1-3. (a) Anni nga kapurueba i meparubang ta ngamin nga abbing onu kabataan, anna kunnasi nga meyilustra yatun? (Innan i letratu ta gafu na artikulo.) (b) Kunnasi nga kapianan nga marubang na kabataan ira nga Cristiano yatun nga kapurueba?

NONOPAN nga umay ka ta tanakuan nga ili para ta tadday nga importante nga okasion. Ararayyu i biahe na bus nga pattakayammu. Ta terminal, nakaddagakka ta karu na pasaheru anna na bus ira. Pia ngana laman ta manawag ta nono mu nu anni i planom​—mattakay ta bus nga umay ta kayà mu nga angngayan! Nu tanakuan i direksion na bus nga pattakayammu, mawawakka.

² Megitta i abbarabbing onu kabataan ta kaggawattam tatun ira nga pasaheru. Meparubang i kabataan ira ta apaddu nga biahe, ari tu gukaban na bus, nu ari, ta pattolay. Nu mittan, napakaru i oportunidad anna desision ira nga arubangadda. Kabataan ira, ari kamu marigatan nu ammunu nu sitaw i kayànu nga angngayan. Sitaw nakuan i pappangetannu?

³ Tabbagan naw nga artikulo yatun nga pakkiavu gukaban na pangipagaram ta kabataan ira nga ifokus i pattoleda ta pakkaraga nga pagayayyatan si Jehova. Kayà natun kagian, ikonsideram  si Jehova ta ngamin nga aspeto na pattolay​—ta edukasion, trabahu, responsibilidad ta familia, anna karuan paga. Mawag gapa nga mapeggan tu espiritual ira nga addetan. Makasiguradu danuri kabataan nga kanayun nga nakafokus ta passerbi kani Jehova ta pamendisionna tapenu mavviktoria ira.​—Bibbigan i Proverbio 16:3.

4. Anni i gigiammuattam taw nga artikulo?

⁴ Masirib i kapeggan tu teokratiko ira nga addetan durante nga abbing pagalaman i tadday. Ngatta? Innattam i tallu nga rason. Ipasingan na ollu nga dua nga rason nga i pangitrabahu ta espiritual nga addetan ay mamakaladda ta personal nga relasion kani Jehova; ipakanawag na mekatallu i benefisio na pangiplano ta teokratiko nga addetan durante nga mabbing pagalaman.

5. Anni i primeru nga rason nu ngatta mapeggattam tu espiritual ira nga addetan?

⁵ I primeru nga rason nu ngatta mapeggan tu espiritual ira nga addetan ay tapenu mepasingattam kani Jehova i pappabalo tam ta ayana anna ta kingnguana para nittam. Naobserba na salmista: “Kepia na mabbala-balo nikaw, O AFU . . . Magayaya ngà AFU, ta makapabbaw ira nga kingnguam; magayaya ngà nga makkansion megafu ta kingngua ira na limam.” (Sal. 92:1, 4) Bilang kabataan, nonopammu i ngamin nga neyawa nikaw ni Jehova. I inango mu, i pangurug mu, i Biblia, i kongregasion, anna i makapabbaw nga iddanamam ta mappange. I pangipoppollu ta espiritual ira nga gannug i tadday ta pangipasingattam tu pappabalo taw ira nga bendision na Dios, nga yatun i mamaddukko paga nittam sa.

6. (a) Anni i efekto na espiritual ira nga addetan ta relasiottam kani Jehova? (b) Anni ira nga addetan i awayyana meplano ta kabbing?

⁶ Oras tu netrabahum ngana i espiritual ira nga addetammu, mamegafu ka ngana nga mamadday tu rekord na makasta nga annangngua ta arubang ni Jehova. Yatun i mekadua nga rason. Yaw i mas mamaddukko nikaw sa. Nipromesa ni apostol Pablo: “Ta i Dios ay matunung. Arian na nga kattaman i kingngua nu, onu i pangaya nu sa.” (Heb. 6:10) Arianna kayà kagian nga ariammu mawag i mapplano tu addetammu megafu ta abbikka pagalaman. Mafulu-ragun si Christine turi ta naddesision nga regular nga bibbiganna i istoria na pattolay na matalo nga wawwaragi. Napeggan gapa tu addetan si Toby turi 12 anios yayya nga bibbigan i interu Biblia nige na bawtismona. Onse anios si Maxim anna 10 anios gapa i wagina nga si Noemi turi ta nabawtisowan ira. Kabalinna, parehas nga nitrabahuda i addetadda nga masserbi ta Bethel. Niplastada ta libag onu zizzing na baleda i aplikasion ta Bethel, tapenu moffunan ira nga mattalupaddian nga nakafokus. Ngatta ariammu nonopan nu anni ira nga addetan i importante nikaw kabalinna, itrabahum danatun?​—Bibbigan i Filipos 1:10, * 11.

7, 8. (a) Ngatta mas malogon i maddesision nu egga i addetan? (b) Ngatta pinili na tadday nga tinedyer nga ari mangà tu abugasia?

⁷ Egga koneksionna ta paddesision i mekatallu nga rason nu ngatta mapeggan tu espiritual ira nga addetan ta kabbing pagalaman. Nu mammanakam i abbing ira, mawag tu magangngua ira tu desision meyannung ta edukasion, trabahu, anna tanakuan paga. I paddesision ay kagitta na pappili tu fustu nga dalan nu nadde mu i naddafungan na dua nga dalan. Basta ammum i dalan mappange ta destinasiommu, ari ka mapproblema ta pappili tu fustu nga dalan. Kunnatun gapa, nu ammum i addetammu ira, malogon ngana laman i pagangngua tu masirib ira nga desision. Kagian na Proverbio 21:5: “I plano  ira na matalikarag ay siguradu nga makasta i pattuppalanna.” Nu mas abbing ka pagalaman nga mapplano gukaban na kapeggan tu makasta ira nga addetan, mas alistu ka nga mavvikktoria. Yatun i nesimmu kani Damaris turi ta neparubang ta importante nga desision ta katinedyerna.

⁸ Naggradua si Damaris nga attarannang i graduna. Puede nakuan nga akseptanna i scholarship tapenu makagigiammu tu abugasia ta unibersidad, ngem mas pinilina i mattrabahu ta bangku. Ngatta? “Abbing ngà pagalaman, pinlanò ngana nga mappayunir. Mawag ku gafu i mappart-time. Nu nakabaling ngà nakuan tu abugasia ta unibersidad, aru nakuan i kuartù, ngem baddi laman i tiansà nga makaleg tu part-time nga trabahu.” Bente dagun ngana nga payunir si Damaris. Matagenona kari nga napilina i fustu nga addetan anna fustu nga desision ta katinedyerna? “Ta bangku, aru nga abugadu i katrabahù. Kuadda i klase na trabahu nga trabahù nakuan nu nagiskuela ngà tu abugasia. Ngem aru nira i ari magayayya ta trabahuda. Nelilli ngà ta ari makasta nga pattuppalan na sekular nga karera megafu ta desisiokku nga mappayunir anna nangivuka yatun tu aru nga dagun nga magayayya nga serbisio kani Jehova.”

9. Ngatta mepangngo i abbing ira ta komendasion?

⁹ Mepangngo ta napafutuan nga komendasion i rinivu nga abbing ta ngamin nga kongregasion ta interu mundo. Matalo ira kani Jehova anna nakafokus i pattoleda ta teokratiko ira nga addetan. Kurug nga magayayya danatun nga kabataan ta pattoleda fuera paga ta pakagigiammuda nga tuttulan i giya ni Jehova ta ngamin nga gannug. Nelagum tatun i edukasion, trabahu, anna familia. “Mattalo ka kani Jehova ta interu nga futum,” nitura ni Solomon. “Ta ngamin nga laka-lakag mu ikonsideram yayya, tapenu tununganna i dala-dalammu.” (Prov. 3:5, 6) Nabalor kani Jehova i kabataan ira ta kongregasion, anna talaga ayatanna ira anna iddan tu proteksion, giya, anna bendision.

10. (a) Ngatta prayoridad tam nakuan i ministerio? (b) Kunnasi tam nga mabbalin tu mas efektibo ta ministerio?

¹⁰ Nu nakafokus i tadday nga mabbing ta pakkaraga nga pagayayyatan si Jehova, mattalikarag nakuan yayya ta ministeriona. Kinagi ni Jesus nga “mawag tu melayya-gayya tu ollu i Mapia nga Dumug.” (Mar. 13:10) Megafu ta kuruga importante i pallayyagayya, mawag nakuan tu iprayoridad tam yatun. Awayyam kari planowan nga mas aru i tiempom ta pallayyagayya? Makapappayunir ka kari? Kunnasi nu ari kuruga makapagayayya nikaw i pallayyagayya? Kunnasi ka mabbalin tu mas efektibo ta pallayyagayya? Egga dua nga dakkua nga makoffun: Mapprepara tu mapia, anna pasikannammu i nono mu ta pangikagi ta ammum ta tanakuan. Baka makaddag ka ta ayayya nga matageno mu nu mallayyagayya ka.

11, 12. (a) Anni i awayya kuan na abbing ira tapenu makaprepara nga mallayyagayya? (b) Kunnasi nga inusa na tadday nga abbing i oportunidadna nga makapallayyagayya ta eskuela?

¹¹ Awayyam pegafuanan gukaban na papprepara nga tabbagan i pakkiavu nga gagangay nga iyavu na kaeskuelam. Egga ira i artikulo ta jw.org nga website anna tanakuan paga nga publikasiottam nga nadisenio tapenu uffunan i kabataan ira nu kunnasida tabbagan i gagangay ira nga pakkiavu. Angngariganna i pakkiavu nga “Ngatta mangurug ka ta Dios?” Makoffun nikaw i artikulo nga “Fustu Kari nga Kurugakku i Ebolusion?” ta brosiur nga Tabbag ta 10 nga Pakkiavu na Kabataan Ira, tapenu ipreparam i tabbag mu.​—Bibbigan i 1 Pedro 3:15.

¹² Kada egga tiansam, ikagim ta kaeskuelam ira nga innadda mismu i jw.org. Kunnatun i kingngua ni Luca. Meyannung ta nadduruma nga relihion i pabbiridan ta klaseda,  tapus napansin ni Luca nga mali i karuan nga netura ta libruda meyannung ta Saksi ira ni Jehova. Maski nu magalangan yayya, nakkiddaw yayya tu permiso nga itunung danaw nga falsu nga akusasion, anna minanugu i mestrada. Ari laman tu niyesplika ni Luca i pangurugna ira, nu ari, nipasinganna paga i website tam ta klaseda. Nangiyawa i mestrada tu asayment nga girawan na kada estudiante i whiteboard animation nga Beat a Bully Without Using Your Fists. Fermi ayayya ni Luca nga nakapallayyagayya yayya.

13. Ngatta ariattam nakuan magimmang nu meparubang ta mariga ira nga situasion?

¹³ Ariammu pakkafian i nono mu maski nu gittana lubak-lubak i dalanammu nu mittan. (2 Tim. 4:2) Nu egga luttuag nga problema, ariammu kattaman i addetammu ira. Si Katharina ay 17 anios turi ta pinlanona nga layyagayyan i kada katrabahuna. Egga tadday nga mamippiga nga nanginsulto sa, ngem arianna nagimmang. Nagustuan na tadday nga katrabahuna nga si Hans i makasta nga konduktana maski nu neparubang ta mariga ira nga situasion. Anni resultana? Binibbigna i publikasiottam ira, nappa-study, anna nabawtisowan. Nagali ngana si Katharina yatutta arianna ammu ngamin yaw nga nesimmu. Nonopammu i ayayyana turi ta nappasa i 13 dagun, agga-itubang yayya ta Kingdom Hall kavulu i familiana tapus si Hans i neyammammu nga bisita nga ispiker! Pia ngana laman ta arianna nagimmang ta addetanna nga layyagayyan i katrabahuna ira!

14, 15. (a) Nu meparubang ta pamipilit, anni nakuan i nonopan na kabataan ira? (b) Kunnasi nga malabanan na kabataan ira i pamipilit?

¹⁴ Siguradu nga napagaram naka naw nga artikulo tapenu maddesision nga ifokus i pattolem ta pakkaraga nga masserbi kani Jehova. Kayàna kagian nga ipoppollum i espiritual nga addetan ta pattolem. Awayyana nga nakasentro ta pappaga-pagayayya i pattolay na karuan ta kasi-kabataammu, anna kayàda gapa nga mevulu ka nira. Duttal i tiempo nga mawag tu ipasingammu nga determinadu ka nga mattalupaddian ta pinilim ira. Ari nakuan mari i fokus mu megafu ta pamipilitda. Kakuruganna, nu nonopammu uli i ilustrasion ta bus, siguradu nga ariammu kayà nga mattakay ta bus nga komforme laman i pappangetanna megafu laman ta gittana magenjoy danuri pasaheru tatun nga bus.

 ¹⁵ Aru nga gannug i makuam tapenu malabanan i pamipilit na kakavvulu. Angngariganna, ibitam i situasion nga ammum nga makatenta. (Prov. 22:3) Nonopammu gapa i mataki nga resulta na pakikavulu ta marake ira i annangnguada. (Gal. 6:7) Makoffun paga nu akseptammu nga kawagammu i tabarang. I kinapakalinno i makoffun nikaw nga akseptan i suhestion nga naggafu ta magana mu anna ta manakam ta espiritual ta kongregasion.​—Bibbigan i 1 Pedro 5:5, 6.

16. Mangistoria tu ekspiriensa nga mangipasingan ta benefisio na kinapakalinno.

¹⁶ Nakoffun kani Christoph i kinapakalinno tapenu akseptan i tabarang sa. Ari nabbayag kabalin na bawtismona, pinegafuananna i regular nga passanay ta gym. Pinagaram yayya na karuan nga kabataan tatun nga makisali ta sports club. Nipakiyuvovugna yatun nga gannug ta tadday nga elder, nga nakkagi kani Christoph nga nonopanna i peligro ira nigena maddesision, gittana i peligro nga mainfluwensian na espiritu na kompetision. Ngem, nakisali lagapa si Christoph ta club. Ari nabbayag, nammuanna nga yatun nga isport ay vayolente, anna delikadu. Nakiyuvovug mangana yayya ta piga nga elder anna ira ngamin ay nangiyawa tu tabarang nga naggafu ta Biblia. “Nangidog si Jehova tu mapia ira nga gumattabarang, anna nagginna ngà Sa, maski nu ari insigida.” Minappakalinno ka kari nga magginna ta masirib nga tabarang?

17, 18. (a) Anni i kayà ni Jehova ta abbarabbing ta kaggawattam? (b) Anni nga kaddaraddam nga situasion i luttuag ta pakka-adulto, anna kunnasi nga mebita yatun? Mangistoria tu ekspiriensa.

¹⁷ “Magayayya ka, mabbing nga lalaki, [onu babay] durante ta kabbimmu, anna magayayya nakuan i futum ta aggaw ira na kabataammu.” (Ecl. 11:9) Wan, kayà ni Jehova nikaw nga mabbing paga nga mapeggakka tu magayayya nga futu. Nipakanawag naw nga artikulo i tadday nga gannug tapenu posible yatun. Maffokus ka ta teokratiko nga addetan, anna ilagummu kanayun si Jehova ta ngamin nga planom. Nu kuammu yatun durante nga abbikka pagalaman, matageno mu i pangigiya, proteksion, anna bendision ni Jehova. Nonopammu i ngamin nga masirib nga tabarang nga malegammu ta Biblia, anna ipafutum yaw: “Daddammammu, gafu, i Kadakallan nga Namaratu nikaw ta aggaw ira na kabataammu.”​—Ecl. 12:1.

¹⁸ Awan tu maski sinni i mattalupaddian nga abbing. Mabi laman nga magadulto i abbarabbing. Kaddaraddam, aru ta adulto i nabbabawi ta pattuttulda ta mali nga addetan turi mabbing paga ira onu, mas grabe paga, ariadda napeggan tu gakkag. Ngem danuri kabataan nga nattalupaddian nga nakafokus ta teokratiko ira nga addetan ay makatageno tu monag nga pagayayya ta pinilida ira adde ta pagadultoda. Yatun i nesimmu kani Mirjana, nga malalaki ta isport ta katinedyerna. Nekiddaw nga sumali yayya ta Winter Olympic Games ngem mas pinilina i mappayunir. Nappasa i 30 dagun, payunir lagapa si Mirjana, kavulu i atawana. Kunna: “Temporario anna ordinario laman nga addetan ta pattolay i kinaprominente, kedayaw, pakapangngua, anna kinariku. I passerbi ta Dios anna i pappursigi nga uffunan ta espiritual i totolay i mas makasta anna mannanayun nga addetan.”

19. Sinaggi-taddayan i benefisio ira na paffokus ta espiritual ira nga addetan ta kabbing pagalaman.

¹⁹ Mepangngo ta sinsero nga komendasion i abbing onu kabataan ira ta kongregasion megafu ta ara-arubangadda danaw nga kapurueba anna determinadu ira nga ifokus i pattoleda ta passerbi kani Jehova. Makuada yatun nu egga i espiritual ira nga addetadda anna iprayoridadda i pallayyagayya. Determinadu gapa ira nga ari arian i fokusda megafu ta mundo. Makapakkomfiansa i kabataan ira nga ari tu kakenga i lallappoda. Suportadu ira na meddu nga wawwaragi, anna nu ipakiyuvovugda kani Jehova i planoda ira ta pattolay, mavviktoria ira.