1-2. Anni i mamagayayya ta aripan ira na Dios? (Santiago 1:​22-25)

 IKAYA ni Jehova anna na iddeddu na nga Ana nga mabbalin ittam tu magayayya. Kagian na nattura ta Salmo 119:2: “Mapalag [“magayayya,” NW] danuri i tumuttul ta bili-bilin na, danuri i napafutu i pakimoray da sa.” Kagian gapa ni Jesus: “Danuri i magginna anna mamarulo ta uvovug na Dios, ay ira i mapalag!”—Luc. 11:28.

² Magayayya nga totolay i aripan ira ni Jehova. Ngatta? Aru i rason. I tadday tatun ay megafu ta inaggaw nga bibbigattam i Uvovug na Dios anna ikagumattam nga iyaplika i magigiammu tam tatun.—Bibbigan i Santiago 1:​22-25.

3. Anni i makasta nga ivunga na nu parulattan onu iyaplika tam i nabibbig tam ta Biblia?

³ Aru i makasta nga ivunga na nu ‘parulattattam i uvovug.’ Nu iyaplika tam i magigiammu tam ta Biblia, mapagayayya tam si Jehova, yatun ta magayayya ittam gapa. (Ecl. 12:13) Nu tuttulattam gapa i tabarang na Biblia, mapakasta tam i relasiottam ta kafamilia tam anna ta wawwaragi. Siguradu nga napakurug mu ngana yatun. Malillitattam gapa i aru nga problema nga maekspiriensa danuri na ari tumuttul ta dorob ni Jehova. Umanugu ittam kani Patul David. Kabalin na nga ikansion i dob, bili-bilin, anna pamanunnu ni Jehova, kinagi  na: “Ta pamarulo ku nira ay dakal i balo ku.”—Sal. 19:​7-11.

4. Ngatta mariga nu karuan nga parulattan i Uvovug na Dios?

⁴ Mariga nu karuan nga parulattan i Uvovug na Dios. Napakaru gare i kuattam ta inaggaw. Ngem mawag tu egga i tiempo tam nga bibbigan anna gigiammuan i Biblia tapenu malippawa tam i kayà ni Jehova nga kuattam. Gigiammuattam gafu i suhestion ira nga makoffun tapenu inaggaw tam nga mabibbig yatun. Ammuattam gapa nu kunnasi tam mapannonopan i nabibbig tam anna nu kunnasi tam meyaplika yatun.

MANGISKEDIUL TU TIEMPO NGA MABBIBBIG TU BIBLIA

5. Anni ira i rason nu ngatta busy ittam?

⁵ Busy i magaru ta totolay ni Jehova. Aru nga oras i kawagan tapenu makua tam i responsibilidad tam ira nga nakagi ta Biblia. Magaru ta nittam i mattrabahu ta sekular tapenu masustini i pakawagattam anna na familia tam. (1 Tim. 5:8) Aru gapa nga Cristiano i manangngal ta mataki onu lakay-bako nga kafamilia da. Aru gapa nga tiempo i mosa tam ta panangngal ta mismu nga gawa-gawayyattam. Egga gapa ira i importante nga kuattam ta kongregasion. Responsibilidad tam gapa i mallayyagayya. Ta karu na obligasiommu, anni i kuammu tapenu egga lagapa i tiempom nga inaggaw nga bibbigan, pannonopan tu mapia, anna iyaplika i nagigiammum?

6. Kunnasim meprayoridad i pabbibbig tu Biblia? (Innan gapa i letratu.)

⁶ I pabbibbig tu Biblia i tadday ta ‘mas importante nga gannug’ para nittam nga Cristiano, yari tu iprayoridad tam yatun. (Fil. 1:​10, NW) Kunnatun i kukukuan na magayayya nga tolay nga nakagi ta ollu nga salmo: ‘Magayayya yayya nga mamarulo ta Dob na YAFU; aggaw-gabi patalattappan na yaw ta napafutu.’ (Sal. 1:​1, 2) Mawag gafu tu egga i tiempo tam nga bibbigan i Biblia. Kanni i kapianan nga oras para tatun? Awayya na tu madduruma i tabbag tam. Ngem mawag tu  piliattam i oras nga mabibbig tam i Biblia tu inaggaw. Kagian ni Brother Victor: “Kakayà ku i mabbibbig tu Biblia ta ummumma. Mariga i malukag tu ummumma, ngem baddi gare i maka-istorbo tatun nga oras. Mas alerto ngà gapa anna mas makapaffokus ngà.” Kunnatukka kari gapa? Iyavu mu ta baggim, ‘Para nio, anni nga oras i kapianan nga mabbibbig tu Biblia?’

PANNONOPAN TU MAPIA I BIBBIGAMMU

7-8. Anni i awayya na nga makefugag tapenu mammakapia ittam ta binibbig tam? Iyilustra.

⁷ Baka kanayun nga aru i bibbigattam ngem ari mabba tullung ta nono tam yatun. Egga kari i binibbig mu tapus nappasa laman i manganannuan, baddi ngana laman i matandaammu tatun? Nesimmu ngana nittam ngamin yatun. Awayya na gapa tu mesimmu yaw ta pabbibbig tam tu Biblia. Baka goal tam nga mabbibbig tu piga nga kapitulo ta kadaggaw. Makasta yatun. Mawag tu egga i goal tam anna mappursigi ittam nga kanayun nga kuan yatun. (1 Cor. 9:26) Ngem nu talaga ikaya tam nga mammakapia tatun, kurang i basta pabbibbig laman.

⁸ Nonopan yaw nga ilustrasion: Mawag na mulu-mula i danum maggafu ta uran tapenu matolay. Ngem nu kekkaru nga uran i nadanna ta ababba laman nga tiempo, baka ari ngana nga masussu na davvun yatun. Mawag na davvun i tiempo tapenu masussu i danum na uran nga mamadakal ta mulu-mula. Kunnatun gapa ta pabbibbig tu Biblia. Ari nakuan tu sobra kapaspas na yatun nga ari tam ngana nga mamatindian i binibbig tam, ni tu matandaan anna meyaplika tam.—Sant. 1:24.

9. Anni i kuattam nu nasanay ittam ngana nga paspas i pabbibbig tam tu Biblia?

⁹ Anni i kuammu nu napansimmu nga keppaspas i pabbibbig mu tu Biblia? Sisinu laman nakuan i pabbibbig mu. Ikagumammu nga pannonopan i kabibibbig mu. Ari gapa tu mariga yatun. Puede nga papidduammu i oras na paggigiammum tapenu egga i tiempom nga pannonopan i binibbig mu. Onu puede gapa nga piga laman nga versikulo i  bibbigammu tapus usammu i nabattang nga tiempo tapenu pannonopan yatun. Kagian ni Victor nga nakagi ta gafu: “Ababba laman i bibbigakku ta Biblia, puede nga tanga-kapitulo laman. Megafu ta umma i pabbibbig ku, egga i tiempò ta interu aggaw nga pannonopan yatun.” Siko i bahala ta karu na bibbigammu, basta siguraduammu nga ari tu kuruga paspas i pabbibbig mu tapenu mapannonopammu yatun.—Sal. 119:97; innan i kahon nga “ Pakkiavu ira nga Pannonopan.”

10. Mangiyawa tu angngarigan nu kunnasim nga meyaplika i nagigiammum. (1 Tesalonica 5:​17, 18)

¹⁰ Nu mabbibbig ka, nonopan nu kunnasim iyaplika yatun. Iyavu ta baggim, ‘Kunnasì nga iyaplika yaw nga informasion sangawe onu ta mappange?’ Angngarigan na, binibbig mu i 1 Tesalonica 5:​17, 18. (Bibbigan.) Kabalimmu nga binibbig yatun, puede ka nga magimmang tapus nonopammu nu mamippiga ka nga makimallo anna nu kumusta i kalidad na pakimallo mu. Puedem gapa nga nonopan i gannug ira nga ipappabalo mu. Puede ka nga mannono tu tallu nga espesipiko nga gannug nga ipappabalo mu kani Jehova. Nu mangiyawa ka tu maski piga laman nga minuto nga nonopan i magigiammum ta Biblia, malippawa mu yatun anna meyaplikam i kagian na. Nonopammu i makasta nga ivunga na nu kuammu i kunnatun kada mabbibbig ka tu Biblia ta kadaggaw! Mabbalikka nu kua tu mas mapia nga aripan ni Jehova. Kunnasi gapa nu gitta na kakkaru i mawag tu uliammu?

MANNONO TU RASONABLE IRA NGA GOAL

11. Ngatta awayya na tu makkafi i nono mu nu karuan? Mangiyawa tu angngarigan.

¹¹ Nu mabbibbig ka tu Biblia anna ikagumammu nga iyaplika i nabibbig mu, baka makkafi i nono mu ta kekkaru balo i mawag tu uliammu. Nonopan yaw nga situasion: Sangawe nga aggaw, binibbig mu ta Biblia i tabarang kontra ta faboritismo. (Sant. 2:​1-8) Nasingammu nga puedem paga nga pakastan i pattratum ta tanakuan yayya nga nanono mu nga egga ira i mawag tu uliammu. Makasta yatun! Ta tumunug nga aggaw, nakabibbig ka tu teksto ira nga mangipasigo nga magimmugug ka nakuan ta kakkagiammu. (Sant. 3:​1-12) Nanono mu nga nu mittan, negatibo i abbibidam, yayya nga plinanom nga pabbalinan tu mas positibo anna mas makapagaram i kakkagiammu. Tapus ta tumunug mana nga aggaw, nakabibbig ka tu tabarang nga ari ka nakuan nga makikkofun ta mundo. (Sant. 4:​4-12) Napansimmu nga mawag tu mas piliammu i bibbigammu, gigirawan,  anna gigginnammu. Tapus ta meka-appa nga aggaw, baka nakkafi i nono mu megafu ta napakaru i mawag tu uliammu.

12. Ngatta ari nakuan makkafi i nono mu nu masingammu ta pabbibbig mu ta Biblia nga aru i mawag nga uliammu? (Innan gapa i footnote.)

¹² Nu masingammu nga aru i mawag tu uliammu onu pakastammu, ari nakuan makkafi i nono mu. Ipasingan laman gare natun nga mapakalinno ka anna makasta i motibom. I tolay nga mapakalinno anna ari na ilogo i baggi na ay innan na i mawag nga pakastan na habang bibbigan na i Biblia. a Nonopammu gapa nga ari ittam nga magiggimmang ta pangibaruasi tu “bagu nga kata-katolay.” (Col. 3:10; ikumpara ta study note nga “nagiging bago.”) Anni i kuammu tapenu tulu-tuloy nga maparulo mu i Uvovug na Dios?

13. Anni i kuammu tapenu makanono ka tu rasonable ira nga goal? (Innan gapa i letratu.)

¹³ Imbes tu pamittanammu nga iyaplika i ngamin nga nabibbig mu, mannono ka labbi tu tadday onu dua nga goal. (Prov. 11:2) Puruebammu yaw: Ilistam i gannug ira nga mawag tu uliammu. Mappili ka tu tadday onu dua nga pagolluammu tatun. Tapus itunug mu ngana gapa saw i karuan. Anni i puedem nga pagolluan?

14. Anni nga goal i puedem nga pagolluan?

¹⁴ Puedem nga pagolluan i tadday nga goal nga mabi para ta niko nga gawatan onu puede gapa yari i pinakakawagammu nga pakastan. Nu nakapili ka ngana, mar-research ka ta publikasiottam ira kagitta na Watch Tower Publications Index onu ta Tulong sa Pag-aaral ng mga Saksi ni Jehova. Ipakimallo mu kani Jehova i goal mu anna ikiddom ta nisa nga ‘iyawa na niko i pakkaraga anna pakawayya nga mamarulo  ta uray na.’ (Fil. 2:13) Tapus ikagumammu nga iyaplika i nagigiammum. Nu nasingammu tu nadde mu i ollu nga goal mu, mas maganassakka gapa nga itunug i karuan paga nga goal mu. Kakurugan na, nu makasta i pangipasingammu ta tadday nga kualidad na Cristiano, mas mabi ngana para ta niko nga ipasingan paga i karuan nga kualidad.

‘MASINGAN NAKUAN TA ATTOLENU’ I UVOVUG NA DIOS

15. Ngatta neruma i totolay ni Jehova ta aru nga totolay nga mabbibbig tu Biblia? (1 Tesalonica 2:13)

¹⁵ Kakkagian na karuan nga namippiga da ngana nga nabibbig i Biblia. Ngem talaga kari nga kurugadda i ituttuddu natun? Niyaplika da kari ngana yatun? Nipamavuludda kari nga afektan natun i pattoleda? Ari nga kuan yatun na aru nga totolay. Ngem dakal i neruman na totolay ni Jehova ta nira! Kagitta na ollu-siglo ira nga Cristiano, ‘kurugattam tu uvovug na Dios’ i Biblia. Fuera tatun, ikagumattam nga iyaplika yatun ta pattoletam.—Bibbigan i 1 Tesalonica 2:13.

16. Anni i makaduffun tapenu maparulo tam i Uvovug?

¹⁶ Ari tu kanayun nga mabi nga bibbigan anna iyaplika i Uvovug na Dios. Baka marigatan ittam nga mangiskediul tu tiempo nga mabbibbig. Puede gapa nga nasanay ittam nga kitappaspas nga mabbibbig yatun ta awan kuruga tu mattallung ta nono tam. Baka makkafi gapa i nono tam ta karu na mawag tu uliattam. Maski anni paga tatun i arubangammu, malampasammu yatun ta uffun ni Jehova. Mappaduffun ittam gafu ta nisa tapenu maparulo tam i Uvovug na anna ari nga kattaman i naginna tam ira. Siguradu nga nu inaggaw tam nga bibbigan i Biblia anna iyaplika yatun, mas magayayya ittam.—Sant. 1:25.