Ari tam nakuan nonopan nga megafu laman ta awan i 70 nga disipulos ta Pamugag na Yafu ay ari ira nga inapruban ni Jesus onu pinanawadda yayya. Ikaya laman ni Jesus tu makavulu i apostoles na tatun nga selebrasion.

Parefu nga apruban ni Jesus i 12 anna i 70 nga disipulos na. Nappili si Jesus tu 12 nga lallaki ta aru nga disipulos na. Inagalan na ira tu apostoles. (Luc. 6:​12-16) Egga yayya ta Galilea turi ta ‘inagalan na i karaddua’ anna “zinog na ira nga mangilayya-gayya ta Pammaguray na Dios anna mamappia ta makkataki.” (Luc. 9:​1-6) Kabalin na, minay si Jesus ta Judea tapus ‘nanullo yayya tu pitu-fulu-dua [“pitu-fulu,” NW] paga nga lallaki anna pinappollu na ira tu taggi-dua.’ (Luc. 9:51; 10:1) Megafu tatun, egga i tagatuttul ira ni Jesus ta maddumu-ruma nga lugar nga nangilayyagayya meyannung ta nisa.

Iselebra lagapa danuri na Judio nga nabbalin tu disipulos ni Jesus i zinagun nga Paskua, posible nga kavulu i kafamilia da. (Ex. 12:​6-11, 17-20) Turi ta aranni ngana nga matay si Jesus, minay yayya anna i apostoles na ta Jerusalem. Ngem ari na nga inagalan i ngamin nga disipulos na maggafu ta Judea, Galilea, anna Perea tapenu maggarammammung anna iselebra tu makkaravulu i Paskua. Manawag gafu nga kayà laman ni Jesus nga makavulu na tatun nga tiempo i apostoles na. Kinagi na ta nira: “Kuruga kinaragatak-ku tu magara-arubang ittam nga mamugag taw nga Paskua nage na kaziga-riga ku!”—Luc. 22:15.

Egga i makasta nga rason ni Jesus nu ngatta kingngua na yatun. Aranni ngana gare yayya nga matay bilang “i Kordero na Dios nga mamakoma ta katagarulian na mundo.” (Juan 1:29) Mesimmu yatun ta Jerusalem nga tatun nga nabayag ngana nga mesakrifisio i tavvung ira para ta Dios. Niperaddam na kordero na Paskua ta Israelita ira nga nilawan ira ni Jehova ta Ehipto. Ngem mas aru i makua na sakrifisio ni Jesus. Palubbangan na i ngamin nga totolay ta liwa anna ta patay! (1 Cor. 5:​7, 8) Megafu tatun nga kingngua ni Jesus, i karaddua nga apostol ay mabbalin tu fundasion na Cristiano nga kongregasion. (Efe. 2:​20-22) Makapa-interes ta maski ta masanto nga siudad na Jerusalem, egga i ‘karaddua nga patuno’ anna netura ta kada patuno i “ngaga-ngagan na karaddua nga apostol ira na Kordero.” (Nep. 21:​10-14) Importante gafu i papel na matalo nga apostoles ta ketuppal na gakkag na Dios. Malippawa tam ngana nu ngatta kayà ni Jesus nga makavulu na ira tatun nga ultimu nga Paskua anna ta selebrasion kabalin natun—i Pamugag na Yafu.

I 70 anna i tanakuan paga nga disipulos ay ari nga nakavulu ni Jesus tatun nga pamugag. Ngem mabbenefisio lagapa ta kingngua ni Jesus nga Pamugag na Yafu i ngamin nga disipulos nga mapakurug da tu matalo ira. Tapus ngamin ngana saw nga disipulos nga mabbalin tu nazelugan nga Cristiano ay makipakkasinabban para ta tadday nga pappatulan nga kinagi ni Jesus ta apostoles na tatun nga gabi.—Luc. 22:​29, 30.