1, 2. (a) Ngatta mavurung i totolay ta tiempo ni Pablo meyannung ta ka-aripan anna kapalubbang? (b) Sinni i nangidirektan ni Pablo ta totolay tapenu malada i kurug nga kapalubbang?

IPARA-PARAYAG na totolay ta imperio na Roma, nu sitaw naddian i ollu ira nga Cristiano, nga ira i taga-defensa ta dob, hustisia, anna kapalubbang. Ngem, nakadepende ta aripan ira i pakapangngua anna gloria na interu nga Imperio na Roma. Egga i tiempo nga 30 porsiento na populasiodda ay aripan. Siguradu nga mavurung i ordinario ira nga tolay nelagum ngana i Cristiano meyannung ta ka-aripan anna kapalubbang.

² Aru i kagian na tura ira ni apostol Pablo meyannung ta kapalubbang. Ngem, i gakkag na ministeriona ay ari nga reforma ta komunidad onu pulitika, i gannug nga karagatan na totolay tatun nga tiempo. Ari nga nakkomfiansa da Pablo anna i kapangngurugna ira ta maski sinni nga mammaguray onu ahensia para ta kapalubbang. Nallallappo lallagu ira nga uffunan i tanakuan nga mammuan i mapia nga dumug na Pappatulan na Dios anna i awan tu nikegittanna nga balor na sakrifisio nga tavvu ni Jesu-Cristo. Nigiya ni Pablo i kapangngurugna ta Paggafuan na kurug nga kapalubbang. Ta mekadua nga turana ta Cristiano ira nga  taga-Corinto, angngariganna, manawag nga kinagina: “Nu sitaw i dian na Espiritu na Yafu, egga i kapalubbang.”​—2 Cor. 3:17.

3, 4. (a) Ngatta nitura ni Pablo i 2 Corinto 3:17? (b) Anni nakuan i kuattam tapenu maekspiriensa i kapalubbang nga naggafu kani Jehova?

³ Ta gafu na tura ni Pablo ta taga-Corinto ira, kinagina i meyannung ta gloria ni Moises turi ta minulug yayya ta Vukig Sinai kabalinna nga nemammatan i presensia na tadday nga anghel ni Jehova. Ta pakasingadda kani Moises, naganassing i totolay, yatutta nangipay si Moises tu belo ta mukana. (Ex. 34:29, 30, 33; 2 Cor. 3:7, 13) “Ngem,” kunni Pablo, “nari i belo na [tadday nga tolay] turi ta minarubang yaya ta Yafu.” (2 Cor. 3:16) Anni i kebalinan na kinagi ni Pablo?

⁴ Kagitta na nagigiammu tam ta nappasa nga artikulo, si Jehova nga Namaratu ta ngamin nga gannug, ay i tattadday laman nga Persona nga magayayya ta awan tu limitasionna nga kapalubbang. Yatun i rason nu ngatta ta presensia ni Jehova anna “nu sitaw i dian na Espiritu na Yafu,” egga i kapalubbang. Ngem tapenu makapagayayya ta kapalubbang, mawag tu ‘umarubang ittam ta Yafu’ nga Jehova, nga mapeggan tu personal nga relasion sa. Ari minammatan na Israelita ira i pinakilallang ni Jehova nira ta espiritual nga gannug. Gittana natakkabban anna nattagga i ginnonopan anna giffutuadda, nga nakafokus laman ira ta pangiyusa ta kapalubbadda ta Ehipto ta pisikal onu ta nepattaggan nga gannug.​—Heb. 3:8-10.

5. (a) Anni nga klase na kapalubbang i irattal na espiritu ni Jehova? (b) Kunnasi tam nammuan nga ari mapakarianan na pisikal nga kefuku i kapalubbang nga iyawa ni Jehova? (c) Anni ira nga pakkiavu i tabbagattam?

⁵ I kapalubbang nga egga koneksionna ta espiritu ni Jehova ay ari laman nga kapalubbang ta pisikal nga ke-aripan. Mas anne paga ta matuppal na appursigi na totolay, mangirattal i espiritu ni Jehova tu kapalubbang ta liwa anna patay, kunne na gapa ta ke-aripan ta falsu nga paddayaw anna ta annangngua ira. (Roma 6:23; 8:2) Talaga makapagayayya nga kapalubbang yatun! Mabenefisiowan i tadday nga tolay ta kunnatun nga klase na kapalubbang maski paga nefuku onu na-aripan yayya. (Gen. 39:20-23) Kurug yaw ta ekspiriensa ni Sister Nancy Yuen anni Brother Harold King, nga parehu nga inattammadda i piga dagun nga kefuku megafu ta pangurugda. Awayyam magiraw anna maginna nu kunnasida inistoria i ekspiriensada ta JW Broadcasting. (Innan i MGA INTERBYU AT KARANASAN > PAGBABATA NG PAGSUBOK.) Ikonsidera tam gafu, kunnasi tam mepasingan nga tagibalorattam i kapalubbattam? Anni i makua tam tapenu masirib nga meyusa yaw nga kapalubbang?

6. Kunnasi nipasingan na Israelita ira nga ariadda inappresia i kapalubbang nga niyawa ni Jehova nira?

⁶ Nu malippawa tam i kurug nga presio na mangina nga regalu, mapaguyu ittam nga ipasingan i appabalo ta narregalu. Ari inappresia na Israelita ira i kapalubbang nga niyawa ni Jehova nira turi ta nipaliagna ira ta nike-aripan ta Ehipto. Piga vulan kabalidda napaliag, ala-alegadda i makan anna menum ira ta Ehipto anna narreklamo ira ta probision ira ni Jehova, nga kayàda paga lallagu nga manoli tatun. Fugurammu yatun, mas nikayàda i “manango, pipino, sandia, lasuna, sabolyas, anna afus” anne ta niyawa na Dios nga kapalubbang nga dayawan i kurug nga Dios nga si Jehova. Yatutta, kakkadda-kaddag kari nga napporay si Jehova ta totolena? (Num. 11:5, 6, 10; 14:3, 4) Leksion yatun para nittam!

7. Kunnasi nagguyu si Pablo segun ta tabaranna ta 2 Corinto 6:1, anna kunnasi tam gapa maparigan yatun?

⁷ Pinagaram ni apostol Pablo i ngamin nga  Cristiano nga ariadda pagurayan i kapalubbang nga niyawa ni Jehova gukaban na Anana, si Jesu-Cristo. (Bibbigan i 2 Corinto 6:1.) Daddamman i pazziga-riga anna taki na pakkakonsensia ni Pablo megafu ta pakatagenona nga aripan yayya na liwa anna patay. Ngem, sigga-pagayayya lagapa nga kinagina: “Mabbala-balo ngà ta Dios, ta paliaran nà gafu kani Jesu-Cristo nga Yafu tam!” Ngatta? Niyesplikana ta kapangngurugna: “Ta i dob na Espiritu nga manolay nittam ta ketadday tam kani Cristo Jesus, ay yaya i namalubbang niakan ta dob na katagarulian anna patay.” (Roma 7:24, 25; 8:2) Tuttulattam gafu i ehemplo ni Pablo nga ariattam nakuan vuluvuga nga kattaman nga pinalubbangan ittam ni Jehova ta ke-aripan ta liwa anna patay. Gukaban na tavvu, makapasserbi ittam ta Dios nga marenu i konsensia anna sigga-pagayayya nga kuan yatun.​—Sal. 40:8.

8, 9. (a) Anni nga abiso i niyawa ni apostol Pedro meyannung ta pangusa ta lallaguray? (b) Anni ira nga peligro i meparubang nittam?

⁸ Fuera paga ta pangipasingan tu appabalo, mawag tam gapa nga sigga-nono nga ari vuluvuga nga abusuan i nabalor nga kapalubbattam nga mappili. Nangabiso si apostol Pedro kontra ta pangusa ta kapalubbang nga panakkag ta nepattaggan ira nga pakkaraga. (Bibbigan i 1 Pedro 2:16.) Ari kari nga iperaddam nikaw natun nga abiso nu anni i nesimmu ta Israelita ira ta katanapan? Mappeppeligro lagapa ittam, awayyana nga mas delikadu. Si Satanas anna i mundona ay mangiyofer tu mas paga makatenta nga pappilian tu assissinnun anna itsura, makan anna menum, paddibersion anna pappaga-pagayayya, anna karuan paga. Maruddu nga mangusa i malalaki ira nga negosiante tu guapo anna guapa ira nga modelo tapenu ipagaram i gannug ira nga egga nakuan nittam maski kattam talaga mawag yatun. Anni mabba kalistuna nga mabiktima ta kunnaw ira nga silu anna ta pangabuso ta lallaguretam!

⁹ Meyaplika gapa i tabarang ni Pedro ta mas serioso ira nga aspeto na pattolay, gittana pappili tu edukasion, trabahu, onu karera. Angngariganna, mapilitan i kabataan ira ta eskuela nga makualipika nga magenrol ta sikat ira nga eskuela para ta mas atannang nga edukasion. Masulsulan ira nga makala ira tu mas dakal nga sueldu anna makasta nga trabahu megafu ta atannang nga edukasion, anna maruddu nga ipasingan na survey nga dakal i nadduman na sueldu na naggradua ta kunnatun ira nga eskuela kumpara turi ta ari nakkolehio. Megafu ta meparubang ira ta pappili nga talaga makafekto ta interu nga pattoleda, makatenta ngamin danaw nga gannug ta kabataan ira. Anni nakuan i nonopadda anna na maganada?

10. Anni i mawag nga agga-nono tam nu usattam i lallaguretam nga mappili ta personal ira nga gannug?

¹⁰ Matageno na karuan nga megafu ta personal nga gannug danaw nga pappili, egga nakuan i lallagureda nga mappili nu anni i ikayàda basta ipamavulun na konsensiada. Baka egga ta nonoda i kinagi ni Pablo ta Cristiano ira nga taga-Corinto meyannung ta makan: “Ngatta ta mefugag i pangnguà ta anni laman nga ikaya ku megafu ta konsensia na tanakuan?” (1 Cor. 10:29) Fustu nga egga i lallaguretam nga personal nga mappili ta kunnatun ira nga gannug meyannung ta edukasion anna karera tam, daddammattam nakuan nga relatibo laman i lallaguretam anna ngamin nga desision ay egga i efektona. Megafu tatun, kunnaw i kinagi ni Pablo: “Awayya mi nga kuan i anni laman nga ikaya mi . . . ngem ari tu ngamin i gannug ay pammakapian. Awayya mi nga kuan i anni laman nga ikaya mi, . . . ngem ari tu ngamin i gannug ay mamakaladda ta pavvurulun.” (1 Cor. 10:23) Siguradu nga makoffun yatun nittam nga  masingan nga egga paga i mas importante nga ikonsidera anne ta personal nga kayà tam nu meyannung ta lallaguretam nga mappili ta ngamin nga aspeto na pattoletam.

11. Anni i gakkag na kapalubbattam?

¹¹ Ta pamappalanna kontra ta pangabuso ta kapalubbang, kinagi gapa ni Pedro i gakkagna. Pinagaramna ittam nga usan i kapalubbattam nga “kunna doroban na Dios.” Yatutta, i kurug nga gakkag nu ngatta pinalubbangan ittam ni Jehova, gukaban ni Jesus, ta dob na liwa anna patay ay tapenu mattolay nga dedikadu nga “kunna doroban na Dios.”

12. Anni nga ehemplo i nipasingan ni Noe anna na familiana para nittam?

¹² I kapianan nga makua tapenu maprotektan i baggi tam ta pangabuso ta kapalubbattam anna ta pabbalin tu aripan mangana na makamundo nga ambision anna pakkaraga ira ay i paffokus ta espiritual ira nga gakkag. (Gal. 5:16) Ikonsidera tam si Noe anna i familiana. Nattolay ira ta vayolente anna imoral nga mundo. Ngem, ari ira nga nasilu ta pakkaraga anna plano na totolay ta pallevuda. Kunnasida nakua yatun? Pinilida nga mabbalin tu okupadu ta ngamin nga annungan nga niyawa ni Jehova nira​—i pamadday tu arka, pagunnug tu makan para ta baggida anna ta aya-ayam, anna pallayyagayya ta tanakuan. “Kingngua ni Noe i ngamin segun ta nidob na Dios sa. Kunnatun mismu i kingnguana.” (Gen. 6:22) Anni i resultana? Napaliag si Noe anna i familiana ta pinangultimo natun nga mundo.​—Heb. 11:7.

13. Anni nga annungan i nalawà ni Jesus anna nipasana ta disipulosna?

¹³ Anni i nidob ni Jehova nga kuattam ta maddaggun? Kwenta disipulos ni Jesus, talaga ammu tam i niyawa na Dios nga annungattam. (Bibbigan i Lucas 4:18, 19.) Aru nga totolay ta maddaggun i vinulag lagapa na dios na sistema na ganna-gannug anna na-aripan ira​—ta relihioso, ekonomia, anna ta komunidad. Pribilehio tam nga tuttulan i ehemplo ni Jesus ta panguffun ta totolay nga mammuan anna dayawan si Jehova, i Dios na kapalubbang. (Mat. 28:19, 20) Ari nga mabi yatun nga trabahu, anna aru  ira i kapurueba. Ta karuan nga nasion, awan tu pakialam na totolay anna vayolente paga i karuan. I pakkiavu gafu nga mawag nga ikonsidera na kada tadday nittam ay, ‘Usu-usakku kari i lallagurè tapenu mas masuportan i trabahu na Pappatulan?’

14, 15. Anni i efekto na trabahu nga pallayyagayya ta totolay ni Jehova? (Innan i letratu ta gafu na artikulo.)

¹⁴ Makapagaram masingan nga aru i makatageno nga aranni ngana nga mangultimo yaw nga mundo yatutta pinasimpleda i pattoleda tapenu makapappayunir ira. (1 Cor. 9:19, 23) Nasserbi i karuan nira ta lokal nga teritoria; nagali gapa i karuan nu sitaw dakal i pakawagan. Segun ta rekord, ta nappasa nga lima dagun, nakkaru i bilang na regular payunir ira tu maturu 1,100,000, anna maturu tu 250,000 ta interu-mundo i neyammung ta ngamin-tiempo nga mangilayyagayya. Talaga kakkasta nga resulta na masirib nga pangiyusa ta lallaguray nga masserbi kani Jehova!​—Sal. 110:3.

¹⁵ Anni i nakoffun taw nga wawwaragi tapenu masiribda nga meyusa i kapalubbadda? Ikonsidera si John anni Judith, nga nasserbi ta nadduruma nga nasion ta nappasa nga 30 dagun. Neraddammadda nga turi ta namegafu i Pioneer Service School ta 1977, nepatalatto i sigga-paran nga pagali anna passerbi nu sitaw mas dakal i pakawagan. Tapenu makafokus ira taw nga addetan, kinagi ni John nga namippiga yayya nanguli tu trabahu tapenu mapattalupaddian i simple nga pattolay. Ta paddattalda ta tanakuan nga nasion, nammuadda nga dakal i uffun na pakimallo anna pattalo kani Jehova tapenu marubadda i kapurueba ira gittana paggigiammu tu bagu nga lengguahe, pakibagay ta bagu nga kultura, anna pagattam ta mariga nga klima. Anni i efekto nira natun nga aru dagun nga passerbi? “Natageno ku nga kuruga okupadu ngà ta kapianan nga trabahu nga nammuakku anna naekspiriensà,” kunni John. “Mas nabbalin tu kuru-kurug niakan si Jehova, gittana meddu nga yama. Nalippawa ku ngana i kayà kagian na Santiago 4:8: ‘Umaranni kamu ta Dios, ay umaranni yaya nikamu.’ Ammù nga nalegakku i ala-alegakku, i makakontentu nga gakkag ta pattolay.”

16. Kunnasi inusa na rinivu nga limitadu i sirkumstansia i kapalubbadda?

¹⁶ Ari tu kagitta da John anni Judith, ipamavulun na sirkumstansia na tanakuan nga masserbi ta ngamin-tiempo ta ababba laman nga tiempo. Ngem, aru lagapa nira i nangapprobetsa nga mabboluntariu ta teokratiko ira nga proyekto ta konstruksion ta interu mundo. Angngariganna, turi ta mapataddag i hedkuarter ta Warwick, New York, ma-27,000 nga wawwaragi i nabboluntariu​—tu dua-ligguan adde ta tanga-ragun onu maturu paga. Temporario nga niyemmadda i normal nga pattoleda tapenu makapasserbi tatun. Talaga makakkasta nga ehemplo ta pangusa ta niyawa na Dios nga kapalubbang tapenu dayawan anna ikakua si Jehova, i Dios na kapalubbang!

17. Anni i makakkasta nga iddanaman danuri masirib i pangusada ta niyawa na Dios nga kapalubbang ta maddaggun?

¹⁷ Magayayya ittam nga nakilala tam si Jehova anna mosa tam tu mapia i kapalubbang nga irattal na kurug nga paddayaw. Mepasingan nakuan ta pappili tam ira nga tagibalorattam i kapalubbattam. Imbes nga kakengan onu usan ta ari mepangngo yatun, usatttam i kapalubbattam anna i oportunidad ira nga irattalna tapenu passerbian si Jehova adde ta mawayya tam. Nu kuattam yatun, makapagayayya ittam nga innaggan i bendision ira nga nipromesa ni Jehova sonu matuppal yaw nga profesiya: “Egga noka i aggaw nga mapalubbangan ngamin i pinaratu ta naripannad-da nga kadaral. Ngamin noka ay mesipo gapa ta makapabbaw nga kapalubbang na ána na Dios.”​—Roma 8:21.