Tagga ta ma-13 anios ngà ngana, nallammin i pangaya ku kani Jehova. Masingakku nga makua na kaeskuelà ira i ngamin nga kakayàda anna kayà ku nakuan gapa i kunnatun. Ninono ku nga kita-istrikto i dorob na magana ku kunne na gapa i estandarte ira na Cristiano. Yayya nga abbo ku nu kitezziga i maddayaw kani Jehova. Nabayag ku ngana nga kurugan nga kurug si Jehova ngem namegafu ngà nga minarayyu nisa.

Ari ngà nga nabbalin tu inactive ta mallawan ngà gapa nu sinaggi-mittan. Ngem nu mallawan ngà, ari ngà nga nakaprepara yayya nga marigatan ngà nga igafu onu itulu-tuloy i pakiyuvovug. Gafu tatun, ari tu makasta i resulta na ministeriò anna ari ngà magayayya. Mas lallagu nga manaki ku i mamministerio. Kukku ta baggì, ‘Sinni gapa i makeyattam taw nga trabahu kada ligguan anna kada vulan?’

Kustu 17 anios ngà ngana, kayà ku ngana i mesina. Yayya nga nagempake ngà, nanaw ngà ta balemi, tapus nagali ngà ta Australia. Maraddam i magana ku kustu nanaw ngà. Mavurung ira ngem abboda nga ituloy ku lapa i masserbi kani Jehova.

 Ta keggà ta Australia, mas nakkafi i espiritualidad ku. Sinaggi-mittan ngà ngana laman nga makistudy. Nakikkofun ngà ta kabataan ira nga kagittà gapa nga umu-umay ta study ngem minung mabba anna maddisco. Nu manono ku yatun nga tiempo, gittana egga ngà ta kinakurug tapus egga ngà gapa ta mundo. Ngem kakku ammu nu sitaw ngà talaga.

Maggi dua ragun i nappasa, nakilalà i tadday nga sister. Arianna ammu nga pinannononà nu sitaw ngana i paffuntan na pattolè. Maddian ngà bi ta tadday nga balay kavulu i lima paga nga single nga sister tapus inimbita mi i manangngal ta sirkito anna i atawana nga si Tamara nga makipaddian nikami tu tanga-ligguan. Nu busy i atawana ta trabahu ira ta kongregasion, makistoria nikami si Tamara anna maggaralo kami. Kakayà ku yatun. Kuruga minappakalinno yayya anna maba-mabi nga arannian. Anni mabba kastana ta egga siko i tolay nga makasta i espiritualidadna tapus enjoy nga kavulu.

Kanayun nga magayayya si Tamara. Dakal i influwensia nio na pangayana ta kinakurug anna ta ministerio. Magayayya yayya megafu ta iyayawana i kapiananna kani Jehova. Ngem sakan gapa, ari ngà magayayya megafu ta ariakku niyawa i kapianakku. Dakal i efekto niakan na kinapositibona anna na kurug nga pagayayyana. Megafu ta ehemplona, pinannonopakku yaw nga kinakurug: Karagatan ni Jehova nga masserbi ittam ngamin nisa nga “sigga-pagayaya” anna ‘makkansion ittam ta arubanna tu makapagayayya nga kansion.’—Sal. 100:2.

Kayà ku gapa i mabbalin tu magayayya gitta ni Tamara, ngem egga ira i mawag nga uliakku. Tallu ragun labbi i nappasa ngem sisinu nga nakuà danatun nga panguli. Ollu na bi, napprepara ngà para ta ministerio tapus egga ira i tiempo nga na-auxiliary payunir ngà. Gafu tatun, ari ngà ngana kuruga maggudu-gudu. Kada mas usakku i Biblia nga mallayyagayya, mas ma-enjoy ku ngana yatun adde ta kada vulan ngà ngana nga ma-auxiliary payunir.

 Nakikkofun ngà ta madduruma i edadna. Iyayawada kani Jehova i kapianadda anna enjoyda i passerbi nisa. Megafu ta makasta nga ehemploda, ninono ku uli nu anni kari talaga i importante nio. Kadaggaw nga binibbig ku i Biblia. Mas lallagu nga na-enjoy ku i ministerio tapus narregular payunir ngà ngana gapa. Aru nga dagun i nappasa ngem tatukku laman uli natageno nga memammo anna magayayya ngà tapus komfortable ngà ta kongregasion.

Nappasa i tanga-ragun, nakilalà si Alex. Masippo yayya anna talaga ayatanna si Jehova anna i ministerio. Ministerial nga aripan yayya tatun nga tiempo anna annam nga ragun ngana gapa yayya nga payunir. Maggi walu vulan gapa yayya nga nasserbi ta Malawi nu sitaw mas dakal i pakawagan. Egga ira i nakavuluna tari nga makasta i ehemploda nisa. Pinagaramda gapa yayya nga itulu-tuloyna nga pagolluan i passerbi kani Jehova ta pattolena.

Ta 2003, nakkasal kami ni Alex tapus nitulu-tuloy mi i masserbi ta ngamin-tiempo. Napakaru i makakkasta nga nagigiammu mi anna kakkaru gapa i bendision ni Jehova nikami.

Ta 2009, nembitakkami nga masserbi bilang misionero ta Timor-Leste. Baddi nga nasion yatun ta Indonesian archipelago. Makkirivu i matageno mi. Nakaddagakkami, excited, anna maganassikkami gapa. Nappasa i lima vulan, zimittal kami ta Dili, i kabisera na nasion.

Dakal i nangulian na pattolemi. Makibagay kami ta bagu nga kultura, lengguahe, maka-makan, anna pallevu. Ta ministerio, kanayukkami nga makasingan tu totolay nga kitappobre, alinno i ginigiammuda onu ari vuluvuga naggigiammu, anna natazza-tazzian. Aru gapa i masingi-singammi nga egga i problemada ta pisikal anna emosional megafu ta gerra anna kinavayolente. *

 Kappagayayya i ministerio mi! Mittan, nasimmuakku i 13-anios nga si Maria. * Maraddam yayya megafu ta natay i yenana piga ragun ngana i nappasa tapus arianna kuruga masingi-singan i yamana. Ari nga ammu ni Maria nu anni i kuanna ta pattolena kagitta na aru nga kasiddagunanna. Manono ku nga mittan, siminatangi yayya tagga ta niyistoriana nio i mataga-tagenona. Ngem ariakku matindian i kakkagianna ta ari ngà paga kuruga malalaki ta lengguaheda. Nakimallo ngà kani Jehova anna nikiddò nga uffunannà nga pasikannan si Maria. Tapus nangibibbig ngà nisa tu makapabannay ira nga teksto. Ta tumunug ira nga dagun, nasingakku nu kunnasi nga inuli na kinakurug i ugu-ugali, itchura, anna i interu nga pattolay ni Maria. Nappabawtiso yayya anna egga ngana gapa i sarilina ira nga Bible study. Daka-dakal ngana sangawe i espiritual nga familia ni Maria anna matagenona ngana nga meddeddu yayya.

Bebbendisionan ni Jehova i pallayyagayya ta Timor-Leste. Maski nu magaru ta publisher ira i nabawtisowan laman ta nappasa nga mafulu ragun, aru ngana nira i nabbalin tu payunir, ministerial nga aripan, onu elder. Mattrabahu gapa i karuan ta remote translation office anna manguffun ira ta pangitransleyt tu publikasion ira meyannung ta Biblia ta lokal ira nga lengguahe. Talaga magaya-ayayya ngà nga makasingan nira nga makkaransion ta study, maggaralo, anna mapprogreso ta espiritual.

Dakal i nadduman na pattolemi ta Timor-Leste kumpara ta Australia ngem talaga magayayya kami taw. Nu mittan, mattakay kami ta tadday nga baddi nga bus nga napappannu tu totolay tapus netakay gapa tatun i manango ira nga nepabilag anna i gugulay maggafu ta palengke. Egga gapa ira i aggaw nga mab-Bible study kami ta tadday nga baddi nga balay nga mapapatu tapus maritta i datagna anna makalelevu i manu ira ta biko mi. Ngem maski nu anni i zigana, kukku lapa, ‘Anni ‘na kastana yaw!’

Nu nonopakku i nappasa, mappabalo ngà ta kingngua na magana ku i adde na mawayyada tapenu ituddu nio i dorob ni Jehova anna sinuportaddà maski tagga ta tinedyer ngà anna ari ngà kuruga aktibo ta espiritual. Napakurug ku nga fustu i Proverbio 22:6. Proud si Mama anna si Papa kani Alex anna nio. Magayayya ira nga makasingan nikami nga massesserbi kani Jehova. Namegafu ta 2016, massesserbi kami ngana ta sirkito ta Australasia branch territory.

Ariakku makapangurug nga egga i tiempo tagga nga ari ku enjoy i pallayyagayya. Kakayà ku ngana sangawe i ministerio! Nalippawa ku gapa nga maski nu anni i mesimmu ta pattoletam, mabbalin ittam laman tu kurug nga magayayya nu napafutuan i passerbi tam ta Dios. Talaga i nappasa nga 18 nga dagun nga passerbì kani Jehova kavulu si Alex i pinakakappagayayya nga tiempo ta pattolè. Mangurug ngà ngana gapa sangawe taw ta kinagi na salmista nga si David kani Jehova: “Ngamin i makiyegu nikaw ay magayaya, anna kanayun nga makkansion ta pappalupagia. Danuri i mangaya nikaw ay . . . napakurug i pagayaya da.”​—Sal. 5:11.