Nige ittam nga maggigiammu, puede tam iyavu, ‘Anni i ekspektakku nga magigiammù?’ Ngem baka ari tam mapansin i bagu nga kayà ni Jehova nga ituddu nittam gafu laman ta egga i ekspektattam nga magigiammu tam. Anni gafu i kuattam tapenu mammuattam i kayà ni Jehova nga ituddu nittam?

Makkiddaw tu ka-uto. Mappaduffukka kani Jehova tapenu malippawa mu nu anni i kayà na nga magigiammum sangawe. (Sant. 1:5) Ari ka maddepende ta datim ngana ira nga ammu.—Prov. 3:​5, 6.

Ipamavulu mu nga influwensian na Biblia i pattolem. “I uvovug na Dios ay matotolay.” (Heb. 4:12) Puede nga madduruma i panginfluwensia nittam na matotolay nga “uvovug” na Dios kada bibbigattam yatun. Ngem mesimmu laman yatun nu nonopattam nga mawag tu gigiammuattam i kayà ni Jehova nga ituddu ta nittam.

Mappabalo ta ngamin nga usu-usan ni Jehova tapenu tudduan ittam. Negitta ta “fiesta nga napakaru i maka-makan” i espiritual nga makan nga iyawa na. (Isa. 25:6) Ari mu nga panakitan i “maka-makan” ira nga ari mu kuruga kayà. Nu kuammu yatun, mas mabbalikka tu mapia nga tolay anna magustuammu i maggigiammu!