama nu ta langi!” Tapus niyavu na: “Ari kari nga mas mangina kamu anne ta mammanu ira?” Anni i punto na? Mas tagibaloran ni Jehova i maddayaw ira nisa anne ta aya-ayam nga pinaratu na. Nu iyayawa na i pakawagan na ayam ira, makasiguradu ittam nga iyawa na gapa i pakawagattam! Kagitta na minaggiddu nga yama, iyawa ni Jehova i pakawagan na familia na megafu ta iddukan na ira.—Sal. 145:16; Mat. 6:32.

7. Kunnasi ittam nga mabbalin tu vuka-palag gitta ni Jehova? (Innan gapa i letratu.)

⁷ Kagitta ni Jehova, awayya tam gapa mangiyawa tu material megafu ta aya. Angngarigan na, egga kari i kilalam tu wagi nga makawag tu makan onu sinnun? Puede naka nga usan ni Jehova tapenu iyawa yatun nga pakawagan na. Kilala i Saksi ira ni Jehova nga vuka-palag ta tiempo na krisis. Angngarigan na, turi ta COVID-19 pandemic, aru nga wawwaragi i nangibillay tu makan, sinnun, anna tanakuan paga ira nga suplay da turi ira ta makawag. Aru gapa i matulu nga naddona para ta worldwide work. Nosa yatun nga fundu tapenu makeyawa tu relief ta interu mundo. Talaga nipafutu da i uvovug ta Hebreo 13:16: “Arian nu nga kattaman i mangngua ta mapia anna mangibillay ta anni laman nga egga nikamu, ta i kuddanaw ira nga sakrifisio i makapagayaya ta Dios.”

8. Kunnasi nga uuffunan ittam ni Jehova gukaban na pangiyawa na tu sikan? (Filipos 2:13)

⁸ Mangiyawa si Jehova tu pakapangngua. Awan tu limitasion na pakapangngua ni Jehova anna magayayya yayya nga ibillay yatun ta  matalo ira nga aripan na. (Bibbigan i Filipos 2:​13, NW.) Napuruebammu ngana kari nga ipakimallo i sikan tapenu malillitan i tentasion onu tapenu maattamman i mariga nga kapurueba? Baka nipakimallo mu gapa nga uffunan naka tapenu makuam i kawagan nga kuammu ta interu aggaw. Turi ta natabbag yatun nga pakimallo mu, magga umanugu ka taw nga kinagi ni apostol Pablo: “Egga i sikakku nga arubangan i ngamin nga gannug gafu ta mangiyayawa niakan tu pakapangngua.”—Fil. 4:​13, NW.

9. Kunnasi tam maparigan i vuka-palag nga pangusa ni Jehova ta pakapangngua na? (Innan gapa i letratu.)

⁹ Maski nu imperfekto ittam, maparigattam lagapa i vuka-palag nga pangusa ni Jehova ta sikan na. Ari tam literal nga mepasa i sikattam ta tanakuan, ngem puede tam ira nga uffunan. Angngarigan na, puede tam nga uffunan i lallakay, babbako, anna mataki nga wawwaragi tam ta trabahu ira ta balay onu ipamalengke ira. Nu ipamavulun na situasiottam, awayya tam gapa i mav-volunteer ta pappakarenu anna pammentena ta Kingdom Hall. Nu usattam i sikattam ta kunnatun ira nga gannug, aru i meyuffuttam ta wawwaragi tam.

10. Kunnasi nga mammakapia i tanakuan ta kakkagiattam?

¹⁰ Ari mu gapa nga kattaman nga egga i efekto na ta tanakuan na kakkagiattam. Egga kari i tadday nga manono mu nga mammakapia ta napafutuan nga komendasiommu? Egga kari i kilalam nga magawag tu banna-bannay? Nu kunnatun, siguraduammu nga mekagim tatun nga tolay nga ikavurungammu yayya. Puedem yayya nga bisitan onu magagal ta nisa, magemail, onu mat-text. Ari ka nakuan kuruga mavurung nu anni i kagiammu. Maski ababba laman anna simple i kagiammu basta napafutuan, baka yatun i eksakto nga kawagan na wagi tapenu matalo lagapa yayya anna positibo.—Prov. 12:25; Efe. 4:29.

11. Kunnasi nga usan ni Jehova i ka-uto na?

¹¹ Mangiyawa si Jehova tu ka-uto. Nitura na disipulo nga si Santiago: “Nu egga nikamu i makkurang ta ka-uto, mawag tu makimallo ta Dios, ay meddan yaya. Ta vuka i palag na Dios anna sigga-allo nga mangiyawa ta maski anni ta ngamin nga totolay.” (Sant. 1:5) Ipasingan danatun nga uvovug nga ari nga iyetu ni Jehova i ka-uto na. Vuka-palag nga ibillay na yatun ta tanakuan. Sifutan gapa nga nu mangiyawa si Jehova, “sigga-allo” nga kuan na yatun. Ta orihinal nga Griego, neyusa gapa i uvovug ira nga “ari nga manguyaw” onu “ari nga magaleg tu kamali.” Manaki gafu ni Jehova nga makatageno ittam tu negatibo megafu ta pakkiddaw tam tu pangigiya na. I kurug, kakayà na nga kiddawattam yatun ta nisa.—Prov. 2:​1-6.

12. Anni ira i chansa tam tapenu mebillay i ka-uto tam?

 ¹² Kunnasi tam gapa nga maparigan i pangibillay ni Jehova tu ka-uto na? (Sal. 32:8) Aru i chansa na totolay ni Jehova nga ibillay i nagigiammu da. Angngarigan na, maruddu nga sanayattam i babbaragu ta ministerio. Mapasensia gapa nga duffunan na elder ira i ministerial servant ira anna i bawtisadu ira nga brother tapenu magigiammu da nu kunnasi nga kuan i annungadda ira ta kongregasion. I-train gapa danuri na ekspiriensadu ta konstruksion anna ta pammentena i tanakuan tapenu makapattrabahu ira ta fasilidad ira na organisasion.

13. Kunnasi tam maparigan i angngibillay ni Jehova ta ka-uto na?

¹³ Ikagumammu nga parigan si Jehova ta pat-training mu ta tanakuan. Vuka-palag nga iyawa ni Jehova i ka-uto na. Vuka-palag gapa nga ibillay tam i pakannammu anna ekspiriensa tam tari ira ta sanayattam. Ari tam nga iyetu i karuan nga ammu tam megafu laman ta ikassittam nga baka talianan ittam saw na sanayattam. Ari tam gapa nga ikagi: ‘Awan vuluvuga tu nat-training nio! Bahala na lapa yayya nga makagigiammu.’ Ari nga mepangngo nga nonopan yatun na maski sinni nga wagi. Magayayya ittam lallagu nga ibillay ari laman tu i pakannammu tam, ‘nu ari maski paga i pangiserbi tam ta mismu nga baggi tam’ tari ira ta sanayattam. (1 Tes. 2:8) Iddanamattam gare nga ‘awayya da gapa saw nga ituddu yatun ta karuan.’ (2 Tim. 2:​1, 2) Nu vuka-palag ittam ngamin ta pangibillay ta ammu tam, sittam anna i sanayattam ay mabbalin tu mas ma-uto anna mas magayayya.

NU GITTA NA ARI NGA MAAPPRESIA I PANGIYAWA TAM

14. Anni i reaksion na magaru nu vuka-palag ittam nira?

¹⁴ Nu vuka-palag ittam jebi ngana ta wawwaragi tam, maruddu nga appresiadda yatun. Awayya na tu mangiyawa ira tu thank you card onu egga i kuadda tapenu ipasingan i pappabalo da. (Col. 3:15) Mas magayayya ittam nu makalawa ittam tu kuddanatun nga pangappresia.

15. Anni nakuan i tandaanattam nu ari nga ikagi na karuan i pangappresia da?

¹⁵ Nu mittan, ari nga ipasingan onu ikagi na tanakuan i pappabalo da ta kingngua tam ta nira. Baka nibillay tam nira i oras, sikan, onu pakkukua tam. Ngem gitta na awan tu pangappresia da. Nu mesimmu yatun, anni i kuattam tapenu ari nga mawawan i pagayayya tam onu ari ittam nga madismaya? Daddammattam i nakagi ta tema nga teksto nga Kingngua 20:35. Ari nga nakadepende i pagayayya tam ta reaksion na tanakuan. Puede tam lapa nga pilian nga mabbalin tu magayayya ta pangiyawa maski nu gitta na ari da appresian yatun. Kunnasi? Innattam i karuan nga makua tam.

16. Ta anni ittam nakuan nga maffokus nu mangiyawa ittam?

¹⁶ Maffokus ta pamarig kani Jehova. Mangiyayawa yayya tu mapia ira nga gannug ta totolay, appresiadda man yatun onu ari. (Mat. 5:​43-48) Nipromesa ni Jehova nga nu mangiyawa ittam gapa nga ‘ariattam nga iddanaman tu metoli’ i maski anni nittam, ‘dakal noka i balo tam.’ (Luc. 6:35) Awayya na nga kasali ta “metoli” i pangikagi da nakuan tu pangappresia. Ngem malawa tam man yatun onu ari, kanayun nga bala-balakkan ittam ni Jehova ta mapia nga kuattam tapenu duffunan i tanakuan anna megafu ta magayayya ittam nga mangiyawa.—Prov. 19:17; 2 Cor. 9:7.

17. Kunnasi nga ari mawawan i fokus tam? (Lucas 14:​12-14)

¹⁷ Tapenu ari mawawan i fokus tam ta pangiyawa, makaduffun i prinsipio ta Lucas 14:​12-14. (Bibbigan.) Ari gapa nga marake nga padulakkattam onu vuka-palag ittam tari ira ta ammu tam nga makawayya gapa nga  kuan balaman yatun nittam. Ngem kunnasi nu nasifutattam nga mangiyawa ittam megafu ta ekspektattam tu egga i katali natun? Baka puede tam nga kuan i kinagi ni Jesus. Imbitattam danuri awan tu pakawayya da nga padulakkan gapa ittam. Ta nu kunnatun, magayayya ittam megafu ta paparigattam si Jehova. Kunnatun balaman nga appana-panono i makaduffun tapenu magayayya ittam lagapa maski nu ari nga ikagi na tanakuan i appresasiodda.

18. Anni i kuattam tapenu mabbalin ittam tu makonsiderasion?

¹⁸ Ari tam kuestionan i motibo na tanakuan. (1 Cor. 13:7) Nu ari nga ikagi na tanakuan i pappabalo da, puede tam iyavu ta baggi tam: ‘Talaga kari nga ari ira nga minappabalo onu baka nakattamadda laman nga ikagi yatun?’ Baka egga gapa i karuan nga rason nu ngatta ari ira nga nappabalo nittam segun ta inekspekta tam. I karuan gapa ay fermi nga mappabalo ngem marigatan ira nga ikagi yatun. Baka mappasiran ira nga mangalawa tu uffun jebi ngana nu dati bi, ira i manguffun ta tanakuan. Maski anni paga tatun i rason, paguyuan ittam na aya nga mabbalin tu makonsiderasion ta kapangngurug tam ira anna magayayya lagapa ta pangiyawa.—Efe. 4:2.

19-20. Ngatta mawag i pappasa-pasensia nu mangiyawa ittam ta tanakuan? (Innan gapa i letratu.)

¹⁹ Mappasa-pasensia. Nu meyannung ta pabbalin tu vuka-palag, nitura na masirib nga si Patul Solomon: “Itabbo mu i pan mu ta dana-danum, megafu ta pappasa na aru nga aggaw ay malegammu uli yatun.” (Ecl. 11:1) Ipasingan natun nga teksto nga baka mappasa labbi i “aru nga aggaw” onu tiempo nage nga mappabalo i karuan gafu ta kinavuka-palag tam. Nesimmu yatun ta tadday nga sister.

²⁰ Nattura bi i atawa na circuit overseer ta tadday nga sister nga bagu baptize anna pinagaram na yayya nga mattalupaddian nga matalo kani Jehova. Pappasa na walu nga ragun, kunnaw i nitabbag na sister ta tura na: “Ari mu ammu yaw, ngem kayà ku nga ikagi ta niko nga dakal i neyuffummu ta nio ta nappasa nga daga-ragun.” Nituloy na paga: “Sobra nga na-touch  ngà [ta tura mu], anna natukkal i futù ta teksto. Ariakku vuluvuga makattaman yatun.” a Kabalin nga niyistoria na sister i ziga ira nga nappasan na ta aru nga dagun, kinagi na: “Nu mittan, kayà ku ngana laman nga panawan i ngangamin, pati i kinakurug anna i responsibilidad ku ira. Ngem megafu ta kanayukku nga nononopan i teksto nga nitura mu nga nakatukkal ta futù, ari ngà lagapa nga magimmang.” Niyammunna paga: “Ta unag natun nga walu nga ragun, yatun nga tura mu anna teksto nga nibillem i pinakanakaduffun nio.” Nonopammu ngana laman i ayayya na atawa na circuit overseer turi ta nalawa na yatun nga tura kabalin na ‘aru nga aggaw’! Baka mesimmu gapa nittam yatun. Baka mappasa labbi i tiempo nige tam nga malawa i pappabalo para ta mapia nga kingngua tam ta tanakuan.

21. Ngatta determinadu ka nga tulu-tuloy nga parigan i kinavuka-palag ni Jehova ?

²¹ Nagigiammu tam nga egga i espesial nga abilidad nga niyawa nittam ni Jehova turi ta pinaratu na ittam. Pinaratu na ittam nga mas magayayya nu mangiyawa ittam anne ta mangalawa. Makasta gapa i panageno tam nu maduffunattam i kapangngurug tam ira. Magayayya ittam gapa nu ikagi da i pangappresia da. Ngem appresian man onu ari na zinuffunattam i kingngua tam ta nisa, magayayya ittam lagapa ta kingngua tam i fustu. Ari mu nakuan vuluvuga kattaman nga maski anni paga i iyawa mu, “mawayya naka iddan ni Jehova tu mas aru paga anne tatun.” (2 Cro. 25:9) Kanayun nga mas aru i iyawa nittam ni Jehova anne ta iyawa tam ta tanakuan! Nu yayya i mamala-balo ta nittam, yatun i kakastan nga bala-balo. Determinadu ittam nakuan gafu nga tulu-tuloy nga parigan yayya.