TA INTERU-MUNDO ta nappasa nga dagun, rinivu nga lallaki i natunno nga elder anna ministerial ta kongregasion ni Jehova. Nu tadday ka tatun ta meddu ira nga brother, siguradu nga magayayya ka ta bagu nga pribilehiom ta passerbi.

Ngem awayyana nga mavurukka. Kunni Jason, mabbing nga elder, “Turi ta natunno ngà, mediu nakaddagang ngà ta bagu ira nga responsibilidad ku.” Natageno da Moises anni Jeremias nga ari ira kualipikadu nga mangalawa tu bagu ira nga annungan kani Jehova. (Ex. 4:10; Jer. 1:6) Nu kunnatun i matageno mu, kunnasim malabanan yatun anna mapprogreso? Ikonsidera i ehemplo ni Timoteo.​—King. 16:1-3.

Awayyana nga tinedyer onu maturu tu bente ngana i dagun ni Timoteo turi ta inimbita yayya ni Pablo nga kavuluna nga mabbiahe. Ta gafuna, megafu ta abbing paga si Timoteo, baddi i komfiansana ta baggina anna magalangan yayya ta bagu nga asaymentna. (1 Tim. 4:11, 12; 2 Tim. 1:1, 2, 7) Ngem, ta pappasa na tanga-dekada, nakagi ni Pablo ta kongregasion ta Filipos: “Nu uray na Yafu, iddanamak-ku tu ari nga mabbayag ay dobak-ku nikamu tatun si Timoteo . . . Yaya laman i kagittà nga egga i pangikavurung na ta paddia-paddian nu.”​—Fil. 2:19, 20.

Ngatta malalaki nga elder si Timoteo? Ikonsidera i annam nga leksion nga mala tam ta ehemplona.

1. Talaga ikavurunganna i totolay. Kinagi ni Pablo ta wawwaragi ta Filipos: “Egga i pangikavurung na [ni Timoteo] ta paddia-paddian nu.” (Fil. 2:20) Wan, talaga ikavurungan ni Timoteo i totolay. Kayàna nga maddukko ira kani Jehova, anna sigga-paran yayya nga massakrifisio para nira.

Ibita nga mabbalin nga kagitta na mammaneho tu bus nga agga-nonona laman i eksakto nga oras na paddattal ta kada terminal anne ta pangà tu pasaheru. Si William nga respetadu nga elder ta maturu nga 20 dagun, ay nattabarang ta bagu ira nga natunno nga lallaki: “Iddukannu i wawwaragi. Pagolluan i pakawagadda ira imbes nga i gannug ira meyannung ta kina-organisadu.”

2. Nipoppolluna i pallayyagayya. Kumpara ta ehemplo ni Timoteo ta tanakuan, kinagi ni Pablo: “Ngamin i karuan ira, i ikavurung da i pammakapianad-da laman, ari tu i meyannung kani Jesu-Cristo.” (Fil. 2:21) Nitura yatun ni Pablo ta Roma. Naobserbana nga kuruga okupadu ta personal ira nga gannug i wawwaragi ta Roma. Makagi nga talakag ira ta trabahu nga pallayyagayya. Ngem ari si Timoteo! Turi ta egga i oportunidad nga ilayyagayya i mapia nga dumug, kagitta ni Isaias i pagimammana nga kunna: “Egga ngà taw! Dobannà!”​—Isa. 6:8.

Kunnasim mabalanse i personal anna espiritual ira nga obligasiommu? Ollu, mapprayoridad. “Pilian i kapianan ta ngamin,” kunni Pablo. (Fil. 1:10) Iprayoridad mu i prayoridad ira na Dios. Mekadua, mappasimple. Alsan i makofu tu tiempo anna sikan. Nipagaram ni Pablo kani Timoteo: “Ibitam i marakay nga pakkaraga na abbing paga i dagud-da. Talakkurugam-mu lagu i mattolay nga matunung, napasikkal ta angngurug, minangngaya ta ikattolay, anna memammo nga makikavvulun.”​—2 Tim. 2:22.

 3. Malallappo yayya ta sagrado nga serbisio. Sinabarangngan ni Pablo i taga-Filipos: “Sikamu mismu i makannammu ta pia na kata-katolay ni Timoteo. Kagitta mi i matama ta nipasserbi mi nga dua megafu ta evanghelio.” (Fil. 2:22) Ari nga talakag si Timoteo. Malappo yayya nga nakipattrabahu kani Pablo, yatutta mas nassikan i pakka-aya-ayada dua.

Ari nga mofutan tu trabahu i organisasion na Dios ta maddaggun. Makakontentu yatun anna mas maddukko ka ta wawwaragi. Yatutta igakkag mu nga ‘mallallappo kanayun ta trabahu nga masserbi ta Yafu.’​—1 Cor. 15:58.

4. Niyaplikana i nagigiammuna ira. Nattura si Pablo kani Timoteo: “Sinuttul mu i nituttuddù ira, i annangnguà, tuange ta gakkag ku ta ikattolè. Sinuttul mu i pangurug ku, i appasa-pasensià, i pangaya ku ta ikattolè, i nipagatta-attam ku.” (2 Tim. 3:10) Megafu ta niyaplika ni Timoteo i nagigiammuna, nakualipika yayya ta mas darakal nga responsibilidad.—1 Cor. 4:17.

Egga kari i kofummu nga mas manakam onu ekspiriensadu nikaw nga awayyam kuan tu modelo? Nu awan, ngatta kammu nga magaleg? Meraddamman ni Tom nga piga dagun ngana nga elder: “Nangipasingan niakan tu personal nga interes i tadday nga ekspiriensadu nga elder anna sinanaynà. Kanayun ngà makkiavu sa anna iyaplikà i tabaranna. Ziminakal i komfiansà megafu tatun.”

5. Tulu-tuloy yayya nga nassanay. Kinagi ni Pablo kani Timoteo: “Penamam-mu lagu i baggim ta nespirituan nga attolay.” (1 Tim. 4:7) Egga i coach na tadday nga atleta, ngem kawaganna lagapa nga sanayan i baggina. Sinabarangngan ni Pablo si Timoteo: “Tangngawam-mu i kebibbig na Masanto nga Tura ta pagamma-ammungan na mangurug ira; ay mallayyagayya anna mattuddu ka gapa. . . . Talakkurugam-mu nga kuan danaw nga annungam-mu tapenu masingan na ngamin nga totolay i papprogreso na trabahum.”—1 Tim. 4:13-15.

Kawagammu gapa nga pakastan i abilidad mu ira. Mallallappo ka nga estudiante na Biblia anna kanayun nga ammuan i bagu ira nga direksion ta organisasion. Ibita gapa i sobra nga pattalo ta baggi​—awayyana nga nononopammu nga aru ngana i ekspiriensam yatutta kayam ngana ayusan i maski anni nga problema maski awan tu memmugug nga pangusito. Tapenu maparigan si Timoteo, “immuguram-mu i agguyu-guyum tuange ta attuttuddum.”​—1 Tim. 4:16.

6. Nakkomfiansa yayya ta espiritu ni Jehova. Meyannung ta ministerio ni Timoteo, niperaddam ni Pablo sa: “Ta pakapangngua na Espiritu Santo nga egga nittam, tangngallam-mu ta mapia ngamin i nepammakatalo nikaw.” (2 Tim. 1:14) Tapenu makuana yatun, kawagan ni Timoteo nga makkomfiansa ta espiritu na Dios.

Kinagi ni Donald nga aru dekada ngana nga elder: “Tagibaloran nakuan na natunno ira nga lallaki i relasiodda ta Dios. Danuri magangngua tatun ay ‘mas nga massikan.’ Nu ipakimalloda i espiritu na Dios anna kultibadda i vunga natun, mabbalin ira tu kurug nga bendision ta wawwaragida.”​—Sal. 84:7; 1 Ped. 4:11.

Talaga makapagaram nga masingan nga aru ta bagu nga natunno ira nga brother, kagittam, i mapprogreso ta passerbi kani Jehova. Kunni Jason nga nakagi ta gafu: “Turi ta elder ngà ngana, aru i nagigiammù anna ziminakal i komfiansà. Talaga magayayya ngà ngana ta asayment ku anna imammatakku yaw nga kakkasta nga pribilehio!”

Ipamavulummu kari nga tulu-tuloy naka nga usan ni Jehova? Igakkag mu nga matudduan kani Timoteo. Mabbalikka noka nga bendision ta totolay na Dios.